ਅੰਤਯੋਦਯਾ ਯੋਜਨਾ 'ਚ ਵੱਡਾ ਬਦਲਾਅ: ਮਿਲੇਗਾ ਘੱਟ ਰਾਸ਼ਨ, ਕਿਹੜੇ ਲੋਕਾਂ ‘ਤੇ ਪਵੇਗਾ ਅਸਰ?

ਅਰਵਿੰਦ ਸ਼ਰਮਾ, ਨਵੀਂ ਦਿੱਲੀ : ਅੰਤਯੋਦਯਾ ਅੰਨ ਯੋਜਨਾ ਤਹਿਤ ਖਾਦਾਨ ਦੀ ਵੰਡ ਦੇ ਫਾਰਮੂਲੇ ਵਿੱਚ ਬਦਲਾਅ ਦੀ ਤਿਆਰੀ ਕੀਤੀ ਜਾ ਰਹੀ ਹੈ। ਮੌਜੂਦਾ ਸਮੇਂ ਵਿੱਚ ਇਸ ਯੋਜਨਾ ਹੇਠ ਹਰ ਯੋਗ ਪਰਿਵਾਰ ਨੂੰ ਹਰ ਮਹੀਨੇ 35 ਕਿਲੋਗ੍ਰਾਮ ਅਨਾਜ ਮਿਲਦਾ ਹੈ, ਪਰਿਵਾਰ ਦੇ ਮੈਂਬਰਾਂ ਦੀ ਗਿਣਤੀ ਚਾਹੇ ਘੱਟ ਹੋਵੇ ਜਾਂ ਜ਼ਿਆਦਾ।

ਨਵਾਂ ਫਾਰਮੂਲਾ ਕੀ ਹੈ?

ਨਵੀਂ ਪ੍ਰਸਤਾਵਿਤ ਵਿਵਸਥਾ ਅਨੁਸਾਰ ਹੁਣ ਪਰਿਵਾਰ ਦੀ ਥਾਂ ਮੈਂਬਰਾਂ ਦੀ ਗਿਣਤੀ ਦੇ ਆਧਾਰ ‘ਤੇ ਰਾਸ਼ਨ ਦਿੱਤਾ ਜਾਵੇਗਾ। ਹਰ ਮੈਂਬਰ ਨੂੰ 7 ਕਿਲੋਗ੍ਰਾਮ ਅਨਾਜ ਮਿਲੇਗਾ, ਪਰ ਕਿਸੇ ਵੀ ਪਰਿਵਾਰ ਨੂੰ ਕੁੱਲ 35 ਕਿਲੋਗ੍ਰਾਮ ਤੋਂ ਵੱਧ ਰਾਸ਼ਨ ਨਹੀਂ ਮਿਲੇਗਾ।

ਕਿਹੜਿਆਂ ‘ਤੇ ਪਵੇਗਾ ਅਸਰ?

ਇਸ ਬਦਲਾਅ ਦਾ ਸਭ ਤੋਂ ਵੱਧ ਅਸਰ 5 ਤੋਂ ਘੱਟ ਮੈਂਬਰਾਂ ਵਾਲੇ ਪਰਿਵਾਰਾਂ ‘ਤੇ ਪਵੇਗਾ, ਕਿਉਂਕਿ ਉਨ੍ਹਾਂ ਨੂੰ ਪਹਿਲਾਂ ਨਾਲੋਂ ਘੱਟ ਰਾਸ਼ਨ ਮਿਲੇਗਾ।

ਜਦਕਿ 5 ਜਾਂ ਉਸ ਤੋਂ ਵੱਧ ਮੈਂਬਰਾਂ ਵਾਲੇ ਪਰਿਵਾਰਾਂ ਨੂੰ ਪਹਿਲਾਂ ਵਾਂਗ ਹੀ ਵੱਧ ਤੋਂ ਵੱਧ 35 ਕਿਲੋਗ੍ਰਾਮ ਅਨਾਜ ਮਿਲਦਾ ਰਹੇਗਾ।

ਕਿੰਨੇ ਲੋਕ ਹੋਣਗੇ ਪ੍ਰਭਾਵਿਤ?

ਦੇਸ਼ ਵਿੱਚ ਲਗਭਗ 81 ਕਰੋੜ ਲੋਕ ਰਾਸ਼ਟਰੀ ਖਾਦ ਸੁਰੱਖਿਆ ਕਾਨੂੰਨ (NFSA) ਤਹਿਤ ਲਾਭ ਪ੍ਰਾਪਤ ਕਰਦੇ ਹਨ, ਜਿਨ੍ਹਾਂ ਵਿੱਚ ਕਰੀਬ 7.8 ਕਰੋੜ ਅੰਤਯੋਦਯਾ ਲਾਭਪਾਤਰੀ ਸ਼ਾਮਲ ਹਨ।

ਨਵਾਂ ਬਦਲਾਅ ਕਦੋਂ ਲਾਗੂ ਹੋਵੇਗਾ?

ਇਹ ਤਬਦੀਲੀ ਤੁਰੰਤ ਲਾਗੂ ਨਹੀਂ ਹੋਵੇਗੀ। ਸਰਕਾਰ ਨੇ ਨੈਸ਼ਨਲ ਫੂਡ ਸਿਕਿਊਰਿਟੀ ਐਕਟ (ਸੰਸ਼ੋਧਨ) ਬਿੱਲ-2026 ਦਾ ਮਸੌਦਾ ਜਨਤਕ ਸੁਝਾਵਾਂ ਲਈ ਜਾਰੀ ਕੀਤਾ ਹੈ। 13 ਜੁਲਾਈ ਤੱਕ ਸੁਝਾਵ ਮੰਗੇ ਗਏ ਹਨ।

ਇਸ ਤੋਂ ਬਾਅਦ ਬਿੱਲ ਨੂੰ ਅੰਤਿਮ ਰੂਪ ਦੇ ਕੇ ਸੰਸਦ ਵਿੱਚ ਪੇਸ਼ ਕੀਤਾ ਜਾਵੇਗਾ ਅਤੇ ਪਾਸ ਹੋਣ ‘ਤੇ ਹੀ ਨਵੀਂ ਵਿਵਸਥਾ ਲਾਗੂ ਹੋਵੇਗੀ।

ਸਰਕਾਰ ਦਾ ਤਰਕ

ਸਰਕਾਰ ਦਾ ਕਹਿਣਾ ਹੈ ਕਿ ਮੌਜੂਦਾ ਪ੍ਰਣਾਲੀ ਵਿੱਚ ਛੋਟੇ ਅਤੇ ਵੱਡੇ ਪਰਿਵਾਰਾਂ ਵਿਚ ਰਾਸ਼ਨ ਵੰਡ ਵਿੱਚ ਅਸਮਾਨਤਾ ਹੈ, ਜਿਸ ਨੂੰ ਠੀਕ ਕਰਨ ਲਈ ਇਹ ਬਦਲਾਅ ਕੀਤਾ ਜਾ ਰਿਹਾ ਹੈ।