VIDEO : ‘ਹਨੂਮਾਨ ਜੀ ਨੇ ਬਚਾਅ ਲਿਆ...’, PM ਮੋਦੀ ਨਾਲ ਗੱਲਬਾਤ ਕਰ ਕੇ ਭਾਵੁਕ ਹੋਏ ਬਹਾਦੁਰ ਕੈਪਟਨ ਸਮਿਤ ਮਛਾਰ

ਡਿਜੀਟਲ ਡੈਸਕ, ਨਵੀਂ ਦਿੱਲੀ : ਪ੍ਰਧਾਨ ਮੰਤਰੀ ਨਰਿੰਦਰ ਮੋਦੀ ਨੇ ਫਲਾਈਦੁਬਈ ਦੇ ਜਹਾਜ਼ 'ਚ 174 ਯਾਤਰੀਆਂ ਦੀ ਜਾਨ ਬਚਾਉਣ ਵਾਲੇ ਭਾਰਤ ਦੇ ਬਹਾਦਰ ਪਾਇਲਟ ਕੈਪਟਨ ਸਮਿਤ ਮਛਾਰ ਨਾਲ ਫੋਨ ’ਤੇ ਗੱਲ ਕਰਕੇ ਉਨ੍ਹਾਂ ਦਾ ਹਾਲਚਾਲ ਜਾਣਿਆ। ਗੱਲਬਾਤ ਦੌਰਾਨ ਕੈਪਟਨ ਸਮਿਤ ਨੇ ਉਸ ਖੌਫਨਾਕ ਘਟਨਾ ਦੇ ਪਲ-ਪਲ ਦਾ ਤਜਰਬਾ ਸਾਂਝਾ ਕੀਤਾ।

ਪਾਇਲਟ ਕੈਪਟਨ ਸਮਿਤ ਮਛਾਰ ਨੇ ਦੱਸਿਆ ਕਿ ਭਾਰੀ ਦਬਾਅ ਤੇ ਸੰਕਟ ਦੌਰਾਨ ਉਨ੍ਹਾਂ ਨੂੰ ਕਿਸ ਗੱਲ ਨੇ ਹਿੰਮਤ ਅਤੇ ਹੌਸਲਾ ਦਿੱਤਾ। ਪ੍ਰਧਾਨ ਮੰਤਰੀ ਨੇ ਉਲਟ ਹਾਲਾਤ 'ਚ ਦਿਖਾਏ ਗਏ ਉਨ੍ਹਾਂ ਦੇ ਅਸਾਧਾਰਣ ਸਾਹਸ, ਸੂਝਬੂਝ ਤੇ ਬਹਾਦਰੀ ਦੀ ਖੁੱਲ੍ਹ ਕੇ ਤਾਰੀਫ਼ ਕੀਤੀ ਤੇ ਉਨ੍ਹਾਂ ਦੇ ਜਲਦੀ ਤੇ ਪੂਰੀ ਤਰ੍ਹਾਂ ਸਿਹਤਮੰਦ ਹੋਣ ਦੀ ਕਾਮਨਾ ਕੀਤੀ।

ਕਾਲ ਦੌਰਾਨ ਮਛਾਰ ਨੇ ਪੀਐੱਮ ਮੋਦੀ ਨੂੰ ਕਿਹਾ ਕਿ ਉਹ ਆਪਣੀ ਜਾਨ ਬਚਾਉਣ ਲਈ ਸੰਘਰਸ਼ ਕਰ ਰਹੇ ਸਨ। ਉਸ ਸਮੇਂ ਉਨ੍ਹਾਂ ਨੂੰ ਅਹਿਸਾਸ ਹੋਇਆ ਕਿ ਜੇਕਰ ਉਨ੍ਹਾਂ ਨੇ ਹਿੰਮਤ ਨਾ ਦਿਖਾਈ ਤਾਂ 170 ਯਾਤਰੀਆਂ ਦੀ ਜਾਨ ਚਲੀ ਜਾਵੇਗੀ।

‘ਹਨੂਮਾਨ ਜੀ ਨੇ ਬਚਾ ਲਿਆ’: ਕੈਪਟਨ ਸਮਿਤ ਮਛਾਰ

ਪੀਐੱਮ ਮੋਦੀ ਨਾਲ ਗੱਲ ਕਰਦਿਆਂ ਫਲਾਈਦੁਬਈ ਦੇ ਕੈਪਟਨ ਸਮਿਤ ਮਛਾਰ ਨੇ ਕਿਹਾ ਕਿ ਜਦੋਂ ਵੀ ਉਨ੍ਹਾਂ ਨੂੰ ਤਕਲੀਫ਼ ਹੁੰਦੀ ਹੈ ਤਾਂ ਉਹ ਹਨੂਮਾਨ ਚਾਲੀਸਾ ਦਾ ਪਾਠ ਕਰਦੇ ਹਨ। ਉਸ ਸਮੇਂ ਵੀ ਉਹ ਸਿਰਫ਼ ਹਨੂਮਾਨ ਚਾਲੀਸਾ ਦਾ ਪਾਠ ਕਰਦੇ ਰਹੇ। ਉਨ੍ਹਾਂ ਕਿਹਾ ਕਿ ਅੱਜ ਤੁਹਾਡੀ ਇੱਕ ਕਾਲ ਤੋਂ ਮੈਨੂੰ ਸੱਚਮੁੱਚ ਬਹੁਤ ਮਾਣ ਮਹਿਸੂਸ ਹੋ ਰਿਹਾ ਹੈ।

ਪੀਐੱਮ ਮੋਦੀ ਨੂੰ ਦੱਸਿਆ ਆਪਣਾ ਸਭ ਤੋਂ ਵੱਡਾ ਆਦਰਸ਼

ਪੀਐੱਮ ਮੋਦੀ ਨਾਲ ਗੱਲ ਕਰਦੇ ਹੋਏ ਫਲਾਈਦੁਬਈ ਦੇ ਕੈਪਟਨ ਸਮਿਤ ਮਛਾਰ ਨੇ ਕਿਹਾ, 'ਜਦੋਂ ਵੀ ਮੈਨੂੰ ਦਰਦ ਹੁੰਦਾ ਹੈ, ਮੈਂ ਹਨੂਮਾਨ ਚਾਲੀਸਾ ਦਾ ਪਾਠ ਕਰਦਾ ਹਾਂ। ਉਸ ਸਮੇਂ ਵੀ ਮੈਂ ਸਿਰਫ਼ ਹਨੂਮਾਨ ਚਾਲੀਸਾ ਦਾ ਪਾਠ ਕਰਦਾ ਰਿਹਾ। ਅੱਜ ਤੁਹਾਡੀ ਇੱਕ ਕਾਲ ਨੇ ਮੈਨੂੰ ਸੱਚਮੁੱਚ ਬਹੁਤ ਮਾਣ ਮਹਿਸੂਸ ਕਰਵਾਇਆ ਹੈ।' ਪੀਐੱਮ ਮੋਦੀ ਦੇ ਸਾਹਮਣੇ ਆਪਣੀ ਮੁਸ਼ਕਲ ਘੜੀ ਦਾ ਜ਼ਿਕਰ ਕਰਦੇ ਹੋਏ ਫਲਾਈਦੁਬਈ ਦੇ ਕੈਪਟਨ ਸਮਿਤ ਮਛਾਰ ਭਾਵੁਕ ਹੋ ਗਏ। ਉਨ੍ਹਾਂ ਕਿਹਾ ਕਿ ਤੁਸੀਂ ਮੇਰੇ ਸਭ ਤੋਂ ਵੱਡੇ ਆਦਰਸ਼ ਹੋ। ਅੱਜ ਤੁਸੀਂ ਜਿਸ ਤਰ੍ਹਾਂ ਮੇਰਾ ਹੌਸਲਾ ਵਧਾ ਰਹੇ ਹੋ, ਉਸ ’ਤੇ ਮੈਨੂੰ ਬਹੁਤ ਮਾਣ ਹੋ ਰਿਹਾ ਹੈ। ਮੈਨੂੰ ਕਈ ਸੱਟਾਂ ਲੱਗੀਆਂ ਸਨ, ਪਰ ਮੈਂ ਆਪਣੇ ਆਪ ਨੂੰ ਕਿਹਾ ਕਿ ਮੈਨੂੰ ਉੱਠਣਾ ਪਵੇਗਾ ਅਤੇ ਕੁਝ ਕਰਨਾ ਪਵੇਗਾ। ਉਸ ਸਮੇਂ ਮੈਂ ਖੁਦ ਨੂੰ ਕਾਕਪਿਟ ਦਾ ਦਰਵਾਜ਼ਾ ਖੋਲ੍ਹਣ ਲਈ ਪ੍ਰੇਰਿਤ ਕੀਤਾ।

‘ਤੁਸੀਂ ਦੁਨੀਆ ਨੂੰ ਦਿਖਾਇਆ ਕਿ ਅਹਿੰਸਾ ਕੀ ਹੁੰਦੀ ਹੈ’: ਪੀਐੱਮ ਮੋਦੀ

ਪ੍ਰਧਾਨ ਮੰਤਰੀ ਨਰਿੰਦਰ ਮੋਦੀ ਨੇ ਫਲਾਈਦੁਬਈ ਦੇ ਕੈਪਟਨ ਸਮਿਤ ਮਛਾਰ ਨੂੰ ਕਿਹਾ, 'ਤੁਸੀਂ ਦੁਨੀਆ ਨੂੰ ਦਿਖਾਇਆ ਹੈ ਕਿ ਅਹਿੰਸਾ ਕੀ ਹੁੰਦੀ ਹੈ। ਮੈਂ ਸੋਸ਼ਲ ਮੀਡੀਆ ’ਤੇ ਕਈ ਟਿੱਪਣੀਆਂ ਪੜ੍ਹੀਆਂ, ਜਿਨ੍ਹਾਂ ਵਿੱਚ ਕਿਹਾ ਗਿਆ ਸੀ ਕਿ ਜੇਕਰ ਹਾਲਾਤ ਕੁਝ ਹੋਰ ਹੁੰਦੇ ਤਾਂ ਲੋਕ ਭਾਰਤ ਬਾਰੇ ਕੀ ਕਹਿੰਦੇ? ਤੁਸੀਂ ਬਹੁਤ ਵੱਡਾ ਕੰਮ ਕੀਤਾ ਹੈ ਅਤੇ ਸਾਰਿਆਂ ਦੀ ਜਾਨ ਬਚਾਈ ਹੈ।'

‘ਮੈਂ ਇੱਕ ਕਾਲ ਦੀ ਦੂਰੀ ’ਤੇ ਹਾਂ’

ਪੀਐੱਮ ਮੋਦੀ ਨੇ ਕੈਪਟਨ ਸਮਿਤ ਮਛਾਰ ਨੂੰ ਭਰੋਸਾ ਦਿਵਾਉਂਦੇ ਹੋਏ ਕਿਹਾ, 'ਮੈਂ ਤੁਹਾਡੀ ਦੇਖਭਾਲ ਕਰਨ ਲਈ ਸਾਊਦੀ ਅਰਬ ਅਤੇ ਯੂਏਈ ਦੀਆਂ ਸਰਕਾਰਾਂ ਦਾ ਧੰਨਵਾਦ ਕਰਦਾ ਹਾਂ। ਮੈਂ ਤੁਹਾਨੂੰ ਭਰੋਸਾ ਦਿਵਾਉਂਦਾ ਹਾਂ ਕਿ ਜਦੋਂ ਵੀ ਤੁਹਾਨੂੰ ਮੇਰੀ ਲੋੜ ਹੋਵੇਗੀ, ਮੈਂ ਸਿਰਫ਼ ਇੱਕ ਫੋਨ ਕਾਲ ਦੀ ਦੂਰੀ ’ਤੇ ਹਾਂ।'

‘ਤੁਹਾਡੇ ਸਵਾਗਤ ਲਈ ਉਤਸ਼ਾਹਿਤ ਹੈ ਭਾਰਤ’

ਪੀਐੱਮ ਮੋਦੀ ਨੇ ਅੱਗੇ ਕਿਹਾ ਕਿ ਭਾਰਤ ਤੁਹਾਡਾ ਸਵਾਗਤ ਕਰਨ ਲਈ ਉਤਸ਼ਾਹਿਤ ਹੈ। ਕੱਲ੍ਹ ਤੁਹਾਡੇ ਜਲਦੀ ਸਿਹਤਯਾਬ ਹੋਣ ਲਈ ਪੂਰੇ ਦੇਸ਼ 'ਚ ਵਿਸ਼ੇਸ਼ ਪ੍ਰਾਰਥਨਾਵਾਂ ਕੀਤੀਆਂ ਗਈਆਂ।

ਪੀਐੱਮ ਮੋਦੀ ਨੇ ਪਰਿਵਾਰਕ ਮੈਂਬਰਾਂ ਨਾਲ ਵੀ ਕੀਤੀ ਸੀ ਗੱਲ

ਪੀਐੱਮ ਮੋਦੀ ਨੇ ਵੀਰਵਾਰ ਨੂੰ ਪਾਇਲਟ ਦੀ ਪਤਨੀ ਤੇ ਮਾਤਾ-ਪਿਤਾ ਨਾਲ ਵੀ ਗੱਲ ਕੀਤੀ ਸੀ ਅਤੇ ਉਨ੍ਹਾਂ ਨੂੰ ਭਰੋਸਾ ਦਿਵਾਇਆ ਸੀ ਕਿ ਮੱਛਾਰ ਅਤੇ ਉਨ੍ਹਾਂ ਦੇ ਪਰਿਵਾਰ ਨੂੰ ਭਾਰਤੀ ਮਿਸ਼ਨਾਂ ਵੱਲੋਂ ਪੂਰੀ ਮਦਦ ਦਿੱਤੀ ਜਾਵੇਗੀ।

ਦੁਬਈ ਤੋਂ ਤੇਲ ਅਵੀਵ ਵੱਲ ਜਾ ਰਹੀ ਫਲਾਈਦੁਬਈ ਦੀ ਉਡਾਣ FZ1073 ਆਸਮਾਨ 'ਚ ਆਮ ਗਤੀ ਨਾਲ ਅੱਗੇ ਵੱਧ ਰਹੀ ਸੀ, ਤਾਂ ਕਾਕਪਿਟ ਦੇ ਅੰਦਰ ਅਚਾਨਕ ਅਣਕਿਆਸਿਆ ਸੰਕਟ ਪੈਦਾ ਹੋ ਗਿਆ।

ਸਹਿ-ਪਾਇਲਟ ਨੇ ਕਥਿਤ ਤੌਰ ’ਤੇ ਜਹਾਜ਼ ਦਾ ਕੰਟਰੋਲ ਵਿਗਾੜ ਕੇ ਉਸ ਨੂੰ ਹੇਠਾਂ ਡੇਗਣ ਦੀ ਕੋਸ਼ਿਸ਼ ਕੀਤੀ, ਜਿਸ ਕਾਰਨ ਕੁਝ ਹੀ ਸਕਿੰਟਾਂ ਵਿੱਚ ਜਹਾਜ਼ ਹਜ਼ਾਰਾਂ ਫੁੱਟ ਹੇਠਾਂ ਵੱਲ ਜਾਣ ਲੱਗਾ।

ਖ਼ਤਰੇ ਨੂੰ ਭਾਂਪਦੇ ਹੀ ਮੁੱਖ ਪਾਇਲਟ ਕੈਪਟਨ ਸਮਿਤ ਮੱਛਾਰ ਨੇ ਉਸ ਨੂੰ ਰੋਕਣ ਦੀ ਕੋਸ਼ਿਸ਼ ਕੀਤੀ, ਜਿਸ ਤੋਂ ਬਾਅਦ ਕਾਕਪਿਟ ਵਿੱਚ ਦੋਵਾਂ ਵਿਚਕਾਰ ਭਿਆਨਕ ਸੰਘਰਸ਼ ਸ਼ੁਰੂ ਹੋ ਗਿਆ।

ਗੰਭੀਰ ਸੱਟਾਂ ਦੇ ਬਾਵਜੂਦ ਨਹੀਂ ਟੁੱਟਣ ਦਿੱਤਾ ਹੌਸਲਾ

ਇਸ ਖੂਨੀ ਹੱਥੋਪਾਈ 'ਚ ਕੈਪਟਨ ਸਮਿਤ ਬੁਰੀ ਤਰ੍ਹਾਂ ਜ਼ਖ਼ਮੀ ਹੋ ਗਏ ਅਤੇ ਸਰੀਰ ਵਿੱਚੋਂ ਲਗਾਤਾਰ ਵਹਿ ਰਹੇ ਖੂਨ ਕਾਰਨ ਉਨ੍ਹਾਂ ਦੀ ਹਾਲਤ ਨਾਜ਼ੁਕ ਹੋਣ ਲੱਗੀ ਸੀ। ਇਸ ਦੇ ਬਾਵਜੂਦ ਉਨ੍ਹਾਂ ਹੋਸ਼ ਨਹੀਂ ਗੁਆਇਆ। ਬੇਹੱਦ ਫੁਰਤੀ ਅਤੇ ਸੂਝਬੂਝ ਦਿਖਾਉਂਦੇ ਹੋਏ ਉਨ੍ਹਾਂ ਨੇ ਕਿਸੇ ਤਰ੍ਹਾਂ ਕਾਕਪਿਟ ਦਾ ਸੁਰੱਖਿਅਤ ਲਾਕ ਖੋਲ੍ਹ ਦਿੱਤਾ। ਦਰਵਾਜ਼ਾ ਖੁੱਲ੍ਹਦੇ ਹੀ ਕੈਬਿਨ ਕਰੂ ਤੇ ਅੱਗੇ ਦੀਆਂ ਕਤਾਰਾਂ 'ਚ ਬੈਠੇ ਯਾਤਰੀ ਤੁਰੰਤ ਅੰਦਰ ਦਾਖ਼ਲ ਹੋਏ ਅਤੇ ਹੰਗਾਮਾ ਕਰ ਰਹੇ ਕੋ-ਪਾਇਲਟ ਨੂੰ ਕਾਬੂ ਕਰ ਲਿਆ।