ਦਿੱਗਜ ਗਾਇਕਾ ਆਸ਼ਾ ਭੋਸਲੇ ਦਾ ਆਖਰੀ ਗੀਤ ‘ਐ ਮੇਰੀ ਜ਼ਿੰਦਗੀ’ ਰਿਲੀਜ਼, ਵੀਡੀਓ ’ਚ ‘ਤਾਈ’ ਦੀ ਝਲਕ ਦੇਖ ਕੇ ਭਾਵੁਕ ਹੋਏ ਪ੍ਰਸ਼ੰਸਕ

ਐਂਟਰਟੇਨਮੈਂਟ ਡੈਸਕ, ਨਵੀਂ ਦਿੱਲੀ : 8 ਸਤੰਬਰ ਨੂੰ ਆਸ਼ਾ ਭੋਸਲੇ ਦੀ 93ਵੀਂ ਜਯੰਤੀ ਹੈ। ਇਸ ਸਾਲ ਅਪ੍ਰੈਲ ’ਚ ਉਨ੍ਹਾਂ ਦਾ ਦੇਹਾਂਤ ਹੋ ਗਿਆ, ਪਰ ਉਹ ਆਪਣੇ ਪਿੱਛੇ ਸੰਗੀਤ ਦੀ ਅਜਿਹੀ ਵਿਰਾਸਤ ਛੱਡ ਗਈਆਂ ਹਨ, ਜਿਸ ਨੂੰ ਪੀੜ੍ਹੀਆਂ ਤੱਕ ਯਾਦ ਰੱਖਿਆ ਜਾਵੇਗਾ।

ਆਸ਼ਾ ਭੋਸਲੇ ਦਾ ਆਖਰੀ ਗੀਤ

ਹੁਣ ਉਨ੍ਹਾਂ ਦੇ ਜਨਮਦਿਨ ਦੇ ਮੌਕੇ ’ਤੇ ਰਘੁਬੀਰ ਯਾਦਵ, ਅੰਸ਼ੁਮਾਨ ਝਾ ਤੇ ਸੋਨੀ ਰਾਜਦਾਨ ਦੀ ਆਉਣ ਵਾਲੀ ਫ਼ਿਲਮ ‘ਓਮ ਕਾ ਹਰੀ’ (Om Ka Hari) ਦੇ ਨਿਰਮਾਤਾਵਾਂ ਨੇ ਪ੍ਰਸ਼ੰਸਕਾਂ ਨੂੰ ਸਰਪ੍ਰਾਈਜ਼ ਦਿੰਦਿਆਂ ਆਸ਼ਾ ਭੋਸਲੇ ਦਾ ਆਖਰੀ ਫੀਚਰ-ਫ਼ਿਲਮ ਗੀਤ ‘ਐ ਮੇਰੀ ਜ਼ਿੰਦਗੀ’ (Ae Meri Zindagi) ਰਿਲੀਜ਼ ਕੀਤਾ ਹੈ।

ਫ਼ਿਲਮ ਕਦੋਂ ਰਿਲੀਜ਼ ਹੋਵੇਗੀ?

ਇਹ ਗੀਤ 2023 ਦੇ ਅਖੀਰ ’ਚ ਰਿਕਾਰਡ ਕੀਤਾ ਗਿਆ ਸੀ। ਹਰੀਸ਼ ਵਿਆਸ ਵੱਲੋਂ ਪਿਤਾ-ਪੁੱਤਰ ਦੇ ਰਿਸ਼ਤੇ ’ਤੇ ਬਣਾਈ ਗਈ ਫ਼ਿਲਮ ‘ਓਮ ਕਾ ਹਰੀ’ ’ਚ ਇਹ ਗੀਤ ਸ਼ਾਮਲ ਕੀਤਾ ਗਿਆ ਹੈ। ਇਹ ਫ਼ਿਲਮ 18 ਸਤੰਬਰ, 2026 ਨੂੰ ਸਿਨੇਮਾਘਰਾਂ ’ਚ ਰਿਲੀਜ਼ ਹੋਣ ਵਾਲੀ ਹੈ।

ਵੀਡੀਓ ਗੀਤ ’ਚ ਦਿਖੀ ‘ਤਾਈ’ ਦੀ ਝਲਕ

8 ਸਤੰਬਰ ਨੂੰ ਰਘੁਬੀਰ ਯਾਦਵ, ਅੰਸ਼ੁਮਾਨ ਝਾ ਤੇ ਸੋਨੀ ਰਾਜਦਾਨ ਸਟਾਰਰ ਫ਼ਿਲਮ ‘ਓਮ ਕਾ ਹਰੀ’ ਦੇ ਨਿਰਮਾਤਾਵਾਂ ਨੇ ਆਸ਼ਾ ਭੋਸਲੇ ਦਾ ਆਖਰੀ ਰਿਕਾਰਡ ਕੀਤਾ ਗਿਆ ਫ਼ਿਲਮੀ ਗੀਤ ‘ਐ ਮੇਰੀ ਜ਼ਿੰਦਗੀ’ ਯੂਟਿਊਬ ’ਤੇ ਰਿਲੀਜ਼ ਕੀਤਾ। ਇਸ ਮਿਊਜ਼ਿਕ ਵੀਡੀਓ ’ਚ ਸਿਰਫ਼ ਗੀਤ ਹੀ ਨਹੀਂ ਹੈ, ਸਗੋਂ ਆਸ਼ਾ ਭੋਸਲੇ ਨੂੰ ਸਟੂਡੀਓ ’ਚ ‘ਐ ਮੇਰੀ ਜ਼ਿੰਦਗੀ’ ਗੀਤ ਰਿਕਾਰਡ ਕਰਦੇ ਹੋਏ ਵੀ ਦਿਖਾਇਆ ਗਿਆ ਹੈ। ਇਸ ਤੋਂ ਇਲਾਵਾ ਉਹ ਫ਼ਿਲਮ ਦੇ ਨਿਰਮਾਤਾਵਾਂ ਤੇ ਅਦਾਕਾਰ ਅੰਸ਼ੁਮਾਨ ਝਾ ਨਾਲ ਗੱਲਬਾਤ ਕਰਦੀਆਂ ਹੋਈਆਂ ਵੀ ਨਜ਼ਰ ਆ ਰਹੀਆਂ ਹਨ। ਗੀਤ ਦੇ ਇਹ ਬਿਹਾਈਂਡ-ਦ-ਸੀਨਜ਼ ਦ੍ਰਿਸ਼ ਇਸ ਰਿਲੀਜ਼ ਨੂੰ ਹੋਰ ਵੀ ਖ਼ਾਸ ਬਣਾ ਦਿੰਦੇ ਹਨ।

ਪ੍ਰਸ਼ੰਸਕਾਂ ਦੇ ਦਿਲਾਂ ਨੂੰ ਛੂਹ ਰਿਹਾ ਹੈ ਗੀਤ

‘ਐ ਮੇਰੀ ਜ਼ਿੰਦਗੀ’ ਨੂੰ ਰਾਜੀਵ ਸਾਰੰਗ ਨੇ ਕੰਪੋਜ਼ ਕੀਤਾ ਹੈ, ਜਦਕਿ ਇਸ ਦੇ ਬੋਲ ਪ੍ਰਦੀਪ ਸ਼ਰਮਾ ਖੁਸਰੋ ਨੇ ਲਿਖੇ ਹਨ। ਆਸ਼ਾ ਭੋਸਲੇ ਦੀ ਆਵਾਜ਼ ’ਚ ਗਾਇਆ ਇਹ ਗੀਤ ਸੁਣਨ ਵਾਲਿਆਂ ਦੇ ਦਿਲਾਂ ਨੂੰ ਛੂਹ ਰਿਹਾ ਹੈ। ਕਈ ਪ੍ਰਸ਼ੰਸਕ ਵੀਡੀਓ ਦੇ ਕਮੈਂਟ ਸੈਕਸ਼ਨ ’ਚ ਆਸ਼ਾ ‘ਤਾਈ’ ਦੀ ਆਵਾਜ਼ ਸੁਣ ਕੇ ਭਾਵੁਕ ਹੋ ਗਏ।

92 ਸਾਲ ਦੀ ਉਮਰ ’ਚ ਤਾਈ ਨੇ ਦੁਨੀਆ ਨੂੰ ਕਿਹਾ ਅਲਵਿਦਾ

ਆਸ਼ਾ ਭੋਸਲੇ ਦਾ 12 ਅਪ੍ਰੈਲ, 2026 ਨੂੰ 92 ਸਾਲ ਦੀ ਉਮਰ ’ਚ ਦੇਹਾਂਤ ਹੋ ਗਿਆ। ਦਿਲ ਦੀ ਧੜਕਣ ਰੁਕਣ ਤੋਂ ਬਾਅਦ ਮਲਟੀਪਲ ਆਰਗਨ ਫੇਲੀਅਰ ਕਾਰਨ ਮੁੰਬਈ ਦੇ ਬ੍ਰੀਚ ਕੈਂਡੀ ਹਸਪਤਾਲ ’ਚ ਉਨ੍ਹਾਂ ਦੀ ਮੌਤ ਹੋਈ।

‘ਓਮ ਕਾ ਹਰੀ’ ਬਾਰੇ

‘ਓਮ ਕਾ ਹਰੀ’ ਦਾ ਨਿਰਦੇਸ਼ਨ ਹਰੀਸ਼ ਵਿਆਸ ਨੇ ਕੀਤਾ ਹੈ। ਇਸ ’ਚ ਅੰਸ਼ੁਮਾਨ ਝਾ ਤੇ ਰਘੁਬੀਰ ਯਾਦਵ ਮੁੱਖ ਭੂਮਿਕਾਵਾਂ ’ਚ ਹਨ। ਫ਼ਿਲਮ ’ਚ ਸੋਨੀ ਰਾਜਦਾਨ, ਸਮਤਾ ਸੁਦੀਕਸ਼ਾ ਤੇ ਆਇਸ਼ਾ ਕਪੂਰ ਵੀ ਅਹਿਮ ਭੂਮਿਕਾਵਾਂ ’ਚ ਨਜ਼ਰ ਆਉਣਗੀਆਂ। ਇਹ ਫ਼ਿਲਮ 18 ਸਤੰਬਰ, 2026 ਨੂੰ ਸਿਨੇਮਾਘਰਾਂ ’ਚ ਰਿਲੀਜ਼ ਹੋਣ ਲਈ ਤਿਆਰ ਹੈ।