AI ਦੀ ਅਜੀਬੋ-ਗਰੀਬ ਗਲਤੀ! ਗਿਟਾਰ ਨੂੰ ਸਮਝ ਲਿਆ ਇਨਸਾਨ, ਕੱਟਿਆ ₹500 ਦਾ ਚਲਾਨ

ਡਿਜੀਟਲ ਡੈਸਕ, ਬੈਂਗਲੁਰੂ: ਆਰਟੀਫਿਸ਼ੀਅਲ ਇੰਟੈਲੀਜੈਂਸ (AI) ਨੂੰ ਲੈ ਕੇ ਦੁਨੀਆ ਭਰ ਵਿੱਚ ਚੱਲ ਰਹੀ ਬਹਿਸ ਵਿਚਕਾਰ ਇੱਕ ਵਾਰ ਫਿਰ AI ਦੀ ਵੱਡੀ ਗਲਤੀ ਸਾਹਮਣੇ ਆਈ ਹੈ। ਬੈਂਗਲੁਰੂ ਵਿੱਚ AI ਨਾਲ ਲੈਸ ਕੈਮਰੇ ਨੇ ਇੱਕ ਗਿਟਾਰ ਨੂੰ ਬਿਨਾਂ ਹੈਲਮੈਟ ਪਹਿਨੇ ਵਿਅਕਤੀ ਸਮਝ ਲਿਆ, ਜਿਸ ਕਾਰਨ ਚਲਾਨ ਕੱਟ ਦਿੱਤਾ ਗਿਆ।

ਦਰਅਸਲ ਸੌਵਿਕ ਦੱਤਾ ਸ਼ਹਿਰ ਵਿੱਚ ਆਪਣੀ ਪਤਨੀ ਦਾ ਸਕੂਟਰ ਚਲਾ ਰਹੇ ਸਨ ਅਤੇ ਉਨ੍ਹਾਂ ਦੀ ਪਿੱਠ ’ਤੇ ਇੱਕ ਗਿਟਾਰ ਬੰਨ੍ਹਿਆ ਹੋਇਆ ਸੀ। ਹਾਲਾਂਕਿ, ਟ੍ਰੈਫਿਕ ਸਰਵਿਲਾਂਸ ਸਿਸਟਮ ਨੂੰ ਕੁਝ ਹੋਰ ਹੀ ਨਜ਼ਰ ਆਇਆ। ਸਿਸਟਮ ਨੇ ਇਸ ਨੂੰ ਬਿਨਾਂ ਹੈਲਮੈਟ ਦੇ ਪਿੱਛੇ ਬੈਠੀ ਸਵਾਰੀ (ਪਿਲੀਅਨ ਰਾਈਡਰ) ਸਮਝ ਲਿਆ। ਦੱਤਾ ਨੇ ਦੱਸਿਆ ਕਿ ਉਨ੍ਹਾਂ ’ਤੇ ਪਿੱਛੇ ਬੈਠੀ ਸਵਾਰੀ ਵੱਲੋਂ ਸੁਰੱਖਿਆ ਹੈਲਮੈਟ ਨਾ ਪਹਿਨਣ ਦੇ ਦੋਸ਼ ਵਿੱਚ ₹500 ਦਾ ਜੁਰਮਾਨਾ ਲਗਾਇਆ ਗਿਆ।

ਫੋਟੋ ਦੇ ਸਬੂਤ ਨਾਲ ਮਿਲਿਆ ਚਲਾਨ

ਆਊਟਰ ਰਿੰਗ ਰੋਡ ’ਤੇ ਲੱਗੇ AI ਕੈਮਰਿਆਂ ਵਿੱਚੋਂ ਇੱਕ ਨੇ 15 ਸਤੰਬਰ ਦੀ ਦੁਪਹਿਰ ਉਨ੍ਹਾਂ ਦੀ ਤਸਵੀਰ ਕੈਦ ਕੀਤੀ ਸੀ। ਅਗਲੇ ਦਿਨ ਫੋਟੋ ਦੇ ਸਬੂਤ ਦੇ ਨਾਲ ਚਲਾਨ ਜਾਰੀ ਕਰ ਦਿੱਤਾ ਗਿਆ। ਇਸ ਤੋਂ ਬਾਅਦ ਦੱਤਾ ਨੇ ਸੋਸ਼ਲ ਮੀਡੀਆ ਦਾ ਸਹਾਰਾ ਲੈਂਦਿਆਂ ਬੈਂਗਲੁਰੂ ਟ੍ਰੈਫਿਕ ਪੁਲਿਸ ਨੂੰ ਚਲਾਨ ਰੱਦ ਕਰਨ ਦੀ ਅਪੀਲ ਕੀਤੀ।

ਫੋਟੋ ਵਿੱਚ ਸਾਫ਼ ਦਿਖਾਈ ਦੇ ਰਿਹਾ ਸੀ ਕਿ ਸੌਵਿਕ ਨੇ ਖੁਦ ਹੈਲਮੈਟ ਪਹਿਨਿਆ ਹੋਇਆ ਸੀ ਅਤੇ ਉਨ੍ਹਾਂ ਦਾ ਗਿਟਾਰ ਪਿੱਛੇ ਠੀਕ ਤਰ੍ਹਾਂ ਰੱਖਿਆ ਹੋਇਆ ਸੀ। ਸਕੂਟਰ ’ਤੇ ਉਨ੍ਹਾਂ ਤੋਂ ਇਲਾਵਾ ਕੋਈ ਹੋਰ ਵਿਅਕਤੀ ਨਹੀਂ ਸੀ। AI ਨੇ ਗਿਟਾਰ ਨੂੰ ਹੀ “ਪਿਲੀਅਨ” ਯਾਨੀ ਪਿੱਛੇ ਬੈਠਣ ਵਾਲੀ ਸਵਾਰੀ ਸਮਝ ਲਿਆ। ਦੱਤਾ ਨੇ ਉਹ ਚਲਾਨ ਵੀ ਸਾਂਝਾ ਕੀਤਾ, ਜੋ ਉਨ੍ਹਾਂ ਦੀ ਪਤਨੀ ਦੇ ਅਕਾਊਂਟ ’ਤੇ ਭੇਜਿਆ ਗਿਆ ਸੀ।

ਸਿਸਟਮ ’ਤੇ ਕੀਤਾ ਤਨਜ

ਚਲਾਨ ਦੀ ਜਾਣਕਾਰੀ ਦੇ ਨਾਲ ਆਪਣੀ ਪੋਸਟ ਵਿੱਚ ਦੱਤਾ ਨੇ ਸ਼ਹਿਰ ਦੇ AI-ਅਧਾਰਿਤ ਟ੍ਰੈਫਿਕ ਇਨਫੋਰਸਮੈਂਟ ਸਿਸਟਮ ’ਤੇ ਤੰਜ ਕੱਸਿਆ। ਪੋਸਟ ਵਿੱਚ ਲਿਖਿਆ ਗਿਆ, “AI-ਅਧਾਰਿਤ ਟ੍ਰੈਫਿਕ ਨਿਯਮ ਤੋੜਨ ਦਾ ਪਤਾ ਲਗਾਉਣ ਵਾਲੇ ਸਿਸਟਮ ਦਾ ਇਹੀ ਹਾਲ ਹੈ!”

ਬੈਂਗਲੁਰੂ ਟ੍ਰੈਫਿਕ ਪੁਲਿਸ ਨੇ ਦਸੰਬਰ 2022 ਵਿੱਚ AI-ਅਧਾਰਿਤ ਸਰਵਿਲਾਂਸ ਸਿਸਟਮ ਅਪਣਾਇਆ ਸੀ ਅਤੇ ਇਸ ਨੂੰ ਬੈਕਐਂਡ ’ਤੇ ਬਿਨਾਂ ਕਿਸੇ ਮਨੁੱਖੀ ਜਾਂਚ-ਪੜਤਾਲ ਦੇ ਚਲਾਇਆ ਜਾਂਦਾ ਸੀ।