- ਸ਼ਹਿਰ ਚੁਣੋ
- ਈ-ਪੇਪਰ
- ਵੈੱਬ ਸਟੋਰੀਜ਼
ਮਸ਼ਹੂਰ ਪੰਜਾਬੀ ਗਾਇਕ ਅਤੇ ਅਦਾਕਾਰ ਦਿਲਜੀਤ ਦੁਸਾਂਝ ਦਾ ਲਾਈਵ ਕੰਸਰਟ ਜਿੱਥੇ ਵੀ ਹੁੰਦਾ ਹੈ, ਉੱਥੋਂ ਦੀ ਰੌਣਕ ਹੀ ਵੱਖਰੀ ਹੁੰਦੀ ਹੈ ਪਰ ਅਹਿਮਦਾਬਾਦ ਦੇ ਨਰਿੰਦਰ ਮੋਦੀ ਸਟੇਡੀਅਮ ਵਿੱਚ ਹੋਇਆ ਉਨ੍ਹਾਂ ਦਾ ਤਾਜ਼ਾ ਸ਼ੋਅ ਸਿਰਫ਼ ਸੰਗੀਤ ਤੱਕ ਸੀਮਤ ਨਹੀਂ ਰਿਹਾ, ਸਗੋਂ ਇਹ ਉਨ੍ਹਾਂ ਦੇ ਵਿਰੋਧੀਆਂ ਨੂੰ ਸਿੱਧਾ ਜਵਾਬ ਦੇਣ ਦਾ ਮੰਚ ਵੀ ਬਣ ਗਿਆ।

ਐਂਟਰਟੇਨਮੈਂਟ ਡੈਸਕ - ਮਸ਼ਹੂਰ ਪੰਜਾਬੀ ਗਾਇਕ ਅਤੇ ਅਦਾਕਾਰ ਦਿਲਜੀਤ ਦੁਸਾਂਝ ਦਾ ਲਾਈਵ ਕੰਸਰਟ ਜਿੱਥੇ ਵੀ ਹੁੰਦਾ ਹੈ, ਉੱਥੋਂ ਦੀ ਰੌਣਕ ਹੀ ਵੱਖਰੀ ਹੁੰਦੀ ਹੈ ਪਰ ਅਹਿਮਦਾਬਾਦ ਦੇ ਨਰਿੰਦਰ ਮੋਦੀ ਸਟੇਡੀਅਮ ਵਿੱਚ ਹੋਇਆ ਉਨ੍ਹਾਂ ਦਾ ਤਾਜ਼ਾ ਸ਼ੋਅ ਸਿਰਫ਼ ਸੰਗੀਤ ਤੱਕ ਸੀਮਤ ਨਹੀਂ ਰਿਹਾ, ਸਗੋਂ ਇਹ ਉਨ੍ਹਾਂ ਦੇ ਵਿਰੋਧੀਆਂ ਨੂੰ ਸਿੱਧਾ ਜਵਾਬ ਦੇਣ ਦਾ ਮੰਚ ਵੀ ਬਣ ਗਿਆ।
ਦੁਨੀਆ ਦੇ ਸਭ ਤੋਂ ਵੱਡੇ ਕ੍ਰਿਕਟ ਸਟੇਡੀਅਮ ਵਿੱਚ ਖਚਾਖਚ ਭਰੀ ਭੀੜ ਸਾਹਮਣੇ ਦਿਲਜੀਤ ਨੇ ਨਾ ਸਿਰਫ਼ ਆਪਣਾ ਪੁਰਾਣਾ ਸੁਪਨਾ ਪੂਰਾ ਹੋਣ ਦੀ ਖੁਸ਼ੀ ਜ਼ਾਹਰ ਕੀਤੀ, ਸਗੋਂ ਉਨ੍ਹਾਂ ਲੋਕਾਂ ਨੂੰ ਵੀ ਜਵਾਬ ਦਿੱਤਾ ਜੋ ਉਨ੍ਹਾਂ ਦੇ ਗੀਤਾਂ ਅਤੇ ਕੰਸਰਟ ’ਤੇ ਲਗਾਤਾਰ ਪਾਬੰਦੀਆਂ ਲਗਾਉਣ ਦੀ ਮੰਗ ਕਰ ਰਹੇ ਹਨ। ਆਪਣੇ ਬੇਬਾਕ ਅੰਦਾਜ਼ ਵਿੱਚ ਉਨ੍ਹਾਂ ਨੇ ਮਸ਼ਹੂਰ ਅੰਤਰਰਾਸ਼ਟਰੀ ਬੈਂਡ 'ਕੋਲਡਪਲੇ' ਦੀ ਮਿਸਾਲ ਦਿੰਦਿਆਂ ਦੇਸ਼ ਵਿੱਚ ਚੱਲ ਰਹੇ 'ਦੋਹਰੇ ਮਾਪਦੰਡਾਂ' ’ਤੇ ਸਿੱਧਾ ਸਵਾਲ ਖੜ੍ਹਾ ਕੀਤਾ ਅਤੇ ਵਿਰੋਧੀਆਂ ਨੂੰ ਖ਼ਾਸ ਸੁਨੇਹਾ ਵੀ ਦਿੱਤਾ।
ਕੋਲਡਪਲੇ ਦੀ ਮਿਸਾਲ ਦੇ ਕੇ ਚੁੱਕੇ ਸਵਾਲ
ਅਹਿਮਦਾਬਾਦ ਦੇ ਮੰਚ ਤੋਂ ਦਿਲਜੀਤ ਦੁਸਾਂਝ ਨੇ ਆਪਣੇ ਸ਼ੋਅ ਵਿਰੁੱਧ ਹੋ ਰਹੀਆਂ ਸ਼ਿਕਾਇਤਾਂ ਬਾਰੇ ਖੁੱਲ੍ਹ ਕੇ ਗੱਲ ਕੀਤੀ। ਉਨ੍ਹਾਂ ਨੇ ਪਿਛਲੇ ਸਾਲ ਇਸੇ ਸਟੇਡੀਅਮ ਵਿੱਚ ਹੋਏ ਬ੍ਰਿਟਿਸ਼ ਬੈਂਡ 'ਕੋਲਡਪਲੇ' ਦੇ ਕੰਸਰਟ ਦਾ ਜ਼ਿਕਰ ਕਰਦਿਆਂ ਕਿਹਾ ਕਿ ਜਦੋਂ ਕੋਲਡਪਲੇ ਇੱਥੇ ਆ ਕੇ ਗਾਉਂਦਾ ਹੈ, "I'm feeling drunk and high" ਤਾਂ ਕਿਸੇ ਨੂੰ ਕੋਈ ਦਿੱਕਤ ਨਹੀਂ ਹੁੰਦੀ।
ਦਿਲਜੀਤ ਨੇ ਕਿਹਾ ਕਿ ਉਨ੍ਹਾਂ ਨੂੰ ਖ਼ੁਦ ਕੋਲਡਪਲੇ ਦਾ ਇਹ ਗੀਤ ਪਸੰਦ ਹੈ, ਪਰ ਸਵਾਲ ਇਹ ਹੈ ਕਿ ਜਦੋਂ ਵਿਦੇਸ਼ੀ ਕਲਾਕਾਰ ਆ ਕੇ ਅਜਿਹਾ ਗਾਉਂਦੇ ਹਨ ਤਾਂ ਕਿਸੇ ਨੂੰ ਪਰੇਸ਼ਾਨੀ ਨਹੀਂ ਹੁੰਦੀ, ਪਰ ਜਿਵੇਂ ਹੀ ਦਿਲਜੀਤ ਗਾਉਂਦਾ ਹੈ ਤਾਂ ਲੋਕਾਂ ਨੂੰ ਸਮੱਸਿਆ ਹੋਣ ਲੱਗਦੀ ਹੈ। ਉਨ੍ਹਾਂ ਨੇ ਮੰਚ ਤੋਂ ਸਿੱਧਾ ਪੁੱਛਿਆ ਕਿ ਆਖ਼ਰ ਇਹ ਦੋਹਰੇ ਮਾਪਦੰਡ ਕਿਉਂ ਹਨ?
ਵਿਰੋਧੀਆਂ ਦੀ ਆਲੋਚਨਾ ’ਤੇ ਤਨਜ਼ ਕੱਸਦਿਆਂ ਦਿਲਜੀਤ ਨੇ ਆਪਣੀ ਭਾਰਤੀ ਪਛਾਣ ਨੂੰ ਵੀ ਮਜ਼ਬੂਤੀ ਨਾਲ ਸਾਹਮਣੇ ਰੱਖਿਆ। ਉਨ੍ਹਾਂ ਕਿਹਾ ਕਿ ਲੋਕ ਉਨ੍ਹਾਂ ਨੂੰ ਇਸ ਤਰ੍ਹਾਂ ਦੇਖਦੇ ਹਨ, ਜਿਵੇਂ ਉਹ ਕਿਤੇ ਬਾਹਰੋਂ ਆਏ ਹੋਣ, ਜਦਕਿ ਉਨ੍ਹਾਂ ਦਾ ਜਨਮ ਇੱਥੇ ਹੀ ਹੋਇਆ ਹੈ, ਉਹ ਕਿਸੇ 'ਹੋਨੋਲੂਲੂ' ਵਿੱਚ ਪੈਦਾ ਨਹੀਂ ਹੋਏ। ਦਿਲਜੀਤ ਨੇ ਆਪਣੇ ਨਾਲ ਮੰਚ ’ਤੇ ਮੌਜੂਦ ਸਾਰੇ ਸੰਗੀਤਕਾਰਾਂ ਵੱਲ ਇਸ਼ਾਰਾ ਕਰਦਿਆਂ ਦੱਸਿਆ ਕਿ ਇਹ ਸਾਰੇ ਇੱਥੋਂ ਦੇ ਜੰਮੇ ਭਾਰਤੀ ਹਨ ਅਤੇ ਇਨ੍ਹਾਂ ਦੇ ਨਾਲ ਹੀ ਉਹ ਪੂਰੀ ਦੁਨੀਆ ਵਿੱਚ ਘੁੰਮ ਕੇ ਭਾਰਤੀ ਅਤੇ ਪੰਜਾਬੀ ਸੰਗੀਤ ਦਾ ਪ੍ਰਚਾਰ ਕਰਦੇ ਹਨ।
ਦੁਨੀਆ ਦੇ ਸਭ ਤੋਂ ਵੱਡੇ ਸਟੇਡੀਅਮ ਵਿੱਚ ਪੂਰਾ ਹੋਇਆ ਸੁਪਨਾ
ਇਸ ਵਿਵਾਦ ਤੋਂ ਇਲਾਵਾ ਦਿਲਜੀਤ ਲਈ ਇਹ ਸ਼ਾਮ ਬੇਹੱਦ ਭਾਵੁਕ ਅਤੇ ਖ਼ਾਸ ਵੀ ਰਹੀ। ਉਨ੍ਹਾਂ ਕਿਹਾ ਕਿ ਲੰਡਨ ਦੇ ਵੈਂਬਲੀ ਸਟੇਡੀਅਮ ਵਿੱਚ ਪਰਫਾਰਮ ਕਰਨ ਤੋਂ ਬਾਅਦ ਵੀ ਦੁਨੀਆ ਦੇ ਸਭ ਤੋਂ ਵੱਡੇ ਸਟੇਡੀਅਮ ਯਾਨੀ ਨਰਿੰਦਰ ਮੋਦੀ ਸਟੇਡੀਅਮ ਵਿੱਚ ਸ਼ੋਅ ਕਰਨਾ ਉਨ੍ਹਾਂ ਦੀ ਵੱਡੀ ਇੱਛਾ ਸੀ।
ਉਨ੍ਹਾਂ ਯਾਦ ਕੀਤਾ ਕਿ ਪਿਛਲੇ ਸਾਲ ਜਦੋਂ ਉਨ੍ਹਾਂ ਨੇ ਕੋਲਡਪਲੇ ਨੂੰ ਇੱਥੇ ਪਰਫਾਰਮ ਕਰਦਿਆਂ ਦੇਖਿਆ ਸੀ ਤਾਂ ਉਸੇ ਦਿਨ ਮਨ ਬਣਾ ਲਿਆ ਸੀ ਕਿ ਇੱਕ ਦਿਨ ਉਹ ਵੀ ਇਸ ਮੈਦਾਨ ਵਿੱਚ ਆਪਣਾ ਸ਼ੋਅ ਕਰਨਗੇ। ਆਪਣੇ ਪ੍ਰਸ਼ੰਸਕਾਂ ਦਾ ਧੰਨਵਾਦ ਕਰਦਿਆਂ ਉਨ੍ਹਾਂ ਕਿਹਾ ਕਿ ਅੱਜ ਇਹ ਸੁਪਨਾ ਪੂਰਾ ਹੋ ਗਿਆ ਹੈ।
ਫਿਰ ਸੁਣਾਇਆ ਆਪਣਾ ਖ਼ਾਸ ਸ਼ੇਅਰ
ਆਪਣੇ ਸ਼ੋਅ ਵਿੱਚ ਰੁਕਾਵਟਾਂ ਪਾਉਣ ਅਤੇ ਪਾਬੰਦੀਆਂ ਲਗਾਉਣ ਵਾਲਿਆਂ ’ਤੇ ਗੁੱਸਾ ਕਰਨ ਦੀ ਬਜਾਏ ਦਿਲਜੀਤ ਨੇ ਬੇਹੱਦ ਸ਼ਾਂਤ ਅਤੇ ਮਜ਼ਾਕੀਆ ਅੰਦਾਜ਼ ਵਿੱਚ ਜਵਾਬ ਦਿੱਤਾ। ਉਨ੍ਹਾਂ ਕਿਹਾ ਕਿ ਉਨ੍ਹਾਂ ਨੂੰ ਪਾਬੰਦੀਆਂ ਲਗਾਉਣ ਵਾਲਿਆਂ ਨਾਲ ਕੋਈ ਦਿੱਕਤ ਨਹੀਂ ਹੈ। ਉਹ ਤਾਂ ਪੂਰਾ ਆਨੰਦ ਲੈ ਰਹੇ ਹਨ ਅਤੇ ਉਨ੍ਹਾਂ ਵੱਲੋਂ ਸਾਰਿਆਂ ਨੂੰ 'ਆਈ ਲਵ ਯੂ' ਹੈ।
ਆਪਣੀ ਗੱਲ ਸਮੇਟਦਿਆਂ ਦਿਲਜੀਤ ਨੇ ਮਜ਼ਾਕ ਵਿੱਚ ਕਿਹਾ ਕਿ ਉਹ ਇੱਕ ਸ਼ੇਅਰ ਸੁਣਾਉਣ ਜਾ ਰਹੇ ਹਨ, ਕੀ ਪਤਾ ਇਸ ਤੋਂ ਬਾਅਦ ਉਸ ਸ਼ੇਅਰ ’ਤੇ ਵੀ ਪਾਬੰਦੀ ਲੱਗ ਜਾਵੇ। ਉਨ੍ਹਾਂ ਨੇ ਪੰਜਾਬੀ ਵਿੱਚ ਕਿਹਾ,
'ਜੋ ਹੋਇਆ ਏ ਹੋਣਾ ਹੀ ਸੀ, ਤੇ ਹੋਣੀ ਰੁਕਿਆਂ ਰੁਕਦੀ ਨਹੀਂ, ਇਕ ਵਾਰੀ ਜਦੋਂ ਸ਼ੁਰੂ ਹੋ ਜਾਵੇ, ਗੱਲ ਫਿਰ ਐਵੇਂ ਹੀ ਮੁੱਕਦੀ ਨਹੀਂ।'
ਇਸ ਦੇ ਨਾਲ ਹੀ ਉਨ੍ਹਾਂ ਨੇ ਸਪੱਸ਼ਟ ਸ਼ਬਦਾਂ ਵਿੱਚ ਚਿਤਾਵਨੀ ਵੀ ਦਿੱਤੀ ਕਿ ਜੇਕਰ ਕੋਈ ਉਨ੍ਹਾਂ ਨੂੰ ਛੇੜੇਗਾ ਤਾਂ ਉਹ ਜਵਾਬ ਜ਼ਰੂਰ ਦੇਣਗੇ।
ਉਨ੍ਹਾਂ ਕਿਹਾ ਕਿ ਉਨ੍ਹਾਂ ਨੂੰ ਛੇੜਿਆ ਨਾ ਜਾਵੇ। ਉਹ ਆਪਣਾ ਪ੍ਰੋਗਰਾਮ ਕਰਨਗੇ, ਟੈਕਸ ਭਰਨਗੇ ਅਤੇ ਚਲੇ ਜਾਣਗੇ। ਅੰਤ ਵਿੱਚ ਉਨ੍ਹਾਂ ਨੇ ਆਪਣੇ ਖ਼ਿਲਾਫ਼ ਚੱਲ ਰਹੇ ਮਾਮਲਿਆਂ ਦਾ ਜ਼ਿਕਰ ਕਰਦਿਆਂ ਇੱਕ ਹੋਰ ਸ਼ੇਅਰ ਪੜ੍ਹਿਆ,
'ਕੁਝ ਉਂਝ ਵੀ ਰਾਹਵਾਂ ਔਖੀਆਂ ਸਨ, ਕੁਝ ਗਲ ਵਿੱਚ ਗ਼ਮ ਦਾ ਤੌਕ ਵੀ ਸੀ, ਕੁਝ ਸ਼ਹਿਰ ਦੇ ਲੋਕ ਵੀ ਜ਼ਾਲਮ ਸਨ, ਕੁਝ ਮੈਨੂੰ ਮਰਨ ਦਾ ਸ਼ੌਕ ਵੀ ਸੀ।'