ਅਮਰੀਕਾ 'ਚ ਚੀਨ ਦੇ 'ਸਾਈਲੈਂਟ ਕਿਲਰ' ਦੀ ਐਂਟਰੀ, 'ਏਸ਼ੀਅਨ ਨੀਡਲ ਐਂਟ' ਨੇ ਮਚਾਈ ਦਹਿਸ਼ਤ; 20 ਸੂਬਿਆਂ 'ਚ ਅਲਰਟ ਜਾਰੀ

ਡਿਜੀਟਲ ਡੈਸਕ, ਨਵੀਂ ਦਿੱਲੀ : ਅਮਰੀਕਾ ਵਿੱਚ ਚੀਨ ਤੋਂ ਆਈ ਇੱਕ ਖ਼ਤਰਨਾਕ ਕੀੜੀ ਤੇਜ਼ੀ ਨਾਲ ਫੈਲ ਰਹੀ ਹੈ, ਜਿਸ ਕਾਰਨ ਸਿਹਤ ਅਧਿਕਾਰੀਆਂ ਨੇ ਲੋਕਾਂ ਨੂੰ ਸਤਰਕ ਰਹਿਣ ਦੀ ਸਲਾਹ ਦਿੱਤੀ ਹੈ। 'ਏਸ਼ੀਅਨ ਨੀਡਲ ਐਂਟ' ਨਾਮ ਦੀ ਇਹ ਛੋਟੀ, ਗੂੜ੍ਹੇ ਭੂਰੇ ਤੋਂ ਕਾਲੇ ਰੰਗ ਦੀ ਕੀੜੀ ਹੁਣ ਅਮਰੀਕਾ ਦੇ ਘੱਟੋ-ਘੱਟ 20 ਰਾਜਾਂ ਵਿੱਚ ਪਾਈ ਜਾ ਚੁੱਕੀ ਹੈ।

ਇਨ੍ਹਾਂ ਸੂਬਿਆਂ 'ਚ ਫਲੋਰੀਡਾ, ਜਾਰਜੀਆ, ਟੈਕਸਾਸ, ਨਿਊਯਾਰਕ, ਪੈਨਸਿਲਵੇਨੀਆ ਤੋਂ ਇਲਾਵਾ ਮੈਸਾਚੂਸਟਸ ਅਤੇ ਵਿਸਕਾਨਸਿਨ ਵਰਗੇ ਉੱਤਰੀ ਇਲਾਕੇ ਵੀ ਸ਼ਾਮਲ ਹਨ। ਹਾਲਾਂਕਿ ਇਹ ਕੀੜੀ ਅਮਰੀਕਾ ਵਿੱਚ 90 ਸਾਲ ਪਹਿਲਾਂ ਵੀ ਪਾਈ ਗਈ ਸੀ, ਪਰ ਹਾਲ ਹੀ ਦੇ ਸਾਲਾਂ ਵਿੱਚ ਇਸ ਦੀ ਗਿਣਤੀ ਤੇਜ਼ੀ ਨਾਲ ਵਧੀ ਹੈ।

ਇਹ ਕੀੜੀ ਆਮ ਕੀੜੀਆਂ ਵਾਂਗ ਦਿਖਾਈ ਦੇਣ ਵਾਲੇ ਟਿੱਲੇ (ਐਂਥਿਲ) ਨਹੀਂ ਬਣਾਉਂਦੀ, ਸਗੋਂ ਪੱਤਿਆਂ ਦੇ ਢੇਰ, ਸੜੀ ਹੋਈ ਲੱਕੜ ਦੇ ਟੁਕੜਿਆਂ ਅਤੇ ਜੰਗਲਾਂ ਵਿੱਚ ਛੁਪ ਕੇ ਰਹਿੰਦੀ ਹੈ, ਜਿਸ ਨਾਲ ਲੋਕਾਂ ਦਾ ਇਸ ਦੇ ਸੰਪਰਕ ਵਿੱਚ ਆਉਣਾ ਆਸਾਨ ਹੋ ਜਾਂਦਾ ਹੈ।

ਡੰਗ ਨਾਲ ਤੇਜ਼ ਦਰਦ, ਐਲਰਜੀ ਵਾਲਿਆਂ ਲਈ ਖ਼ਤਰਨਾਕ

ਇਸ ਕੀੜੀ ਦਾ ਡੰਗ ਕਾਫ਼ੀ ਦਰਦਨਾਕ ਹੁੰਦਾ ਹੈ, ਜੋ ਕਈ ਘੰਟਿਆਂ ਤੱਕ ਆਉਂਦਾ-ਜਾਂਦਾ ਰਹਿ ਸਕਦਾ ਹੈ। ਕੁਝ ਮਾਮਲਿਆਂ ਵਿੱਚ ਦਰਦ ਡੰਗ ਵਾਲੀ ਥਾਂ ਤੋਂ ਅੱਗੇ ਵੀ ਫੈਲ ਜਾਂਦਾ ਹੈ। ਮਾਹਿਰਾਂ ਅਨੁਸਾਰ, ਜਿਨ੍ਹਾਂ ਲੋਕਾਂ ਨੂੰ ਐਲਰਜੀ ਹੁੰਦੀ ਹੈ, ਉਨ੍ਹਾਂ ਵਿੱਚ ਇਸ ਦਾ ਡੰਗ 'ਐਨਾਫਿਲੇਕਸਿਸ' ਵਰਗੀ ਗੰਭੀਰ ਅਤੇ ਜਾਨਲੇਵਾ ਪ੍ਰਤੀਕਿਰਿਆ ਵੀ ਪੈਦਾ ਕਰ ਸਕਦਾ ਹੈ।

ਇਸ ਦਾ ਸੂਈ ਵਰਗਾ ਡੰਗ ਕੱਪੜਿਆਂ ਨੂੰ ਵੀ ਵਿੰਨ੍ਹ ਸਕਦਾ ਹੈ। ਹਾਂਗਕਾਂਗ ਯੂਨੀਵਰਸਿਟੀ ਦੇ ਕੀਟ ਵਿਗਿਆਨੀ ਬੇਨੋਇਟ ਗੁਏਨਾਰਡ ਨੇ ਕਿਹਾ ਕਿ ਇਸ ਦਾ ਡੰਗ ਅਜਿਹਾ ਮਹਿਸੂਸ ਹੁੰਦਾ ਹੈ ਜਿਵੇਂ ਕਿਸੇ ਨੇ ਸਿੱਧਾ ਸਰੀਰ 'ਚ ਸੂਈ ਚੁਭੋ ਦਿੱਤੀ ਹੋਵੇ।

ਹਮਲਾਵਰ ਨਹੀਂ, ਫਿਰ ਵੀ ਸਾਵਧਾਨੀ ਜ਼ਰੂਰੀ

ਮਾਹਿਰਾਂ ਦਾ ਕਹਿਣਾ ਹੈ ਕਿ ਇਹ ਕੀੜੀ ਸੁਭਾਅ ਪੱਖੋਂ ਹਮਲਾਵਰ ਨਹੀਂ ਹੁੰਦੀ ਅਤੇ ਉਦੋਂ ਹੀ ਕੱਟਦੀ ਹੈ ਜਦੋਂ ਉਸ ਨੂੰ ਖ਼ਤਰਾ ਮਹਿਸੂਸ ਹੁੰਦਾ ਹੈ। ਇਹ 'ਫਾਇਰ ਐਂਟਸ' ਵਾਂਗ ਵੱਡੇ ਪੱਧਰ 'ਤੇ ਖ਼ਤਰਾ ਨਹੀਂ ਹੈ, ਪਰ ਫਿਰ ਵੀ ਸਾਵਧਾਨੀ ਜ਼ਰੂਰੀ ਹੈ।

ਅਮਰੀਕੀ ਖੇਤੀਬਾੜੀ ਵਿਭਾਗ ਨੇ ਸਲਾਹ ਦਿੱਤੀ ਹੈ ਕਿ ਬਾਹਰ ਕੰਮ ਕਰਨ ਵਾਲੇ ਲੋਕ ਦਸਤਾਨੇ ਪਹਿਨਣ ਅਤੇ ਜੇਕਰ ਅਜਿਹੀ ਕੀੜੀ ਦਿਖਾਈ ਦੇਵੇ ਤਾਂ ਸਾਵਧਾਨੀ ਨਾਲ ਦੂਰੀ ਬਣਾ ਕੇ ਰੱਖਣ। ਵਿਭਾਗ ਦਾ ਕਹਿਣਾ ਹੈ ਕਿ ਹੋਰ ਵਿਦੇਸ਼ੀ ਪ੍ਰਜਾਤੀਆਂ ਵਾਂਗ ਇਹ ਕੀੜੀ ਹੁਣ ਅਮਰੀਕਾ ਵਿੱਚ ਸਥਾਈ ਤੌਰ 'ਤੇ ਵੱਸ ਚੁੱਕੀ ਹੈ।