ਆਰ. ਮਾਧਵਨ ਦੇ ਪੁੱਤਰ ਵੇਦਾਂਤ ਨੇ ਖੋਲ੍ਹਿਆ ‘ਇੰਡਿਅਨ ਬਾਡੀ ਟਾਈਪ’ ਦਾ ਰਾਜ਼, ਦੱਸਿਆ ਖੇਡਾਂ ’ਚ ਕਿੱਥੇ ਖਾ ਰਹੇ ਹਾਂ ਮਾਤ?

ਲਾਈਫਸਟਾਈਲ ਡੈਸਕ, ਨਵੀਂ ਦਿੱਲੀ : ਬਾਲੀਵੁੱਡ ਦੇ ਮਸ਼ਹੂਰ ਅਦਾਕਾਰ ਆਰ. ਮਾਧਵਨ ਦੇ ਪੁੱਤਰ ਵੇਦਾਂਤ ਮਾਧਵਨ ਇਨ੍ਹੀਂ ਦਿਨੀਂ ਚਰਚਾ ’ਚ ਹਨ। ਵੇਦਾਂਤ ਇੱਕ ਤੈਰਾਕ ਹਨ, ਜੋ ਏਸ਼ੀਅਨ ਗੇਮਜ਼ 2026 ’ਚ ਭਾਰਤ ਦੀ ਨੁਮਾਇੰਦਗੀ ਕਰਨ ਵਾਲੇ ਹਨ। ਤੁਹਾਨੂੰ ਦੱਸ ਦੇਈਏ ਕਿ ਏਸ਼ੀਅਨ ਗੇਮਜ਼ ਇਸ ਸਾਲ 19 ਸਤੰਬਰ ਤੋਂ 4 ਅਕਤੂਬਰ ਤੱਕ ਜਾਪਾਨ ’ਚ ਕਰਵਾਈਆਂ ਜਾਣਗੀਆਂ।

ਹਾਲ ਹੀ ’ਚ ਵੇਦਾਂਤ ਮਾਧਵਨ ਨੇ ਪੀਟੀਆਈ ਨੂੰ ਇੱਕ ਇੰਟਰਵਿਊ ਦਿੱਤਾ, ਜਿਸ ’ਚ ਉਨ੍ਹਾਂ ਨੇ ਆਪਣੀਆਂ ਤਿਆਰੀਆਂ ਬਾਰੇ ਖੁੱਲ੍ਹ ਕੇ ਗੱਲ ਕੀਤੀ। ਪਰ ਇਸ ਦੌਰਾਨ ਉਨ੍ਹਾਂ ਨੇ ਇੱਕ ਅਜਿਹੀ ਗੱਲ ਕਹੀ, ਜਿਸ ਨੇ ਸਾਰਿਆਂ ਦਾ ਧਿਆਨ ਆਪਣੇ ਵੱਲ ਖਿੱਚਿਆ। ਵੇਦਾਂਤ ਨੇ ਖੇਡਾਂ ’ਚ ਭਾਰਤੀਆਂ ਦੇ ਪ੍ਰਦਰਸ਼ਨ ਨੂੰ ਉਨ੍ਹਾਂ ਦੀ ਡਾਈਟ ਨਾਲ ਜੋੜਿਆ। ਆਓ ਜਾਣਦੇ ਹਾਂ ਕਿ ਭਾਰਤੀਆਂ ਦੀ ਖੁਰਾਕ ਬਾਰੇ ਵੇਦਾਂਤ ਨੇ ਕੀ ਕਿਹਾ।

ਖਾਣ-ਪੀਣ ’ਚ ਸੁਧਾਰ ਦੀ ਲੋੜ

ਵੇਦਾਂਤ ਦਾ ਮੰਨਣਾ ਹੈ ਕਿ ਭਾਰਤੀ ਜੈਨੇਟਿਕ ਤੌਰ ’ਤੇ ਕਾਫੀ ਸਮਰੱਥ ਹਨ, ਜੋ ਉਨ੍ਹਾਂ ਦੇ ਖੇਡ ਕਰੀਅਰ ਲਈ ਚੰਗੀ ਗੱਲ ਹੈ। ਇਸ ਦੇ ਨਾਲ ਹੀ ਭਾਰਤੀਆਂ ’ਚ ਟੈਲੈਂਟ ਦੀ ਵੀ ਕੋਈ ਕਮੀ ਨਹੀਂ ਹੈ, ਪਰ ਇੱਕ ਚੀਜ਼ ਜੋ ਸਾਨੂੰ ਪਿੱਛੇ ਰੋਕ ਰਹੀ ਹੈ, ਉਹ ਹੈ ਸਾਡੀ ਡਾਈਟ। ਜੇਕਰ ਆਪਣੇ ਖਾਣ-ਪੀਣ ’ਚ ਸੁਧਾਰ ਕੀਤਾ ਜਾਵੇ ਤਾਂ ਅਸੀਂ ਹੋਰ ਬਿਹਤਰ ਐਥਲੀਟ ਬਣ ਸਕਦੇ ਹਾਂ।

ਸਰੀਰ ਜ਼ਿਆਦਾ ਚਰਬੀ ਜਮ੍ਹਾਂ ਕਰਦਾ ਹੈ

ਵਿਕਾਸਵਾਦ (Evolution) ਕਾਰਨ ਭਾਰਤੀਆਂ ਦਾ ਸਰੀਰ ਜ਼ਿਆਦਾ ਚਰਬੀ ਸਟੋਰ ਕਰਦਾ ਹੈ। ਇਸ ਨੂੰ ਏਸ਼ੀਅਨ ਫੀਨੋਟਾਈਪ ਜਾਂ ਥਿਨ-ਫੈਟ ਬਾਡੀ ਟਾਈਪ ਕਿਹਾ ਜਾਂਦਾ ਹੈ। ਹਜ਼ਾਰਾਂ ਸਾਲ ਪਹਿਲਾਂ ਸ਼ਿਕਾਰ ਛੱਡ ਕੇ ਖੇਤੀਬਾੜੀ ਅਪਣਾਉਣ ਦੇ ਨਾਲ-ਨਾਲ ਬਦਲਦੇ ਮੌਸਮ ਵਰਗੇ ਕਾਰਨਾਂ ਨੂੰ ਵੀ ਇਸ ਦੇ ਪਿੱਛੇ ਜ਼ਿੰਮੇਵਾਰ ਮੰਨਿਆ ਜਾਂਦਾ ਹੈ।

ਦਰਅਸਲ, ਮੌਸਮੀ ਤਬਦੀਲੀ ਕਾਰਨ ਮਾਨਸੂਨ ਕਾਫੀ ਅਣਪਛਾਤਾ ਹੋ ਗਿਆ ਹੈ। ਇਸ ਲਈ ਪੀੜ੍ਹੀਆਂ ਤੋਂ ਵਾਰ-ਵਾਰ ਪੈਂਦੇ ਅਕਾਲ ਤੋਂ ਬਚਣ ਲਈ ਸਾਡਾ ਸਰੀਰ ਮਾਸਪੇਸ਼ੀਆਂ ਬਣਾਉਣ ਦੀ ਬਜਾਏ ਚਰਬੀ ਜਮ੍ਹਾਂ ਕਰਨ ਲੱਗਦਾ ਹੈ, ਤਾਂ ਜੋ ਭੁੱਖਮਰੀ ਦੀ ਸਥਿਤੀ ’ਚ ਸਰੀਰ ਨੂੰ ਊਰਜਾ ਮਿਲਦੀ ਰਹੇ। ਇਸ ਨੂੰ ਤੁਸੀਂ ਇੱਕ ਤਰ੍ਹਾਂ ਦਾ ਸਰਵਾਈਵਲ ਮਕੈਨਿਜ਼ਮ ਸਮਝ ਸਕਦੇ ਹੋ।

ਡਾਈਟ ’ਚ ਪ੍ਰੋਟੀਨ ਵਧਾਉਣਾ ਜ਼ਰੂਰੀ

ਇਸ ਇੰਡਿਅਨ ਬਾਡੀ ਟਾਈਪ ਦੇ ਨੁਕਸਾਨ ਤੋਂ ਬਚਣ ਲਈ ਵੇਦਾਂਤ ਨੇ ਸੁਝਾਅ ਦਿੱਤਾ ਕਿ ਸਾਨੂੰ ਆਪਣੀ ਡਾਈਟ ’ਚ ਪ੍ਰੋਟੀਨ ਦੀ ਮਾਤਰਾ ਵਧਾਉਣ ਦੀ ਲੋੜ ਹੈ। ਭਾਰਤੀਆਂ ਦੀ ਡਾਈਟ ’ਚ ਕਾਰਬੋਹਾਈਡ੍ਰੇਟ ਦੀ ਮਾਤਰਾ ਕਾਫੀ ਜ਼ਿਆਦਾ ਹੁੰਦੀ ਹੈ। ਇਸ ਦੇ ਪਿੱਛੇ ਇਹ ਕਾਰਨ ਵੀ ਹੈ ਕਿ ਪੇਟ ਭਰਿਆ ਰੱਖਣ ਤੇ ਊਰਜਾ ਲਈ ਜ਼ਿਆਦਾਤਰ ਲੋਕ ਆਪਣੀ ਡਾਈਟ ’ਚ ਕਾਰਬਸ ਨੂੰ ਵਧੇਰੇ ਸ਼ਾਮਲ ਕਰਦੇ ਹਨ, ਪਰ ਪ੍ਰੋਟੀਨ ਨੂੰ ਅਣਦੇਖਾ ਕਰ ਦਿੰਦੇ ਹਨ।

ਵੇਦਾਂਤ ਨੇ ਦੱਸਿਆ ਕਿ ਉਹ ਆਪਣੀ ਡਾਈਟ ਲਈ ਇੱਕ ਡਾਈਟੀਸ਼ੀਅਨ ਨਾਲ ਮਿਲ ਕੇ ਕੰਮ ਕਰ ਰਹੇ ਹਨ ਤੇ ਖੁਰਾਕ ’ਚ ਬਦਲਾਅ ਕਰਨ ਨਾਲ ਉਨ੍ਹਾਂ ਦੀ ਸਪੀਡ ਤੇ ਫਾਰਮ ’ਚ ਕਾਫੀ ਸੁਧਾਰ ਆਇਆ ਹੈ। ਜੇਕਰ ਭਾਰਤੀ ਆਪਣੀ ਡਾਈਟ ’ਚ ਇਹ ਸੁਧਾਰ ਕਰ ਲੈਣ ਤਾਂ ਉਹ ਖੇਡਾਂ ’ਚ ਕਾਫੀ ਸ਼ਾਨਦਾਰ ਪ੍ਰਦਰਸ਼ਨ ਕਰ ਸਕਦੇ ਹਨ।