ਕੋਲਕਾਤਾ ਦੀ ਪ੍ਰੈਜ਼ੀਡੈਂਸੀ ਜੇਲ੍ਹ 'ਚ ਬੰਦ ਅੱਤਵਾਦੀ ਆਫਤਾਬ ਅੰਸਾਰੀ ਤੋਂ 3 ਆਈਫੋਨ ਬਰਾਮਦ, ਰਾਊਟਰ ਤੇ 31 ਹਜ਼ਾਰ ਰੁਪਏ ਵੀ ਮਿਲੇ

ਸਟੇਟ ਬਿਊਰੋ, ਕੋਲਕਾਤਾ : ਬੰਗਾਲ ਦੀ ਅਤਿ-ਸੁਰੱਖਿਅਤ ਮੰਨੀ ਜਾਣ ਵਾਲੀ ਕੋਲਕਾਤਾ ਦੇ ਅਲੀਪੁਰ ਸਥਿਤ ਪ੍ਰੈਜ਼ੀਡੈਂਸੀ ਸੈਂਟਰਲ ਜੇਲ੍ਹ 'ਚ ਇਕ ਵਾਰ ਫਿਰ ਗੰਭੀਰ ਸੁਰੱਖਿਆ ਚੂਕ ਦਾ ਸਨਸਨੀਖੇਜ਼ ਮਾਮਲਾ ਸਾਹਮਣੇ ਆਇਆ ਹੈ। 2002 'ਚ ਕੋਲਕਾਤਾ ਸਥਿਤ ਅਮਰੀਕੀ ਸੂਚਨਾ ਕੇਂਦਰ 'ਤੇ ਹੋਏ ਅੱਤਵਾਦੀ ਹਮਲੇ ਦੇ ਮੁੱਖ ਸਾਜ਼ਿਸ਼ਕਰਤਾ ਤੇ ਉਮਰ ਕੈਦ ਦੀ ਸਜ਼ਾ ਕੱਟ ਰਹੇ ਬਦਨਾਮ ਅੱਤਵਾਦੀ ਆਫਤਾਬ ਅਹਿਮਦ ਅੰਸਾਰੀ ਦੀ ਸੈੱਲ ਤੋਂ ਛਾਪੇਮਾਰੀ ਦੌਰਾਨ ਤਿੰਨ ਆਈਫੋਨ, ਵਾਈ-ਫਾਈ ਰਾਊਟਰ, ਪੈਨ ਡਰਾਈਵ ਅਤੇ 31 ਹਜ਼ਾਰ ਰੁਪਏ ਬਰਾਮਦ ਕੀਤੇ ਗਏ ਹਨ।

ਗੁਪਤ ਖੁਫੀਆ ਸੂਚਨਾ ਦੇ ਆਧਾਰ 'ਤੇ ਜੇਲ੍ਹ ਵਿਭਾਗ ਦੇ ਅਧਿਕਾਰੀਆਂ ਨੇ ਜਦੋਂ ਆਫਤਾਬ ਦੇ 14 ਨੰਬਰ ਸੈੱਲ ਦੀ ਡੂੰਘਾਈ ਨਾਲ ਤਲਾਸ਼ੀ ਲਈ ਤਾਂ ਉਸ ਦੇ ਕੱਪੜਿਆਂ ਅਤੇ ਬਿਸਤਰਿਆਂ ਦੀਆਂ ਪਰਤਾਂ ਵਿਚਕਾਰੋਂ ਇਹ ਹਾਈ-ਟੈੱਕ ਉਪਕਰਨ ਬਰਾਮਦ ਹੋਏ। ਬਰਾਮਦ ਸਾਮਾਨ 'ਚ ਦੋ ਰਾਊਟਰ, ਦੋ ਕਾਰਡ ਰੀਡਰ, ਈਅਰਫੋਨ ਅਤੇ 500 ਰੁਪਏ ਦੇ ਨੋਟਾਂ 'ਚ ਕੁੱਲ 31,000 ਰੁਪਏ ਸ਼ਾਮਲ ਹਨ।

ਇਸ ਤੋਂ ਬਾਅਦ ਹੇਸਟਿੰਗਜ਼ ਥਾਣੇ 'ਚ ਰਸਮੀ ਸ਼ਿਕਾਇਤ ਦਰਜ ਕਰਵਾਈ ਗਈ ਹੈ। ਜਾਂਚ ਏਜੰਸੀਆਂ ਦੇ ਮੁੱਢਲੇ ਮੁਲਾਂਕਣ ਅਨੁਸਾਰ, ਆਫਤਾਬ ਜੇਲ੍ਹ ਦੇ ਅੰਦਰੋਂ ਬੇਝਿਜਕ ਵ੍ਹਟਸਐਪ ਤੇ ਟੈਲੀਗ੍ਰਾਮ ਵਰਗੀਆਂ ਐਪਸ ਦੀ ਵਰਤੋਂ ਕਰ ਰਿਹਾ ਸੀ। ਖੁਫੀਆ ਏਜੰਸੀਆਂ ਹੁਣ ਇਸ ਗੱਲ ਦੀ ਡੂੰਘਾਈ ਨਾਲ ਜਾਂਚ ਕਰ ਰਹੀਆਂ ਹਨ ਕਿ ਕੀ ਉਹ ਪਾਕਿਸਤਾਨ ਸਥਿਤ ਆਪਣੇ ਪੁਰਾਣੇ ਆਕਾਵਾਂ ਜਾਂ ਸਰਹੱਦ ਪਾਰ ਅੱਤਵਾਦੀ ਨੈੱਟਵਰਕ ਦੇ ਸੰਪਰਕ 'ਚ ਸੀ।

ਇਸ ਘਟਨਾ ਨੇ ਜੇਲ੍ਹ ਦੇ ਅੰਦਰ ਫੈਲੇ ਭ੍ਰਿਸ਼ਟਾਚਾਰ ਦੀ ਪੋਲ ਖੋਲ੍ਹ ਦਿੱਤੀ ਹੈ। ਆਖ਼ਰ ਇੰਨੀ ਸਖ਼ਤ ਤਿੰਨ-ਪੱਧਰੀ ਸੁਰੱਖਿਆ ਵਿਵਸਥਾ ਅਤੇ ਸੀਸੀਟੀਵੀ ਨਿਗਰਾਨੀ ਦੇ ਬਾਵਜੂਦ ਇਹ ਇਲੈਕਟ੍ਰਾਨਿਕ ਉਪਕਰਨ ਤੇ ਨਕਦੀ ਜੇਲ੍ਹ ਦੇ ਅੰਦਰ ਕਿਵੇਂ ਪਹੁੰਚੇ? ਪੁਲਿਸ ਉਨ੍ਹਾਂ ਜੇਲ੍ਹ ਕਰਮਚਾਰੀਆਂ ਦੀ ਪਛਾਣ ਕਰਨ 'ਚ ਜੁਟੀ ਹੈ, ਜਿਨ੍ਹਾਂ ਨੇ ਪੈਸਿਆਂ ਦੇ ਲਾਲਚ 'ਚ ਇਸ ਅੱਤਵਾਦੀ ਦੀ ਮਦਦ ਕੀਤੀ।