- ਸ਼ਹਿਰ ਚੁਣੋ
- ਈ-ਪੇਪਰ
- ਵੈੱਬ ਸਟੋਰੀਜ਼
- ਸ਼ਹਿਰ ਚੁਣੋ
- ਈ-ਪੇਪਰ
- ਵੈੱਬ ਸਟੋਰੀਜ਼
ਹਮੇਸ਼ਾ ਥੱਕੇ-ਥੱਕੇ ਰਹਿੰਦੇ ਹੋ? ਸਰੀਰ ’ਚ ਹੋ ਸਕਦੀ ਹੈ ਇਸ ਮਿਨਰਲ ਦੀ ਕਮੀ, ਡਾਈਟ ’ਚ ਸ਼ਾਮਲ ਕਰੋ ਇਹ 5 ਫੂਡਜ਼
ਜੇ ਤੁਹਾਨੂੰ ਥਕਾਵਟ, ਕਮਜ਼ੋਰੀ ਜਾਂ ਮਾਸਪੇਸ਼ੀਆਂ ’ਚ ਅਕਸਰ ਖਿਚਾਅ ਮਹਿਸੂਸ ਹੁੰਦਾ ਹੈ ਤਾਂ ਇਹ ਮੈਗਨੀਸ਼ੀਅਮ ਦੀ ਕਮੀ ਦਾ ਸੰਕੇਤ ਹੋ ਸਕਦਾ ਹੈ।
Posted By Paramjit Kaur
Publish Date: Fri, 02 Oct 2026 12:14 PM (IST)
Updated Date: Fri, 02 Oct 2026 12:19 PM (IST)
ਲਾਈਫਸਟਾਈਲ ਡੈਸਕ, ਨਵੀਂ ਦਿੱਲੀ : ਕੀ ਤੁਹਾਨੂੰ ਵੀ ਦਿਨ ਭਰ ਥਕਾਵਟ ਤੇ ਕਮਜ਼ੋਰੀ ਮਹਿਸੂਸ ਹੁੰਦੀ ਹੈ? ਰਾਤਾਂ ਦੀ ਨੀਂਦ ਉੱਡ ਗਈ ਹੈ ਜਾਂ ਫਿਰ ਅਕਸਰ ਮਾਸਪੇਸ਼ੀਆਂ ’ਚ ਖਿਚਾਅ ਦੀ ਸ਼ਿਕਾਇਤ ਰਹਿੰਦੀ ਹੈ? ਜੇ ਹਾਂ, ਤਾਂ ਇਹ ਤੁਹਾਡੇ ਸਰੀਰ ’ਚ ਮੈਗਨੀਸ਼ੀਅਮ ਦੀ ਕਮੀ ਦਾ ਸੰਕੇਤ ਹੋ ਸਕਦਾ ਹੈ।
ਮੈਗਨੀਸ਼ੀਅਮ ਸਾਡੇ ਸਰੀਰ ਲਈ ਇੱਕ ਬਹੁਤ ਜ਼ਰੂਰੀ ਖਣਿਜ ਹੈ। ਇਹ ਮਾਸਪੇਸ਼ੀਆਂ, ਨਸਾਂ ਦੇ ਸਹੀ ਕੰਮਕਾਜ, ਦਿਲ ਦੀ ਸਿਹਤ ਤੇ ਸਰੀਰ ’ਚ ਊਰਜਾ ਬਣਾਉਣ ’ਚ ਅਹਿਮ ਭੂਮਿਕਾ ਨਿਭਾਉਂਦਾ ਹੈ। ਅੱਜਕੱਲ੍ਹ ਦੀ ਭੱਜ-ਦੌੜ ਭਰੀ, ਅਨਿਯਮਿਤ ਜੀਵਨਸ਼ੈਲੀ ਤੇ ਪੈਕਡ ਖਾਣੇ ਕਾਰਨ ਸਰੀਰ ’ਚ ਇਸ ਜ਼ਰੂਰੀ ਪੋਸ਼ਕ ਤੱਤ ਦੀ ਕਮੀ ਹੋਣਾ ਆਮ ਗੱਲ ਬਣ ਗਈ ਹੈ।
ਹਾਲਾਂਕਿ ਘਬਰਾਉਣ ਦੀ ਕੋਈ ਲੋੜ ਨਹੀਂ ਹੈ। ਸਭ ਤੋਂ ਚੰਗੀ ਗੱਲ ਇਹ ਹੈ ਕਿ ਤੁਸੀਂ ਆਪਣੀ ਰੋਜ਼ਾਨਾ ਡਾਈਟ ’ਚ ਕੁਝ ਸਸਤੇ ਤੇ ਆਸਾਨੀ ਨਾਲ ਮਿਲਣ ਵਾਲੇ ਫੂਡਜ਼ ਸ਼ਾਮਲ ਕਰਕੇ ਕੁਦਰਤੀ ਤਰੀਕੇ ਨਾਲ ਇਸ ਕਮੀ ਨੂੰ ਪੂਰਾ ਕਰ ਸਕਦੇ ਹੋ। ਆਓ ਜਾਣਦੇ ਹਾਂ ਇਨ੍ਹਾਂ ਖਾਸ ਚੀਜ਼ਾਂ ਬਾਰੇ।
ਹਰੀਆਂ ਪੱਤੇਦਾਰ ਸਬਜ਼ੀਆਂ
ਪਾਲਕ, ਮੇਥੀ, ਸਰ੍ਹੋਂ ਤੇ ਚੌਲਾਈ ਵਰਗੀਆਂ ਹਰੀਆਂ ਸਬਜ਼ੀਆਂ ਨੂੰ ਮੈਗਨੀਸ਼ੀਅਮ ਦਾ ਵਧੀਆ ਸਰੋਤ ਮੰਨਿਆ ਜਾਂਦਾ ਹੈ। ਇਨ੍ਹਾਂ ’ਚ ‘ਕਲੋਰੋਫਿਲ’ ਵੀ ਮੌਜੂਦ ਹੁੰਦਾ ਹੈ। ਤੁਸੀਂ ਇਨ੍ਹਾਂ ਨੂੰ ਰੋਜ਼ਾਨਾ ਸਬਜ਼ੀ, ਸੂਪ ਜਾਂ ਸਲਾਦ ਦੇ ਰੂਪ ’ਚ ਖਾ ਸਕਦੇ ਹੋ। ਇਸ ਨਾਲ ਸਰੀਰ ਨੂੰ ਜ਼ਰੂਰੀ ਪੋਸ਼ਣ ਮਿਲੇਗਾ ਤੇ ਪਾਚਨ ਤੰਤਰ ਨੂੰ ਵੀ ਫਾਇਦਾ ਹੋ ਸਕਦਾ ਹੈ।
ਕੇਲਾ
ਕੇਲਾ ਇੱਕ ਅਜਿਹਾ ਫਲ ਹੈ ਜੋ ਹਰ ਮੌਸਮ ’ਚ ਤੇ ਲਗਭਗ ਹਰ ਜਗ੍ਹਾ ਆਸਾਨੀ ਨਾਲ ਮਿਲ ਜਾਂਦਾ ਹੈ। ਇਹ ਸਿਰਫ਼ ਮੈਗਨੀਸ਼ੀਅਮ ਹੀ ਨਹੀਂ, ਸਗੋਂ ਪੋਟੈਸ਼ੀਅਮ ਨਾਲ ਵੀ ਭਰਪੂਰ ਹੁੰਦਾ ਹੈ। ਕੇਲਾ ਥੱਕੀਆਂ ਹੋਈਆਂ ਮਾਸਪੇਸ਼ੀਆਂ ਨੂੰ ਆਰਾਮ ਦੇਣ ਤੇ ਸਰੀਰ ਦੀ ਊਰਜਾ ਬਣਾਈ ਰੱਖਣ ’ਚ ਮਦਦ ਕਰ ਸਕਦਾ ਹੈ। ਇਸ ਨੂੰ ਸਵੇਰ ਦੇ ਨਾਸ਼ਤੇ ’ਚ ਜਾਂ ਵਰਕਆਊਟ ਤੋਂ ਬਾਅਦ ਖਾਧਾ ਜਾ ਸਕਦਾ ਹੈ।
ਨਟਸ ਤੇ ਸੀਡਜ਼
ਬਦਾਮ, ਕਾਜੂ, ਅਖਰੋਟ ਦੇ ਨਾਲ-ਨਾਲ ਕੱਦੂ ਤੇ ਸੂਰਜਮੁਖੀ ਦੇ ਬੀਜ ਮੈਗਨੀਸ਼ੀਅਮ ਦੇ ਚੰਗੇ ਸਰੋਤ ਹਨ। ਇਨ੍ਹਾਂ ’ਚ ਮੈਗਨੀਸ਼ੀਅਮ ਤੋਂ ਇਲਾਵਾ ਹੈਲਦੀ ਫੈਟਸ, ਪ੍ਰੋਟੀਨ ਤੇ ਫਾਈਬਰ ਵੀ ਪਾਏ ਜਾਂਦੇ ਹਨ। ਰੋਜ਼ਾਨਾ ਇੱਕ ਮੁੱਠੀ ਨਟਸ ਜਾਂ ਸੀਡਜ਼ ਖਾਣ ਨਾਲ ਸਰੀਰ ਨੂੰ ਪੋਸ਼ਣ ਮਿਲ ਸਕਦਾ ਹੈ ਤੇ ਊਰਜਾ ਬਣਾਈ ਰੱਖਣ ’ਚ ਮਦਦ ਮਿਲ ਸਕਦੀ ਹੈ।
ਦਾਲਾਂ ਤੇ ਬੀਨਜ਼
ਸਾਡੇ ਘਰਾਂ ’ਚ ਰੋਜ਼ ਬਣਨ ਵਾਲੀਆਂ ਦਾਲਾਂ ਵੀ ਮੈਗਨੀਸ਼ੀਅਮ ਦਾ ਵਧੀਆ ਸਰੋਤ ਹਨ। ਛੋਲੇ, ਰਾਜਮਾ, ਲੋਬੀਆ, ਮਸੂਰ ਤੇ ਮੂੰਗ ਦਾਲ ਨੂੰ ਆਪਣੀ ਡਾਈਟ ਦਾ ਹਿੱਸਾ ਬਣਾਓ। ਇਹ ਪ੍ਰੋਟੀਨ ਤੇ ਫਾਈਬਰ ਨਾਲ ਵੀ ਭਰਪੂਰ ਹੁੰਦੀਆਂ ਹਨ। ਇਨ੍ਹਾਂ ਨੂੰ ਖਾਣ ਨਾਲ ਪਾਚਨ ਤੰਤਰ ਨੂੰ ਫਾਇਦਾ ਹੁੰਦਾ ਹੈ ਤੇ ਪੇਟ ਲੰਬੇ ਸਮੇਂ ਤੱਕ ਭਰਿਆ ਮਹਿਸੂਸ ਹੋ ਸਕਦਾ ਹੈ।
ਡਾਰਕ ਚਾਕਲੇਟ
ਜੇ ਤੁਹਾਨੂੰ ਮਿੱਠਾ ਖਾਣਾ ਪਸੰਦ ਹੈ ਤਾਂ ਡਾਰਕ ਚਾਕਲੇਟ ਤੁਹਾਡੇ ਲਈ ਇੱਕ ਵਿਕਲਪ ਹੋ ਸਕਦੀ ਹੈ। ਇਸ ’ਚ ਮੈਗਨੀਸ਼ੀਅਮ ਦੇ ਨਾਲ ਐਂਟੀਆਕਸੀਡੈਂਟ ਵੀ ਪਾਏ ਜਾਂਦੇ ਹਨ। ਇਸ ਨੂੰ ਸੀਮਤ ਮਾਤਰਾ ’ਚ ਖਾਣਾ ਡਾਈਟ ਦਾ ਹਿੱਸਾ ਬਣਾਇਆ ਜਾ ਸਕਦਾ ਹੈ। ਇਨ੍ਹਾਂ ਕੁਦਰਤੀ ਚੀਜ਼ਾਂ ਨੂੰ ਆਪਣੀ ਰੋਜ਼ਾਨਾ ਡਾਈਟ ’ਚ ਸ਼ਾਮਲ ਕਰਕੇ ਤੁਸੀਂ ਮੈਗਨੀਸ਼ੀਅਮ ਦੀ ਲੋੜ ਪੂਰੀ ਕਰਨ ’ਚ ਮਦਦ ਲੈ ਸਕਦੇ ਹੋ। ਹਾਲਾਂਕਿ, ਲਗਾਤਾਰ ਥਕਾਵਟ ਜਾਂ ਕਮਜ਼ੋਰੀ ਨੂੰ ਸਿਰਫ਼ ਮੈਗਨੀਸ਼ੀਅਮ ਦੀ ਕਮੀ ਨਾਲ ਨਾ ਜੋੜੋ। ਅਜਿਹੇ ਲੱਛਣ ਬਣੇ ਰਹਿਣ ਤਾਂ ਡਾਕਟਰ ਨਾਲ ਸਲਾਹ ਕਰਨਾ ਬਿਹਤਰ ਹੈ।