ਬੰਗਲਾਦੇਸ਼ ਦੇ ਰੱਖਿਆ ਸਲਾਹਕਾਰ ਸ਼ਮਸੁਲ ਇਸਲਾਮ ਆਉਣਗੇ ਭਾਰਤ, ਦਿੱਲੀ 'ਚ ਬਿਮਸਟੈੱਕ ਸੁਰੱਖਿਆ ਬੈਠਕ 'ਚ ਲੈਣਗੇ ਹਿੱਸਾ

ਢਾਕਾ (ਏਐੱਨਆਈ) : ਬਿਮਸਟੈੱਕ ਦੇ ਕੌਮੀ ਸੁਰੱਖਿਆ ਸਲਾਹਕਾਰਾਂ (ਐੱਨਐੱਸਏ) ਦੀ ਨਵੀਂ ਦਿੱਲੀ ਵਿਚ 16 ਜੁਲਾਈ ਨੂੰ ਹੋਣ ਵਾਲੀ ਬੈਠਕ ਵਿਚ ਬੰਗਲਾਦੇਸ਼ ਦੇ ਪ੍ਰਧਾਨ ਮੰਤਰੀ ਤਾਰਿਕ ਰਹਿਮਾਨ ਦੇ ਰੱਖਿਆ ਸਲਾਹਕਾਰ ਬ੍ਰਿਗੇਡੀਅਰ ਜਨਰਲ (ਰਿਟਾਇਰਡ) ਏਕੇਐੱਮ ਸ਼ਮਸੁਲ ਇਸਲਾਮ ਦੇ ਹਿੱਸਾ ਲੈਣ ਦੀ ਸੰਭਾਵਨਾ ਹੈ। ਸਥਾਨਕ ਖ਼ਬਰ ਏਜੰਸੀ ਯੂਐੱਨਬੀ ਨੇ ਇਕ ਕੂਟਨੀਤਕ ਸੂਤਰ ਦੇ ਹਵਾਲੇ ਨਾਲ ਕਿਹਾ ਕਿ ਪ੍ਰਧਾਨ ਮੰਤਰੀ ਦੇ ਰੱਖਿਆ ਸਲਾਹਕਾਰ ਬ੍ਰਿਗੇਡੀਅਰ ਜਨਰਲ (ਰਿਟਾਇਰਡ) ਏਕੇਐੱਮ ਸ਼ਮਸੁਲ ਇਸਲਾਮ ਬੈਠਕ ਵਿਚ ਬੰਗਲਾਦੇਸ਼ ਦੀ ਨੁਮਾਇੰਦਗੀ ਕਰਨਗੇ।

ਉਨ੍ਹਾਂ ਦੀ ਸ਼ਮੂਲੀਅਤ ਦੀ ਸੂਚਨਾ ਕੂਟਨੀਤਕ ਹਲਕਿਆਂ ਰਾਹੀਂ ਭਾਰਤ ਸਰਕਾਰ ਨੂੰ ਪਹਿਲਾਂ ਹੀ ਦਿੱਤੀ ਜਾ ਚੁੱਕੀ ਹੈ। ਇਸ ਦੌਰੇ ਨੂੰ ਦੋਵਾਂ ਦੇਸ਼ਾਂ ਵਿਚਾਲੇ ਉੱਚ ਪੱਧਰੀ ਯਾਤਰਾਵਾਂ ਦੇ ਲਿਹਾਜ਼ ਨਾਲ ਅਹਿਮ ਮੰਨਿਆ ਜਾ ਰਿਹਾ ਹੈ। ਬਿਮਸਟੈੱਕ (ਬੇ ਆਫ ਬੰਗਾਲ ਇਨੀਸ਼ੀਏਟਿਵ ਫਾਰ ਮਲਟੀ ਸੈਕਟੋਰਲ ਟੈਕਨੀਕਲ ਐਂਡ ਇਕੋਨਾਮਿਕ ਕੋਆਪ੍ਰੇਸ਼ਨ ) ਦੀ ਪੰਜਵੀਂ ਐੱਨਐੱਸਏ ਬੈਠਕ ਦੀ ਮੇਜ਼ਬਾਨੀ ਭਾਰਤ ਵੱਲੋਂ ਕੀਤਾ ਜਾਏਗਾ। ਇਹ ਬੈਠਕ 16 ਜੁਲਾਈ ਨੂੰ ਨਵੀਂ ਦਿੱਲੀ ਵਿਚ ਹੋਵੇਗੀ। ਇਸ ਸੰਗਠਨ ਵਿਚ ਭਾਰਤ ਦੇ ਇਲਾਵਾ ਬੰਗਲਾਦੇਸ਼, ਭੂਟਾਨ, ਨੇਪਾਲ, ਸ੍ਰੀਲੰਕਾ, ਮਿਆਂਮਾਰ ਤੇ ਥਾਈਲੈਂਡ ਸ਼ਾਮਲ ਹਨ। ਮੌਜੂਦਾ ਸਮੇਂ ’ਚ ਬੰਗਲਾਦੇਸ਼ ਬਿਮਸਟੈੱਕ ਦਾ ਚੇਅਰਮੈਨ ਹੈ।