- ਸ਼ਹਿਰ ਚੁਣੋ
- ਈ-ਪੇਪਰ
- ਵੈੱਬ ਸਟੋਰੀਜ਼
ਟੇਕ-ਆਫ਼ ਤੋਂ ਬਾਅਦ AI ਐਕਸਪ੍ਰੈੱਸ ਦੇ ਜਹਾਜ਼ 'ਚ ਤਕਨੀਕੀ ਖ਼ਰਾਬੀ, ਅਸਮਾਨ ’ਚ ਲਾਏ 18 ਚੱਕਰ; ਸੁਰੱਖਿਅਤ ਲੈਂਡਿੰਗ
ਕੇਰਲ ਦੇ ਕੰਨੂਰ ਤੋਂ ਜੇੱਦਾਹ ਜਾ ਰਹੀ ਏਅਰ ਇੰਡੀਆ ਐਕਸਪ੍ਰੈੱਸ ਦੀ ਫਲਾਈਟ ਦੇ ਯਾਤਰੀਆਂ ਨੂੰ ਮੰਗਲਵਾਰ ਨੂੰ ਉਸ ਵੇਲੇ ਤਣਾਅਪੂਰਨ ਪਲਾਂ ਦਾ ਸਾਹਮਣਾ ਕਰਨਾ ਪਿਆ, ਜਦੋਂ ਉਡਾਣ ਭਰਨ ਦੇ ਕੁਝ ਹੀ ਦੇਰ ਬਾਅਦ ਜਹਾਜ਼ ਵਿੱਚ ਤਕਨੀਕੀ ਖ਼ਰਾਬੀ ਦਾ ਖ਼ਦਸ਼ਾ ਹੋਇਆ। ਇਸ ਤੋਂ ਬਾਅਦ ਕਰੂ ਨੂੰ ਕੰਨੂਰ ਇੰਟਰਨੈਸ਼ਨਲ ਏਅਰਪੋਰਟ 'ਤੇ ਵਾਪਸ ਪਰਤਣਾ ਪਿਆ।
Posted By Anuradha Bains
Publish Date: Tue, 16 Jun 2026 01:54 PM (IST)
Updated Date: Tue, 16 Jun 2026 01:56 PM (IST)
ਡਿਜੀਟਲ ਡੈਸਕ, ਕੰਨੂਰ। ਕੇਰਲ ਦੇ ਕੰਨੂਰ ਤੋਂ ਜੇੱਦਾਹ ਜਾ ਰਹੀ ਏਅਰ ਇੰਡੀਆ ਐਕਸਪ੍ਰੈੱਸ ਦੀ ਫਲਾਈਟ ਦੇ ਯਾਤਰੀਆਂ ਨੂੰ ਮੰਗਲਵਾਰ ਨੂੰ ਉਸ ਵੇਲੇ ਤਣਾਅਪੂਰਨ ਪਲਾਂ ਦਾ ਸਾਹਮਣਾ ਕਰਨਾ ਪਿਆ, ਜਦੋਂ ਉਡਾਣ ਭਰਨ ਦੇ ਕੁਝ ਹੀ ਦੇਰ ਬਾਅਦ ਜਹਾਜ਼ ਵਿੱਚ ਤਕਨੀਕੀ ਖ਼ਰਾਬੀ ਦਾ ਖ਼ਦਸ਼ਾ ਹੋਇਆ। ਇਸ ਤੋਂ ਬਾਅਦ ਕਰੂ ਨੂੰ ਕੰਨੂਰ ਇੰਟਰਨੈਸ਼ਨਲ ਏਅਰਪੋਰਟ 'ਤੇ ਵਾਪਸ ਪਰਤਣਾ ਪਿਆ।
ਕੰਨੂਰ ਤੋਂ ਸਵੇਰੇ ਕਰੀਬ 7:03 ਵਜੇ ਉਡਾਣ ਭਰਨ ਵਾਲੀ ਇਸ ਫਲਾਈਟ ਵਿੱਚ ਸਫ਼ਰ ਸ਼ੁਰੂ ਹੋਣ ਦੇ ਲਗਪਗ 30 ਮਿੰਟ ਬਾਅਦ ਤਕਨੀਕੀ ਖ਼ਰਾਬੀ ਦਾ ਪਤਾ ਲੱਗਿਆ। ਸੁਰੱਖਿਆ ਦੇ ਤੈਅ ਨਿਯਮਾਂ ਦੀ ਪਾਲਣਾ ਕਰਦੇ ਹੋਏ ਪਾਇਲਟਾਂ ਨੇ ਇੰਟਰਨੈਸ਼ਨਲ ਫਲਾਈਟ ਜਾਰੀ ਰੱਖਣ ਦੀ ਬਜਾਏ ਵਾਪਸ ਉਸੇ ਏਅਰਪੋਰਟ 'ਤੇ ਪਰਤਣ ਦਾ ਫ਼ੈਸਲਾ ਕੀਤਾ ਜਿੱਥੋਂ ਉਡਾਣ ਭਰੀ ਗਈ ਸੀ।
ਅਸਮਾਨ ਵਿੱਚ ਲਾਏ 18 ਚੱਕਰ
ਹਾਲਾਂਕਿ, ਜੇੱਦਾਹ ਦੀ ਲੰਮੀ ਯਾਤਰਾ ਲਈ ਜਹਾਜ਼ ਵਿੱਚ ਬਹੁਤ ਜ਼ਿਆਦਾ ਈਂਧਨ ਭਰਿਆ ਹੋਇਆ ਸੀ, ਇਸ ਲਈ ਲੈਂਡਿੰਗ ਤੋਂ ਪਹਿਲਾਂ ਕਰੂ ਨੂੰ ਬਾਲਣ ਦਾ ਭਾਰ ਘੱਟ ਕਰਨਾ ਪਿਆ। ਸੁਰੱਖਿਅਤ ਤਰੀਕੇ ਨਾਲ ਬਾਲਣ ਖ਼ਤਮ ਕਰਨ ਲਈ ਜਹਾਜ਼ ਉਸ ਇਲਾਕੇ ਦੇ ਉੱਪਰ ਚੱਕਰ ਲਗਾਉਣ ਲੱਗਾ ਅਤੇ ਕੰਨੂਰ ਵੱਲ ਵਧਣ ਤੋਂ ਪਹਿਲਾਂ ਅਸਮਾਨ ਵਿੱਚ ਲਗਭਗ 18 ਚੱਕਰ ਕੱਟੇ।
ਆਖ਼ਰਕਾਰ ਸਵੇਰੇ 9 ਵਜੇ ਜਹਾਜ਼ ਸੁਰੱਖਿਅਤ ਰੂਪ ਨਾਲ ਲੈਂਡ ਕਰ ਗਿਆ, ਜਿਸ ਨਾਲ ਯਾਤਰੀਆਂ ਅਤੇ ਸਥਿਤੀ 'ਤੇ ਨਜ਼ਰ ਰੱਖ ਰਹੇ ਏਅਰਪੋਰਟ ਅਧਿਕਾਰੀਆਂ ਨੇ ਸੁਖ ਦਾ ਸਾਹ ਲਿਆ। ਜਹਾਜ਼ ਵਿੱਚ ਕੁੱਲ 180 ਯਾਤਰੀ ਸਵਾਰ ਸਨ।
ਏਪੀਯੂ ਨਾਲ ਜੁੜੀ ਸੀ ਸਮੱਸਿਆ
ਸ਼ੁਰੂਆਤੀ ਰਿਪੋਰਟਾਂ ਮੁਤਾਬਕ, ਜਹਾਜ਼ ਵਿੱਚ ਹਾਲ ਹੀ ਵਿੱਚ ਇਸ ਦੇ ਆਕਸੀਲਰੀ ਪਾਵਰ ਯੂਨਿਟ ਨਾਲ ਜੁੜੀ ਕੋਈ ਸਮੱਸਿਆ ਸਾਹਮਣੇ ਆਈ ਸੀ। ਬਾਅਦ ਵਿੱਚ ਇਸ ਖ਼ਰਾਬੀ ਨੂੰ ਠੀਕ ਕਰ ਦਿੱਤਾ ਗਿਆ ਸੀ ਅਤੇ ਜਹਾਜ਼ ਨੂੰ ਉਡਾਣ ਲਈ ਮਨਜ਼ੂਰੀ ਦੇ ਦਿੱਤੀ ਗਈ ਸੀ। ਹਾਲਾਂਕਿ, ਅਧਿਕਾਰੀ ਹੁਣ ਇਸ ਗੱਲ ਦੀ ਬਾਰੀਕੀ ਨਾਲ ਜਾਂਚ ਕਰ ਰਹੇ ਹਨ ਕਿ ਕੀ ਪਹਿਲਾਂ ਆਈ ਸਮੱਸਿਆ ਦਾ ਉਡਾਣ ਦੌਰਾਨ ਹੋਈ ਤਕਨੀਕੀ ਖ਼ਰਾਬੀ ਨਾਲ ਕੋਈ ਸਬੰਧ ਸੀ।