ਅਧਿਕਾਰੀ ਨਾਲ ਝਗੜੇ ਤੋਂ ਇਲਾਹਾਬਾਦ ਹਾਈ ਕੋਰਟ ਤੱਕ: 25 ਸਾਲ ਸਾਧੂ ਦਾ ਜੀਵਨ ਬਸਰ ਕਰਨ ਵਾਲੇ ਗਿਰਵਰਦਾਸ ਮੁੜ CRPF 'ਚ ਤੈਨਾਤ

ਹਰਿਓਮ ਗੌੜ, ਨਈ ਦੁਨੀਆ, ਮੁਰੈਨਾ: ਅਧਿਕਾਰੀ ਨਾਲ ਝਗੜੇ ਕਾਰਨ ਨੌਕਰੀ ਤੋਂ ਬਰਖ਼ਾਸਤ ਹੋਣ ਤੋਂ ਬਾਅਦ 25 ਸਾਲ ਤੱਕ ਸੰਤ ਬਣ ਕੇ ਰਹੇ ਮੁਰੈਨਾ ਦੇ 50 ਸਾਲਾ ਗਿਰਵਰਦਾਸ ਹੁਣ ਫਿਰ ਸੀਆਰਪੀਐੱਫ ਦੀ ਵਰਦੀ ਵਿਚ ਵਾਪਸ ਆ ਗਏ ਹਨ। 26 ਸਾਲ ਬਾਅਦ ਇਲਾਹਾਬਾਦ ਹਾਈ ਕੋਰਟ ਵਿਚ ਕੇਸ ਜਿੱਤਣ ਤੋਂ ਬਾਅਦ ਉਨ੍ਹਾਂ ਨੂੰ ਛੱਤੀਸਗੜ੍ਹ ਦੇ ਬੀਜਾਪੁਰ ਵਿਚ ਨਿਯੁਕਤੀ ਮਿਲੀ ਹੈ। ਸੰਘਰਸ਼, ਆਸਥਾ ਅਤੇ ਹੱਕ ਦੀ ਇਸ ਲੜਾਈ ਵਿਚ ਅਖੀਰਕਾਰ ਉਨ੍ਹਾਂ ਨੇ ਜਿੱਤ ਹਾਸਲ ਕੀਤੀ ਹੈ।

ਮੱਧ ਪ੍ਰਦੇਸ਼ ਦੇ ਮੁਰੈਨਾ ਦੇ ਛਿਛਾਵਲੀ ਪਿੰਡ ਦੇ ਨਿਵਾਸੀ ਗਿਰਵਰ ਸਿੰਘ ਤੋਮਰ ਸਾਲ 1991 ਵਿਚ ਸੀਆਰਪੀਐੱਫ ਵਿਚ ਹਵਲਦਾਰ ਅਹੁਦੇ ’ਤੇ ਚੁਣੇ ਗਏ ਸਨ। 1999 ਵਿਚ ਇਕ ਸੀਨੀਅਰ ਅਧਿਕਾਰੀ ਨਾਲ ਵਿਵਾਦ ਹੋ ਗਿਆ। ਪਹਿਲਾਂ ਉਨ੍ਹਾਂ ਨੂੰ ਮੁਅੱਤਲ ਕੀਤਾ ਗਿਆ, ਫਿਰ 21 ਅਕਤੂਬਰ 1999 ਨੂੰ ਵਿਭਾਗੀ ਜਾਂਚ ਤੋਂ ਬਾਅਦ ਬਰਖਾਸਤ ਕਰ ਦਿੱਤਾ ਗਿਆ। ਪਰਿਵਾਰ ਦੇ ਅਨੁਸਾਰ, ਚਾਰ-ਪੰਜ ਸਾਲ ਬਾਅਦ ਉਨ੍ਹਾਂ ਨੇ ਬਰਹਦਵਾਰੀ ਮੰਦਰ ਅਤੇ ਫਿਰ ਮੁਰੈਨਾ ਦੇ ਗੁਫਾ ਮੰਦਰ ਵਿਚ ਸੰਤ ਬਣ ਕੇ ਪੂਜਾ-ਪਾਠ ਕਰਨਾ ਸ਼ੁਰੂ ਕੀਤਾ। ਮੁੱਖ ਪੁਜਾਰੀ ਨੇ ਉਨ੍ਹਾਂ ਨੂੰ ਗਿਰਵਰਦਾਸ ਮਹਾਰਾਜ ਦਾ ਨਾਮ ਦਿੱਤਾ।

ਕੋਰਟ ਦੇ ਹੁਕਮ ਤੋਂ ਬਾਅਦ ਜੁਆਇਨਿੰਗ

ਉਨ੍ਹਾਂ ਦੇ ਪੁੱਤਰ ਅਭਿਸ਼ੇਕ ਅਨੁਸਾਰ, ਬਰਖਾਸਤੀ ਖ਼ਿਲਾਫ਼ ਗਿਰਵਰਦਾਸ ਨੇ 1999 ਵਿਚ ਇਲਾਹਾਬਾਦ ਹਾਈ ਕੋਰਟ ਵਿਚ ਕੇਸ ਕੀਤਾ। 2007 ਵਿਚ ਕੋਰਟ ਨੇ ਉਨ੍ਹਾਂ ਦੇ ਹੱਕ ਵਿਚ ਫੈਸਲਾ ਸੁਣਾਇਆ, ਪਰ ਸੀਆਰਪੀਐੱਫ ਨੇ ਇਸ ’ਤੇ ਸਟੇਅ ਲੈ ਲਿਆ। ਉਨ੍ਹਾਂ ਨੇ ਹਾਈ ਕੋਰਟ ਦੀ ਡਬਲ ਬੈਂਚ ਵਿਚ ਅਪੀਲ ਕੀਤੀ, ਜਿੱਥੇ ਕੋਰਟ ਨੇ 28 ਅਗਸਤ 2025 ਨੂੰ ਸੀਆਰਪੀਐੱਫ ਨੂੰ ਤਿੰਨ ਮਹੀਨਿਆਂ ਵਿਚ ਜੁਆਇਨਿੰਗ ਦਾ ਹੁਕਮ ਦਿੱਤਾ। ਹਾਲ ਹੀ ਵਿਚ 26 ਅਗਸਤ ਨੂੰ ਸੀਆਰਪੀਐੱਫ ਨੇ ਉਨ੍ਹਾਂ ਨੂੰ ਬੀਜਾਪੁਰ ਵਿਚ ਪੋਸਟਿੰਗ ਦਿੱਤੀ ਹੈ।