- ਸ਼ਹਿਰ ਚੁਣੋ
- ਈ-ਪੇਪਰ
- ਵੈੱਬ ਸਟੋਰੀਜ਼
- ਸ਼ਹਿਰ ਚੁਣੋ
- ਈ-ਪੇਪਰ
- ਵੈੱਬ ਸਟੋਰੀਜ਼
ਪੰਜਾਬੀ ਆ ਗਏ ਓਏ! ਦਿਲਜੀਤ ਦੁਸਾਂਝ ਨੇ ਰਚਿਆ ਇਤਿਹਾਸ, ਭਾਰਤ ਦੇ ਸਭ ਤੋਂ ਵੱਡੇ ਸਟੇਡੀਅਮ 'ਚ ਕੀਤਾ ਮੈਗਾ ਕੰਸਰਟ ਦਾ ਐਲਾਨ
ਪੰਜਾਬੀ ਗਾਇਕ-ਅਦਾਕਾਰ ਦਿਲਜੀਤ ਦੁਸਾਂਝ ਨੇ ਵੈਂਬਲੀ ਸਟੇਡੀਅਮ 'ਚ ਆਪਣੇ ਕੰਸਰਟ ਦੌਰਾਨ ਅਹਿਮਦਾਬਾਦ ਦੇ ਨਰਿੰਦਰ ਮੋਦੀ ਸਟੇਡੀਅਮ 'ਚ ਸ਼ੋਅ ਕਰਨ ਦਾ ਐਲਾਨ ਕੀਤਾ। ਉਨ੍ਹਾਂ ਨੇ ਲੰਡਨ ਦੇ ਇਸ ਵੈਨਿਊ ’ਤੇ ਇੱਕ ਕਲਾਕਾਰ ਵਜੋਂ ਪਰਫਾਰਮ ਕਰਨ ਵਾਲੇ ਪਹਿਲੇ ਪੰਜਾਬੀ ਗਾਇਕ ਬਣ ਕੇ ਇਤਿਹਾਸ ਰਚਿਆ। ਇਸ ਦੌਰਾਨ ਦਰਸ਼ਕਾਂ ਨੇ ਜ਼ੋਰਦਾਰ ਤਾਲੀਆਂ ਅਤੇ ਚੀਅਰਜ਼ ਨਾਲ ਉਨ੍ਹਾਂ ਦਾ ਸਵਾਗਤ ਕੀਤਾ।
Posted By Sunita
Publish Date: Sun, 13 Sep 2026 12:31 PM (IST)
Updated Date: Sun, 13 Sep 2026 12:32 PM (IST)
ਐਂਟਰਟੇਨਮੈਂਟ ਡੈਸਕ, ਨਵੀਂ ਦਿੱਲੀ - ਪੰਜਾਬੀ ਗਾਇਕ-ਅਦਾਕਾਰ ਦਿਲਜੀਤ ਦੁਸਾਂਝ ਨੇ ਵੈਂਬਲੀ ਸਟੇਡੀਅਮ 'ਚ ਆਪਣੇ ਕੰਸਰਟ ਦੌਰਾਨ ਅਹਿਮਦਾਬਾਦ ਦੇ ਨਰਿੰਦਰ ਮੋਦੀ ਸਟੇਡੀਅਮ 'ਚ ਸ਼ੋਅ ਕਰਨ ਦਾ ਐਲਾਨ ਕੀਤਾ। ਉਨ੍ਹਾਂ ਨੇ ਲੰਡਨ ਦੇ ਇਸ ਵੈਨਿਊ ’ਤੇ ਇੱਕ ਕਲਾਕਾਰ ਵਜੋਂ ਪਰਫਾਰਮ ਕਰਨ ਵਾਲੇ ਪਹਿਲੇ ਪੰਜਾਬੀ ਗਾਇਕ ਬਣ ਕੇ ਇਤਿਹਾਸ ਰਚਿਆ। ਇਸ ਦੌਰਾਨ ਦਰਸ਼ਕਾਂ ਨੇ ਜ਼ੋਰਦਾਰ ਤਾਲੀਆਂ ਅਤੇ ਚੀਅਰਜ਼ ਨਾਲ ਉਨ੍ਹਾਂ ਦਾ ਸਵਾਗਤ ਕੀਤਾ।
ਅਗਲਾ ਸ਼ੋਅ ਭਾਰਤ 'ਚ ਕਰਨਗੇ ਦਿਲਜੀਤ
ਪੰਜਾਬੀ ਗਾਇਕ-ਅਦਾਕਾਰ ਦਿਲਜੀਤ ਦੁਸਾਂਝ ਨੇ ਸ਼ਨੀਵਾਰ, 12 ਸਤੰਬਰ ਨੂੰ ਲੰਡਨ ਦੇ ਵੈਂਬਲੀ ਸਟੇਡੀਅਮ 'ਚ ਆਪਣੇ ਕੰਸਰਟ ਦੌਰਾਨ ਐਲਾਨ ਕੀਤਾ ਕਿ ਉਹ ਅਗਲੀ ਵਾਰ ਅਹਿਮਦਾਬਾਦ ਦੇ ਨਰਿੰਦਰ ਮੋਦੀ ਸਟੇਡੀਅਮ 'ਚ ਪਰਫਾਰਮ ਕਰਨਗੇ। ਇਹ ਐਲਾਨ ਉਨ੍ਹਾਂ ਦੇ ‘ਔਰਾ ਵਰਲਡ ਟੂਰ’ ਦੌਰਾਨ ਕੀਤਾ ਗਿਆ, ਜਿਸ ਦਾ ਦਰਸ਼ਕਾਂ ਨੇ ਜ਼ੋਰਦਾਰ ਸਵਾਗਤ ਕੀਤਾ।
ਬਾਅਦ 'ਚ ਦੁਸਾਂਝ ਨੇ ਅਹਿਮਦਾਬਾਦ ਸ਼ੋਅ ਦੀ ਤਾਰੀਖ ਦੀ ਪੁਸ਼ਟੀ ਕਰਦਿਆਂ ਦਰਸ਼ਕਾਂ ਨੂੰ ਕਿਹਾ, “ਅਸੀਂ 21 ਨਵੰਬਰ 2026 ਨੂੰ ਨਰਿੰਦਰ ਮੋਦੀ ਸਟੇਡੀਅਮ 'ਚ ਪਰਫਾਰਮ ਕਰਾਂਗੇ।” ਇਹ ਕੰਸਰਟ 2024 'ਚ ਹੋਏ ਉਨ੍ਹਾਂ ਦੇ ‘ਦਿਲ-ਲੁਮਿਨਾਟੀ ਇੰਡੀਆ ਟੂਰ’ ਤੋਂ ਬਾਅਦ ਅਹਿਮਦਾਬਾਦ 'ਚ ਉਨ੍ਹਾਂ ਦੀ ਵਾਪਸੀ ਹੋਵੇਗੀ। ਨਵੰਬਰ 'ਚ ਹੋਣ ਵਾਲੇ ਇਸ ਸ਼ੋਅ ਲਈ ਟਿਕਟਾਂ, ਕੀਮਤ ਅਤੇ ਬੁਕਿੰਗ ਨਾਲ ਸਬੰਧਤ ਜਾਣਕਾਰੀ ਅਜੇ ਜਾਰੀ ਨਹੀਂ ਕੀਤੀ ਗਈ ਹੈ।
ਕੋਲਡਪਲੇ ਬਾਰੇ ਵੀ ਕੀਤੀ ਗੱਲ
ਵੈਨਿਊ ਬਾਰੇ ਗੱਲ ਕਰਦਿਆਂ ਦੁਸਾਂਝ ਨੇ ਨਰਿੰਦਰ ਮੋਦੀ ਸਟੇਡੀਅਮ ਨੂੰ ਭਾਰਤ ਦਾ ਸਭ ਤੋਂ ਵੱਡਾ ਸਟੇਡੀਅਮ ਦੱਸਿਆ ਅਤੇ ਉੱਥੇ ਕੋਲਡਪਲੇ ਦੇ ਕੰਸਰਟ ਦਾ ਵੀ ਜ਼ਿਕਰ ਕੀਤਾ।
ਕੋਲਡਪਲੇ ਦਾ ਜ਼ਿਕਰ ਕਰਦਿਆਂ ਉਨ੍ਹਾਂ ਨੇ ਕਿਹਾ, “ਭਾਰਤ 'ਚ ਸਭ ਤੋਂ ਵੱਡਾ ਸਟੇਡੀਅਮ ਹੈ—ਨਰਿੰਦਰ ਮੋਦੀ ਸਟੇਡੀਅਮ। ਇੱਕ ਵਿਦੇਸ਼ੀ ਬੈਂਡ ਨੇ ਉੱਥੇ ਸਾਰੀਆਂ ਟਿਕਟਾਂ ਵੇਚ ਦਿੱਤੀਆਂ ਸਨ। ਉਨ੍ਹਾਂ ਲਈ ਸਨਮਾਨ ਹੈ, ਬਹੁਤ-ਬਹੁਤ ਵਧਾਈ! ਪਰ ਜੇ ਭਾਰਤ 'ਚ ਕੋਈ ਸਟੇਡੀਅਮ ਹੋਵੇ ਅਤੇ ਉੱਥੇ ਕੋਈ ਪੰਜਾਬੀ ਪਰਫਾਰਮ ਨਾ ਕਰੇ, ਤਾਂ ਅਜਿਹਾ ਤਾਂ ਹੋ ਹੀ ਨਹੀਂ ਸਕਦਾ।”
ਪਹਿਲੇ ਪੰਜਾਬੀ ਕਲਾਕਾਰ ਬਣ ਕੇ ਰਚਿਆ ਇਤਿਹਾਸ
ਵੈਂਬਲੀ 'ਚ ਦੁਸਾਂਝ ਇਸ ਵੈਨਿਊ ’ਤੇ ਮੁੱਖ ਕਲਾਕਾਰ ਵਜੋਂ ਪਰਫਾਰਮ ਕਰਨ ਵਾਲੇ ਪਹਿਲੇ ਪੰਜਾਬੀ ਗਾਇਕ ਬਣੇ। ਸ਼ੋਅ ਦੀ ਸ਼ੁਰੂਆਤ “ਪੰਜਾਬੀ ਆ ਗਏ ਵੈਂਬਲੀ ਓਏ!” ਨਾਲ ਕਰਦਿਆਂ ਉਨ੍ਹਾਂ ਨੇ ਖਚਾਖਚ ਭਰੀ ਭੀੜ ਨੂੰ ਕਿਹਾ ਕਿ ਇਹ ਪਲ “ਇਤਿਹਾਸ ਦੇ ਪੰਨਿਆਂ 'ਚ ਦਰਜ ਹੋ ਜਾਵੇਗਾ।” ਦੋ ਘੰਟਿਆਂ ਤੋਂ ਵੱਧ ਚੱਲੇ ਇਸ ਕੰਸਰਟ 'ਚ ਉਨ੍ਹਾਂ ਨੇ GOAT, Lover, Hass Hass ਅਤੇ Born to Shine ਵਰਗੇ ਗੀਤ ਗਾਏ।
90,000 ਲੋਕਾਂ ਦੀ ਸਮਰੱਥਾ ਵਾਲੇ ਇਸ ਸਟੇਡੀਅਮ 'ਚ ਵੱਖ-ਵੱਖ ਪਿਛੋਕੜਾਂ ਤੋਂ ਆਏ ਪ੍ਰਸ਼ੰਸਕਾਂ ਨੂੰ ਗਾਉਂਦੇ ਅਤੇ ਨੱਚਦੇ ਦੇਖਿਆ ਗਿਆ। ਦੁਸਾਂਝ ਨੇ ਦਰਸ਼ਕਾਂ ਨਾਲ ਗੱਲਬਾਤ ਵੀ ਕੀਤੀ ਅਤੇ ਬੱਚਿਆਂ ਸਮੇਤ ਇੱਕ ਬਜ਼ੁਰਗ ਮਹਿਲਾ ਅਤੇ ਕਈ ਹੋਰ ਪ੍ਰਸ਼ੰਸਕਾਂ ਨੂੰ ਸਟੇਜ ’ਤੇ ਵੀ ਬੁਲਾਇਆ। ਦੁਸਾਂਝ ਨੇ ਕੰਸਰਟ ਦਾ ਅੰਤ ‘ਮੈਂ ਹਾਂ ਪੰਜਾਬੀ’ ਗੀਤ ਅਤੇ ਆਤਿਸ਼ਬਾਜ਼ੀ ਨਾਲ ਕੀਤਾ। ਇਸ ਤਰ੍ਹਾਂ ਵੈਂਬਲੀ ਸ਼ੋਅ ਸ਼ਾਨਦਾਰ ਅੰਦਾਜ਼ 'ਚ ਸਮਾਪਤ ਹੋਇਆ ਅਤੇ ਹੁਣ ਦਿਲਜੀਤ ਅਹਿਮਦਾਬਾਦ ਦੇ ਨਰਿੰਦਰ ਮੋਦੀ ਸਟੇਡੀਅਮ 'ਚ ਧੂਮ ਮਚਾਉਣ ਲਈ ਤਿਆਰ ਹਨ।