ਪੰਜਾਬੀ ਅਦਾਕਾਰੀ ਨੂੰ ਸ਼ਿੱਦਤ ਨਾਲ ਪ੍ਰਣਾਇਆ ਵਿਜੈ ਟੰਡਨ

ਅਦਾਕਾਰ ਵਿਜੈ ਟੰਡਨ ਪੰਜਾਬੀ ਸਿਨੇਮੇ ਦੇ ਐਸੇ ਅਦਾਕਾਰ ਹਨ ਜਿਨ੍ਹਾਂ ਨੇ ਸੱਤਰ ਦੇ ਦਹਾਕੇ ’ਚ ਆਪਣੇ ਫਿਲਮੀ ਕੈਰੀਅਰ ਦਾ ਆਗਾਜ਼ ਕੀਤਾ ਤੇ 50 ਸਾਲ ਦਾ ਸ਼ਾਨਦਾਰ ਸਫ਼ਰ ਤਹਿ ਕਰਕੇ ਉਹ ਅੱਜ ਵੀ ਪੰਜਾਬੀ ਫਿਲਮਾਂ ’ਚ ਪੂਰੀ ਸ਼ਿੱਦਤ ਨਾਲ ਖ਼ੂਬਸੂਰਤ ਅਦਾਕਾਰੀ ਦੇ ਰੰਗ ਬਿਖੇਰ ਰਹੇ ਹਨ। ਪੰਜਾਬੀ ਸਿਨੇਮੇ ਦੀ ਝੋਲੀ ’ਚ ਕਈ ਖ਼ੂਬਸੂਰਤ ਫਿਲਮਾਂ ਪਾਉਣ ਵਾਲੇ ਵਿਜੈ ਟੰਡਨ ਅਜਿਹੇ ਇਕੱਲੇ ਵਾਹਿਦ ਸ਼ਖ਼ਸ ਹਨ ਜਿਨ੍ਹਾਂ ਦੀ ਬਤੌਰ ਲੇਖਕ,ਨਿਰਮਾਤਾ ਅਤੇ ਅਦਾਕਾਰ ਵਜੋਂ 1993 ਵਿਚ ਰਿਲੀਜ਼ ਹੋਈ ਫਿਲਮ ‘ਕਚਹਿਰੀ’ ਨੂੰ ਸਾਲ 1994 ’ਚ ਸਰਬੋਤਮ ਫਿਲਮ ਲਈ ਰਾਸ਼ਟਰੀ ਪੁਰਸਕਾਰ ਨਾਲ ਸਨਮਾਨਿਤ ਕੀਤਾ ਗਿਆ। ਸਚਮੁੱਚ ਹੀ ਅਦਾਕਾਰ ਵਿਜੈ ਟੰਡਨ ਪੰਜਾਬੀ ਸਿਨੇਮੇ ਦਾ ਮਾਣ ਹਨ ।

ਜਨਮ

13 ਮਾਰਚ 1950 ਨੂੰ ਸੋਹਣ ਲਾਲ ਟੰਡਨ ਤੇ ਮਾਤਾ ਸਤਿਆਵਤੀ ਜੀ ਦੇ ਘਰ ਲੁਧਿਆਣੇ ਦੀ ਤਹਿਸੀਲ ਜਗਰਾਓਂ ’ਚ ਪੈਦਾ ਹੋਏ ਵਿਜੈ ਟੰਡਨ ਨੇ ਮੁੱਢਲੀ ਸਿੱਖਿਆ ਜਗਰਾਓਂ ਤੋਂ ਹੀ ਹਾਸਿਲ ਕੀਤੀ। ਉਪਰੰਤ ਗੁਰੂ ਗੋਬਿੰਦ ਸਿੰਘ ਕਾਲਜ ਚੰਡੀਗੜ੍ਹ ਤੋਂ ਬੀਏ ਦੀ ਡਿਗਰੀ ਹਾਸਿਲ ਕੀਤੀ। ਚੰਡੀਗੜ੍ਹ ਪੜ੍ਹਦਿਆਂ ਦਿਲਚਸਪੀ ਅਦਾਕਾਰੀ ਵੱਲ ਹੋ ਗਈ ਤੇ ਚੰਡੀਗੜ੍ਹ ਥੀਏਟਰ ਗਰੁੱਪ ਜਾਇਨ ਕਰ ਲਿਆ। ਥੀਏਟਰ ’ਚ ਖੇਡੇ ਅਣਗਿਣਤ ਨਾਟਕਾਂ ਜ਼ਰੀਏ ਅਦਾਕਾਰੀ ’ਚ ਪਰਿਪੱਕਤਾ ਹਾਸਲ ਕਰਨ ਤੋਂ ਬਾਅਦ ਇਨ੍ਹਾਂ ਨੇ ਪੰਜਾਬੀ ਫਿਲਮਾਂ ਵੱਲ ਰੁਖ਼ ਕੀਤਾ ਤੇ ਪ੍ਰਸਿੱਧ ਫਿਲਮਸਾਜ਼ ਇੰਦਰਜੀਤ ਹਸਨਪੁਰੀ ਨੇ ਆਪਣੀ ਪੰਜਾਬੀ ਫਿਲਮ ‘ਤੇਰੀ ਮੇਰੀ ਇਕ ਜਿੰਦੜੀ’ ਲਈ ਸਾਈਨ ਕਰ ਲਿਆ ਜੋ ਨਾਮਵਰ ਅਦਾਕਾਰ ਵਰਿੰਦਰ ਦੀ ਵੀ ਪਹਿਲੀ ਫਿਲਮ ਸੀ। ਫਿਲਮ ਦੀ ਸ਼ੂਟਿੰਗ 13 ਜਨਵਰੀ 1971 ਨੂੰ ਸ਼ੁਰੂ ਹੋ ਗਈ ਸੀ ਪਰ ਕਿਸੇ ਕਾਰਨ ਫਿਲਮ ਨੂੰ ਪੂਰੇ ਹੋਣ ’ਚ 4 ਸਾਲ ਲੱਗ ਗਏ।

ਕਰੀਅਰ ਦੀ ਸ਼ੁਰੂਆਤ

ਉਸ ਤੋਂ ਪਹਿਲਾਂ ਵਿਜੈ ਟੰਡਨ ਨੂੰ ਬਤੌਰ ਮੁੱਖ ਅਦਾਕਾਰ ਲੈ ਕੇ ਪ੍ਰਸਿੱਧ ਕਾਮੇਡੀਅਨ ਮਿਹਰ ਮਿੱਤਲ ਨੇ ਮਸ਼ਹੂਰ ਨਾਟਕ ‘ਲਾਡਲਾ’ ਤੇ ਅਧਾਰਿਤ ਫ਼ਿਲਮ ‘ਮਾਂ ਦਾ ਲਾਡਲਾ’ ਦਾ ਨਿਰਮਾਣ ਕਰ ਉਸ ਨੂੰ ਆਪਣੇ ਬੈਨਰ ਹੇਠ 6 ਅਪ੍ਰੈਲ 1973 ਨੂੰ ਰਿਲੀਜ਼ ਕਰ ਦਿੱਤਾ ਜਿਸ ਨੂੰ ਸਿਨੇ ਪ੍ਰੇਮੀਆਂ ਦਾ ਅਥਾਹ ਪਿਆਰ ਮਿਲਿਆ। ਇਹ ਫਿਲਮ ਇਨ੍ਹਾਂ ਦੇ ਫਿਲਮੀ ਕਰੀਅਰ ਦੀ ਡੈਬਿਊ ਫ਼ਿਲਮ ਦੇ ਤੌਰ ’ਤੇ ਜਾਣੀ ਜਾਂਦੀ ਹੈ। ਪੰਜਾਬੀ ਸਿਨੇਮੇ ’ਚ ਵਿਜੈ ਦਾ ਫਿਲਮੀ ਸਫ਼ਰ ਸ਼ਾਨਦਾਰ ਰਿਹਾ। ਪੰਜਾਬੀ ਫਿਲਮਾਂ ਵਿਚ ਹੀਰੋ ਦੇ ਨਾਲ ਨਾਲ ਖ਼ਲਨਾਇਕ ਦੇ ਕਿਰਦਾਰ ਵੀ ਬਿਹਤਰੀਨ ਅਦਾ ਕੀਤੇ। ਪੰਜਾਬੀ ਫਿਲਮਾਂ ’ਚ 1973 ਤੋਂ ਸ਼ੁਰੂ ਹੋਇਆ ਫਿਲਮੀ ਸਫ਼ਰ ਅੱਜ ਵੀ ਨਿਰੰਤਰ ਜਾਰੀ ਹੈ।

ਮਸ਼ਹੂਰ ਫ਼ਿਲਮਾਂ

ਵਿਜੈ ਨੇ ‘ਮਿੱਤਰ ਪਿਆਰੇ ਨੂੰ’ (1975), ‘ਤੇਰੀ ਮੇਰੀ ਇਕ ਜ਼ਿੰਦੜੀ’ (1975), ‘ਸੱਚਾ ਮੇਰਾ ਰੂਪ ਹੈ’ (1976), ‘ਸਵਾ ਲਾਖ ਸੇ ਏਕ ਲੜਾਊ’ (1976), ‘ਟਾਕਰਾ’ (1976), ‘ਸ਼ਹੀਦ ਊਧਮ ਸਿੰਘ’ (1977), ‘ਵੰਗਾਰ’ (1977), ‘ਯਮਲਾ ਜੱਟ’ (1977), ‘ਸਰਦਾਰ-ਏ-ਆਜ਼ਮ’ (1979), ‘ਜੱਟੀ’ (1980), ‘ਸੱਸੀ ਪੁੰਨੂੰ’ (1983), ‘ਯਾਰ ਗਰੀਬਾਂ ਦਾ’ (1986), ‘ਕਚਹਿਰੀ’ (1993), ‘ਤਬਾਹੀ’ (1993), ‘ਵਿਛੋੜਾ’ (1994), ‘ਕੁੜੀ ਕੈਨੇਡਾ ਦੀ’ (1994), ‘ਨਾਲਾਇਕ’ (2005), ‘ਸਤਿ ਸ਼੍ਰੀ ਅਕਾਲ’ (2008), ‘ਅਾਪਣੀ ਬੋਲੀ ਆਪਣਾ ਦੇਸ਼’ (2009), ‘ਜੱਟ ਐਂਡ ਜੂਲੀਅਟ-2’ (2013), ‘ਯਾਰਾ ਦਾ ਕੈਚਅੱਪ’ (2014), ‘ਮਿਸਟਰ ਐਂਡ ਮਿਸਿਜ਼ 420’ (2014), ‘ਮੁੰਡੇ ਕਮਾਲ ਦੇ’ (2015), ‘ਵਿਸਾਖੀ ਲਿਸਟ’ (2016), ‘ਲੌਂਗ ਲਾਚੀ’ (2018), ‘ਅਫ਼ਸਰ’ (2018), ‘ਅਸੀਸ’ (2018), ‘ਗੋਲਕ ਬੈਂਕ ਤੇ ਬਟੂਆ’ (2018), ‘ਗਿੰਦੜਸਿੰਘੀ’ (2019), ‘ਰੱਬ ਦਾ ਰੇਡੀਓ-2’ (2019) ਨੈਸ਼ਨਲ ਅਵਾਰਡ ਜੇਤੂ ਫਿਲਮ ‘ਤੇਰੀ ਮੇਰੀ ਜੋੜੀ’ (2019), ‘ਖ਼ਤਰੇ ਦਾ ਘੁੱਗੂ’, ‘ਨਿਸ਼ਾਨਾ’ (2022) ਤੇ ‘ਜੱਟੂ ਨਿਖੱਟੂ’ (2023) ਪ੍ਰਮੁੱਖ ਹਨ।

ਬਤੌਰ ਫਿਲਮ ਲੇਖਕ ਸੰਵਾਦ ਵੀ ਲਿਖੇ

ਇਨ੍ਹਾਂ ਨੇ ਆਪਣੀ ਪੰਜਾਬੀ ਫਿਲਮਾਂ ਕਚਹਿਰੀ ’ਚ ਬਤੌਰ ਫਿਲਮ ਲੇਖਕ ਤੇ ਸੰਵਾਦ ਵੀ ਲਿਖੇ ਹਨ, ਇਸ ਫਿਲਮ ’ਚ ਪ੍ਰਸਿੱਧ ਅਦਾਕਾਰ ਯੋਗਰਾਜ ਸਿੰਘ ਤੇ ਗੁਰਦਾਸ ਮਾਨ ਮੁੱਖ ਭੂਮਿਕਾ ’ਚ ਸਨ ਤੇ ਇਸ ਫਿਲਮ ਨੂੰ 1994 ’ਚ ‘ਸਰਬੋਤਮ ਫੀਚਰ ਫਿਲਮ ਦਾ ਨੈਸ਼ਨਲ ਐਵਾਰਡ ਮਿਲ ਚੁੱਕਾ ਹੈ। ਪ੍ਰਸਿੱਧ ਬਾਲੀਵੁੱਡ ਫਿਲਮ ‘ਸਰਹੱਦ ਪਾਰ’ ਦੀ ਕਹਾਣੀ ਲਿਖੀ ਜਿਸ ਵਿਚ ਪ੍ਰਸਿੱਧ ਅਦਾਕਾਰ ਸੰਜੇ ਦੱਤ, ਤੱਬੂ, ਮਹਿਮਾ ਚੌਧਰੀ, ਚੰਦਰਚੂਹੜ ਸਿੰਘ ਵਰਗੇ ਅਦਾਕਾਰਾਂ ਨੇ ਅਦਾਕਾਰੀ ਕੀਤੀ। ਟੰਡਨ ਨੇ ਹਿੰਦੀ ਫ਼ਿਲਮਾਂ ਤੋਂ ਇਲਾਵਾ ਪੰਜਾਬੀ ਫਿਲਮ ‘ਲਕੀਰਾਂ’ ਦੀ ਕਹਾਣੀ,ਫਿਲਮ ‘ਮਰ ਜਾਵਾਂ ਗੁੜ ਖਾ ਕੇ’, ‘ਅਾਪਣੀ ਬੋਲੀ ਅਾਪਣਾ ਦੇਸ਼’, ‘ਸੁੰਦਰੀ ਦਾ ਬ੍ਰੇਵ ਕੌਰ’ ਦੇ ਸੰਵਾਦ ਤੇ ਫਿਲਮ ਸਤਿ ਸ੍ਰੀ ਅਕਾਲ ਦੇ ਸੰਵਾਦ ਅਤੇ ਪਟਕਥਾ ਵੀ ਲਿਖੇ। 15 ਦੇ ਕਰੀਬ ਟੀਵੀ. ਸੀਰੀਅਲਾਂ ’ਚ ਕੰਮ ਵੀ ਕੀਤਾ, ਜਿਨ੍ਹਾਂ ’ਚ ਪ੍ਰਸਿੱਧ ਸੀਰੀਅਲ ‘ਦੋ ਅਕਾਲਗੜ੍ਹ’, ‘ਸਰਹਿੰਦ’ , ‘ਰਾਣੋ’, ‘ਆਪਣੀ ਮਿੱਟੀ’, ‘ਮਨ ਜੀਤੈ ਜਗ ਜੀਤ’ ਤੇ ਹਿੰਦੀ ਨਾਟਕ ‘ਬੁਨਿਆਦ’, ‘ਤਾਰ’ ਤੇ ‘ਦਾਦਾ ਦਾਦੀ ਕੀ ਕਹਾਣੀਆਂ’ ਸ਼ਾਮਿਲ ਹਨ।

ਵਿਆਹ

ਵਿਜੈ ਦਾ ਵਿਆਹ ਸੁਨੀਤਾ ਟੰਡਨ ਨਾਲ ਹੋਇਆ ਅਤੇ ਇਨ੍ਹਾਂ ਦੇ ਤਿੰਨ ਬੱਚੇ ਹਨ: ਇਕ ਪੁੱਤਰ ਤੇ ਦੋ ਧੀਆਂ। ਇਹ ਬੱਚੇ ਵੀ ਅਦਾਕਾਰਾ ਦਾ ਸ਼ੌਕ ਰੱਖਦੇ ਹਨ ਤੇ ਬੇਟੀ ਪੂਜਾ ਟੰਡਨ ਨੇ ਅਦਾਕਾਰ ਦਿਲਜੀਤ ਦੋਸਾਂਝ ਦੀ ਪਹਿਲੀ ਫ਼ਿਲਮ ‘ਦ ਲਾਇਨ ਆਫ ਪੰਜਾਬ’ ’ਚ ਦਿਲਜੀਤ ਨਾਲ ਬਤੌਰ ਮੁੱਖ ਅਦਾਕਾਰਾ ਪੰਜਾਬੀ ਫਿਲਮ ਇੰਡਸਟਰੀ ਵਿਚ ਡੈਬਿਊ ਕੀਤਾ ਸੀ।

ਭਾਸ਼ਾ ਵਿਭਾਗ ਦੇ ਸਨਮਾਨ ਦੀ ਉਡੀਕ

ਆਪਣੀ ਜ਼ਿੰਦਗੀ ਦੇ ਪੰਜ ਦਹਾਕੇ ਫਿਲਮ ਇੰਡਸਟਰੀ ’ਚ ਗੁਜ਼ਾਰਨ ਸਮੇਂ ਦੌਰਾਨ ਇਨ੍ਹਾਂ ਨੂੰ ਅਨੇਕਾਂ ਮਾਣ ਸਨਮਾਨ ਹਾਸਿਲ ਹੋਏ। ਦਸੰਬਰ 2020 ਵਿਚ ਭਾਸ਼ਾ ਵਿਭਾਗ ਪੰਜਾਬ ਵੱਲੋਂ ਵਿਜੈ ਟੰਡਨ ਸਮੇਤ ਹੋਰ ਵੀ ਸੀਨੀਅਰ ਅਦਾਕਾਰਾਂ ਨੂੰ ਸ਼੍ਰੋਮਣੀ ਐਵਾਰਡ ਦੇਣ ਦਾ ਐਲਾਨ ਕੀਤਾ ਗਿਆ ਪਰ ਅਫ਼ਸੋਸ ਉਹ 5 ਵਰ੍ਹੇ ਬੀਤ ਜਾਣ ਦੇ ਬਾਵਜੂਦ ਨਹੀਂ ਦਿੱਤਾ ਗਿਆ। ਪੰਜਾਬੀ ਸਿਨੇਮੇ ਦੇ ਇਤਿਹਾਸ ਦਾ ਇਕ ਸੁਨਹਿਰੀ ਪਾਤਰ ਹਨ ਵਿਜੈ ਟੰਡਨ। ਪ੍ਰਮਾਤਮਾ ਆਪ ਜੀ ਨੂੰ ਸਦਾ ਚੜ੍ਹਦੀ ਕਲਾ ਵਿਚ ਰੱਖੇ। •

-ਅੰਗਰੇਜ ਸਿੰਘ ਵਿਰਦੀ

94646-28857