ਕਿਰਾਏ ਦਾ ਘਰ ਲੈਣ ਜਾ ਰਹੇ ਹੋ? ਰੈਂਟ ਐਗਰੀਮੈਂਟ ’ਚ ਦੇਖ ਲਓ ਇਹ 5 ਗੱਲਾਂ, ਨਹੀਂ ਤਾਂ ਮਕਾਨ ਮਾਲਕ ਨਾਲ ਆਏ ਦਿਨ ਹੋਵੇਗੀ ਖਿਚੋਤਾਣ

ਲਾਈਫਸਟਾਈਲ ਡੈਸਕ, ਨਵੀਂ ਦਿੱਲੀ : ਕਿਰਾਏ ਦਾ ਮਕਾਨ ਲੈਣ ਤੋਂ ਪਹਿਲਾਂ ਰੈਂਟ ਐਗਰੀਮੈਂਟ ਬਣਵਾਉਣਾ ਸਭ ਤੋਂ ਅਹਿਮ ਕਦਮ ਹੁੰਦਾ ਹੈ। ਕਈ ਵਾਰ ਅਸੀਂ ਜਲਦਬਾਜ਼ੀ ’ਚ ਬਿਨਾਂ ਪੜ੍ਹੇ ਕਾਗਜ਼ਾਂ ’ਤੇ ਸਾਈਨ ਕਰ ਦਿੰਦੇ ਹਾਂ, ਜਿਸ ਕਾਰਨ ਬਾਅਦ ’ਚ ਮਕਾਨ ਮਾਲਕ ਤੇ ਕਿਰਾਏਦਾਰ ਵਿਚਕਾਰ ਖਿੱਚੋਤਾਣ ਤੇ ਵਿਵਾਦ ਦੀ ਸਥਿਤੀ ਪੈਦਾ ਹੋ ਜਾਂਦੀ ਹੈ।

ਜੇਕਰ ਤੁਸੀਂ ਵੀ ਰੈਂਟ ਐਗਰੀਮੈਂਟ ਸਾਈਨ ਕਰਨ ਜਾ ਰਹੇ ਹੋ ਤਾਂ ਭਵਿੱਖ ’ਚ ਕਿਸੇ ਵੀ ਪਰੇਸ਼ਾਨੀ ਤੋਂ ਬਚਣ ਲਈ ਇਨ੍ਹਾਂ ਜ਼ਰੂਰੀ ਗੱਲਾਂ ਦਾ ਧਿਆਨ ਰੱਖਣਾ ਬਹੁਤ ਜ਼ਰੂਰੀ ਹੈ।

ਰੈਂਟ ਐਗਰੀਮੈਂਟ ਪੜ੍ਹੇ ਬਿਨਾਂ ਨਾ ਕਰੋ ਕੋਈ ਡੀਲ

ਦਸਤਾਵੇਜ਼ ’ਚ ਸਭ ਤੋਂ ਪਹਿਲਾਂ ਇਹ ਚੈੱਕ ਕਰੋ ਕਿ ਤੁਹਾਡੇ ਤੇ ਮਕਾਨ ਮਾਲਕ ਵਿਚਕਾਰ ਕਿੰਨੇ ਕਿਰਾਏ ’ਤੇ ਸਹਿਮਤੀ ਹੋਈ ਹੈ। ਇਹ ਵੀ ਦੇਖੋ ਕਿ ਤੁਸੀਂ ਕਿਰਾਇਆ ਕਿਸ ਤਰੀਕੇ ਨਾਲ ਅਦਾ ਕਰੋਗੇ। ਸਭ ਤੋਂ ਜ਼ਰੂਰੀ ਗੱਲ ਇਹ ਹੈ ਕਿ ਐਗਰੀਮੈਂਟ ’ਚ ਸਪੱਸ਼ਟ ਹੋਣਾ ਚਾਹੀਦਾ ਹੈ ਕਿ ਹਰ ਸਾਲ ਕਿਰਾਏ ’ਚ ਕਿੰਨੇ ਪ੍ਰਤੀਸ਼ਤ ਵਾਧਾ ਹੋਵੇਗਾ। ਜੇਕਰ ਇਹ ਹਿੱਸਾ ਖਾਲੀ ਹੈ ਤਾਂ ਤੁਸੀਂ ਕਿਰਾਏ ਨੂੰ ਲੈ ਕੇ ਗੱਲਬਾਤ ਕਰ ਸਕਦੇ ਹੋ। ਨਾਲ ਹੀ, ਯਾਦ ਰੱਖੋ ਕਿ 11 ਮਹੀਨਿਆਂ ਤੋਂ ਵੱਧ ਦੀ ਮਿਆਦ ਵਾਲੇ ਐਗਰੀਮੈਂਟ ਦੀ ਕਾਨੂੰਨੀ ਤੌਰ ’ਤੇ ਰਜਿਸਟ੍ਰੇਸ਼ਨ ਕਰਵਾਉਣੀ ਲਾਜ਼ਮੀ ਹੁੰਦੀ ਹੈ।

ਕਿਰਾਇਆ ਦੇਣ ’ਚ ਦੇਰੀ ਹੋਈ ਤਾਂ ਕੀ ਦੇਣੀ ਪਵੇਗੀ ਪੈਨਲਟੀ?

ਜ਼ਿੰਦਗੀ ’ਚ ਕਈ ਵਾਰ ਅਚਾਨਕ ਖਰਚੇ ਵੱਧ ਜਾਂਦੇ ਹਨ ਤੇ ਕਿਰਾਇਆ ਦੇਣ ’ਚ ਕੁਝ ਦਿਨਾਂ ਦੀ ਦੇਰੀ ਹੋ ਸਕਦੀ ਹੈ। ਅਜਿਹੇ ’ਚ ਕੀ ਮਕਾਨ ਮਾਲਕ ਤੁਹਾਡੇ ’ਤੇ ਲੇਟ ਫੀਸ ਜਾਂ ਪੈਨਲਟੀ ਲਗਾਏਗਾ? ਇਹ ਗੱਲ ਐਗਰੀਮੈਂਟ ’ਚ ਸਪੱਸ਼ਟ ਤੌਰ ’ਤੇ ਲਿਖੀ ਹੋਣੀ ਚਾਹੀਦੀ ਹੈ। ਇਸ ਤੋਂ ਇਲਾਵਾ, ਘਰ ਖਾਲੀ ਕਰਦੇ ਸਮੇਂ ਤੁਹਾਡੀ ਸਕਿਊਰਿਟੀ ਡਿਪਾਜ਼ਿਟ ਕਿਹੜੀਆਂ ਸ਼ਰਤਾਂ ’ਤੇ ਤੇ ਕਿੰਨੇ ਦਿਨਾਂ ’ਚ ਵਾਪਸ ਕੀਤੀ ਜਾਵੇਗੀ, ਇਹ ਵੀ ਲਿਖਤੀ ਰੂਪ ’ਚ ਦਰਜ ਹੋਣਾ ਚਾਹੀਦਾ ਹੈ, ਤਾਂ ਜੋ ਬਾਅਦ ’ਚ ਤੁਹਾਡੇ ਪੈਸੇ ਨਾ ਅਟਕਣ।

ਪੁਰਾਣੇ ਬਿੱਲਾਂ ਦੀ ਕਲੀਅਰੈਂਸ ਤੇ ਸਹੂਲਤਾਂ ਦਾ ਖਰਚ

ਨਵੇਂ ਘਰ ਦੀ ਚਾਬੀ ਲੈਣ ਤੋਂ ਪਹਿਲਾਂ ਇਹ ਪੱਕਾ ਕਰ ਲਓ ਕਿ ਪੁਰਾਣੇ ਕਿਰਾਏਦਾਰ ਦੇ ਬਿਜਲੀ, ਪਾਣੀ, ਹਾਊਸ ਟੈਕਸ ਤੇ ਸੋਸਾਇਟੀ ਮੇਨਟੇਨੈਂਸ ਦੇ ਸਾਰੇ ਬਿੱਲ ਅਦਾ ਕੀਤੇ ਜਾ ਚੁੱਕੇ ਹਨ ਜਾਂ ਨਹੀਂ। ਨਹੀਂ ਤਾਂ ਪੁਰਾਣਾ ਬਕਾਇਆ ਤੁਹਾਡੇ ਸਿਰ ਆ ਸਕਦਾ ਹੈ।

ਇਸ ਦੇ ਨਾਲ ਹੀ, ਜੇਕਰ ਤੁਸੀਂ ਸੋਸਾਇਟੀ ਦੇ ਜਿਮ, ਕਲੱਬ ਹਾਊਸ, ਸਵਿਮਿੰਗ ਪੂਲ ਜਾਂ ਪਾਰਕਿੰਗ ਦੀ ਵਰਤੋਂ ਕਰਨ ਵਾਲੇ ਹੋ ਤਾਂ ਉਨ੍ਹਾਂ ਦੇ ਚਾਰਜ ਕੀ ਹੋਣਗੇ? ਇਹ ਸਾਰੀਆਂ ਗੱਲਾਂ ਐਗਰੀਮੈਂਟ ਦਾ ਹਿੱਸਾ ਹੋਣੀਆਂ ਚਾਹੀਦੀਆਂ ਹਨ।

ਘਰ ਦਾ ਕੋਨਾ-ਕੋਨਾ ਜ਼ਰੂਰ ਚੈੱਕ ਕਰੋ

ਰੈਂਟ ਐਗਰੀਮੈਂਟ ਫਾਈਨਲ ਕਰਨ ਤੋਂ ਪਹਿਲਾਂ ਘਰ ਦਾ ਕੋਨਾ-ਕੋਨਾ ਚੰਗੀ ਤਰ੍ਹਾਂ ਚੈੱਕ ਕਰੋ। ਦੀਵਾਰਾਂ ਦਾ ਪੇਂਟ, ਫਰਸ਼ ਦੀ ਹਾਲਤ, ਬਿਜਲੀ ਦੇ ਬੋਰਡ ਤੇ ਕਿਚਨ-ਬਾਥਰੂਮ ਦੇ ਨਲ ਤੇ ਪਾਈਪ ਆਦਿ ਦੀ ਜਾਂਚ ਕਰ ਲਓ। ਜੇਕਰ ਕੋਈ ਚੀਜ਼ ਟੁੱਟੀ ਹੋਈ ਜਾਂ ਖਰਾਬ ਹੈ ਤਾਂ ਮਕਾਨ ਮਾਲਕ ਨੂੰ ਦੱਸੋ ਤੇ ਸ਼ਿਫਟ ਹੋਣ ਤੋਂ ਪਹਿਲਾਂ ਹੀ ਉਸਨੂੰ ਠੀਕ ਕਰਵਾ ਲਓ।

ਜੇਕਰ ਤੁਸੀਂ ਬਿਨਾਂ ਜਾਂਚ ਕੀਤੇ ਘਰ ’ਚ ਸ਼ਿਫਟ ਹੋ ਗਏ ਤਾਂ ਘਰ ਖਾਲੀ ਕਰਦੇ ਸਮੇਂ ਉਸ ਟੁੱਟ-ਫੁੱਟ ਦਾ ਪੂਰਾ ਖਰਚਾ ਤੁਹਾਨੂੰ ਹੀ ਭਰਨਾ ਪੈ ਸਕਦਾ ਹੈ।

ਸੋਸਾਇਟੀ ਦੇ ਨਿਯਮਾਂ ਬਾਰੇ ਜ਼ਰੂਰ ਜਾਣੋ

ਘਰ ’ਚ ਸਮੇਂ-ਸਮੇਂ ’ਤੇ ਹੋਣ ਵਾਲੇ ਰਿਪੇਅਰਿੰਗ ਦੇ ਕੰਮ, ਜਿਵੇਂ ਰੰਗ-ਰੋਗਨ, ਪੁਰਾਣੀਆਂ ਤਾਰਾਂ ਦੀ ਮੁਰੰਮਤ ਜਾਂ ਪਲੰਬਿੰਗ ਦਾ ਖਰਚਾ ਕੌਣ ਚੁੱਕੇਗਾ? ਜੇਕਰ ਤੁਸੀਂ ਪੈਸੇ ਖਰਚ ਕਰਦੇ ਹੋ ਤਾਂ ਕੀ ਮਕਾਨ ਮਾਲਕ ਉਹ ਰਕਮ ਅਗਲੇ ਮਹੀਨੇ ਦੇ ਕਿਰਾਏ ਵਿੱਚੋਂ ਕੱਟੇਗਾ? ਇਹ ਗੱਲ ਪਹਿਲਾਂ ਹੀ ਤੈਅ ਕਰ ਲਓ।

ਇਸ ਤੋਂ ਇਲਾਵਾ, ਕਈ ਹਾਊਸਿੰਗ ਸੋਸਾਇਟੀਆਂ ਤੇ ਮਕਾਨ ਮਾਲਕਾਂ ਦੇ ਆਪਣੇ ਕੁਝ ਖਾਸ ਨਿਯਮ ਹੁੰਦੇ ਹਨ, ਜਿਵੇਂ ਘਰ ’ਚ ਪਾਲਤੂ ਜਾਨਵਰ ਨਾ ਰੱਖਣਾ, ਨਾਨ-ਵੈਜ ਨਾ ਪਕਾਉਣਾ ਜਾਂ ਦੇਰ ਰਾਤ ਘਰ ਆਉਣ ’ਤੇ ਪਾਬੰਦੀ। ਇਨ੍ਹਾਂ ਸਾਰੇ ਨਿਯਮਾਂ ਨੂੰ ਐਗਰੀਮੈਂਟ ’ਚ ਜ਼ਰੂਰ ਪੜ੍ਹੋ।

ਸਭ ਤੋਂ ਜ਼ਰੂਰੀ ਗੱਲ ਇਹ ਹੈ ਕਿ ਐਗਰੀਮੈਂਟ ਕਰਨ ਤੋਂ ਪਹਿਲਾਂ ਕਾਗਜ਼ਾਤ ਦੇਖ ਕੇ ਇਹ ਜ਼ਰੂਰ ਪੱਕਾ ਕਰ ਲਓ ਕਿ ਜਿਸ ਵਿਅਕਤੀ ਨਾਲ ਤੁਸੀਂ ਡੀਲ ਕਰ ਰਹੇ ਹੋ, ਉਹੀ ਘਰ ਦਾ ਅਸਲੀ ਮਾਲਕ ਹੈ। ਨਾਲ ਹੀ, ਸੋਸਾਇਟੀ ਤੋਂ ਰਹਿਣ ਲਈ ਨੋ-ਆਬਜੈਕਸ਼ਨ ਸਰਟੀਫਿਕੇਟ (NOC) ਵੀ ਲੈ ਲਓ।