100-150 ਰੁਪਏ ਦੇ ਸਸਤੇ ਸਨਗਲਾਸ ਕਿਤੇ ਅੱਖਾਂ ਲਈ ਨਾ ਬਣ ਜਾਣ ਮੁਸੀਬਤ, ਖਰੀਦਣ ਤੋਂ ਪਹਿਲਾਂ ਇਨ੍ਹਾਂ ਜ਼ਰੂਰੀ ਗੱਲਾਂ ਦਾ ਰੱਖੋ ਧਿਆਨ

ਲਾਈਫਸਟਾਈਲ ਡੈਸਕ, ਨਵੀਂ ਦਿੱਲੀ : ਇਸ ਗੱਲ ’ਚ ਕੋਈ ਸ਼ੱਕ ਨਹੀਂ ਕਿ ਸਨਗਲਾਸ ਆਉਟਫਿਟ ਦੇ ਨਾਲ ਇੱਕ ਵੱਖਰੀ ਹੀ ਵਾਈਬ ਦਿੰਦੇ ਹਨ, ਪਰ ਇਨ੍ਹਾਂ ਦਾ ਕੰਮ ਸਿਰਫ਼ ਕੂਲ ਦਿਖਣ ਤੋਂ ਥੋੜ੍ਹਾ ਜ਼ਿਆਦਾ ਹੁੰਦਾ ਹੈ। ਜੇ ਤੁਸੀਂ ਗਰਮੀਆਂ ਦੀ ਤਪਸ਼ ਤੇ ਧੂੜ-ਮਿੱਟੀ ਤੋਂ ਬਚਣ ਲਈ ਰਾਹ ਜਾਂਦੇ ਕਿਸੇ ਵੀ ਬਾਜ਼ਾਰ ਤੋਂ ਸਸਤੇ ਸਨਗਲਾਸ ਖਰੀਦ ਲੈਂਦੇ ਹੋ ਤਾਂ ਇਹ ਜੇਬ ਲਈ ਕਿਫਾਇਤੀ ਜ਼ਰੂਰ ਹੋ ਸਕਦੇ ਹਨ, ਪਰ ਅੱਖਾਂ ’ਤੇ ਇਸ ਦਾ ਮਾੜਾ ਅਸਰ ਪੈ ਸਕਦਾ ਹੈ।

ਸਸਤੇ ਸਨਗਲਾਸ ਦਾ ਅੱਖਾਂ ’ਤੇ ਮਾੜਾ ਅਸਰ

ਗਰਮੀਆਂ ਦੇ ਮੌਸਮ ’ਚ 100-150 ਰੁਪਏ ’ਚ ਮਿਲਣ ਵਾਲੇ ਸਨਗਲਾਸ ਸਟਾਈਲਿਸ਼ ਤਾਂ ਦਿਖਾਈ ਦੇ ਸਕਦੇ ਹਨ, ਪਰ ਇਨ੍ਹਾਂ ਨਾਲ ਅੱਖਾਂ ਦੀ ਸਿਹਤ ਖਰਾਬ ਹੋ ਸਕਦੀ ਹੈ। ਇਸ ਦਾ ਕਾਰਨ ਇਹ ਹੈ ਕਿ ਅਜਿਹੇ ਸਨਗਲਾਸ ’ਚ ਯੂਵੀ ਕਿਰਨਾਂ ਤੋਂ ਬਚਾਅ ਲਈ ਲੋੜੀਂਦੀ ਸੁਰੱਖਿਆ ਨਹੀਂ ਹੁੰਦੀ ਤੇ ਅੱਖਾਂ ’ਤੇ ਧੁੱਪ ਦਾ ਅਸਰ ਜਾਰੀ ਰਹਿੰਦਾ ਹੈ। ਇਸ ਨਾਲ ਮੋਤੀਆਬਿੰਦ, ਮੈਕਿਊਲਰ ਡੀਜਨਰੇਸ਼ਨ, ਰੈਟਿਨਾ ਨੂੰ ਨੁਕਸਾਨ, ਅੱਖਾਂ ’ਤੇ ਦਬਾਅ, ਸੰਵੇਦਨਸ਼ੀਲਤਾ ਤੇ ਡਰਾਈਨੇਸ ਵਰਗੀਆਂ ਸਮੱਸਿਆਵਾਂ ਵਧ ਸਕਦੀਆਂ ਹਨ।

ਸਹੀ ਸਨਗਲਾਸ ਦੀ ਚੋਣ ਕਿਵੇਂ ਕਰੀਏ?

ਸਹੀ ਸਨਗਲਾਸ ਚੁਣਦੇ ਸਮੇਂ ਕਈ ਗੱਲਾਂ ਦਾ ਧਿਆਨ ਰੱਖਣਾ ਜ਼ਰੂਰੀ ਹੈ। ਇਨ੍ਹਾਂ ਬਾਰੇ ਇੱਥੇ ਦੱਸਿਆ ਜਾ ਰਿਹਾ ਹੈ:

ਯੂਵੀ ਪ੍ਰੋਟੈਕਸ਼ਨ ਪਹਿਲੀ ਸ਼ਰਤ

ਸਨਗਲਾਸ ਖਰੀਦਦੇ ਸਮੇਂ ਸਭ ਤੋਂ ਪਹਿਲਾਂ ਇਹ ਯਕੀਨੀ ਬਣਾਓ ਕਿ ਉਸ ’ਚ ਯੂਵੀ ਪ੍ਰੋਟੈਕਸ਼ਨ ਹੋਵੇ। ਲੇਬਲ ਚੈੱਕ ਕਰੋ ਕਿ ਇਹ ਅੱਖਾਂ ਨੂੰ ਕਿੰਨੀ ਪ੍ਰਤੀਸ਼ਤ ਹਾਨੀਕਾਰਕ ਕਿਰਨਾਂ ਤੋਂ ਬਚਾਉਂਦਾ ਹੈ। ਜੇ ਇਸ ’ਤੇ UV 400 ਰੇਟਿੰਗ ਦਿੱਤੀ ਗਈ ਹੈ ਤਾਂ ਇਸ ਦਾ ਮਤਲਬ ਹੈ ਕਿ ਇਹ ਅੱਖਾਂ ਨੂੰ ਹਾਨੀਕਾਰਕ ਯੂਵੀ ਕਿਰਨਾਂ ਤੋਂ ਚੰਗੀ ਸੁਰੱਖਿਆ ਦੇਣ ਲਈ ਬਣਾਇਆ ਗਿਆ ਹੈ।

ਫਰੇਮ ਦਾ ਆਕਾਰ

ਦੂਜੀ ਗੱਲ ਇਹ ਦੇਖੋ ਕਿ ਫਰੇਮ ਥੋੜ੍ਹਾ ਵੱਡਾ ਹੋਵੇ ਤੇ ਇਸ ਤਰ੍ਹਾਂ ਦਾ ਹੋਵੇ ਕਿ ਅੱਖਾਂ ਦੇ ਆਲੇ-ਦੁਆਲੇ ਦਾ ਹਿੱਸਾ ਚੰਗੀ ਤਰ੍ਹਾਂ ਕਵਰ ਹੋ ਜਾਵੇ।

ਲੈਂਸ ਦਾ ਰੰਗ

ਲੋਕਾਂ ਨੂੰ ਲੱਗਦਾ ਹੈ ਕਿ ਸਨਗਲਾਸ ਦਾ ਰੰਗ ਜਿੰਨਾ ਜ਼ਿਆਦਾ ਡਾਰਕ ਹੋਵੇਗਾ, ਉਹ ਯੂਵੀ ਕਿਰਨਾਂ ਤੋਂ ਉਨੀ ਹੀ ਬਿਹਤਰ ਸੁਰੱਖਿਆ ਦੇਵੇਗਾ। ਹਾਲਾਂਕਿ, ਲੈਂਸ ਦਾ ਰੰਗ ਇਕੱਲਾ ਯੂਵੀ ਸੁਰੱਖਿਆ ਦਾ ਪੈਮਾਨਾ ਨਹੀਂ ਹੁੰਦਾ। ਚੰਗੀ ਯੂਵੀ ਪ੍ਰੋਟੈਕਸ਼ਨ ਵਾਲੇ ਲੈਂਸ ਦੀ ਚੋਣ ਕਰਨਾ ਜ਼ਿਆਦਾ ਮਹੱਤਵਪੂਰਨ ਹੈ।

ਬ੍ਰਾਂਡ ਤੇ ਕੁਆਲਿਟੀ

ਜੇ ਸਨਗਲਾਸ 100-150 ਰੁਪਏ ’ਚ ਮਿਲ ਰਹੇ ਹਨ ਤੇ ਤੁਹਾਨੂੰ ਲੱਗਦਾ ਹੈ ਕਿ ਤੁਸੀਂ ਪੈਸੇ ਬਚਾ ਰਹੇ ਹੋ ਤਾਂ ਇਹ ਵੱਡੀ ਭੁੱਲ ਹੋ ਸਕਦੀ ਹੈ। ਸਨਗਲਾਸ ਹਮੇਸ਼ਾ ਚੰਗੀ ਕੁਆਲਿਟੀ ਤੇ ਭਰੋਸੇਯੋਗ ਬ੍ਰਾਂਡ ਦੇ ਹੀ ਖਰੀਦਣੇ ਚਾਹੀਦੇ ਹਨ ਤਾਂ ਜੋ ਅੱਖਾਂ ਦੀ ਸਿਹਤ ਨਾਲ ਸਮਝੌਤਾ ਨਾ ਹੋਵੇ।

ਚਿਹਰੇ ਦੀ ਬਣਤਰ

ਸਨਗਲਾਸ ਦਾ ਫਰੇਮ ਅਜਿਹਾ ਹੋਣਾ ਚਾਹੀਦਾ ਹੈ ਜੋ ਅੱਖਾਂ ਨੂੰ ਚੰਗੀ ਤਰ੍ਹਾਂ ਢੱਕ ਸਕੇ। ਇਸ ਦੇ ਨਾਲ ਇਹ ਵੀ ਧਿਆਨ ਰੱਖੋ ਕਿ ਫਰੇਮ ਤੁਹਾਡੇ ਚਿਹਰੇ ’ਤੇ ਚੰਗਾ ਲੱਗੇ। ਸਨਗਲਾਸ ਦਾ ਚਿਹਰੇ ’ਤੇ ਸਹੀ ਤਰ੍ਹਾਂ ਫਿੱਟ ਹੋਣਾ ਵੀ ਲੁੱਕ ਲਈ ਮਹੱਤਵਪੂਰਨ ਹੈ।