‘ਤਮਾਮ ਚੁਣੌਤੀਆਂ ਦੇ ਬਾਵਜੂਦ ਅੱਗੇ ਵਧਦਾ ਰਿਹਾ ਸੰਘ...’, RSS ਦੇ ਵਿਜਯਾਦਸ਼ਮੀ ਸਮਾਗਮ 'ਚ ਬੋਲੇ ਦੈਨਿਕ ਜਾਗਰਣ ਦੇ ਮੁੱਖ ਸੰਪਾਦਕ ਸੰਜੇ ਗੁਪਤਾ

ਡਿਜੀਟਲ ਡੈਸਕ, ਨਾਗਪੁਰ। RSS ਦੇ ਵਿਜਯਾਦਸ਼ਮੀ ਸਮਾਗਮ ਵਿੱਚ ਦੈਨਿਕ ਜਾਗਰਣ ਦੇ ਮੁੱਖ ਸੰਪਾਦਕ ਸੰਜੇ ਗੁਪਤਾ ਮੁੱਖ ਮਹਿਮਾਨ ਵਜੋਂ ਸ਼ਾਮਲ ਹੋਏ। ਇਸ ਦੌਰਾਨ ਉਨ੍ਹਾਂ ਨੇ ਪ੍ਰੋਗਰਾਮ ਨੂੰ ਸੰਬੋਧਨ ਕੀਤਾ। ਸੰਜੇ ਗੁਪਤਾ ਨੇ ਸਾਰਿਆਂ ਨੂੰ ਵਿਜਯਾਦਸ਼ਮੀ ਅਤੇ ਰਾਸ਼ਟਰੀ ਸਵੈਮਸੇਵਕ ਸੰਘ ਦੇ ਸਥਾਪਨਾ ਦਿਵਸ ਦੀਆਂ ਵਧਾਈਆਂ ਦਿੱਤੀਆਂ।

‘ਹਿੰਦੂ ਸਮਾਜ ਦੀ ਏਕਤਾ ਤੇ ਦੇਸ਼ ਦੀ ਆਜ਼ਾਦੀ ਸੰਘ ਦਾ ਉਦੇਸ਼’

ਦੈਨਿਕ ਜਾਗਰਣ ਦੇ ਮੁੱਖ ਸੰਪਾਦਕ ਸੰਜੇ ਗੁਪਤਾ ਨੇ ਸਮਾਗਮ ਨੂੰ ਸੰਬੋਧਨ ਕਰਦਿਆਂ ਕਿਹਾ, “101 ਸਾਲ ਪਹਿਲਾਂ ਜਦੋਂ ਸੰਘ ਦੀ ਸਥਾਪਨਾ ਹੋਈ ਸੀ, ਉਦੋਂ ਭਾਰਤ ਆਜ਼ਾਦ ਨਹੀਂ ਸੀ ਅਤੇ ਉਸ ਸਮੇਂ ਦੀਆਂ ਸਮਾਜਿਕ ਸਥਿਤੀਆਂ ਵੀ ਬਹੁਤ ਵੱਖਰੀਆਂ ਸਨ। ਇਸ ਲਈ ਸੰਘ ਦੀ ਸਥਾਪਨਾ ਦੀ ਮੂਲ ਧਾਰਨਾ ਅਤੇ ਉਦੇਸ਼ ਜਿੱਥੇ ਹਿੰਦੂ ਸਮਾਜ ਵਿੱਚ ਏਕਤਾ ਕਾਇਮ ਕਰਨਾ ਅਤੇ ਉਸ ਨੂੰ ਸਮਰੱਥ ਬਣਾਉਣਾ ਸੀ, ਉੱਥੇ ਹੀ ਦੇਸ਼ ਨੂੰ ਆਜ਼ਾਦ ਕਰਵਾਉਣਾ ਵੀ ਇਸ ਦਾ ਪ੍ਰਮੁੱਖ ਉਦੇਸ਼ ਸੀ।”

ਉਨ੍ਹਾਂ ਕਿਹਾ ਕਿ ਉਸ ਸਮੇਂ ਸੰਘ ਦੀ ਧਾਰਨਾ ਸੀ ਕਿ ਸਮਾਜ ਨੂੰ ਗੁਲਾਮੀ ਦੀ ਮਾਨਸਿਕਤਾ ਤੋਂ ਬਾਹਰ ਕੱਢੇ ਬਿਨਾਂ ਅਤੇ ਆਪਣੇ ਮੂਲ ਸਰੂਪ ਦੀ ਪਛਾਣ ਕੀਤੇ ਬਿਨਾਂ ਅਸਲ ਆਜ਼ਾਦੀ ਦੀ ਕਲਪਨਾ ਨਹੀਂ ਕੀਤੀ ਜਾ ਸਕਦੀ। ਭਾਰਤ ਆਜ਼ਾਦ ਹੋਇਆ ਅਤੇ ਆਜ਼ਾਦੀ ਤੋਂ ਬਾਅਦ ਸੰਘ ਨੇ ਵਿਅਕਤੀ ਨਿਰਮਾਣ ਦੇ ਨਾਲ-ਨਾਲ ਭਾਰਤੀਅਤਾ ਅਤੇ ਰਾਸ਼ਟਰੀ ਨਿਸ਼ਠਾ ਨੂੰ ਆਪਣਾ ਪ੍ਰਮੁੱਖ ਟੀਚਾ ਬਣਾਇਆ।

ਉਨ੍ਹਾਂ ਅੱਗੇ ਕਿਹਾ, “ਸੰਘ ਦੀ ਇਸ ਪਵਿੱਤਰ ਵਿਚਾਰਧਾਰਾ ਨੂੰ ਆਜ਼ਾਦੀ ਤੋਂ ਬਾਅਦ ਸੱਤਾ ਵਿੱਚ ਬੈਠੇ ਸਿਆਸਤਦਾਨਾਂ ਅਤੇ ਰਾਜਨੀਤੀ ਦੇ ਇੱਕ ਵਰਗ ਨੇ ਸਵੀਕਾਰ ਨਹੀਂ ਕੀਤਾ, ਕਿਉਂਕਿ ਸੰਘ ਦੀ ਵਿਚਾਰਧਾਰਾ ਉਨ੍ਹਾਂ ਦੇ ਤੁਸ਼ਟੀਕਰਨ ਦੇ ਏਜੰਡੇ ਨਾਲ ਮੇਲ ਨਹੀਂ ਖਾਂਦੀ ਸੀ। ਇਸ ਦੇ ਬਾਵਜੂਦ ਤਮਾਮ ਚੁਣੌਤੀਆਂ ਦਾ ਸਾਹਮਣਾ ਕਰਦਿਆਂ ਸੰਘ ਆਪਣੇ ਰਾਹ ’ਤੇ ਲਗਾਤਾਰ ਅੱਗੇ ਵਧਦਾ ਰਿਹਾ।”

ਦੈਨਿਕ ਜਾਗਰਣ ਦੇ ਮੁੱਖ ਸੰਪਾਦਕ ਸੰਜੇ ਗੁਪਤਾ ਨੇ ਕਿਹਾ, “ਭਾਰਤ ਦੇ ਗਣਤੰਤਰ ਬਣਨ ਤੋਂ ਬਾਅਦ ਸੰਘ ਦੇ ਵਿਚਾਰਾਂ ਤੋਂ ਪ੍ਰੇਰਿਤ ਹੋ ਕੇ ਸ਼ੁੱਧ ਭਾਰਤੀਅਤਾ ਵਿੱਚ ਵਿਸ਼ਵਾਸ ਰੱਖਣ ਵਾਲੇ ਕਈ ਸਿਆਸਤਦਾਨਾਂ ਨੇ ਆਪਣੇ ਵਿਚਾਰਾਂ ਵਿੱਚ ਬਦਲਾਅ ਕੀਤਾ ਅਤੇ ਕੁਝ ਰਾਸ਼ਟਰ ਨਿਸ਼ਠ ਵਿਚਾਰਾਂ ਵਾਲੇ ਲੋਕਾਂ ਨਾਲ ਮਿਲ ਕੇ ਜਨਸੰਘ ਦੀ ਸਥਾਪਨਾ ਕੀਤੀ। ਬਾਅਦ ਵਿੱਚ ਇਹੀ ਜਨਸੰਘ ਭਾਰਤੀ ਜਨਤਾ ਪਾਰਟੀ (BJP) ਦੇ ਰੂਪ ਵਿੱਚ ਅੱਜ ਦੁਨੀਆ ਦੀ ਸਭ ਤੋਂ ਵੱਡੀ ਸਿਆਸੀ ਪਾਰਟੀ ਬਣ ਗਈ ਹੈ।”

‘ਸੰਘ ਨਾ ਹੁੰਦਾ ਤਾਂ ਹਿੰਦੂ ਸੰਸਕਾਰ ਲੁਪਤ ਹੋ ਜਾਂਦੇ’

ਦੈਨਿਕ ਜਾਗਰਣ ਦੇ ਮੁੱਖ ਸੰਪਾਦਕ ਸੰਜੇ ਗੁਪਤਾ ਨੇ ਸਮਾਗਮ ਵਿੱਚ ਅੱਗੇ ਕਿਹਾ, “ਅੱਜ BJP ਦੇ ਸਿਖਰਲੇ ਆਗੂਆਂ ਸਮੇਤ ਕਈ ਹੋਰ ਨੇਤਾਵਾਂ ਅੰਦਰ ਭਾਰਤੀਅਤਾ, ਰਾਸ਼ਟਰੀਅਤਾ ਅਤੇ ਭਾਰਤੀ ਸੰਸਕਾਰਾਂ ਦੀ ਜੋ ਸਮਝ ਹੈ, ਉਹ ਉਨ੍ਹਾਂ ਨੂੰ ਰਾਸ਼ਟਰੀ ਸਵੈਮਸੇਵਕ ਸੰਘ ਤੋਂ ਹੀ ਮਿਲੀ ਹੈ। ਇਸ ਲਈ ਇਹ ਮੰਨਣ ਵਿੱਚ ਕੋਈ ਝਿਜਕ ਨਹੀਂ ਹੋਣੀ ਚਾਹੀਦੀ ਕਿ ਇਸ ਪਾਰਟੀ ਦੀ ਸਫਲਤਾ ਪਿੱਛੇ ਸੰਘ ਦੀ ਦ੍ਰਿੜ੍ਹ ਵਿਚਾਰਧਾਰਾ ਅਤੇ ਉਸ ਦੀ ਸੰਗਠਨਾਤਮਕ ਤਾਕਤ ਹੈ।”

ਉਨ੍ਹਾਂ ਅੱਗੇ ਕਿਹਾ, “ਸੰਘ ਦੇ ਨਾਲ-ਨਾਲ ਉਸ ਦੇ ਸਹਿਯੋਗੀ ਅਤੇ ਵਿਚਾਰਾਂ ਤੋਂ ਪ੍ਰੇਰਿਤ ਸੰਗਠਨਾਂ, ਜਿਨ੍ਹਾਂ ਵਿੱਚ ਭਾਰਤੀ ਜਨਤਾ ਪਾਰਟੀ ਵੀ ਸ਼ਾਮਲ ਹੈ, ’ਤੇ ਲਗਾਤਾਰ ਦੋਸ਼ ਲੱਗਦੇ ਹਨ ਕਿ ਉਹ ਹਿੰਦੂ ਕੱਟੜਵਾਦ ਨੂੰ ਉਤਸ਼ਾਹਿਤ ਕਰਦੇ ਹਨ। ਪਰ ਅੱਜ ਜੇਕਰ ਸੰਘ ਨਾ ਹੁੰਦਾ ਤਾਂ ਹਿੰਦੂ ਸੰਸਕਾਰ ਅਤੇ ਹਿੰਦੂ ਜੀਵਨ-ਪੱਧਤੀ ਪਤਾ ਨਹੀਂ ਕਦੋਂ ਦੇ ਲੁਪਤ ਹੋ ਚੁੱਕੇ ਹੁੰਦੇ। ਪਹਿਲਾਂ ਮੁਗਲਾਂ ਅਤੇ ਫਿਰ ਅੰਗਰੇਜ਼ਾਂ ਦੇ ਸ਼ਾਸਨ ਹੇਠ ਲਗਭਗ 600 ਸਾਲ ਦੀ ਗੁਲਾਮੀ ਤੋਂ ਬਾਅਦ ਜੇਕਰ ਅੱਜ ਦੁਨੀਆ ਵਿੱਚ ਭਾਰਤੀਅਤਾ ਅਤੇ ਹਿੰਦੂਤਵ ਦੀ ਆਪਣੀ ਪਛਾਣ ਅਤੇ ਪ੍ਰਭਾਵ ਹੈ, ਤਾਂ ਇਸ ਦਾ ਸਿਹਰਾ ਮੁੱਖ ਤੌਰ ’ਤੇ ਸੰਘ ਨੂੰ ਦਿੱਤਾ ਜਾਣਾ ਚਾਹੀਦਾ ਹੈ।”

‘ਸੰਘ ਤੇ ਜਾਗਰਣ ਦੀ ਵਿਚਾਰਧਾਰਾ ਰਾਸ਼ਟਰ ਪ੍ਰਤੀ ਨਿਸ਼ਠਾ ਤੇ ਸਮਰਪਣ ਦੇ ਮਾਮਲੇ 'ਚ ਇੱਕੋ ਜਿਹੀ ਹੈ’

ਦੈਨਿਕ ਜਾਗਰਣ ਦੇ ਮੁੱਖ ਸੰਪਾਦਕ ਸੰਜੇ ਗੁਪਤਾ ਨੇ ਅਖ਼ਬਾਰ ਦੀ ਸੰਪਾਦਕੀ ਨੀਤੀ ਦਾ ਜ਼ਿਕਰ ਕਰਦਿਆਂ ਕਿਹਾ, “ਦੈਨਿਕ ਜਾਗਰਣ ਅਖ਼ਬਾਰ ਦੀ ਸੰਪਾਦਕੀ ਨੀਤੀ ਵੀ ਇਸੇ ਵਿਚਾਰ ’ਤੇ ਆਧਾਰਿਤ ਹੈ। ਸਾਡੇ ਅਖ਼ਬਾਰ ਦੀ ਨੀਤੀ ਕਹਿੰਦੀ ਹੈ ਕਿ ਦੈਨਿਕ ਜਾਗਰਣ ਇੱਕ ਆਸਥਾਵਾਨ, ਰਾਸ਼ਟਰਭਗਤ ਅਤੇ ਸਨਾਤਨ ਭਾਰਤੀ ਕਦਰਾਂ-ਕੀਮਤਾਂ ਦਾ ਵਾਹਕ ਅਖ਼ਬਾਰ ਹੈ, ਜਿਸ ਦੇ ਸੰਸਕਾਰ ਸਨਾਤਨ ਭਾਰਤੀ ਹਨ।”

ਉਨ੍ਹਾਂ ਕਿਹਾ, “ਅਜਿਹਾ ਅਖ਼ਬਾਰ, ਜਿਸ ਦੀ ਪ੍ਰਕਿਰਤੀ ਅਤੇ ਕਾਰਜਸ਼ੈਲੀ ਵਿੱਚ ਪੂਰਨ ਆਸਥਾ ਹੈ ਅਤੇ ਜੋ ਸਕਾਰਾਤਮਕ ਸੋਚ ਦੇ ਨਾਲ ਸਮਰਸਤਾ ਤੇ ਸਦਭਾਵਨਾ ਵਾਲੇ ਵਿਹਾਰ ਨੂੰ ਅਪਣਾਉਂਦਾ ਹੈ, ਆਪਣੇ ਪਾਠਕਾਂ ਨੂੰ ਵੀ ਇਸ ਲਈ ਲਗਾਤਾਰ ਪ੍ਰੇਰਿਤ ਕਰਦਾ ਹੈ। ਇਸ ਦਾ ਟੀਚਾ ਦੇਸ਼ਵਾਸੀਆਂ ਵਿੱਚ ਇਹ ਭਾਵਨਾ ਜਗਾਉਣਾ ਵੀ ਹੈ ਕਿ ਉਹ ਦੇਸ਼ ਲਈ ਕੀ ਕਰ ਸਕਦੇ ਹਨ ਅਤੇ ਦੇਸ਼ ਨੂੰ ਕੀ ਦੇ ਸਕਦੇ ਹਨ। ਦੇਖਿਆ ਜਾਵੇ ਤਾਂ ਸੰਘ ਅਤੇ ਜਾਗਰਣ ਦੀ ਵਿਚਾਰਧਾਰਾ ਭਾਰਤੀ ਸਨਾਤਨ ਸੰਸਕ੍ਰਿਤੀ ਅਤੇ ਰਾਸ਼ਟਰ ਪ੍ਰਤੀ ਨਿਸ਼ਠਾ ਤੇ ਸਮਰਪਣ ਦੇ ਮਾਮਲੇ ਵਿੱਚ ਇੱਕੋ ਜਿਹੀ ਹੈ।”

‘ਅਗਲੀ ਸਦੀ ਲਈ ਸੰਘ ਦਾ ਉਦੇਸ਼ ਦੇਸ਼ਵਾਸੀਆਂ 'ਚ ਚਰਿੱਤਰ ਨਿਰਮਾਣ’

ਦੈਨਿਕ ਜਾਗਰਣ ਦੇ ਮੁੱਖ ਸੰਪਾਦਕ ਸੰਜੇ ਗੁਪਤਾ ਨੇ ਕਿਹਾ, “ਪਿਛਲੀ ਸਦੀ ਵਿੱਚ ਜਿੱਥੇ ਸੰਘ ਦਾ ਧਿਆਨ ਤੁਸ਼ਟੀਕਰਨ ਕਾਰਨ ਹਿੰਦੂ ਸਮਾਜ ਸਾਹਮਣੇ ਪੈਦਾ ਹੋਈਆਂ ਕਈ ਚੁਣੌਤੀਆਂ ਨੂੰ ਦੂਰ ਕਰਨ ’ਤੇ ਸੀ, ਉੱਥੇ ਹੀ ਅਗਲੀ ਸਦੀ ਲਈ ਸੰਘ ਨੇ ਜੋ ਚੁਣੌਤੀਆਂ ਆਪਣੇ ਸਾਹਮਣੇ ਰੱਖੀਆਂ ਹਨ, ਉਨ੍ਹਾਂ ਵਿੱਚ ਦੇਸ਼ਵਾਸੀਆਂ ਦਾ ਚਰਿੱਤਰ ਨਿਰਮਾਣ ਸਭ ਤੋਂ ਅਹਿਮ ਹੈ। ਚੰਗੇ ਚਰਿੱਤਰ ਵਾਲਾ ਵਿਅਕਤੀ ਰਾਸ਼ਟਰ ਪ੍ਰਤੀ ਆਪਣੇ ਫ਼ਰਜ਼ਾਂ ਨੂੰ ਚੰਗੀ ਤਰ੍ਹਾਂ ਸਮਝਦਾ ਹੈ। ਰਾਸ਼ਟਰ ਪ੍ਰਤੀ ਨਿਸ਼ਠਾ ਅਤੇ ਫ਼ਰਜ਼ ਇੱਕ ਚਰਿੱਤਰਵਾਨ ਨਾਗਰਿਕ ਦੇ ਜ਼ਰੂਰੀ ਗੁਣ ਹਨ। ਅੱਜ ਜੇਕਰ ਭਾਰਤ ਨੂੰ ਆਪਣਾ ਸੁਨਹਿਰੀ ਦੌਰ ਮੁੜ ਹਾਸਲ ਕਰਨਾ ਹੈ, ਤਾਂ ਚਰਿੱਤਰ ਨਿਰਮਾਣ ਤੋਂ ਬਿਨਾਂ ਇਹ ਸੰਭਵ ਨਹੀਂ ਹੈ।”

ਦੈਨਿਕ ਜਾਗਰਣ ਦੇ ਮੁੱਖ ਸੰਪਾਦਕ ਸੰਜੇ ਗੁਪਤਾ ਨੇ ਸੰਘ ਦੀ ਲੀਡਰਸ਼ਿਪ ਦਾ ਧੰਨਵਾਦ ਕਰਦਿਆਂ ਕਿਹਾ, “ਬੇਇਨਸਾਫ਼ੀ ’ਤੇ ਇਨਸਾਫ਼ ਅਤੇ ਝੂਠ ’ਤੇ ਸੱਚ ਦੀ ਜਿੱਤ ਦੇ ਇਸ ਤਿਉਹਾਰ ’ਤੇ ਸੰਘ ਦੀ ਲੀਡਰਸ਼ਿਪ ਨੇ ਅੱਜ ਮੈਨੂੰ ਜੋ ਮੌਕਾ ਦਿੱਤਾ ਹੈ, ਉਸ ਲਈ ਅਸੀਂ ਇੱਕ ਵਾਰ ਫਿਰ ਧੰਨਵਾਦੀ ਹਾਂ। ਅਸੀਂ ਆਪਣੇ ਪੂਰੇ ਜਾਗਰਣ ਸਮੂਹ ਵੱਲੋਂ ਸਰਬਸ਼ਕਤੀਮਾਨ ਅੱਗੇ ਪ੍ਰਾਰਥਨਾ ਕਰਦੇ ਹਾਂ ਕਿ ਉਹ ਭਾਰਤ ਨੂੰ ਪਰਮ ਵੈਭਵ ਦੀ ਚੋਟੀ ’ਤੇ ਲਿਜਾਣ ਲਈ ਲਗਾਤਾਰ ਯਤਨਸ਼ੀਲ ਰਾਸ਼ਟਰੀ ਸਵੈਮਸੇਵਕ ਸੰਘ ਨੂੰ ਹੋਰ ਸਮਰੱਥ ਬਣਾਏ।”