ਖੂਨੀ CA ਦੀ ਖੇਡ : ਪਤਨੀ ਨੂੰ ਪਹਿਲਾਂ ਕੂਹਣੀ ਮਾਰ ਕੇ ਕੀਤਾ ਬੇਹੋਸ਼, ਫਿਰ ਕੈਂਚੀ ਨਾਲ ਕੀਤੇ ਸੱਤ ਵਾਰ; ਲਾਸ਼ ਕੋਲ ਬੈਠ ਕੇ ਘੜੀ ਲੁੱਟ ਦੀ ਝੂਠੀ ਕਹਾਣੀ

ਜਾਗਰਣ ਸੰਵਾਦਦਾਤਾ, ਝੱਜਰ : ਪਾਹਸੌਰ ਪਿੰਡ ਨੇੜੇ ਬੀਤੇ ਐਤਵਾਰ ਰਾਤ ਹੋਏ ਬੈਂਕਰ ਮਹਿਕ ਦੇ ਕਤਲ ਮਾਮਲੇ 'ਚ ਪੁਲਿਸ ਰਿਮਾਂਡ ਦੌਰਾਨ ਹੈਰਾਨ ਕਰਨ ਵਾਲੇ ਖੁਲਾਸੇ ਹੋਏ ਹਨ। ਮੁਲਜ਼ਮ ਪਤੀ, ਹਿਸਾਰ ਨਿਵਾਸੀ ਸੀਏ (CA) ਅੰਸ਼ੁਲ ਧਵਨ ਨੇ ਆਪਣੀ ਪਤਨੀ ਦਾ ਕਤਲ ਕਰਨ ਲਈ ਨਾ ਸਿਰਫ਼ ਬੇਰਹਿਮੀ ਦੀਆਂ ਹੱਦਾਂ ਪਾਰ ਕੀਤੀਆਂ, ਸਗੋਂ ਕਾਨੂੰਨ ਨੂੰ ਗੁੰਮਰਾਹ ਕਰਨ ਲਈ ਇਕ ਫ਼ਿਲਮੀ ਕਹਾਣੀ ਵੀ ਰਚੀ।

ਪੁਲਿਸ ਪੁੱਛਗਿੱਛ 'ਚ ਅੰਸ਼ੁਲ ਨੇ ਕਬੂਲ ਕੀਤਾ ਕਿ ਉਸ ਨੇ ਮਹਿਕ ਨੂੰ ਮੌਤ ਦੇ ਘਾਟ ਉਤਾਰਨ ਦੀ ਯੋਜਨਾ ਪਹਿਲਾਂ ਹੀ ਬਣਾ ਲਈ ਸੀ। ਗੁਰੂਗ੍ਰਾਮ ਜਾਂਦੇ ਸਮੇਂ ਰਸਤੇ 'ਚ ਉਸ ਨੇ ਚੱਲਦੀ ਗੱਡੀ 'ਚ ਮਹਿਕ ਦੀ ਛਾਤੀ 'ਤੇ ਜ਼ੋਰ ਦੀ ਕੋਹਣੀ ਮਾਰੀ, ਜਿਸ ਨਾਲ ਉਹ ਬੇਹੋਸ਼ ਹੋ ਗਈ। ਇਸ ਤੋਂ ਬਾਅਦ ਮੁਲਜ਼ਮ ਨੇ ਗੱਡੀ ਰੋਕ ਕੇ ਮਹਿਕ ਨੂੰ ਹੇਠਾਂ ਉਤਾਰਿਆ ਤੇ ਆਪਣੇ ਕੋਲ ਰੱਖੀ ਕੈਂਚੀ ਨਾਲ ਉਸ ਦੀ ਗਰਦਨ 'ਤੇ ਛੇ ਤੋਂ ਸੱਤ ਵਾਰ ਕੀਤੇ। ਇਸ ਬੇਰਹਿਮ ਹਮਲੇ 'ਚ ਮਹਿਕ ਦੀ ਮੌਕੇ 'ਤੇ ਹੀ ਮੌਤ ਹੋ ਗਈ।

ਇਕ ਘੰਟੇ ਤਕ ਲਾਸ਼ ਕੋਲ ਬੈਠ ਕੇ ਰਚੀ 'ਲੁੱਟ' ਦੀ ਸਾਜ਼ਿਸ਼

ਕਤਲ ਤੋਂ ਬਾਅਦ ਮੁਲਜ਼ਮ ਅੰਸ਼ੁਲ ਕਰੀਬ ਇਕ ਘੰਟੇ ਤਕ ਲਾਸ਼ ਦੇ ਕੋਲ ਹੀ ਬੈਠਾ ਰਿਹਾ। ਇਸ ਦੌਰਾਨ ਉਸ ਨੇ ਮਾਮਲੇ ਨੂੰ "ਲੁੱਟ" ਦਾ ਰੂਪ ਦੇਣ ਲਈ ਮਹਿਕ ਦੇ ਗਹਿਣੇ ਤੇ ਮੰਗਲਸੂਤਰ ਉਤਾਰ ਕੇ ਨੇੜਲੇ ਖੇਤਾਂ 'ਚ ਸੁੱਟ ਦਿੱਤੇ। ਖ਼ੁਦ ਨੂੰ ਬੇਗੁਨਾਹ ਸਾਬਤ ਕਰਨ ਲਈ ਉਸ ਨੇ ਨਹਿਰ ਦੇ ਪੁਲ 'ਤੇ ਆਪਣਾ ਸਿਰ ਮਾਰ ਕੇ ਖ਼ੁਦ ਨੂੰ ਜ਼ਖ਼ਮੀ ਕਰ ਲਿਆ। ਇਸ ਤੋਂ ਬਾਅਦ ਉਸ ਨੇ ਸੜਕ 'ਤੇ ਇੱਕ ਰਾਹਗੀਰ ਦੀ ਗੱਡੀ ਰੁਕਵਾ ਕੇ 'ਡਾਇਲ 112' 'ਤੇ ਕਾਲ ਕਰਵਾਈ ਕਿ ਉਨ੍ਹਾਂ ਨਾਲ ਲੁੱਟ ਦੀ ਵਾਰਦਾਤ ਹੋਈ ਹੈ।

ਰਿਮਾਂਡ ਪੂਰਾ, ਮੁਲਜ਼ਮ ਹੁਣ ਜੁਡੀਸ਼ੀਅਲ ਹਿਰਾਸਤ ਵਿੱਚ

ਥਾਣਾ ਮੁਖੀ ਸੁਰੇਸ਼ ਹੁੱਡਾ ਦੀ ਅਗਵਾਈ ਹੇਠ ਪੁਲਿਸ ਨੇ ਰਿਮਾਂਡ ਦੌਰਾਨ ਕਤਲ ਵਿੱਚ ਵਰਤਿਆ ਹਥਿਆਰ (ਕੈਂਚੀ) ਅਤੇ ਸੁੱਟੇ ਗਏ ਗਹਿਣੇ ਬਰਾਮਦ ਕਰ ਲਏ ਹਨ। ਪੁੱਛਗਿੱਛ ਵਿੱਚ ਇਹ ਵੀ ਸਾਹਮਣੇ ਆਇਆ ਕਿ ਵਾਰਦਾਤ ਤੋਂ ਪਹਿਲਾਂ ਦੋਵੇਂ ਇੱਕ ਢਾਬੇ 'ਤੇ ਵੀ ਰੁਕੇ ਸਨ। ਰਿਮਾਂਡ ਦੀ ਮਿਆਦ ਪੂਰੀ ਹੋਣ ਤੋਂ ਬਾਅਦ ਪੁਲਿਸ ਨੇ ਮੁਲਜ਼ਮ ਨੂੰ ਅਦਾਲਤ ਵਿੱਚ ਪੇਸ਼ ਕੀਤਾ, ਜਿੱਥੋਂ ਉਸ ਨੂੰ ਜੁਡੀਸ਼ੀਅਲ (ਨਿਆਇਕ) ਹਿਰਾਸਤ 'ਚ ਭੇਜ ਦਿੱਤਾ ਗਿਆ ਹੈ।

ਦੱਸ ਦੇਈਏ ਕਿ ਮ੍ਰਿਤਕ ਮਹਿਕ ਦੇ ਭਰਾ ਅਕਸ਼ੈ (ਨਿਵਾਸੀ ਹਾਂਸੀ) ਨੇ ਦੱਸਿਆ ਕਿ ਉਸ ਦੀ ਭੈਣ ਦਾ ਵਿਆਹ 25 ਸਤੰਬਰ 2025 ਨੂੰ ਅੰਸ਼ੁਲ ਨਾਲ ਹੋਇਆ ਸੀ। ਦੋਵੇਂ ਗੁਰੂਗ੍ਰਾਮ ਵਿੱਚ ਨਿੱਜੀ ਸੰਸਥਾਵਾਂ ਵਿੱਚ ਕੰਮ ਕਰਦੇ ਸਨ। ਅਕਸ਼ੈ ਦੇ ਬਿਆਨਾਂ ਦੇ ਆਧਾਰ 'ਤੇ ਹੀ ਪੁਲਿਸ ਨੇ ਕਤਲ ਦਾ ਮਾਮਲਾ ਦਰਜ ਕਰਕੇ ਅੰਸ਼ੁਲ ਨੂੰ ਗ੍ਰਿਫ਼ਤਾਰ ਕੀਤਾ ਸੀ।