ਭਾਰਤੀ ਸ਼ੇਅਰ ਬਾਜ਼ਾਰ ਨੂੰ ਦੋਹਰਾ ਝਟਕਾ: ਹੁਣ ਦੱਖਣੀ ਕੋਰੀਆ ਨੇ ਪਛਾੜਿਆ, ਹੱਥੋਂ ਫਿਸਲੀ ਛੇਵੀਂ ਰੈਂਕ

ਨਵੀਂ ਦਿੱਲੀ: ਭਾਰਤ ਦੇ ਸ਼ੇਅਰ ਬਾਜ਼ਾਰ ਨੂੰ ਇੱਕ ਹੋਰ ਵੱਡਾ ਝਟਕਾ ਲੱਗਾ ਹੈ। ਦੱਖਣੀ ਕੋਰੀਆ ਦੇ ਸ਼ੇਅਰ ਬਾਜ਼ਾਰ ਨੇ ਭਾਰਤ ਦੇ ਸ਼ੇਅਰ ਬਾਜ਼ਾਰ ਨੂੰ ਪਿੱਛੇ ਛੱਡ ਦਿੱਤਾ ਹੈ। ਇੱਕ ਹਫ਼ਤੇ ਵਿੱਚ ਇਹ ਦੂਜੀ ਵਾਰ ਹੋਇਆ ਹੈ ਜਦੋਂ ਭਾਰਤੀ ਬਾਜ਼ਾਰ ਨੂੰ ਦੋਹਰਾ ਝਟਕਾ ਲੱਗਾ। ਇਸ ਤੋਂ ਪਹਿਲਾਂ 26 ਮਈ ਨੂੰ ਤਾਇਵਾਨ ਦੇ ਸ਼ੇਅਰ ਬਾਜ਼ਾਰ ਨੇ ਭਾਰਤ ਨੂੰ ਪਛਾੜਿਆ ਸੀ ਅਤੇ ਹੁਣ ਦੱਖਣੀ ਕੋਰੀਆ ਦੇ ਸਟਾਕ ਮਾਰਕੀਟ ਨੇ ਭਾਰਤ ਤੋਂ ਨੰਬਰ 6 ਦੀ ਪੁਜੀਸ਼ਨ ਖੋਹ ਲਈ ਹੈ।

ਦੱਖਣੀ ਕੋਰੀਆ ਅਤੇ ਤਾਇਵਾਨ ਦੇ ਸ਼ੇਅਰ ਬਾਜ਼ਾਰਾਂ ਵਿੱਚ ਆਈ ਤੇਜ਼ੀ ਦਾ ਮੁੱਖ ਕਾਰਨ ਸੈਮੀਕੰਡਕਟਰ ਰਿਹਾ ਹੈ। ਦੋਵਾਂ ਦੇਸ਼ਾਂ ਦੀਆਂ ਸੈਮੀਕੰਡਕਟਰ ਖੇਤਰ ਦੀਆਂ ਦਿੱਗਜ ਕੰਪਨੀਆਂ ਵਿੱਚ ਜ਼ਬਰਦਸਤ ਉਛਾਲ ਦੇਖਿਆ ਗਿਆ, ਜਿਸ ਕਾਰਨ ਦੋਵਾਂ ਦੇਸ਼ਾਂ ਦੇ ਸ਼ੇਅਰ ਬਾਜ਼ਾਰਾਂ ਵਿੱਚ ਵਾਧਾ ਹੋਇਆ।

4.8 ਟ੍ਰਿਲੀਅਨ ਡਾਲਰ 'ਤੇ ਆਇਆ ਭਾਰਤੀ ਬਾਜ਼ਾਰ ਦਾ ਮਾਰਕੀਟ ਕੈਪ

ਸੈਮੀਕੰਡਕਟਰ ਖੇਤਰ ਦੀਆਂ ਕੰਪਨੀਆਂ ਵਿੱਚ ਆ ਰਿਹਾ ਇਹ ਉਛਾਲ ਵਿਸ਼ਵ ਪੱਧਰ 'ਤੇ ਆਰਟੀਫੀਸ਼ੀਅਲ ਇੰਟੈਲੀਜੈਂਸ (AI) ਦੇ ਖੇਤਰ ਵਿੱਚ ਆਈ ਤੇਜ਼ੀ ਦੇ ਫਾਇਦੇ ਕਾਰਨ ਹੈ। ਦੱਖਣੀ ਕੋਰੀਆ ਵਿੱਚ ਲਿਸਟਡ ਕੰਪਨੀਆਂ ਦਾ ਕੁੱਲ ਮਾਰਕੀਟ ਕੈਪ ਇਸ ਸਾਲ 86% ਵਧ ਕੇ 5 ਟ੍ਰਿਲੀਅਨ ਡਾਲਰ ਤੱਕ ਪਹੁੰਚ ਗਿਆ ਹੈ। ਇਸ ਦੇ ਉਲਟ, ਭਾਰਤੀ ਬਾਜ਼ਾਰ ਦਾ ਮਾਰਕੀਟ ਕੈਪੀਟਲਾਈਜ਼ੇਸ਼ਨ ਫਿਸਲ ਕੇ ਲਗਭਗ 4.8 ਟ੍ਰਿਲੀਅਨ ਡਾਲਰ 'ਤੇ ਆ ਗਿਆ ਹੈ।

2026 ਵਿੱਚ ਹੁਣ ਤੱਕ Sensex ਅਤੇ Nifty ਵਿੱਚ ਕਰਮਵਾਰ 12 ਫੀਸਦੀ ਅਤੇ 15 ਫੀਸਦੀ ਦੀ ਗਿਰਾਵਟ ਆਈ ਹੈ। ਇਹ ਮਾੜਾ ਪ੍ਰਦਰਸ਼ਨ ਸਤੰਬਰ 2024 ਦੇ ਅਖੀਰ ਤੋਂ ਹੀ ਜਾਰੀ ਹੈ, ਜਿਸ ਦੇ ਮੁੱਖ ਕਾਰਨ - ਉੱਚ ਵੈਲਿਊਏਸ਼ਨ, ਕਮਜ਼ੋਰ ਕਮਾਈ ਅਤੇ ਵਿਦੇਸ਼ੀ ਨਿਵੇਸ਼ਕਾਂ ਦੁਆਰਾ ਲਗਾਤਾਰ ਕੀਤੀ ਜਾ ਰਹੀ ਬਿਕਵਾਲੀ ਹੈ।

Samsung ਅਤੇ SK Hynix ਨੇ ਛੂਹਿਆ 1 ਟ੍ਰਿਲੀਅਨ ਡਾਲਰ ਦਾ ਅੰਕੜਾ

ਦੱਖਣੀ ਕੋਰੀਆ ਦੇ ਬਾਜ਼ਾਰ ਵਿੱਚ ਲਿਸਟਡ ਸੈਮਸੰਗ ਇਲੈਕਟ੍ਰਾਨਿਕਸ ਅਤੇ ਐਸਕੇ ਹਾਇਨਿਕਸ ਨੇ 1 ਟ੍ਰਿਲੀਅਨ ਡਾਲਰ ਦੇ ਮਾਰਕੀਟ ਕੈਪ ਦੇ ਅੰਕੜੇ ਨੂੰ ਪਾਰ ਕਰ ਲਿਆ ਹੈ। ਦੋਵਾਂ ਕੰਪਨੀਆਂ ਨੇ ਬਾਜ਼ਾਰ ਵਿੱਚ ਆਈ ਤੇਜ਼ੀ ਦੀ ਅਗਵਾਈ ਕੀਤੀ। AI ਮੈਮੋਰੀ-ਚਿੱਪ ਟੈਕਨਾਲੋਜੀ ਵਿੱਚ ਉਨ੍ਹਾਂ ਦੀ ਬੜ੍ਹਤ ਨੇ Kospi ਇੰਡੈਕਸ ਨੂੰ 2026 ਵਿੱਚ 100% ਤੋਂ ਵੱਧ ਦਾ ਲਾਭ ਦਿਵਾਉਣ ਵਿੱਚ ਮਦਦ ਕੀਤੀ ਹੈ। ਇਸ ਸਾਲ ਦੱਖਣੀ ਕੋਰੀਆ ਨੇ ਕੈਨੇਡਾ, ਜਰਮਨੀ, ਯੂਕੇ ਅਤੇ ਫਰਾਂਸ ਵਰਗੇ ਕਈ ਵੱਡੇ ਬਾਜ਼ਾਰਾਂ ਨੂੰ ਵੀ ਪਿੱਛੇ ਛੱਡ ਦਿੱਤਾ ਹੈ।