- ਸ਼ਹਿਰ ਚੁਣੋ
- ਈ-ਪੇਪਰ
- ਵੈੱਬ ਸਟੋਰੀਜ਼
- ਸ਼ਹਿਰ ਚੁਣੋ
- ਈ-ਪੇਪਰ
- ਵੈੱਬ ਸਟੋਰੀਜ਼
ਕੀ ਸੱਚਮੁੱਚ ਬਾਜ਼ਾਰ ’ਚ ਵਿਕ ਰਹੇ ਹਨ ਪਲਾਸਟਿਕ ਦੇ ਅੰਡੇ? FSSAI ਨੇ ਦੱਸਿਆ ਪਾਣੀ ਵਾਲਾ ਸੌਖਾ ਟੈਸਟ, ਤੁਰੰਤ ਖੁੱਲ੍ਹ ਜਾਵੇਗਾ ਭੇਤ
ਇੰਟਰਨੈੱਟ ’ਤੇ ਵਾਇਰਲ ਹੋ ਰਹੀਆਂ 'ਪਲਾਸਟਿਕ ਵਾਲੇ ਅੰਡਿਆਂ' ਦੀਆਂ ਵੀਡੀਓਜ਼ ਵਿਚਕਾਰ FSSAI ਨੇ ਅੰਡਿਆਂ ਦੀ ਤਾਜ਼ਗੀ ਜਾਂਚਣ ਲਈ ਇੱਕ ਸੌਖਾ ਵਾਟਰ ਟੈਸਟ ਦੱਸਿਆ ਹੈ।
Posted By Paramjit Kaur
Publish Date: Thu, 01 Oct 2026 11:15 AM (IST)
Updated Date: Thu, 01 Oct 2026 11:18 AM (IST)
ਲਾਈਫਸਟਾਈਲ ਡੈਸਕ, ਨਵੀਂ ਦਿੱਲੀ : ਅੱਜਕੱਲ੍ਹ ਇੰਟਰਨੈੱਟ ’ਤੇ 'ਪਲਾਸਟਿਕ ਵਾਲੇ ਅੰਡਿਆਂ' ਦੀਆਂ ਵੀਡੀਓਜ਼ ਖੂਬ ਵਾਇਰਲ ਹੋ ਰਹੀਆਂ ਹਨ। ਇਨ੍ਹਾਂ ਨੂੰ ਦੇਖ ਕੇ ਕਿਸੇ ਦੇ ਮਨ ’ਚ ਵੀ ਡਰ ਪੈਦਾ ਹੋ ਸਕਦਾ ਹੈ ਕਿ ਕਿਤੇ ਅਸੀਂ ਜੋ ਅੰਡੇ ਖਾ ਰਹੇ ਹਾਂ, ਉਹ ਨਕਲੀ ਤਾਂ ਨਹੀਂ? ਬਾਜ਼ਾਰ ’ਚ ਵਿਕ ਰਹੇ ਅੰਡਿਆਂ ਦੀ ਅਸਲੀਅਤ ਨੂੰ ਲੈ ਕੇ ਲੋਕਾਂ ’ਚ ਅਕਸਰ ਭੰਬਲਭੂਸਾ ਰਹਿੰਦਾ ਹੈ। ਇਸੇ ਡਰ ਤੇ ਗਲਤਫਹਿਮੀ ਨੂੰ ਦੂਰ ਕਰਨ ਲਈ ਭਾਰਤ ਦੀ ਫੂਡ ਸੇਫਟੀ ਅਥਾਰਟੀ FSSAI ਨੇ ਇੱਕ ਬਹੁਤ ਹੀ ਕੰਮ ਦਾ ਤਰੀਕਾ ਸਾਂਝਾ ਕੀਤਾ ਹੈ। ਇਸ ਸੌਖੇ ਟੈਸਟ ਰਾਹੀਂ ਤੁਸੀਂ ਆਪਣੀ ਰਸੋਈ ’ਚ ਹੀ ਪਤਾ ਲਗਾ ਸਕਦੇ ਹੋ ਕਿ ਤੁਹਾਡਾ ਅੰਡਾ ਤਾਜ਼ਾ ਹੈ ਜਾਂ ਪੁਰਾਣਾ।
ਘਰ ਬੈਠੇ ਪਾਣੀ ਨਾਲ ਕਰੋ ਅੰਡੇ ਦੀ ਜਾਂਚ
FSSAI ਨੇ ਅੰਡੇ ਦੀ ਤਾਜ਼ਗੀ ਪਰਖਣ ਲਈ ਇੱਕ ਪੁਰਾਣਾ ਤੇ ਕਾਰਗਰ ਤਰੀਕਾ ਦੱਸਿਆ ਹੈ, ਜਿਸ ਨੂੰ ਵਾਟਰ ਟੈਸਟ ਕਿਹਾ ਜਾਂਦਾ ਹੈ। ਇਸ ਲਈ ਤੁਹਾਨੂੰ ਕਿਸੇ ਵਿਗਿਆਨਕ ਉਪਕਰਣ ਦੀ ਲੋੜ ਨਹੀਂ। ਸਿਰਫ਼ ਇੱਕ ਕੱਚ ਦਾ ਗਿਲਾਸ ਜਾਂ ਡੂੰਘਾ ਬਰਤਨ ਲਓ ਤੇ ਉਸ ’ਚ ਪਾਣੀ ਭਰੋ।
ਹੁਣ ਪਾਣੀ ’ਚ ਅੰਡਾ ਪਾਓ ਤੇ ਦੇਖੋ ਕੀ ਹੁੰਦਾ ਹੈ:
ਤਾਜ਼ਾ ਅੰਡਾ: ਜੇ ਅੰਡਾ ਬਿਲਕੁਲ ਤਾਜ਼ਾ ਤੇ ਖਾਣ ਯੋਗ ਹੈ ਤਾਂ ਉਹ ਸਿੱਧਾ ਬਰਤਨ ਦੇ ਤਲ ’ਤੇ ਜਾ ਕੇ ਆਰਾਮ ਨਾਲ ਟਿਕ ਜਾਵੇਗਾ।
ਪੁਰਾਣਾ ਅੰਡਾ: ਜੇ ਅੰਡਾ ਬਾਸੀ ਜਾਂ ਕਾਫ਼ੀ ਪੁਰਾਣਾ ਹੋ ਚੁੱਕਾ ਹੈ ਤਾਂ ਉਹ ਪਾਣੀ ’ਚ ਉੱਪਰ ਵੱਲ ਤੈਰਨ ਲੱਗੇਗਾ ਜਾਂ ਫਿਰ ਸਿੱਧਾ ਖੜ੍ਹਾ ਹੋ ਜਾਵੇਗਾ।
ਜਰਦੀ ਤੇ ਸਫ਼ੈਦੀ ਦਾ ਮਿਲਣਾ ਕੀ ਨਕਲੀ ਅੰਡੇ ਦੀ ਨਿਸ਼ਾਨੀ ਹੈ?
ਸੋਸ਼ਲ ਮੀਡੀਆ ’ਤੇ ਸਭ ਤੋਂ ਵੱਧ ਫੈਲਾਈ ਜਾਣ ਵਾਲੀ ਅਫ਼ਵਾਹ ਇਹ ਹੈ ਕਿ ਜੇਕਰ ਅੰਡਾ ਤੋੜਦੇ ਹੀ ਉਸ ਦੀ ਪੀਲੀ ਜਰਦੀ ਤੇ ਸਫ਼ੈਦ ਹਿੱਸਾ ਆਪਸ ’ਚ ਘੁਲ ਜਾਣ ਤਾਂ ਅੰਡਾ ਪਲਾਸਟਿਕ ਦਾ ਬਣਿਆ ਹੋਇਆ ਹੈ। FSSAI ਨੇ ਇਸ ਦਾਅਵੇ ਨੂੰ ਪੂਰੀ ਤਰ੍ਹਾਂ ਬੇਬੁਨਿਆਦ ਦੱਸਿਆ ਹੈ।
ਅਸਲ ’ਚ ਜਿਵੇਂ-ਜਿਵੇਂ ਅੰਡਾ ਪੁਰਾਣਾ ਹੁੰਦਾ ਜਾਂਦਾ ਹੈ, ਉਸ ਦੇ ਅੰਦਰ ਦੀ ਬਣਤਰ ਤੇ ਮਜ਼ਬੂਤੀ ਕਮਜ਼ੋਰ ਹੋਣ ਲੱਗਦੀ ਹੈ। ਇਸ ਕਾਰਨ ਜਰਦੀ ਤੇ ਸਫ਼ੈਦੀ ਆਸਾਨੀ ਨਾਲ ਆਪਸ ’ਚ ਮਿਲ ਜਾਂਦੇ ਹਨ। ਇਹ ਅੰਡੇ ਦੇ ਪੁਰਾਣੇ ਹੋਣ ਦੀ ਇੱਕ ਕੁਦਰਤੀ ਪ੍ਰਕਿਰਿਆ ਹੈ, ਨਾ ਕਿ ਉਸ ਦੇ ਨਕਲੀ ਜਾਂ ਪਲਾਸਟਿਕ ਹੋਣ ਦਾ ਕੋਈ ਸਬੂਤ।
ਅੰਡਾ ਅੰਦਰੋਂ ਸੁੱਕ ਕਿਉਂ ਜਾਂਦਾ ਹੈ ਤੇ ਪਾਣੀ ’ਚ ਕਿਉਂ ਤੈਰਦਾ ਹੈ?
ਸਾਨੂੰ ਅੰਡੇ ਦਾ ਬਾਹਰੀ ਛਿਲਕਾ ਕਾਫ਼ੀ ਸਖ਼ਤ ਲੱਗਦਾ ਹੈ, ਪਰ ਅਸਲ ’ਚ ਇਸ ’ਚ ਅਣਗਿਣਤ ਬਹੁਤ ਬਾਰੀਕ ਛੇਕ ਹੁੰਦੇ ਹਨ। ਸਮਾਂ ਬੀਤਣ ਦੇ ਨਾਲ ਇਨ੍ਹਾਂ ਛੋਟੇ ਛੇਕਾਂ ਰਾਹੀਂ ਅੰਡੇ ਦੇ ਅੰਦਰਲੀ ਨਮੀ ਭਾਫ਼ ਬਣ ਕੇ ਬਾਹਰ ਨਿਕਲ ਜਾਂਦੀ ਹੈ ਤੇ ਉਸ ਦੀ ਥਾਂ ਹਵਾ ਲੈ ਲੈਂਦੀ ਹੈ।
ਅੰਡੇ ਦੇ ਅੰਦਰ ਹਵਾ ਦਾ ਇਹ ਬੁਲਬੁਲਾ ਵੱਡਾ ਹੁੰਦਾ ਜਾਂਦਾ ਹੈ, ਜਿਸ ਕਾਰਨ ਅੰਡਾ ਹਲਕਾ ਹੋ ਕੇ ਪਾਣੀ ’ਚ ਤੈਰਨ ਲੱਗਦਾ ਹੈ। ਇਸੇ ਕਾਰਨ ਜਦੋਂ ਤੁਸੀਂ ਕਿਸੇ ਬਹੁਤ ਪੁਰਾਣੇ ਅੰਡੇ ਨੂੰ ਤੋੜਦੇ ਹੋ ਤਾਂ ਉਹ ਅੰਦਰੋਂ ਕੁਝ ਸੁੱਕਾ-ਸੁੱਕਾ ਜਿਹਾ ਲੱਗ ਸਕਦਾ ਹੈ।
ਇਸ ਲਈ ਜੇਕਰ ਤੁਹਾਨੂੰ ਸੋਸ਼ਲ ਮੀਡੀਆ ’ਤੇ ਕੋਈ ਅਜਿਹੀ ਵੀਡੀਓ ਦਿਖਾਈ ਦੇਵੇ ਜੋ ਤੁਹਾਨੂੰ 'ਪਲਾਸਟਿਕ ਦੇ ਅੰਡਿਆਂ' ਦੇ ਨਾਮ ’ਤੇ ਡਰਾਉਣ ਦੀ ਕੋਸ਼ਿਸ਼ ਕਰੇ ਤਾਂ ਘਬਰਾਉਣ ਦੀ ਲੋੜ ਨਹੀਂ। ਤੁਸੀਂ ਸਿਰਫ਼ ਇੱਕ ਗਿਲਾਸ ਪਾਣੀ ਲਓ ਤੇ ਅੰਡੇ ਦੀ ਤਾਜ਼ਗੀ ਦੀ ਜਾਂਚ ਕਰ ਲਓ।