ਉੱਠਦੇ ਹੀ ਚੱਕਰ ਆਉਣ ਨੂੰ ਹਲਕੇ ’ਚ ਨਾ ਲਓ, ਪੋਸ਼ਚਰਲ ਹਾਈਪੋਟੈਂਸ਼ਨ ਨਾਲ ਹੋ ਸਕਦਾ ਹੈ ਕਨੈਕਸ਼ਨ ; ਜਾਣੋ ਇਸਦੇ ਲੱਛਣ

ਲਾਈਫਸਟਾਈਲ ਡੈਸਕ, ਨਵੀਂ ਦਿੱਲੀ : ਸਿਹਤਮੰਦ ਲੋਕਾਂ ਦਾ ਬਲੱਡ ਪ੍ਰੈਸ਼ਰ ਵੀ ਕਈ ਵਾਰ ਘੱਟ ਹੁੰਦਾ ਹੈ। ਕੁਝ ਲੋਕਾਂ ’ਚ ਕੁਦਰਤੀ ਤੌਰ 'ਤੇ ਹੀ ਬਲੱਡ ਪ੍ਰੈਸ਼ਰ ਘੱਟ ਦੇਖਿਆ ਜਾਂਦਾ ਹੈ ਤੇ ਇਸ ਦਾ ਉਨ੍ਹਾਂ ਦੀ ਸਿਹਤ 'ਤੇ ਕੋਈ ਬੁਰਾ ਅਸਰ ਵੀ ਨਜ਼ਰ ਨਹੀਂ ਆਉਂਦਾ। ਪਰ ਪੋਸ਼ਚਰਲ ਹਾਈਪੋਟੈਂਸ਼ਨ ’ਚ ਖੜ੍ਹੇ ਹੋਣ ਦੇ 3 ਮਿੰਟ ਦੇ ਅੰਦਰ ਚੱਕਰ ਜਿਹਾ ਮਹਿਸੂਸ ਹੋ ਸਕਦਾ ਹੈ। ਅਜਿਹਾ ਦਿਮਾਗ ਵਰਗੇ ਮੁੱਖ ਅੰਗਾਂ ਤੱਕ ਆਕਸੀਜਨ ਸਹੀ ਤਰੀਕੇ ਨਾਲ ਨਾ ਪਹੁੰਚਣ ਕਾਰਨ ਹੋ ਸਕਦਾ ਹੈ। ਪੋਸ਼ਚਰਲ ਹਾਈਪੋਟੈਂਸ਼ਨ ਕੀ ਹੈ, ਇਸ ਦੇ ਲੱਛਣ ਕੀ ਹਨ ਤੇ ਇਸ ਨੂੰ ਕਿਵੇਂ ਮੈਨੇਜ ਕੀਤਾ ਜਾ ਸਕਦਾ ਹੈ, ਆਓ ਜਾਣਦੇ ਹਾਂ।

ਹੋ ਸਕਦਾ ਹੈ ਪੋਸ਼ਚਰਲ ਹਾਈਪੋਟੈਂਸ਼ਨ

ਜੇਕਰ ਲੰਬੇ ਸਮੇਂ ਤੱਕ ਬੈਠੇ ਜਾਂ ਲੇਟੇ ਰਹਿਣ ਤੋਂ ਬਾਅਦ ਉੱਠਦੇ ਹਨ ਤਾਂ ਤਿੰਨ ਮਿੰਟ ਦੇ ਅੰਦਰ ਬਲੱਡ ਪ੍ਰੈਸ਼ਰ ਅਚਾਨਕ ਬਹੁਤ ਘੱਟ ਹੋ ਸਕਦਾ ਹੈ। ਅਜਿਹਾ ਗ੍ਰੈਵਿਟੀ ਕਾਰਨ ਪੈਰਾਂ ’ਚ ਖੂਨ ਦਾ ਤੇਜ਼ੀ ਨਾਲ ਵਹਾਅ ਹੋਣ ਤੇ ਦਿਮਾਗ ਤੱਕ ਸਹੀ ਤਰੀਕੇ ਨਾਲ ਨਾ ਪਹੁੰਚਣ ਕਰਕੇ ਹੋ ਸਕਦਾ ਹੈ। ਬਜ਼ੁਰਗਾਂ ’ਚ ਅਜਿਹੀ ਸਥਿਤੀ ਹੋਣ 'ਤੇ ਡਿੱਗਣ ਤੇ ਗੰਭੀਰ ਸੱਟ ਲੱਗਣ ਦਾ ਖ਼ਤਰਾ ਰਹਿੰਦਾ ਹੈ।

ਇਹ ਹੁੰਦੇ ਹਨ ਲੱਛਣ

• ਚੱਕਰ ਆਉਣਾ
• ਸਿਰ ’ਚ ਭਾਰੀਪਣ ਮਹਿਸੂਸ ਹੋਣਾ
• ਕਨਫਿਊਜ਼ਨ ਹੋਣਾ
• ਚੱਕਰ ਖਾ ਕੇ ਡਿੱਗ ਪੈਣਾ
• ਮਤਲੀ ਆਉਣਾ
• ਅੱਖਾਂ ਅੱਗੇ ਧੁੰਦਲਾ ਦਿਖਾਈ ਦੇਣਾ
• ਧਿਆਨ ਨਾ ਲੱਗਣਾ
• ਹੱਥ ਠੰਢੇ ਪੈ ਜਾਣਾ ਤੇ ਪਸੀਨਾ ਆਉਣਾ
• ਸਾਹ ਤੇਜ਼ ਚੱਲਣਾ
• ਥਕਾਵਟ ਹੋਣਾ

ਲੋਅ ਬਲੱਡ ਪ੍ਰੈਸ਼ਰ ਦੇ ਵੀ ਹੋ ਸਕਦੇ ਹਨ ਗੰਭੀਰ ਨਤੀਜੇ

ਭਾਵੇਂ ਹਾਈ ਬਲੱਡ ਪ੍ਰੈਸ਼ਰ ਨੂੰ ਅਕਸਰ ਦਿਲ ਦੀਆਂ ਬਿਮਾਰੀਆਂ ਜਾਂ ਕਈ ਹੋਰ ਬਿਮਾਰੀਆਂ ਦਾ ਵੱਡਾ ਕਾਰਨ ਮੰਨਿਆ ਜਾਂਦਾ ਹੈ, ਪਰ ਲੋਅ ਬਲੱਡ ਪ੍ਰੈਸ਼ਰ ਕਾਰਨ ਵੀ ਇਸ ਤਰ੍ਹਾਂ ਦੀਆਂ ਸਮੱਸਿਆਵਾਂ ਹੋ ਸਕਦੀਆਂ ਹਨ:

• ਦਿਲ ਦੀਆਂ ਬਿਮਾਰੀਆਂ
• ਸਰੀਰ ’ਚ ਖੂਨ ਦੀ ਮਾਤਰਾ ਘੱਟ ਹੋਣਾ
• ਗੰਭੀਰ ਇਨਫੈਕਸ਼ਨ
• ਹਾਰਮੋਨ ਨਾਲ ਜੁੜੀਆਂ ਸਮੱਸਿਆਵਾਂ
• ਗੰਭੀਰ ਐਲਰਜਿਕ ਰਿਐਕਸ਼ਨ
• ਇਸ ਤਰ੍ਹਾਂ ਪੋਸ਼ਚਰਲ ਹਾਈਪੋਟੈਂਸ਼ਨ ਨੂੰ ਕਰੋ ਮੈਨੇਜ

ਸਿਰ ਉੱਚਾ ਕਰਕੇ ਸੌਂਵੋ : ਸੌਂਦੇ ਸਮੇਂ ਆਪਣੇ ਸਿਰ ਨੂੰ 20 ਤੋਂ 30 ਡਿਗਰੀ ਤੱਕ ਉੱਚਾ ਰੱਖੋ। ਇਸ ਨਾਲ ਅਚਾਨਕ ਉੱਠਣ 'ਤੇ ਬਲੱਡ ਪ੍ਰੈਸ਼ਰ ਘੱਟ ਹੋਣ ਦੇ ਖ਼ਤਰੇ ਤੋਂ ਬਚਣ ’ਚ ਮਦਦ ਮਿਲ ਸਕਦੀ ਹੈ।

ਹੌਲੀ-ਹੌਲੀ ਪੋਜ਼ੀਸ਼ਨ ਬਦਲੋ : ਪੋਜ਼ੀਸ਼ਨ ਬਦਲਦੇ ਸਮੇਂ ਜਲਦਬਾਜ਼ੀ ਨਾ ਕਰੋ। ਜੇਕਰ ਲੇਟੇ ਹੋਏ ਹੋ ਤਾਂ ਹੌਲੀ-ਹੌਲੀ ਬੈਠੋ ਤੇ ਕੁਝ ਸਕਿੰਟਾਂ ਬਾਅਦ ਖੜ੍ਹੇ ਹੋਵੋ।

ਬੈੱਡ ਦਾ ਸਹਾਰਾ ਲਓ : ਸੌਣ ਦੀ ਪੋਜ਼ੀਸ਼ਨ ਤੋਂ ਉੱਠਦੇ ਸਮੇਂ ਬੈੱਡ ਦੇ ਕਿਨਾਰੇ ਜਾਂ ਉਸ ਦੇ ਕਿਸੇ ਫਿਕਸਚਰ ਦਾ ਸਹਾਰਾ ਲਓ।

ਪੈਰਾਂ ਦੀ ਸਧਾਰਨ ਕਸਰਤ ਕਰੋ : ਪੈਰਾਂ ’ਚ ਖੂਨ ਦੇ ਸੰਚਾਰ ਨੂੰ ਆਮ ਬਣਾਉਣ ਲਈ ਹਲਕੀ-ਫੁਲਕੀ ਸਟ੍ਰੈਚਿੰਗ ਕਰੋ। ਇਸ ਦੌਰਾਨ ਕੁਰਸੀ ਜਾਂ ਬੈੱਡ ਨੂੰ ਫੜ ਕੇ ਰੱਖੋ।

ਅਚਾਨਕ ਨਾ ਝੁਕੋ : ਬੈੱਡ ਤੋਂ ਉੱਠਦੇ ਹੀ ਕਿਸੇ ਚੀਜ਼ ਨੂੰ ਚੁੱਕਣ ਲਈ ਅਚਾਨਕ ਹੇਠਾਂ ਨਾ ਝੁਕੋ, ਇਸ ਨਾਲ ਤੇਜ਼ ਚੱਕਰ ਆ ਸਕਦਾ ਹੈ। ਚੀਜ਼ ਚੁੱਕਣ ਲਈ ਲੰਬੀ ਛੜੀ ਜਾਂ ਕਿਸੇ ਸਹਾਰੇ ਦੀ ਵਰਤੋਂ ਕਰੋ।