ਮੋਬਾਈਲ 'ਤੇ ਰੀਲਾਂ ਦੇਖਣ ਤੋਂ ਰੋਕਣ 'ਤੇ ਘਰੋਂ ਭੱਜਿਆ 8 ਸਾਲਾ ਬੱਚਾ, ਚੰਡੀਗੜ੍ਹ ਤੋਂ ਟਰੇਨ ਰਾਹੀਂ ਪਹੁੰਚਿਆ ਗਵਾਲੀਅਰ ਤੇ ਫਿਰ...

ਨਈ ਦੁਨੀਆ ਪ੍ਰਤੀਨਿਧ, ਗਵਾਲੀਅਰ : ਮੋਬਾਈਲ ਉੱਤੇ ਰੀਲਾਂ ਦੇਖਣ ਤੋਂ ਰੋਕਣ ’ਤੇ ਨਾਰਾਜ਼ ਹੋ ਕੇ ਅੱਠ ਸਾਲ ਦਾ ਬੱਚਾ ਬਿਨਾਂ ਦੱਸੇ ਘਰੋਂ ਤੁਰ ਪਿਆ ਅਤੇ ਚੰਡੀਗੜ੍ਹ ਤੋਂ ਹੁੰਦਾ ਹੋਇਆ ਗਵਾਲੀਅਰ ਪਹੁੰਚ ਗਿਆ। ਚੰਡੀਗੜ੍ਹ-ਇੰਦੌਰ ਐਕਸਪ੍ਰੈੱਸ ਦੇ ਸਲੀਪਰ ਕੋਚ ਵਿਚ ਇਕੱਲਾ ਸਫ਼ਰ ਕਰ ਰਿਹਾ ਇਹ ਬੱਚਾ ਚੈਕਿੰਗ ਦੌਰਾਨ ਟੀਟੀਈ ਦੀ ਨਜ਼ਰ ਵਿਚ ਆ ਗਿਆ। ਸ਼ੱਕ ਪੈਣ ’ਤੇ ਉਨ੍ਹਾਂ ਨੇ ਆਰਪੀਐੱਫ ਕੰਟਰੋਲ ਰੂਮ ਨੂੰ ਜਾਣਕਾਰੀ ਦਿੱਤੀ। ਇਸ ਤੋਂ ਬਾਅਦ ਗਵਾਲੀਅਰ ਵਿਚ ਆਰਪੀਐੱਫ ਨੇ ਬੱਚੇ ਨੂੰ ਟ੍ਰੇਨ ਤੋਂ ਉਤਾਰ ਕੇ ਉਸ ਦੀ ਮਾਂ ਨਾਲ ਫੋਨ ਉੱਤੇ ਗੱਲ ਕਰਵਾਈ।

ਬੱਚਾ ਚੰਡੀਗੜ੍ਹ ਦਾ ਰਹਿਣ ਵਾਲਾ ਹੈ। ਉਸ ਨੇ ਦੱਸਿਆ ਕਿ ਘਰ ਵਿਚ ਮੋਬਾਈਲ ਉੱਤੇ ਰੀਲਾਂ ਦੇਖਣ ਤੋਂ ਉਸ ਨੂੰ ਰੋਕਿਆ ਗਿਆ ਸੀ। ਇਸ ਕਾਰਨ ਨਾਰਾਜ਼ ਹੋ ਕੇ ਉਹ ਬਿਨਾਂ ਕਿਸੇ ਨੂੰ ਦੱਸੇ ਘਰੋਂ ਨਿਕਲ ਗਿਆ। ਫਿਰ, ਉਹ ਚੰਡੀਗੜ੍ਹ ਤੋਂ ਟ੍ਰੇਨ ਵਿਚ ਸਵਾਰ ਹੋ ਗਿਆ। ਉਸ ਨੂੰ ਇਸ ਗੱਲ ਦਾ ਅੰਦਾਜ਼ਾ ਨਹੀਂ ਸੀ ਕਿ ਉਹ ਕਿੰਨੀ ਦੂਰ ਜਾ ਰਿਹਾ ਹੈ। ਉਸ ਦੇ ਪਰਿਵਾਰ ਦੇ ਲੋਕ ਉਸ ਨੂੰ ਲੈਣ ਗਵਾਲੀਅਰ ਪਹੁੰਚੇ ਹਨ।