ਰੋਹਿਤ ਸ਼ੈੱਟੀ ਦੇ ਨਾਂ 'ਤੇ ਵਾਇਰਲ ਹੋਈ Bigg Boss 20 ਦੀ ਫ਼ਰਜ਼ੀ ਪੋਸਟ, ਭੜਕੇ 'ਗੋਲਮਾਲ 5' ਦੇ ਡਾਇਰੈਕਟਰ; ਪ੍ਰਸ਼ੰਸਕਾਂ ਨੂੰ ਕੀਤਾ ਸਾਵਧਾਨ

ਐਂਟਰਟੇਨਮੈਂਟ ਡੈਸਕ, ਨਵੀਂ ਦਿੱਲੀ : ਬਿੱਗ ਬੌਸ 20 ਦੇ ਬੀਤੇ ਵੀਕੈਂਡ ਕਾ ਵਾਰ ਤੋਂ ਬਾਅਦ ਰੋਹਿਤ ਸ਼ੈੱਟੀ ਦੇ ਨਾਂ 'ਤੇ ਇੱਕ ਫੇਸਬੁੱਕ ਪੋਸਟ ਇੰਟਰਨੈੱਟ 'ਤੇ ਕਾਫ਼ੀ ਵਾਇਰਲ ਹੋ ਰਹੀ ਸੀ। ਇਸ ਪੋਸਟ ਵਿੱਚ ਦਾਅਵਾ ਕੀਤਾ ਗਿਆ ਸੀ ਕਿ ਉਨ੍ਹਾਂ ਨੇ ਕਾਮੇਡੀਅਨ ਗੌਰਵ ਗੁਪਤਾ ਵੱਲੋਂ ਲਵ ਗਿੱਲ ਅਤੇ ਸਕਾਊਟ ਓਪੀ 'ਤੇ ਕੀਤੇ ਗਏ ਰੋਸਟ ਦਾ ਵਿਰੋਧ ਕੀਤਾ ਹੈ।

ਹੁਣ ਇਸ ਫ਼ਰਜ਼ੀ ਫੇਸਬੁੱਕ ਪੋਸਟ 'ਤੇ ਖੁਦ 'ਗੋਲਮਾਲ 5' ਦੇ ਡਾਇਰੈਕਟਰ ਰੋਹਿਤ ਸ਼ੈੱਟੀ ਨੇ ਪ੍ਰਤੀਕਿਰਿਆ ਦਿੱਤੀ ਹੈ ਅਤੇ ਸਖ਼ਤ ਚੇਤਾਵਨੀ ਜਾਰੀ ਕੀਤੀ ਹੈ।

ਰੋਹਿਤ ਸ਼ੈੱਟੀ ਦੇ ਨਾਂ 'ਤੇ ਬਣਿਆ ਹੋਇਆ ਹੈ ਫ਼ਰਜ਼ੀ ਅਕਾਊਂਟ

ਰੋਹਿਤ ਸ਼ੈੱਟੀ ਨੇ ਆਪਣੇ ਅਧਿਕਾਰਤ ਇੰਸਟਾਗ੍ਰਾਮ ਅਕਾਊਂਟ ਰਾਹੀਂ ਇਸ ਫੇਸਬੁੱਕ ਅਕਾਊਂਟ ਦਾ ਪਰਦਾਫਾਸ਼ ਕੀਤਾ ਅਤੇ ਪ੍ਰਸ਼ੰਸਕਾਂ ਨੂੰ ਸਾਵਧਾਨ ਕਰਦਿਆਂ ਇਸ ਨੂੰ ਫ਼ਰਜ਼ੀ ਦੱਸਿਆ।

ਅਦਾਕਾਰ ਅਤੇ ਨਿਰਦੇਸ਼ਕ ਨੇ ਆਪਣੀ ਇੰਸਟਾਗ੍ਰਾਮ ਸਟੋਰੀ 'ਤੇ ਲਿਖਿਆ, "ਮੈਂ ਇਹ ਸਪੱਸ਼ਟ ਕਰਨਾ ਚਾਹੁੰਦਾ ਹਾਂ ਕਿ ਮੈਂ ਅਧਿਕਾਰਤ ਤੌਰ 'ਤੇ ਸਿਰਫ਼ ਇੰਸਟਾਗ੍ਰਾਮ 'ਤੇ ਹੀ ਮੌਜੂਦ ਹਾਂ। ਫੇਸਬੁੱਕ ਅਤੇ ਐਕਸ (X) 'ਤੇ ਮੇਰਾ ਕੋਈ ਅਕਾਊਂਟ ਨਹੀਂ ਹੈ। ਮੇਰੇ ਨਾਂ 'ਤੇ ਦਾਅਵਾ ਕਰਨ ਵਾਲੇ ਸਾਰੇ ਅਕਾਊਂਟ ਅਤੇ ਪ੍ਰੋਫਾਈਲ ਫ਼ਰਜ਼ੀ ਅਤੇ ਗੈਰ-ਅਧਿਕਾਰਤ ਹਨ।"

ਰੋਹਿਤ ਸ਼ੈੱਟੀ ਨੇ ਪ੍ਰਸ਼ੰਸਕਾਂ ਨੂੰ ਸਾਵਧਾਨ ਕਰਦਿਆਂ ਅੱਗੇ ਲਿਖਿਆ,"ਮੈਂ ਸਾਰਿਆਂ ਨੂੰ ਬੇਨਤੀ ਕਰਦਾ ਹਾਂ ਕਿ ਅਜਿਹੇ ਕਿਸੇ ਵੀ ਅਕਾਊਂਟ ਜਾਂ ਉਸ 'ਤੇ ਪਾਈ ਗਈ ਅਜਿਹੀ ਸਮੱਗਰੀ 'ਤੇ ਵਿਸ਼ਵਾਸ ਨਾ ਕਰੋ, ਜਿਸ ਬਾਰੇ ਇਹ ਦਾਅਵਾ ਕੀਤਾ ਜਾ ਰਿਹਾ ਹੈ ਕਿ ਇਹ ਮੈਂ ਲਿਖੀ ਹੈ। ਤੁਹਾਡੀ ਸਮਝਦਾਰੀ ਅਤੇ ਸਹਿਯੋਗ ਲਈ ਬਹੁਤ-ਬਹੁਤ ਧੰਨਵਾਦ।"

ਰੋਹਿਤ ਸ਼ੈੱਟੀ ਦੇ ਨਾਂ 'ਤੇ ਫੇਸਬੁੱਕ 'ਤੇ ਵਾਇਰਲ ਹੋਈ ਸੀ ਇਹ ਪੋਸਟ

ਰੋਹਿਤ ਸ਼ੈੱਟੀ ਦਾ ਇਹ ਸਪੱਸ਼ਟੀਕਰਨ ਬਿੱਗ ਬੌਸ 20 ਨਾਲ ਜੁੜੀ ਇੱਕ ਵਾਇਰਲ ਪੋਸਟ ਤੋਂ ਬਾਅਦ ਆਇਆ ਹੈ, ਜਿਸ ਵਿੱਚ ਗੌਰਵ ਗੁਪਤਾ ਦੀ ਆਲੋਚਨਾ ਕੀਤੀ ਗਈ ਸੀ।

ਇਸ ਫੇਸਬੁੱਕ ਪੋਸਟ ਵਿੱਚ ਲਿਖਿਆ ਸੀ, "ਦੋਸਤਾਨਾ ਅੰਦਾਜ਼ ਵਿੱਚ ਰੋਸਟ ਕਰਨਾ ਠੀਕ ਹੈ, ਪਰ ਰੋਸਟ ਕਰਨ ਦੇ ਨਾਂ 'ਤੇ ਕਿਸੇ ਦਾ ਮਜ਼ਾਕ ਉਡਾਉਣਾ ਬੰਦ ਹੋਣਾ ਚਾਹੀਦਾ ਹੈ। ਲੋਕਾਂ ਨੂੰ ਹਸਾਉਣਾ ਚੰਗੀ ਗੱਲ ਹੈ, ਪਰ ਕਿਸੇ ਨੂੰ ਰੁਆ ਕੇ ਹੱਸਣਾ ਬਿਲਕੁਲ ਠੀਕ ਨਹੀਂ ਹੈ। ਹਰ ਕਿਸੇ ਦੀ ਇੱਜ਼ਤ ਕਰਨੀ ਸਿੱਖੋ।"

ਦੱਸ ਦੇਈਏ ਕਿ ਪਿਛਲੇ ਵੀਕੈਂਡ ਜਦੋਂ ਗੌਰਵ ਗੁਪਤਾ ਬਿੱਗ ਬੌਸ ਦੇ ਘਰ ਵਿੱਚ ਆਏ ਸਨ ਤਾਂ ਉਨ੍ਹਾਂ ਨੇ ਲਵ ਅਤੇ ਸਕਾਊਟ ਨੂੰ ਟ੍ਰੋਲ ਕਰਦਿਆਂ ਗੇਮਰ ਦੀ ਗਰਲਫ੍ਰੈਂਡ ਕਸ਼ਵੀ ਹੀਰਾਨੰਦਾਨੀ ਦਾ ਨਾਂ ਵੀ ਵਿਚਕਾਰ ਲਿਆ ਸੀ।

ਇਸ ਗੱਲ ਨੂੰ ਲੈ ਕੇ ਦੋਵੇਂ ਮੁਕਾਬਲੇਬਾਜ਼ ਸਲਮਾਨ ਖ਼ਾਨ ਦੇ ਸਾਹਮਣੇ ਹੀ ਕਾਮੇਡੀਅਨ 'ਤੇ ਭੜਕ ਗਏ ਸਨ।

ਇਸ ਤੋਂ ਬਾਅਦ ਜਦੋਂ ਰੋਹਿਤ ਸ਼ੈੱਟੀ ਦੇ ਨਾਂ 'ਤੇ ਇਹ ਫੇਸਬੁੱਕ ਪੋਸਟ ਵਾਇਰਲ ਹੋਈ ਤਾਂ ਇਸ 'ਤੇ ਬਲੂ ਟਿੱਕ ਵੀ ਲੱਗਿਆ ਹੋਇਆ ਸੀ। ਇਸ ਕਾਰਨ ਕਈ ਲੋਕਾਂ ਨੇ ਮੰਨ ਲਿਆ ਕਿ ਡਾਇਰੈਕਟਰ ਵੀ ਇਸ ਵਿਵਾਦ ਦਾ ਹਿੱਸਾ ਬਣ ਗਏ ਹਨ। ਹਾਲਾਂਕਿ, ਹੁਣ ਰੋਹਿਤ ਸ਼ੈੱਟੀ ਨੇ ਖੁਦ ਇਸ ਪੋਸਟ ਨੂੰ ਫ਼ਰਜ਼ੀ ਕਰਾਰ ਦੇ ਕੇ ਸਾਰੀ ਸਥਿਤੀ ਸਪੱਸ਼ਟ ਕਰ ਦਿੱਤੀ ਹੈ।