ਪਸੀਨੇ ਦੀ ਬਦਬੂ ਕਾਰਨ ਹੁੰਦੀ ਹੈ ਸ਼ਰਮਿੰਦਗੀ? ਦਿਨਭਰ ਫਰੈਸ਼ ਮਹਿਸੂਸ ਕਰਨ ਲਈ ਹਾਈਜੀਨ ਨਾਲ ਜੁੜੀਆਂ ਇਨ੍ਹਾਂ ਗੱਲਾਂ ਦਾ ਰੱਖੋ ਧਿਆਨ

ਲਾਈਫਸਟਾਈਲ ਡੈਸਕ, ਨਵੀਂ ਦਿੱਲੀ : ਪਸੀਨਾ ਆਉਣਾ ਸਰੀਰ ਦੀ ਇੱਕ ਆਮ ਪ੍ਰਤੀਕਿਰਿਆ ਹੈ, ਪਰ ਇਸ ਕਾਰਨ ਸਰੀਰ ’ਚੋਂ ਬਦਬੂ ਆਉਣ ਦੀ ਸਮੱਸਿਆ ਵੀ ਹੋ ਸਕਦੀ ਹੈ। ਕੁਝ ਲੋਕਾਂ ਨੂੰ ਇਹ ਪਰੇਸ਼ਾਨੀ ਜ਼ਿਆਦਾ ਹੁੰਦੀ ਹੈ, ਜਿਸ ਕਾਰਨ ਉਹ ਲੋਕਾਂ ਨਾਲ ਉੱਠਣ-ਬੈਠਣ ’ਚ ਝਿਝਕ ਮਹਿਸੂਸ ਕਰਨ ਲੱਗਦੇ ਹਨ। ਪਸੀਨੇ ਦੀ ਬਦਬੂ ਨੂੰ ਛੁਪਾਉਣ ਲਈ ਅਕਸਰ ਅਸੀਂ ਮਹਿੰਗੇ ਪਰਫਿਊਮ ਜਾਂ ਡਿਓਡਰੈਂਟ ਦੀ ਵਰਤੋਂ ਕਰਦੇ ਹਾਂ, ਪਰ ਇਹ ਕੋਈ ਸਥਾਈ ਹੱਲ ਨਹੀਂ ਹੈ।

ਦਰਅਸਲ, ਪਸੀਨੇ ਦੀ ਆਪਣੀ ਕੋਈ ਗੰਧ ਨਹੀਂ ਹੁੰਦੀ। ਬਦਬੂ ਉਦੋਂ ਆਉਂਦੀ ਹੈ, ਜਦੋਂ ਚਮੜੀ ’ਤੇ ਮੌਜੂਦ ਬੈਕਟੀਰੀਆ ਪਸੀਨੇ ਨਾਲ ਪ੍ਰਤੀਕਿਰਿਆ ਕਰਦੇ ਹਨ। ਇਸ ਲਈ ਬਦਬੂ ਤੋਂ ਬਚਣ ਲਈ ਨਿੱਜੀ ਸਫਾਈ (ਪਰਸਨਲ ਹਾਈਜੀਨ) ਦਾ ਧਿਆਨ ਰੱਖਣਾ ਬਹੁਤ ਜ਼ਰੂਰੀ ਹੈ। ਆਓ ਜਾਣਦੇ ਹਾਂ ਕਿ ਤੁਸੀਂ ਪਸੀਨੇ ਦੀ ਬਦਬੂ ਨੂੰ ਕਿਵੇਂ ਰੋਕ ਸਕਦੇ ਹੋ।

ਐਂਟੀ-ਬੈਕਟੀਰੀਅਲ ਸਾਬਣ ਨਾਲ ਨਹਾਓ

ਪਸੀਨੇ ਦੀ ਬਦਬੂ ਰੋਕਣ ਲਈ ਸਭ ਤੋਂ ਜ਼ਰੂਰੀ ਹੈ ਕਿ ਤੁਸੀਂ ਰੋਜ਼ਾਨਾ ਚੰਗੀ ਤਰ੍ਹਾਂ ਨਹਾਓ। ਨਹਾਉਂਦੇ ਸਮੇਂ ਐਂਟੀ-ਬੈਕਟੀਰੀਅਲ ਸਾਬਣ ਦੀ ਵਰਤੋਂ ਕਰੋ, ਤਾਂ ਜੋ ਸਰੀਰ ’ਤੇ ਜਮ੍ਹਾ ਬੈਕਟੀਰੀਆ ਸਾਫ਼ ਹੋ ਸਕਣ। ਇਸ ਦੇ ਨਾਲ ਹੀ ਨਹਾਉਂਦੇ ਸਮੇਂ ਅੰਡਰਆਰਮਜ਼, ਪੱਟਾਂ ਦੇ ਵਿਚਕਾਰ ਤੇ ਪੈਰਾਂ ਦੀਆਂ ਉਂਗਲਾਂ ਦੇ ਵਿਚਕਾਰ ਚੰਗੀ ਤਰ੍ਹਾਂ ਸਫਾਈ ਕਰੋ। ਇਨ੍ਹਾਂ ਹਿੱਸਿਆਂ ’ਚ ਸਭ ਤੋਂ ਜ਼ਿਆਦਾ ਪਸੀਨਾ ਆਉਂਦਾ ਹੈ ਤੇ ਬੈਕਟੀਰੀਆ ਵੀ ਇੱਥੇ ਜ਼ਿਆਦਾ ਪੈਦਾ ਹੁੰਦੇ ਹਨ। ਜੇਕਰ ਤੁਹਾਨੂੰ ਜ਼ਿਆਦਾ ਪਸੀਨਾ ਆਉਂਦਾ ਹੈ ਤਾਂ ਦਿਨ ’ਚ ਦੋ ਵਾਰ ਨਹਾਓ।

ਸਹੀ ਫੈਬਰਿਕ ਤੇ ਕੱਪੜਿਆਂ ਦੀ ਸਫਾਈ

ਅਸੀਂ ਕਿਹੜੇ ਕੱਪੜੇ ਪਹਿਨਦੇ ਹਾਂ ਤੇ ਉਨ੍ਹਾਂ ਨੂੰ ਕਿਵੇਂ ਸਾਫ਼ ਕਰਦੇ ਹਾਂ, ਇਸ ਦਾ ਅਸਰ ਵੀ ਸਰੀਰ ਦੀ ਗੰਧ ’ਤੇ ਪੈਂਦਾ ਹੈ। ਸਿੰਥੈਟਿਕ, ਨਾਇਲੋਨ ਜਾਂ ਪਾਲੀਏਸਟਰ ਦੇ ਕੱਪੜੇ ਪਸੀਨਾ ਸੋਖਦੇ ਨਹੀਂ ਹਨ। ਇਸ ਦੀ ਬਜਾਏ ਕਾਟਨ ਜਾਂ ਲਿਨਨ ਦੇ ਢਿੱਲੇ ਕੱਪੜੇ ਪਹਿਨੋ, ਜਿਸ ਨਾਲ ਪਸੀਨਾ ਆਸਾਨੀ ਨਾਲ ਸੁੱਕ ਸਕੇ।

ਇਸ ਦੇ ਨਾਲ ਹੀ, ਇੱਕ ਵਾਰ ਪਹਿਨੇ ਹੋਏ ਕੱਪੜੇ ਬਿਨਾਂ ਧੋਏ ਦੁਬਾਰਾ ਨਾ ਪਹਿਨੋ, ਖਾਸ ਕਰਕੇ ਟੀ-ਸ਼ਰਟ, ਅੰਡਰਗਾਰਮੈਂਟ, ਕਮੀਜ਼ ਜਾਂ ਕੁੜਤਾ ਵਰਗੇ ਕੱਪੜੇ। ਕੱਪੜਿਆਂ ’ਚ ਬੈਕਟੀਰੀਆ ਜਮ੍ਹਾ ਹੋ ਜਾਂਦੇ ਹਨ, ਜਿਨ੍ਹਾਂ ਕਾਰਨ ਬਦਬੂ ਆਉਂਦੀ ਹੈ। ਇਸ ਤੋਂ ਇਲਾਵਾ, ਕੱਪੜਿਆਂ ਨੂੰ ਧੋਣ ਤੋਂ ਬਾਅਦ ਧੁੱਪ ’ਚ ਸੁਕਾਓ, ਤਾਂ ਜੋ ਉਨ੍ਹਾਂ ’ਚ ਮੌਜੂਦ ਬੈਕਟੀਰੀਆ ਘੱਟ ਹੋ ਸਕਣ।

ਅੰਡਰਆਰਮਜ਼ ਦੀ ਸ਼ੇਵਿੰਗ ਤੇ ਸਫਾਈ

ਅੰਡਰਆਰਮਜ਼ ਦੇ ਵਾਲ ਨਮੀ ਨੂੰ ਰੋਕ ਕੇ ਰੱਖਦੇ ਹਨ। ਇਸ ਲਈ ਅੰਡਰਆਰਮਜ਼ ਦੀ ਸ਼ੇਵਿੰਗ ਜਾਂ ਟ੍ਰਿਮਿੰਗ ਕਰੋ, ਤਾਂ ਜੋ ਪਸੀਨਾ ਆਸਾਨੀ ਨਾਲ ਸੁੱਕ ਸਕੇ ਤੇ ਬੈਕਟੀਰੀਆ ਜਮ੍ਹਾ ਨਾ ਹੋਣ। ਇਸ ਦੇ ਨਾਲ ਹੀ ਨਹਾਉਣ ਤੋਂ ਬਾਅਦ ਸਰੀਰ ਨੂੰ ਚੰਗੀ ਤਰ੍ਹਾਂ ਸੁਕਾਓ। ਗਿੱਲੇ ਹਿੱਸਿਆਂ ’ਤੇ ਬੈਕਟੀਰੀਆ ਜਲਦੀ ਪੈਦਾ ਹੋ ਸਕਦੇ ਹਨ।

ਐਂਟੀਪਰਸਪਿਰੈਂਟ ਤੇ ਕੁਦਰਤੀ ਉਪਾਅ

ਪਰਫਿਊਮ ਦੀ ਬਜਾਏ ਐਂਟੀਪਰਸਪਿਰੈਂਟ ਦੀ ਵਰਤੋਂ ਕਰੋ, ਜੋ ਪਸੀਨਾ ਘੱਟ ਕਰਨ ’ਚ ਮਦਦ ਕਰਦਾ ਹੈ। ਧਿਆਨ ਰੱਖੋ ਕਿ ਐਂਟੀਪਰਸਪਿਰੈਂਟ ਹਮੇਸ਼ਾ ਸੁੱਕੀ ਚਮੜੀ ’ਤੇ ਹੀ ਲਗਾਓ। ਇਸ ਤੋਂ ਇਲਾਵਾ, ਗਿੱਲੀ ਫਿਟਕਰੀ ਨੂੰ ਅੰਡਰਆਰਮਜ਼ ’ਤੇ ਰਗੜਨ ਨਾਲ ਵੀ ਪਸੀਨੇ ਦੀ ਬਦਬੂ ਤੋਂ ਰਾਹਤ ਮਿਲਣ ਦਾ ਦਾਅਵਾ ਕੀਤਾ ਜਾਂਦਾ ਹੈ। ਪਾਣੀ ’ਚ ਐਪਲ ਸਾਈਡਰ ਵਿਨੇਗਰ ਮਿਲਾ ਕੇ ਨਹਾਉਣ ਨਾਲ ਵੀ ਸਰੀਰ ਦਾ pH ਸੰਤੁਲਨ ਬਣਿਆ ਰਹਿਣ ਤੇ ਬਦਬੂ ਘਟਣ ’ਚ ਮਦਦ ਮਿਲਣ ਦਾ ਦਾਅਵਾ ਕੀਤਾ ਜਾਂਦਾ ਹੈ।