ਮਹਿੰਗੇ ਕੱਪੜਿਆਂ 'ਤੇ ਲੱਗ ਗਿਆ ਤੇਲ ਦਾ ਜ਼ਿੱਦੀ ਦਾਗ? ਡਰਾਈ ਕਲੀਨਿੰਗ ਤੋਂ ਪਹਿਲਾਂ ਅਜ਼ਮਾਓ ਇਹ ਆਸਾਨ ਤਰੀਕੇ

ਲਾਈਫਸਟਾਈਲ ਡੈਸਕ, ਨਵੀਂ ਦਿੱਲੀ : ਖਾਣਾ ਬਣਾਉਂਦੇ ਜਾਂ ਖਾਂਦੇ ਸਮੇਂ ਕੱਪੜਿਆਂ 'ਤੇ ਤੇਲ ਦੇ ਦਾਗ ਲੱਗਣਾ ਬਿਲਕੁਲ ਆਮ ਗੱਲ ਹੈ। ਪਰ ਕਈ ਵਾਰ ਇਹ ਦਾਗ ਕੱਪੜੇ 'ਤੇ ਇੰਨੇ ਪੱਕੇ ਹੋ ਜਾਂਦੇ ਹਨ ਕਿ ਆਮ ਤਰੀਕੇ ਨਾਲ ਧੋਣ ਤੋਂ ਬਾਅਦ ਵੀ ਨਹੀਂ ਜਾਂਦੇ। ਉੱਪਰੋਂ ਜੇਕਰ ਦਾਗ ਮਹਿੰਗੇ ’ਤੇ ਨਵੇਂ ਕੱਪੜਿਆਂ 'ਤੇ ਲੱਗ ਜਾਣ ਤਾਂ ਉਨ੍ਹਾਂ ਨੂੰ ਘਰ ’ਚ ਰਗੜ ਕੇ ਸਾਫ ਕਰਨਾ ਮੁਸ਼ਕਲ ਹੋ ਜਾਂਦਾ ਹੈ। ਅਜਿਹੇ ’ਚ ਲੋਕਾਂ ਨੂੰ ਇਸ ਨੂੰ ਸਾਫ ਕਰਨ ਦਾ ਇੱਕੋ ਵਿਕਲਪ ਨਜ਼ਰ ਆਉਂਦਾ ਹੈ—ਡਰਾਈ ਕਲੀਨਿੰਗ। ਪਰ ਕੁਝ ਹੈਕਸ ਦੀ ਮਦਦ ਨਾਲ ਇਨ੍ਹਾਂ ਦਾਗਾਂ ਨੂੰ ਆਸਾਨੀ ਨਾਲ ਸਾਫ ਕੀਤਾ ਜਾ ਸਕਦਾ ਹੈ।

ਕੌਰਨਸਟਾਰਚ ਜਾਂ ਬੇਕਿੰਗ ਸੋਡਾ

ਕੱਪੜੇ 'ਤੇ ਤੇਲ ਡਿੱਗਣ ਤੋਂ ਬਾਅਦ ਉਸ ਨੂੰ ਤੁਰੰਤ ਡਿਟਰਜੈਂਟ ਨਾਲ ਧੋਣ ਦੀ ਬਜਾਏ ਉਸ 'ਤੇ 1-2 ਚਮਚ ਕੌਰਨਸਟਾਰਚ ਜਾਂ ਬੇਕਿੰਗ ਸੋਡਾ ਪਾਓ। ਇਸ ਨੂੰ ਕੱਪੜੇ 'ਤੇ ਪਾ ਕੇ ਘੱਟੋ-ਘੱਟ 10-15 ਮਿੰਟ ਲਈ ਛੱਡ ਦਿਓ। ਤੁਸੀਂ ਪਾਊਡਰ ਨੂੰ ਝਾੜ ਕੇ ਵੀ ਹਟਾ ਸਕਦੇ ਹੋ ’ਤੇ ਜੇਕਰ ਦਾਗ ਪੱਕਾ ਹੈ ਤਾਂ ਇਸ ਨੂੰ ਬੁਰਸ਼ ਨਾਲ ਹਲਕੇ ਹੱਥ ਨਾਲ ਰਗੜ ਕੇ ਹਟਾਓ। ਇਹ ਪਾਊਡਰ ਕੱਪੜੇ ’ਚੋਂ ਤੇਲ ਸੋਖਣ ’ਚ ਮਦਦ ਕਰੇਗਾ, ਜਿਸ ਨਾਲ ਕੱਪੜਾ ਧੋਣ ਸਮੇਂ ਤੇਲ ਦਾ ਦਾਗ ਕੱਢਣ ’ਚ ਜ਼ਿਆਦਾ ਮੁਸ਼ਕਲ ਨਹੀਂ ਹੋਵੇਗੀ। ਪੱਕੇ ਦਾਗ ਦੀ ਸਥਿਤੀ ’ਚ ਪਾਊਡਰ ਨੂੰ 30 ਮਿੰਟ ਤੱਕ ਲੱਗਾ ਰਹਿਣ ਦਿਓ ’ਤੇ ਇਸ ਤੋਂ ਬਾਅਦ ਹੀ ਕੱਪੜੇ ਨੂੰ ਡਿਟਰਜੈਂਟ ਨਾਲ ਧੋਵੋ। ਦਾਗ ਛੁੱਟਣ ਦੀ ਇੱਕ ਨਿਸ਼ਾਨੀ ਇਹ ਹੈ ਕਿ ਪਾਊਡਰ ਕੱਪੜੇ 'ਤੇ ਚਿਪਕਣ ਲੱਗੇਗਾ ਜਾਂ ਫਿਰ ਉਸ ਦਾ ਰੰਗ ਹਲਕਾ ਜਿਹਾ ਬਦਲ ਜਾਵੇਗਾ।

ਟਿਸ਼ੂ ਜਾਂ ਪੇਪਰ ਟਾਵਲ

ਕੱਪੜੇ ਨੂੰ ਕਿਸੇ ਲੱਕੜ ਦੇ ਕਾਰਡਬੋਰਡ 'ਤੇ ਰੱਖੋ, ਤਾਂ ਜੋ ਕੱਪੜੇ ਦੇ ਦੂਜੇ ਪਾਸੇ ਤੇਲ ਨਾ ਪਹੁੰਚੇ। ਇਸ ਤੋਂ ਬਾਅਦ ਉਸ 'ਤੇ ਟਿਸ਼ੂ ਜਾਂ ਪੇਪਰ ਟਾਵਲ ਰੱਖ ਕੇ ਹਲਕੇ ਹੱਥ ਨਾਲ ਦਬਾਓ। ਇਸ ਦੀ ਮਦਦ ਨਾਲ ਕੱਪੜੇ 'ਤੇ ਲੱਗਾ ਤੇਲ ਟਿਸ਼ੂ ’ਚ ਆ ਜਾਵੇਗਾ। ਇਸ ਗੱਲ ਦਾ ਧਿਆਨ ਰੱਖੋ ਕਿ ਇਸ ਦੌਰਾਨ ਕੱਪੜੇ ਨੂੰ ਭੁੱਲ ਕੇ ਵੀ ਨਾ ਰਗੜੋ। ਹੁਣ ਹੱਥ ’ਚ ਥੋੜ੍ਹਾ ਡਿਟਰਜੈਂਟ ਲਓ ’ਤੇ ਉਸ ਨੂੰ ਕੱਪੜੇ 'ਤੇ ਲਗਾ ਕੇ ਉਂਗਲਾਂ ਦੀ ਮਦਦ ਨਾਲ ਹੌਲੀ-ਹੌਲੀ ਰਗੜੋ। ਇਸ ਲਈ ਜੇਕਰ ਡਿਸ਼ ਡਿਟਰਜੈਂਟ ਦੀ ਵਰਤੋਂ ਕੀਤੀ ਜਾਵੇ ਤਾਂ ਹੋਰ ਵੀ ਵਧੀਆ ਰਹੇਗਾ, ਕਿਉਂਕਿ ਇਸ ’ਚ ਮੌਜੂਦ ਸਰਫੈਕਟੈਂਟ ਤੇਲ ਦੀ ਪਰਤ ਨੂੰ ਤੋੜਨ ’ਚ ਮਦਦ ਕਰਦਾ ਹੈ।

ਫੈਬਰਿਕ ਦਾ ਧਿਆਨ ਰੱਖੋ

ਇਸ ਗੱਲ ਦਾ ਵੀ ਖਾਸ ਧਿਆਨ ਰੱਖੋ ਕਿ ਹਰ ਤਰ੍ਹਾਂ ਦੇ ਫੈਬਰਿਕ 'ਤੇ ਇੱਕੋ ਤਰੀਕਾ ਕੰਮ ਨਹੀਂ ਕਰੇਗਾ। ਕਾਟਨ, ਡੈਨਿਮ ’ਤੇ ਪੌਲੀਐਸਟਰ 'ਤੇ ਕੌਰਨਸਟਾਰਚ ਜਾਂ ਬੇਕਿੰਗ ਸੋਡਾ ਦੀ ਵਰਤੋਂ ਕੀਤੀ ਜਾ ਸਕਦੀ ਹੈ। ਜਦਕਿ ਸਿਲਕ, ਜੌਰਜੈੱਟ ’ਤੇ ਕੈਸ਼ਮੀਅਰ ਵਰਗੇ ਨਾਜ਼ੁਕ ਕੱਪੜਿਆਂ 'ਤੇ ਇਹ ਘਰੇਲੂ ਨੁਸਖੇ ਵਰਤਣ ਨਾਲ ਫੈਬਰਿਕ ਨੂੰ ਨੁਕਸਾਨ ਪਹੁੰਚ ਸਕਦਾ ਹੈ। ਇਨ੍ਹਾਂ ਲਈ ਡਰਾਈ ਕਲੀਨਿੰਗ ਹੀ ਸਭ ਤੋਂ ਵਧੀਆ ਵਿਕਲਪ ਹੈ।