ਇੱਕ ਫ਼ਿਲਮ ਨਾਲ ਸਟਾਰ ਬਣੇ, ਹੁਣ ਕੰਮ ਦੇ ਮੁਹਤਾਜ ਹੋਏ ਸ਼ਰਦ ਕਪੂਰ; 'ਜੋਸ਼' ਅਦਾਕਾਰ ਦੀ ਹਾਲਤ ਦੇਖ ਕੇ ਪ੍ਰਸ਼ੰਸਕਾਂ ਨੂੰ ਆਏ ਸਲਮਾਨ ਖਾਨ ਯਾਦ

"ਮੈਂ ਬਾਰਸੀਲੋਨਾ ਵਿੱਚ ਫੁੱਟਬਾਲ ਖੇਡਣ ਗਿਆ ਸੀ। ਟੀਮ ਵਿੱਚ ਕਈ ਵੱਡੇ ਖਿਡਾਰੀ ਸਨ। ਮੈਨੂੰ ਲੱਗ ਰਿਹਾ ਸੀ ਕਿ ਮੈਂ ਵੀ ਬਹੁਤ ਵੱਡਾ ਖਿਡਾਰੀ ਹਾਂ। ਮੈਂ ਆਪਣੇ ਆਪ ਨੂੰ ਮੇਸੀ ਸਮਝ ਰਿਹਾ ਸੀ। ਖੇਡ ਦੌਰਾਨ ਇੱਕ ਵਿਅਕਤੀ ਦੀ ਲੱਤ ਮੇਰੇ ਨਾਲ ਵੱਜ ਗਈ, ਜਿਸ ਤੋਂ ਬਾਅਦ ਮੈਨੂੰ ਮਹਿਸੂਸ ਹੋਇਆ ਕਿ ਮੈਨੂੰ ਗੰਭੀਰ ਸੱਟ ਲੱਗ ਗਈ ਹੈ।"

Posted By alisha

Publish Date: Sat, 14 Nov 2026 10:33 AM (IST)

Updated Date: Sat, 14 Nov 2026 10:41 AM (IST)

ਇੱਕ ਫ਼ਿਲਮ ਨਾਲ ਸਟਾਰ ਬਣੇ, ਹੁਣ ਕੰਮ ਦੇ ਮੁਹਤਾਜ ਹੋਏ ਸ਼ਰਦ ਕਪੂਰ; 'ਜੋਸ਼' ਅਦਾਕਾਰ ਦੀ ਹਾਲਤ ਦੇਖ ਕੇ ਪ੍ਰਸ਼ੰਸਕਾਂ ਨੂੰ ਆਏ ਸਲਮਾਨ ਖਾਨ ਯਾਦ

ਮਨੋਰੰਜਨ ਡੈਸਕ, ਨਵੀਂ ਦਿੱਲੀ : ਸਾਲ 2000 ਵਿੱਚ ਰਿਲੀਜ਼ ਹੋਈ ਫ਼ਿਲਮ ‘ਜੋਸ਼’ ਵਿੱਚ ਸ਼ਾਹਰੁਖ਼ ਖ਼ਾਨ ਅਤੇ ਐਸ਼ਵਰਿਆ ਰਾਏ ਦੇ ਨਾਲ ਨਜ਼ਰ ਆਏ 90 ਦੇ ਦਹਾਕੇ ਦੇ ਮਸ਼ਹੂਰ ਅਦਾਕਾਰ ਸ਼ਰਦ ਕਪੂਰ ਇਸ ਸਮੇਂ ਮੁਸ਼ਕਲ ਦੌਰ ਵਿੱਚੋਂ ਲੰਘ ਰਹੇ ਹਨ। ਉਨ੍ਹਾਂ ਦੀ ਹਾਲ ਹੀ ਵਿੱਚ ਵਾਇਰਲ ਹੋਈ ਵੀਡੀਓ ਦੇਖ ਕੇ ਪ੍ਰਸ਼ੰਸਕਾਂ ਨੂੰ ਯਕੀਨ ਨਹੀਂ ਹੋ ਰਿਹਾ ਕਿ ਇਹ ਉਹੀ ਸਟਾਰ ਹਨ, ਜਿਨ੍ਹਾਂ ਦੀ ਅਦਾਕਾਰੀ ਦੇ ਉਹ ਕਦੇ ਦੀਵਾਨੇ ਹੁੰਦੇ ਸਨ।

ਹਾਲ ਹੀ ਵਿੱਚ ਸ਼ਰਦ ਕਪੂਰ ਦੀ ਇੱਕ ਵੀਡੀਓ ਵਾਇਰਲ ਹੋ ਰਹੀ ਹੈ, ਜਿਸ ਵਿੱਚ ਉਹ ਆਪਣੇ ਘਰ ਦੇ ਮੁਸ਼ਕਲ ਹਾਲਾਤਾਂ ਕਾਰਨ ਆਪਣੇ ਚਾਰ ਪਾਲਤੂ ਕੁੱਤਿਆਂ ਤੋਂ ਕੁਝ ਸਮੇਂ ਲਈ ਵੱਖ ਹੋਣ ਦਾ ਦਰਦ ਬਿਆਨ ਕਰਦੇ ਨਜ਼ਰ ਆ ਰਹੇ ਹਨ। ਇਸ ਦੇ ਨਾਲ ਹੀ ਉਨ੍ਹਾਂ ਨੇ ਬਾਲੀਵੁੱਡ ਤੋਂ ਕੰਮ ਦਿਵਾਉਣ ਲਈ ਮਦਦ ਦੀ ਅਪੀਲ ਵੀ ਕੀਤੀ ਹੈ।

ਮੈਂ ਉਨ੍ਹਾਂ ਤੋਂ ਬਿਨਾਂ ਨਹੀਂ ਰਹਿ ਸਕਦਾ : ਸ਼ਰਦ ਕਪੂਰ

ਸ਼ਰਦ ਕਪੂਰ ਦੀ ਦੋਸਤ ਅਤੇ ਬੇਜ਼ੁਬਾਨ ਪਬਲਿਕ ਵੈਲਫੇਅਰ ਟਰੱਸਟ ਦੀ ਸੰਸਥਾਪਕ ਹੇਮਾ ਚੌਧਰੀ ਨੇ ਦੱਸਿਆ ਕਿ ਅਦਾਕਾਰ ਇਨ੍ਹੀਂ ਦਿਨੀਂ ਸਿਹਤ ਸਬੰਧੀ ਸਮੱਸਿਆਵਾਂ ਨਾਲ ਜੂਝ ਰਹੇ ਹਨ। ਠੀਕ ਹੋਣ ਲਈ ਉਨ੍ਹਾਂ ਨੂੰ ਕੁਝ ਸਮਾਂ ਚਾਹੀਦਾ ਹੈ। ਇਸੇ ਕਾਰਨ ਉਨ੍ਹਾਂ ਦੇ ਕੁੱਤਿਆਂ ਨੂੰ ਕੁਝ ਸਮੇਂ ਲਈ ਅਜਿਹੀ ਜਗ੍ਹਾ ਭੇਜਿਆ ਗਿਆ ਹੈ, ਜਿੱਥੇ ਉਨ੍ਹਾਂ ਦੀ ਚੰਗੀ ਤਰ੍ਹਾਂ ਦੇਖਭਾਲ ਕੀਤੀ ਜਾਵੇਗੀ।

ਸ਼ਰਦ ਨੇ ਵੀ ਆਪਣੇ ਮੁਸ਼ਕਲ ਹਾਲਾਤਾਂ ਬਾਰੇ ਗੱਲ ਕਰਦਿਆਂ ਕਿਹਾ ਕਿ ਉਹ ਸਿਰਫ਼ ਕੁਝ ਸਮੇਂ ਲਈ ਆਪਣੇ ਕੁੱਤਿਆਂ ਤੋਂ ਦੂਰ ਹੋ ਰਹੇ ਹਨ।

ਉਨ੍ਹਾਂ ਕਿਹਾ, "ਇਸ ਸਮੇਂ ਮੇਰੇ ਘਰ ਵਿੱਚ ਕੁਝ ਸਮੱਸਿਆਵਾਂ ਚੱਲ ਰਹੀਆਂ ਹਨ। ਇਸ ਘਰ ਤੋਂ ਬਾਅਦ ਜਦੋਂ ਮੈਂ ਇੱਕ ਬੰਗਲੇ ਵਿੱਚ ਸ਼ਿਫਟ ਹੋ ਜਾਵਾਂਗਾ ਤਾਂ ਮੈਂ ਯੋਦਾ ਤੋਂ ਆਪਣੇ ਬੱਚਿਆਂ ਨੂੰ ਵਾਪਸ ਲੈ ਆਵਾਂਗਾ। ਮੈਂ ਉਨ੍ਹਾਂ ਤੋਂ ਬਿਨਾਂ ਨਹੀਂ ਰਹਿ ਸਕਦਾ। ਇੱਕ ਅਦਾਕਾਰ ਹੋਣ ਦੇ ਨਾਤੇ ਮੈਂ ਬਹੁਤ ਭਾਵੁਕ ਇਨਸਾਨ ਹਾਂ। ਮੈਂ ਉਨ੍ਹਾਂ ਨਾਲ ਗਲਤ ਕਿਵੇਂ ਕਰ ਸਕਦਾ ਹਾਂ?"

ਸੱਟ ਲੱਗਣ ਕਾਰਨ ਅਦਾਕਾਰੀ ਤੋਂ ਹੋਣਾ ਪਿਆ ਦੂਰ

ਸ਼ਰਦ ਕਪੂਰ ਨੇ ਅਦਾਕਾਰਾ ਜਯਾ ਭੱਟਾਚਾਰੀਆ ਨਾਲ ਗੱਲਬਾਤ ਦੌਰਾਨ ਇਹ ਵੀ ਦੱਸਿਆ ਕਿ ਬਾਰਸੀਲੋਨਾ ਵਿੱਚ ਫੁੱਟਬਾਲ ਖੇਡਦੇ ਸਮੇਂ ਲੱਗੀ ਸੱਟ ਕਾਰਨ ਉਹ ਅਦਾਕਾਰੀ ਤੋਂ ਦੂਰ ਹੋ ਗਏ ਸਨ। ਹੁਣ ਉਹ ਮੁੜ ਅਦਾਕਾਰੀ ਦੀ ਦੁਨੀਆ ਵਿੱਚ ਵਾਪਸੀ ਕਰਨਾ ਚਾਹੁੰਦੇ ਹਨ।

ਅਦਾਕਾਰ ਨੇ ਦੱਸਿਆ, "ਮੈਂ ਬਾਰਸੀਲੋਨਾ ਵਿੱਚ ਫੁੱਟਬਾਲ ਖੇਡਣ ਗਿਆ ਸੀ। ਟੀਮ ਵਿੱਚ ਕਈ ਵੱਡੇ ਖਿਡਾਰੀ ਸਨ। ਮੈਨੂੰ ਲੱਗ ਰਿਹਾ ਸੀ ਕਿ ਮੈਂ ਵੀ ਬਹੁਤ ਵੱਡਾ ਖਿਡਾਰੀ ਹਾਂ। ਮੈਂ ਆਪਣੇ ਆਪ ਨੂੰ ਮੇਸੀ ਸਮਝ ਰਿਹਾ ਸੀ। ਖੇਡ ਦੌਰਾਨ ਇੱਕ ਵਿਅਕਤੀ ਦੀ ਲੱਤ ਮੇਰੇ ਨਾਲ ਵੱਜ ਗਈ, ਜਿਸ ਤੋਂ ਬਾਅਦ ਮੈਨੂੰ ਮਹਿਸੂਸ ਹੋਇਆ ਕਿ ਮੈਨੂੰ ਗੰਭੀਰ ਸੱਟ ਲੱਗ ਗਈ ਹੈ।"

ਬਾਲੀਵੁੱਡ ਤੋਂ ਅਦਾਕਾਰ ਨੇ ਮੰਗਿਆ ਕੰਮ

ਜਯਾ ਭੱਟਾਚਾਰੀਆ ਨਾਲ ਗੱਲਬਾਤ ਕਰਦਿਆਂ ਸ਼ਰਦ ਨੇ ਦੱਸਿਆ ਕਿ ਉਹ ਹੁਣ ਮੁੜ ਕੰਮ ਸ਼ੁਰੂ ਕਰਨਾ ਚਾਹੁੰਦੇ ਹਨ। ਉਨ੍ਹਾਂ ਨੇ ਬਾਲੀਵੁੱਡ ਦੇ ਲੋਕਾਂ ਨੂੰ ਮਦਦ ਦੀ ਅਪੀਲ ਕਰਦਿਆਂ ਕਿਹਾ, "ਮੈਂ ਸਾਰਿਆਂ ਨੂੰ ਸਿਰਫ਼ ਇਹੀ ਬੇਨਤੀ ਕਰਨਾ ਚਾਹੁੰਦਾ ਹਾਂ ਕਿ ਮੈਂ ਚੰਗੇ ਕੰਮ ਦੀ ਤਲਾਸ਼ ਵਿੱਚ ਹਾਂ। ਮੈਨੂੰ ਤੁਹਾਡੇ ਸਹਿਯੋਗ ਦੀ ਲੋੜ ਹੈ। ਤੁਹਾਡਾ ਨੈਤਿਕ ਸਹਿਯੋਗ ਵੀ ਮੇਰੇ ਲਈ ਬਹੁਤ ਮਾਇਨੇ ਰੱਖਦਾ ਹੈ। ਤੁਸੀਂ ਸਾਰੇ ਜਾਣਦੇ ਹੋ ਕਿ ਮੈਂ ਇੱਕ ਚੰਗਾ ਅਦਾਕਾਰ ਹਾਂ। ਸੱਚਾਈ ਇਹ ਹੈ ਕਿ ਪੈਸਾ ਮੇਰੇ ਲਈ ਕੋਈ ਮੁੱਦਾ ਨਹੀਂ ਹੈ।"

ਸ਼ਰਦ ਨੇ ਦੱਸਿਆ ਕਿ ਸੱਟ ਤੋਂ ਠੀਕ ਹੋਣ ਤੋਂ ਬਾਅਦ ਉਨ੍ਹਾਂ ਨੂੰ ਉਮੀਦ ਹੈ ਕਿ ਉਹ ਜਨਵਰੀ ਤੱਕ ਕੰਮ 'ਤੇ ਵਾਪਸ ਆ ਜਾਣਗੇ। ਇਸ ਤੋਂ ਬਾਅਦ ਉਹ ਫ਼ਿਲਮਾਂ, ਟੈਲੀਵਿਜ਼ਨ ਅਤੇ OTT ਪਲੇਟਫਾਰਮਾਂ 'ਤੇ ਵੀ ਕੰਮ ਕਰਨਾ ਚਾਹੁੰਦੇ ਹਨ।

ਸੋਸ਼ਲ ਮੀਡੀਆ 'ਤੇ ਪ੍ਰਸ਼ੰਸਕਾਂ ਨੇ ਵਧਾਇਆ ਹੌਸਲਾ

ਅਦਾਕਾਰ ਨੂੰ ਮੈਲੀ ਜੀਨਸ ਅਤੇ ਪੁਰਾਣੀ ਬਨਿਆਨ ਵਿੱਚ ਵਾਕਰ ਦੇ ਸਹਾਰੇ ਤੁਰਦਿਆਂ ਦੇਖ ਕੇ ਸੋਸ਼ਲ ਮੀਡੀਆ ਯੂਜ਼ਰਜ਼ ਭਾਵੁਕ ਹੋ ਗਏ। ਲੋਕਾਂ ਨੇ ਉਨ੍ਹਾਂ ਨੂੰ ਹੌਸਲਾ ਦਿੱਤਾ ਅਤੇ ਜਲਦੀ ਠੀਕ ਹੋਣ ਦੀ ਕਾਮਨਾ ਕੀਤੀ।

ਇੱਕ ਯੂਜ਼ਰ ਨੇ ਲਿਖਿਆ, "ਆਪਣਾ ਧਿਆਨ ਰੱਖੋ ਸਰ ਅਤੇ ਰੱਬ ਤੁਹਾਨੂੰ ਅਸੀਸ ਦੇਵੇ। ਤੁਹਾਡੀ ਵਾਪਸੀ ਬਹੁਤ ਸ਼ਾਨਦਾਰ ਹੋਵੇਗੀ।"

ਦੂਜੇ ਯੂਜ਼ਰ ਨੇ ਲਿਖਿਆ, "ਤੁਸੀਂ ਬਹੁਤ ਚੰਗੇ ਇਨਸਾਨ ਅਤੇ ਅਦਾਕਾਰ ਹੋ। ਅਸੀਂ ਵੀ ਤੁਹਾਨੂੰ ਵੱਧ ਤੋਂ ਵੱਧ ਫ਼ਿਲਮਾਂ ਵਿੱਚ ਦੇਖਣਾ ਚਾਹੁੰਦੇ ਹਾਂ।"

ਇੱਕ ਹੋਰ ਯੂਜ਼ਰ ਨੇ ਸ਼ਾਹਰੁਖ਼ ਖ਼ਾਨ, ਸਲਮਾਨ ਖ਼ਾਨ ਅਤੇ ਕਰਨ ਜੌਹਰ ਨੂੰ ਅਪੀਲ ਕਰਦਿਆਂ ਲਿਖਿਆ, "ਕਿਰਪਾ ਕਰਕੇ ਤੁਸੀਂ ਸਾਰੇ ਇਨ੍ਹਾਂ ਦੀ ਮਦਦ ਕਰੋ। ਇਹ ਬਹੁਤ ਚੰਗੇ ਇਨਸਾਨ ਹਨ। ਇਨ੍ਹਾਂ ਨੂੰ ਕੰਮ ਦਿਓ।"