ਦੀਵਾਲੀ ਦੀਆਂ ਪਰੰਪਰਾਵਾਂ ਬਾਰੇ ਆਯੁਸ਼ਮਾਨ ਖੁਰਾਨਾ ਦੀ ਰਾਏ, ਬਚਪਨ 'ਚ ਛੋਟੇ ਭਰਾ ਨਾਲ ਇਸ ਤਰ੍ਹਾਂ ਮਨਾਉਂਦੇ ਸਨ ਤਿਉਹਾਰ

ਮੈਂ ਚੰਡੀਗੜ੍ਹ ਪਹੁੰਚਿਆ ਤਾਂ ਮੈਨੂੰ ਮਿਲਣ ਲਈ ਲੋਕਾਂ ਦੀ ਭੀੜ ਇਕੱਠੀ ਹੋ ਗਈ। ਉਸ ਸਮੇਂ ਮੈਨੂੰ ਪਤਾ ਹੀ ਨਹੀਂ ਸੀ ਕਿ ਸੁਰੱਖਿਆ ਗਾਰਡ ਰੱਖਣਾ ਚਾਹੀਦਾ ਹੈ ਜਾਂ ਨਹੀਂ। ਮੈਨੂੰ ਲੱਗਦਾ ਸੀ ਕਿ ਇਹ ਮੇਰਾ ਆਪਣਾ ਸ਼ਹਿਰ ਹੈ, ਇੱਥੇ ਕੀ ਸਮੱਸਿਆ ਹੋ ਸਕਦੀ ਹੈ

Posted By alisha

Publish Date: Mon, 09 Nov 2026 03:22 PM (IST)

Updated Date: Mon, 09 Nov 2026 03:32 PM (IST)

ਦੀਵਾਲੀ ਦੀਆਂ ਪਰੰਪਰਾਵਾਂ ਬਾਰੇ ਆਯੁਸ਼ਮਾਨ ਖੁਰਾਨਾ ਦੀ ਰਾਏ, ਬਚਪਨ 'ਚ ਛੋਟੇ ਭਰਾ ਨਾਲ ਇਸ ਤਰ੍ਹਾਂ ਮਨਾਉਂਦੇ ਸਨ ਤਿਉਹਾਰ

ਸਮਿਤਾ ਸ਼੍ਰੀਵਾਸਤਵ, ਮੁੰਬਈ : ਅਦਾਕਾਰ ਆਯੁਸ਼ਮਾਨ ਖੁਰਾਨਾ ਲਈ ਦੀਵਾਲੀ ਦਾ ਮਤਲਬ ਸਿਰਫ਼ ਰੌਸ਼ਨੀ, ਮਿਠਾਈਆਂ ਅਤੇ ਜਸ਼ਨ ਨਹੀਂ, ਸਗੋਂ ਪਰਿਵਾਰ ਨਾਲ ਘਰ ਵਿੱਚ ਸਮਾਂ ਬਿਤਾਉਣਾ ਵੀ ਹੈ। ਇਹੀ ਕਾਰਨ ਹੈ ਕਿ ਉਹ ਕਿੰਨੇ ਵੀ ਰੁੱਝੇ ਹੋਣ, ਦੀਵਾਲੀ ਮੌਕੇ ਚੰਡੀਗੜ੍ਹ ਜਾਣਾ ਉਨ੍ਹਾਂ ਲਈ ਬੇਹੱਦ ਜ਼ਰੂਰੀ ਹੁੰਦਾ ਹੈ।

ਆਉਣ ਵਾਲੇ ਦਿਨਾਂ ਵਿੱਚ ਸੂਰਜ ਬੜਜਾਤਿਆ ਦੇ ਨਿਰਦੇਸ਼ਨ ਹੇਠ ਬਣੀ ਫ਼ਿਲਮ 'ਯੇ ਪ੍ਰੇਮ ਮੋਲ ਲਿਆ' ਵਿੱਚ ਨਜ਼ਰ ਆਉਣ ਵਾਲੇ ਆਯੁਸ਼ਮਾਨ ਨੇ ਆਪਣੀ ਲੇਖਿਕਾ ਅਤੇ ਨਿਰਦੇਸ਼ਕ ਪਤਨੀ ਤਾਹਿਰਾ ਕਸ਼ਯਪ ਨਾਲ ਤਿਉਹਾਰ ਦੀਆਂ ਜ਼ਿੰਮੇਵਾਰੀਆਂ ਵੰਡਣ ਤੋਂ ਲੈ ਕੇ ਬਚਪਨ ਦੀਆਂ ਯਾਦਾਂ ਤਾਜ਼ਾ ਕਰਨ ਤੱਕ ਦੀਵਾਲੀ ਨਾਲ ਜੁੜੇ ਕਈ ਦਿਲਚਸਪ ਕਿੱਸੇ ਸਾਂਝੇ ਕੀਤੇ।

ਤੁਹਾਡੇ ਲਈ ਦੀਵਾਲੀ ਦਾ ਅਸਲ ਮਤਲਬ ਕੀ ਹੈ? ਬਚਪਨ 'ਚ ਦੀਵਾਲੀ ਦੀਆਂ ਕਿਹੜੀਆਂ ਯਾਦਾਂ ਹਨ

ਮੇਰੇ ਲਈ ਦੀਵਾਲੀ ਦਾ ਅਸਲ ਮਤਲਬ ਘਰ ਹੈ। ਮੇਰਾ ਮੰਨਣਾ ਹੈ ਕਿ ਹਰ ਸੂਬੇ ਦਾ ਆਪਣਾ ਸੱਭਿਆਚਾਰ ਅਤੇ ਪਸੰਦੀਦਾ ਤਿਉਹਾਰ ਹੁੰਦਾ ਹੈ। ਉੱਤਰੀ ਭਾਰਤ ਵਿੱਚ ਦੀਵਾਲੀ ਸਭ ਤੋਂ ਵੱਧ ਮਨਾਈ ਜਾਂਦੀ ਹੈ ਅਤੇ ਖ਼ਾਸ ਕਰਕੇ ਸਾਡੇ ਘਰ ਵਿੱਚ ਇਹ ਸਭ ਤੋਂ ਖ਼ਾਸ ਤਿਉਹਾਰ ਹੁੰਦਾ ਹੈ।

ਇਹ ਉਹ ਸਮਾਂ ਹੁੰਦਾ ਹੈ ਜਦੋਂ ਪਰਿਵਾਰ ਦੇ ਸਾਰੇ ਮੈਂਬਰਾਂ ਦਾ ਘਰ ਵਿੱਚ ਹੋਣਾ ਬਹੁਤ ਜ਼ਰੂਰੀ ਹੁੰਦਾ ਹੈ। ਬਚਪਨ ਤੋਂ ਹੀ ਅਸੀਂ ਦੀਵਾਲੀ ਪਰਿਵਾਰ ਨਾਲ ਮਨਾਉਂਦੇ ਆਏ ਹਾਂ ਅਤੇ ਅੱਜ ਵੀ ਅਜਿਹਾ ਹੀ ਕਰਦੇ ਹਾਂ।

ਮੈਂ ਆਮ ਤੌਰ 'ਤੇ ਕੰਮ ਤੋਂ ਛੁੱਟੀ ਨਹੀਂ ਲੈਂਦਾ ਪਰ ਦੀਵਾਲੀ 'ਤੇ ਮੈਨੂੰ ਚੰਡੀਗੜ੍ਹ ਜਾਣਾ ਹੀ ਹੁੰਦਾ ਹੈ। ਇਸ ਲਈ ਮੈਨੂੰ ਛੁੱਟੀ ਚਾਹੀਦੀ ਹੀ ਚਾਹੀਦੀ ਹੈ। ਕਿਸੇ ਹੋਰ ਤਿਉਹਾਰ ਦੀ ਛੁੱਟੀ ਮਿਲੇ ਜਾਂ ਨਾ ਮਿਲੇ ਪਰ ਦੀਵਾਲੀ ਦੀ ਛੁੱਟੀ ਸਭ ਤੋਂ ਜ਼ਰੂਰੀ ਹੈ।

ਚੰਡੀਗੜ੍ਹ 'ਚ ਬਚਪਨ ਦੀ ਦੀਵਾਲੀ ਦੀ ਕੋਈ ਖ਼ਾਸ ਯਾਦ

ਸਾਡੇ ਘਰ ਵਿੱਚ ਲਕਸ਼ਮੀ ਪੂਜਾ ਮੰਮੀ ਹੀ ਕਰਦੇ ਹਨ। ਹਰ ਘਰ ਵਿੱਚ ਪੂਜਾ ਕਰਨ ਦਾ ਤਰੀਕਾ ਵੱਖਰਾ ਹੁੰਦਾ ਹੈ। ਸਾਨੂੰ ਇੱਕ ਛੋਟੀ ਜਿਹੀ ਕਿਤਾਬ ਦਿੱਤੀ ਜਾਂਦੀ ਸੀ ਤਾਂ ਜੋ ਅਸੀਂ ਉਸ ਨੂੰ ਪੜ੍ਹ ਕੇ ਮੰਤਰ ਸਹੀ ਤਰੀਕੇ ਨਾਲ ਬੋਲ ਸਕੀਏ।

ਜਦਕਿ ਮੰਮੀ ਨੂੰ ਸਾਰੀਆਂ ਗੱਲਾਂ ਯਾਦ ਹੁੰਦੀਆਂ ਸਨ ਅਤੇ ਉਹ ਬਹੁਤ ਤੇਜ਼ੀ ਨਾਲ ਮੰਤਰ ਪੜ੍ਹਦੇ ਸਨ। ਅਸੀਂ ਉਨ੍ਹਾਂ ਦੇ ਨਾਲ-ਨਾਲ ਪੜ੍ਹਨ ਦੀ ਕੋਸ਼ਿਸ਼ ਕਰਦੇ ਹੋਏ ਅਕਸਰ ਕੁਝ ਗ਼ਲਤ ਬੋਲ ਜਾਂਦੇ ਸੀ। ਮੈਂ ਅਤੇ ਮੇਰਾ ਭਰਾ ਅਪਾਰਸ਼ਕਤੀ ਖੁਰਾਨਾ ਹਮੇਸ਼ਾ ਇਸ ਵਿੱਚ ਫਸ ਜਾਂਦੇ ਸੀ।

ਬਚਪਨ ਦੀ ਉਹ ਯਾਦ ਬਹੁਤ ਪਿਆਰੀ ਹੈ। ਹਾਲਾਂਕਿ ਤਿਉਹਾਰ ਮਨਾਉਣ ਦਾ ਉਹੀ ਉਤਸ਼ਾਹ ਅੱਜ ਵੀ ਬਰਕਰਾਰ ਹੈ। ਮੰਮੀ ਅੱਜ ਵੀ ਪੂਜਾ ਕਰਦੇ ਹਨ ਅਤੇ ਅਸੀਂ ਉਨ੍ਹਾਂ ਦੇ ਨਾਲ ਸਹੀ ਮੰਤਰ ਬੋਲਣ ਦੀ ਕੋਸ਼ਿਸ਼ ਕਰਦੇ ਹਾਂ।

ਦੀਵਾਲੀ 'ਤੇ ਕੌਣ ਵੱਧ ਜ਼ਿੰਮੇਵਾਰੀਆਂ ਨਿਭਾਉਂਦਾ ਹੈ

ਦੀਵਾਲੀ 'ਤੇ ਜ਼ਿਆਦਾਤਰ ਜ਼ਿੰਮੇਵਾਰੀ ਮੇਰੀ ਹੁੰਦੀ ਹੈ, ਕਿਉਂਕਿ ਤਾਹਿਰਾ ਦਾ ਪਰਿਵਾਰ ਅੱਧਾ ਹਿੰਦੂ ਅਤੇ ਅੱਧਾ ਸਿੱਖ ਹੈ। ਮੇਰੇ ਮਾਤਾ-ਪਿਤਾ ਦੋਵੇਂ ਹਿੰਦੂ ਹਨ, ਇਸ ਲਈ ਸਾਡੇ ਘਰ ਵਿੱਚ ਦੀਵਾਲੀ ਮਨਾਉਣ ਦੀ ਪਰੰਪਰਾ ਹਮੇਸ਼ਾ ਤੋਂ ਰਹੀ ਹੈ।

ਜੇਕਰ ਪਾਰਟੀ ਹੁੰਦੀ ਹੈ ਤਾਂ ਉਸ ਦੀ ਜ਼ਿੰਮੇਵਾਰੀ ਤਾਹਿਰਾ ਸੰਭਾਲਦੀ ਹੈ ਅਤੇ ਜੇਕਰ ਪੂਜਾ-ਪਾਠ ਦਾ ਕੰਮ ਹੋਵੇ ਤਾਂ ਉਹ ਮੈਂ ਦੇਖਦਾ ਹਾਂ।

ਇਸ ਵਾਰ ਤੁਸੀਂ ਦੀਵਾਲੀ ਪਾਰਟੀ ਇੰਨੀ ਜਲਦੀ ਕਿਉਂ ਰੱਖੀ? ਪਾਰਟੀ 'ਚ ਕਿਹੜੀਆਂ ਗੱਲਾਂ ਦਾ ਖ਼ਾਸ ਧਿਆਨ ਰੱਖਦੇ ਹੋ

ਸ਼ਾਇਦ ਇਸ ਵਾਰ ਸਭ ਤੋਂ ਪਹਿਲੀ ਦੀਵਾਲੀ ਪਾਰਟੀ ਸਾਡੇ ਘਰ ਹੀ ਹੋਈ ਹੈ। ਇਸ ਦਾ ਕਾਰਨ ਇਹ ਸੀ ਕਿ ਮੇਰੀਆਂ ਦੋ ਫ਼ਿਲਮਾਂ ਆਉਣ ਵਾਲੀਆਂ ਹਨ ਅਤੇ ਮੇਰੇ ਕੋਲ ਛੁੱਟੀ ਲਈ ਸਿਰਫ਼ ਦੋ ਦਿਨ ਹੀ ਸਨ। ਫ਼ਿਲਮ 'ਉੜਤਾ ਤੀਰ' ਦਾ ਪ੍ਰਮੋਸ਼ਨ ਖ਼ਤਮ ਹੋਇਆ ਹੈ, ਜਦਕਿ 'ਯੇ ਪ੍ਰੇਮ ਮੋਲ ਲਿਆ' ਦਾ ਪ੍ਰਮੋਸ਼ਨ ਹੁਣ ਸ਼ੁਰੂ ਹੋਣ ਵਾਲਾ ਹੈ। ਇਸੇ ਕਰਕੇ ਅਸੀਂ ਪਾਰਟੀ ਸਭ ਤੋਂ ਪਹਿਲਾਂ ਰੱਖ ਲਈ।

ਸਾਡੀ ਦੀਵਾਲੀ ਪਾਰਟੀ ਦੀ ਕੋਈ ਖ਼ਾਸ ਥੀਮ ਨਹੀਂ ਹੁੰਦੀ। ਸਾਰੇ ਮਹਿਮਾਨ ਰਵਾਇਤੀ ਕੱਪੜਿਆਂ ਵਿੱਚ ਆਉਂਦੇ ਹਨ ਅਤੇ ਇਹੀ ਸਾਡੇ ਲਈ ਦੀਵਾਲੀ ਦੀ ਥੀਮ ਹੁੰਦੀ ਹੈ।

ਪਾਰਟੀ ਖ਼ਤਮ ਹੋਣ ਤੋਂ ਬਾਅਦ ਜਦੋਂ ਮਹਿਮਾਨ ਚਲੇ ਜਾਂਦੇ ਹਨ ਅਤੇ ਘਰ ਬਿਲਕੁਲ ਸ਼ਾਂਤ ਹੋ ਜਾਂਦਾ ਹੈ ਤਾਂ ਇਹ ਦੇਖ ਕੇ ਖ਼ੁਸ਼ੀ ਹੁੰਦੀ ਹੈ ਕਿ ਸਾਰੇ ਲੋਕ ਖ਼ੁਸ਼ ਹੋ ਕੇ ਗਏ ਹਨ। ਸਾਰਿਆਂ ਨੇ ਚੰਗਾ ਖਾਣਾ ਖਾਧਾ, ਦਿਲ ਖੋਲ੍ਹ ਕੇ ਡਾਂਸ ਕੀਤਾ ਅਤੇ ਖ਼ੂਬ ਹਾਸੇ-ਮਜ਼ਾਕ ਕੀਤੇ।

ਜੇਕਰ ਕੋਈ ਇਹ ਕਹਿ ਦੇਵੇ ਕਿ ਉੱਥੇ ਬਿਲਕੁਲ ਘਰ ਵਰਗਾ ਮਾਹੌਲ ਸੀ ਅਤੇ ਅਜਿਹਾ ਲੱਗਿਆ ਜਿਵੇਂ ਆਪਣੇ ਹੀ ਘਰ ਬੈਠੇ ਹੋਈਏ ਤਾਂ ਇਸ ਤੋਂ ਵੱਡੀ ਗੱਲ ਹੋਰ ਕੋਈ ਨਹੀਂ ਹੋ ਸਕਦੀ।

ਵੈਸੇ ਤਾਂ ਮੇਰੀ ਜ਼ਿੰਦਗੀ ਖਾਣੇ ਦੇ ਆਲੇ-ਦੁਆਲੇ ਹੀ ਘੁੰਮਦੀ ਹੈ ਪਰ ਪਾਰਟੀ ਵਿੱਚ ਮਹਿਮਾਨਾਂ ਦੀ ਦੇਖਭਾਲ ਕਰਨ ਕਾਰਨ ਮੈਨੂੰ ਖਾਣਾ ਖਾਣ ਦਾ ਸਮਾਂ ਨਹੀਂ ਮਿਲਦਾ। ਇਸ ਲਈ ਜਾਂ ਤਾਂ ਮੈਂ ਸਭ ਤੋਂ ਪਹਿਲਾਂ ਖਾਣਾ ਖਾ ਲੈਂਦਾ ਹਾਂ ਜਾਂ ਪਾਰਟੀ ਖ਼ਤਮ ਹੋਣ ਤੋਂ ਬਾਅਦ। ਵਿਚਕਾਰ ਖਾਣਾ ਨਹੀਂ ਖਾਂਦਾ।

ਦੀਵਾਲੀ ਦੀਆਂ ਤਿਆਰੀਆਂ 'ਚ ਬੱਚਿਆਂ ਦਾ ਕਿੰਨਾ ਯੋਗਦਾਨ ਹੁੰਦਾ ਹੈ

ਮੇਰੀ ਧੀ ਕਾਫ਼ੀ ਦੇਸੀ ਸੁਭਾਅ ਦੀ ਹੈ। ਉਸ ਨੂੰ ਬਾਲੀਵੁੱਡ ਦੇ ਗੀਤਾਂ 'ਤੇ ਡਾਂਸ ਕਰਨਾ ਬਹੁਤ ਪਸੰਦ ਹੈ। ਅਸੀਂ ਦੋਵੇਂ ਇਕੱਠੇ ਡਾਂਸ ਕਰਦੇ ਹਾਂ। ਪਾਰਟੀ ਦੀ ਪਲੇਲਿਸਟ ਤਿਆਰ ਕਰਨ ਵਿੱਚ ਉਸ ਦਾ ਯੋਗਦਾਨ ਹੁੰਦਾ ਹੈ।

ਮੇਰਾ ਬੇਟਾ ਥੋੜ੍ਹਾ ਅੰਤਰਮੁਖੀ ਸੁਭਾਅ ਦਾ ਹੈ। ਉਸ ਨੂੰ ਸੰਗੀਤ ਅਤੇ ਗਾਣੇ ਗਾਉਣ ਦਾ ਬਹੁਤ ਸ਼ੌਕ ਹੈ। ਜਦੋਂ ਉਸ ਦੇ ਦੋਸਤ ਆਉਂਦੇ ਹਨ ਤਾਂ ਉਹ ਘਰ ਦੇ ਅੰਦਰ ਗਿਟਾਰ ਲੈ ਕੇ ਉਨ੍ਹਾਂ ਨਾਲ ਰੁੱਝਿਆ ਰਹਿੰਦਾ ਹੈ।

ਮੇਰੀ ਧੀ ਸਾਰੇ ਮਹਿਮਾਨਾਂ ਨਾਲ ਘੁਲ-ਮਿਲ ਜਾਂਦੀ ਹੈ, ਜਦਕਿ ਬੇਟਾ ਆਪਣੇ ਗਿਟਾਰ ਅਤੇ ਸੰਗੀਤ ਵਿੱਚ ਮਸਤ ਰਹਿੰਦਾ ਹੈ।

ਫ਼ਿਲਮਾਂ 'ਚ ਦੀਵਾਲੀ ਨੂੰ ਰੌਸ਼ਨੀ ਤੇ ਖ਼ੁਸ਼ੀਆਂ ਦੇ ਤਿਉਹਾਰ ਵਜੋਂ ਦਿਖਾਇਆ ਜਾਂਦਾ ਹੈ। ਕੀ 'ਯੇ ਪ੍ਰੇਮ ਮੋਲ ਲਿਆ' 'ਚ ਵੀ ਦੀਵਾਲੀ ਦਾ ਕੋਈ ਸੀਨ ਹੈ

ਬਿਲਕੁਲ, ਫ਼ਿਲਮ ਵਿੱਚ ਦੀਵਾਲੀ ਦਾ ਇੱਕ ਸੀਨ ਹੈ। ਸੈੱਟ 'ਤੇ ਮਾਹੌਲ ਬਹੁਤ ਖ਼ੂਬਸੂਰਤ ਸੀ। ਅਸੀਂ ਰੰਗੋਲੀ ਬਣਾਈ ਸੀ ਅਤੇ 'ਝੁਮਕਾ ਪਟੋਲਾ' ਗਾਣੇ ਵਿੱਚ ਸ਼ਰਵਰੀ ਅਤੇ ਘਰ ਦੀਆਂ ਸਾਰੀਆਂ ਔਰਤਾਂ ਡਾਂਸ ਕਰਦੀਆਂ ਨਜ਼ਰ ਆਉਣਗੀਆਂ। ਇਹ ਗਾਣਾ ਦੀਵਾਲੀ ਦੇ ਤਿਉਹਾਰ ਦੌਰਾਨ ਹੀ ਆਉਂਦਾ ਹੈ।

ਸੂਰਜ ਜੀ ਦੀਆਂ ਫ਼ਿਲਮਾਂ ਦਾ ਤਿਉਹਾਰਾਂ ਨਾਲ ਬਹੁਤ ਗੂੜ੍ਹਾ ਸਬੰਧ ਹੁੰਦਾ ਹੈ। 'ਯੇ ਪ੍ਰੇਮ ਮੋਲ ਲਿਆ' ਵਿੱਚ ਤਿੰਨ ਤਿਉਹਾਰ ਦਿਖਾਏ ਗਏ ਹਨ।

ਫ਼ਿਲਮ ਵਿੱਚ ਨਵਰਾਤਰੀ ਦਾ ਡਾਂਡੀਆ ਹੈ, ਪ੍ਰੀ-ਕਲਾਈਮੈਕਸ ਵਿੱਚ ਦੀਵਾਲੀ ਹੈ ਅਤੇ ਕਲਾਈਮੈਕਸ ਵਿੱਚ ਛੱਠ ਪੂਜਾ ਹੈ। ਇਹ ਫ਼ਿਲਮ ਤਿਉਹਾਰਾਂ ਦੇ ਜਸ਼ਨ ਨੂੰ ਦਰਸਾਉਂਦੀ ਹੈ।

ਮੈਂ ਪੰਜਾਬੀ ਹਾਂ ਅਤੇ ਸਾਡੇ ਇੱਥੇ ਛੱਠ ਪੂਜਾ ਨਹੀਂ ਮਨਾਈ ਜਾਂਦੀ। ਸ਼ਰਵਰੀ ਮਰਾਠੀ ਹੈ ਅਤੇ ਉਸ ਦੇ ਘਰ ਵਿੱਚ ਵੀ ਛੱਠ ਪੂਜਾ ਨਹੀਂ ਹੁੰਦੀ। ਇਸ ਲਈ ਇਹ ਇੱਕ ਅਜਿਹਾ ਤਿਉਹਾਰ ਸੀ, ਜਿਸ ਬਾਰੇ ਸਾਨੂੰ ਪਹਿਲੀ ਵਾਰ ਇੰਨੇ ਨੇੜੇ ਤੋਂ ਜਾਣਨ ਦਾ ਮੌਕਾ ਮਿਲਿਆ।

ਇਸ ਤੋਂ ਇਲਾਵਾ ਫ਼ਿਲਮ ਵਿੱਚ ਲਗਪਗ 80 ਫ਼ੀਸਦੀ ਰਵਾਇਤੀ ਕੱਪੜੇ ਪਹਿਨੇ ਗਏ ਹਨ, ਜਿਵੇਂ ਕੁੜਤਾ, ਸ਼ੇਰਵਾਨੀ ਅਤੇ ਪੈਂਟ।

ਫ਼ਿਲਮ 'ਊਂਚਾਈ' ਦੀ ਰਿਲੀਜ਼ ਤੋਂ ਲਗਪਗ ਚਾਰ ਸਾਲ ਬਾਅਦ ਸੂਰਜ ਜੀ ਦੀ ਇਹ ਫ਼ਿਲਮ ਆ ਰਹੀ ਹੈ। ਉਨ੍ਹਾਂ ਦੀਆਂ ਫ਼ਿਲਮਾਂ ਪਰਿਵਾਰਕ ਹੁੰਦੀਆਂ ਹਨ ਅਤੇ ਲੰਬੇ ਸਮੇਂ ਬਾਅਦ ਉਹ ਵਿਆਹ ਦੀ ਪਿੱਠਭੂਮੀ ਵਾਲੀ ਫ਼ਿਲਮ ਲੈ ਕੇ ਆ ਰਹੇ ਹਨ। ਉਨ੍ਹਾਂ ਦੀ ਫ਼ਿਲਮ ਆਪਣੇ ਆਪ ਵਿੱਚ ਹੀ ਇੱਕ ਤਿਉਹਾਰ ਵਰਗੀ ਹੈ।

ਫ਼ਿਲਮਾਂ 'ਚ ਤਿਉਹਾਰਾਂ ਨੂੰ ਸ਼ਾਮਲ ਕਰਨਾ ਤੁਹਾਡੇ ਲਈ ਕਿਉਂ ਜ਼ਰੂਰੀ ਹੈ

ਜੇਕਰ ਅਸੀਂ 90 ਫ਼ੀਸਦੀ ਭਾਰਤੀਆਂ ਨਾਲ ਜੁੜਨਾ ਚਾਹੁੰਦੇ ਹਾਂ ਤਾਂ ਫ਼ਿਲਮਾਂ ਰਾਹੀਂ ਤਿਉਹਾਰਾਂ ਨਾਲ ਜੁੜਨਾ ਬਹੁਤ ਜ਼ਰੂਰੀ ਹੈ। ਸੂਰਜ ਜੀ ਨੇ ਮੈਨੂੰ ਤਿੰਨ ਖ਼ਾਸ ਗੱਲਾਂ ਦੱਸੀਆਂ ਸਨ, ਜੋ ਮੈਂ ਉਨ੍ਹਾਂ ਤੋਂ ਸਿੱਖੀਆਂ ਹਨ।

ਪਹਿਲੀ ਗੱਲ, ਫ਼ਿਲਮ ਵਿੱਚ ਕੋਈ ਨਾ ਕੋਈ ਤਿਉਹਾਰ ਜ਼ਰੂਰ ਹੋਣਾ ਚਾਹੀਦਾ ਹੈ। ਦੂਜੀ ਗੱਲ, ਫ਼ਿਲਮ ਵਿੱਚ ਖਾਣਾ ਹੋਣਾ ਚਾਹੀਦਾ ਹੈ। ਖਾਣਾ ਇਸ ਤਰ੍ਹਾਂ ਪਰੋਸਿਆ ਜਾਣਾ ਚਾਹੀਦਾ ਹੈ ਕਿ ਦੇਖਣ ਵਾਲੇ ਨੂੰ ਵੀ ਭੁੱਖ ਲੱਗ ਜਾਵੇ। ਤੀਜੀ ਗੱਲ, ਫ਼ਿਲਮ ਵਿੱਚ ਬੈਕਗ੍ਰਾਊਂਡ ਮਿਊਜ਼ਿਕ ਲਈ ਵੀ ਢੁੱਕਵੀਂ ਜਗ੍ਹਾ ਹੋਣੀ ਚਾਹੀਦੀ ਹੈ। ਇਹ ਤਿੰਨ ਗੱਲਾਂ ਉਨ੍ਹਾਂ ਨੇ ਮੈਨੂੰ ਸਮਝਾਈਆਂ ਸਨ।

ਇਹ ਪਹਿਲੀ ਵਾਰ ਸੀ ਜਦੋਂ ਮੈਂ ਕਿਸੇ ਨਿਰਦੇਸ਼ਕ ਤੋਂ ਅਜਿਹੀਆਂ ਗੱਲਾਂ ਸੁਣੀਆਂ। ਉਹ ਭਾਰਤ ਦੇ ਸੱਭਿਆਚਾਰ ਨੂੰ ਬਹੁਤ ਚੰਗੀ ਤਰ੍ਹਾਂ ਸਮਝਦੇ ਹਨ।

ਸੂਰਜ ਬੜਜਾਤਿਆ ਅਤੇ ਰਾਜਸ਼੍ਰੀ ਫ਼ਿਲਮਜ਼ ਨੇ ਹਮੇਸ਼ਾ ਸਾਂਝੇ ਪਰਿਵਾਰਾਂ ਨੂੰ ਹੀ ਆਪਣੀਆਂ ਫ਼ਿਲਮਾਂ ਵਿੱਚ ਦਿਖਾਇਆ ਹੈ ਕਿਉਂਕਿ ਸੂਰਜ ਜੀ ਖ਼ੁਦ ਵੀ ਸਾਂਝੇ ਪਰਿਵਾਰ ਵਿੱਚ ਰਹਿੰਦੇ ਹਨ।

ਅੱਜ ਵੱਡੇ ਸ਼ਹਿਰਾਂ ਵਿੱਚ ਛੋਟੇ ਪਰਿਵਾਰਾਂ ਦਾ ਰੁਝਾਨ ਵਧ ਗਿਆ ਹੈ। ਅਜਿਹੇ ਵਿੱਚ ਰਿਸ਼ਤਿਆਂ ਦੀ ਅਹਿਮੀਅਤ ਕੀ ਹੈ, ਉਨ੍ਹਾਂ ਦੀ ਖ਼ਾਸੀਅਤ ਕੀ ਹੈ ਅਤੇ ਇਹ ਰਿਸ਼ਤੇ ਤੁਹਾਨੂੰ ਜ਼ਿੰਦਗੀ ਵਿੱਚ ਕਿਹੋ ਜਿਹੀ ਮਜ਼ਬੂਤੀ ਦਿੰਦੇ ਹਨ, ਇਹ ਸਭ ਕੁਝ ਸਾਨੂੰ ਸੂਰਜ ਬੜਜਾਤਿਆ ਦੀਆਂ ਫ਼ਿਲਮਾਂ ਤੋਂ ਸਿੱਖਣ ਨੂੰ ਮਿਲਦਾ ਹੈ।

ਫ਼ਿਲਮਾਂ 'ਚ ਆਉਣ ਤੋਂ ਬਾਅਦ ਕਿਹੜੀ ਦੀਵਾਲੀ ਸਭ ਤੋਂ ਯਾਦਗਾਰ ਰਹੀ ਤੇ ਕਿਉਂ

ਮੇਰੇ ਲਈ ਹਰ ਦੀਵਾਲੀ ਯਾਦਗਾਰ ਰਹੀ ਹੈ। ਤਿੰਨ ਸਾਲ ਪਹਿਲਾਂ ਮੇਰੇ ਪਿਤਾ ਜੀ ਦਾ ਦੇਹਾਂਤ ਹੋ ਗਿਆ ਸੀ। ਹੁਣ ਮੈਂ ਸਭ ਤੋਂ ਅੱਗੇ ਬੈਠਦਾ ਹਾਂ ਕਿਉਂਕਿ ਪਿਤਾ ਜੀ ਦੇ ਜਾਣ ਤੋਂ ਬਾਅਦ ਪਹਿਲੀ ਵਾਰ ਮੈਨੂੰ ਮਹਿਸੂਸ ਹੋਣ ਲੱਗਾ ਹੈ ਕਿ ਮੈਂ ਵੱਡਾ ਹੋ ਗਿਆ ਹਾਂ।

ਪਹਿਲਾਂ ਮੈਂ ਹਮੇਸ਼ਾ ਬੱਚਿਆਂ ਨਾਲ ਪਿੱਛੇ ਬੈਠਦਾ ਸੀ। ਮੈਂ ਹਮੇਸ਼ਾ ਘਰ ਦਾ ਬੱਚਾ ਹੀ ਰਿਹਾ ਹਾਂ ਪਰ ਪਿਤਾ ਜੀ ਦੇ ਜਾਣ ਤੋਂ ਬਾਅਦ ਹੁਣ ਮਹਿਸੂਸ ਹੁੰਦਾ ਹੈ ਕਿ ਮੇਰੇ ਮੋਢਿਆਂ 'ਤੇ ਵੀ ਜ਼ਿੰਮੇਵਾਰੀ ਆ ਗਈ ਹੈ।

ਇਸ ਤੋਂ ਇਲਾਵਾ ਮੇਰੀ ਪਹਿਲੀ ਫ਼ਿਲਮ ਤੋਂ ਬਾਅਦ ਵਾਲੀ ਦੀਵਾਲੀ ਵੀ ਬਹੁਤ ਖ਼ਾਸ ਸੀ। ਉਸ ਸਮੇਂ ਮੈਨੂੰ ਚੰਡੀਗੜ੍ਹ ਤੋਂ ਇੱਕ ਵੱਖਰੇ ਤਰ੍ਹਾਂ ਦਾ ਪਿਆਰ ਮਿਲਿਆ ਸੀ।

ਜਿਵੇਂ ਹੀ ਮੈਂ ਚੰਡੀਗੜ੍ਹ ਪਹੁੰਚਿਆ ਤਾਂ ਮੈਨੂੰ ਮਿਲਣ ਲਈ ਲੋਕਾਂ ਦੀ ਭੀੜ ਇਕੱਠੀ ਹੋ ਗਈ। ਉਸ ਸਮੇਂ ਮੈਨੂੰ ਪਤਾ ਹੀ ਨਹੀਂ ਸੀ ਕਿ ਸੁਰੱਖਿਆ ਗਾਰਡ ਰੱਖਣਾ ਚਾਹੀਦਾ ਹੈ ਜਾਂ ਨਹੀਂ। ਮੈਨੂੰ ਲੱਗਦਾ ਸੀ ਕਿ ਇਹ ਮੇਰਾ ਆਪਣਾ ਸ਼ਹਿਰ ਹੈ, ਇੱਥੇ ਕੀ ਸਮੱਸਿਆ ਹੋ ਸਕਦੀ ਹੈ।

ਪਰ ਅਚਾਨਕ ਮੇਰੇ ਵੱਲ ਲੋਕਾਂ ਦੀ ਬਹੁਤ ਵੱਡੀ ਭੀੜ ਆ ਗਈ ਅਤੇ ਮੈਨੂੰ ਬਾਹਰ ਨਿਕਲਣ ਵਿੱਚ ਹੀ ਲਗਪਗ ਅੱਧਾ ਘੰਟਾ ਲੱਗ ਗਿਆ। ਇਸ ਤਰ੍ਹਾਂ ਮੇਰੇ ਲਈ ਪਹਿਲੀ ਦੀਵਾਲੀ ਦਾ ਸਵਾਗਤ ਹੀ ਬਹੁਤ ਸ਼ਾਨਦਾਰ ਅਤੇ ਜਸ਼ਨ ਭਰਿਆ ਰਿਹਾ।

ਦੀਵਾਲੀ 'ਤੇ ਸਭ ਤੋਂ ਵੱਧ ਖ਼ਰੀਦਦਾਰੀ ਕਰਨਾ ਕਿਸ ਨੂੰ ਪਸੰਦ ਹੈ, ਤੁਹਾਨੂੰ ਜਾਂ ਤਾਹਿਰਾ ਨੂੰ

ਅਸੀਂ ਦੋਵੇਂ ਹੀ ਜ਼ਿਆਦਾ ਖ਼ਰੀਦਦਾਰੀ ਨਹੀਂ ਕਰਦੇ। ਸਾਨੂੰ ਸ਼ਾਪਿੰਗ ਦਾ ਇੰਨਾ ਸ਼ੌਕ ਨਹੀਂ ਹੈ। ਹਾਲਾਂਕਿ ਦੀਵਾਲੀ 'ਤੇ ਅਸੀਂ ਆਪਣੇ ਰਿਸ਼ਤੇਦਾਰਾਂ ਲਈ ਤੋਹਫ਼ੇ ਜ਼ਰੂਰ ਖ਼ਰੀਦਦੇ ਹਾਂ, ਕਿਉਂਕਿ ਇਹ ਸਾਡੇ ਪਰਿਵਾਰ ਦੀ ਇੱਕ ਰਵਾਇਤ ਹੈ।

ਮੇਰੀ ਮਾਂ ਹੀ ਪਰਿਵਾਰ ਲਈ ਸਭ ਤੋਂ ਵੱਧ ਤੋਹਫ਼ੇ ਖ਼ਰੀਦਦੇ ਹਨ।

ਬਚਪਨ 'ਚ ਤੁਸੀਂ ਤੇ ਅਪਾਰਸ਼ਕਤੀ ਦੀਵਾਲੀ ਮੌਕੇ ਕੋਈ ਖ਼ਾਸ ਕੰਮ ਕਰਦੇ ਸੀ

ਅਸੀਂ ਦੀਵਾਲੀ 'ਤੇ ਇੱਕ ਵੱਡੀ ਸਾਰੀ ਪਰਾਤ ਵਿੱਚ ਲਗਪਗ 50 ਦੀਵੇ ਰੱਖਦੇ ਸੀ ਅਤੇ ਉਨ੍ਹਾਂ ਨੂੰ ਆਪਣੇ ਹੱਥਾਂ ਨਾਲ ਘਰ ਦੇ ਹਰ ਕਮਰੇ ਅਤੇ ਹਰ ਕੋਨੇ ਵਿੱਚ ਜਗਾਉਂਦੇ ਸੀ। ਤੁਲਸੀ ਮਾਤਾ ਦੇ ਬੂਟੇ ਕੋਲ ਵੀ ਦੀਵਾ ਰੱਖਦੇ ਸੀ। ਇਹ ਰਵਾਇਤ ਸਾਡੇ ਘਰ ਵਿੱਚ ਹਮੇਸ਼ਾ ਤੋਂ ਚੱਲਦੀ ਆ ਰਹੀ ਹੈ।

ਇਸ ਤੋਂ ਇਲਾਵਾ ਦੀਵਾਲੀ ਦੇ ਸਮੇਂ ਅਸੀਂ ਆਪਣੇ ਆਪ ਨੂੰ ਇਹ ਛੋਟ ਦਿੰਦੇ ਹਾਂ ਕਿ ਜੋ ਮਰਜ਼ੀ ਖਾ ਸਕਦੇ ਹਾਂ।

ਅਸੀਂ ਇੱਕ ਸਮੇਂ ਵਿੱਚ ਹੀ ਅੱਧਾ ਕਿਲੋ ਮਿਠਾਈ ਖ਼ਤਮ ਕਰ ਦਿੰਦੇ ਹਾਂ। ਜਿਵੇਂ ਹੀ ਪੂਜਾ ਖ਼ਤਮ ਹੁੰਦੀ ਹੈ, ਅਸੀਂ ਮਿਠਾਈ ਖਾਣੀ ਸ਼ੁਰੂ ਕਰ ਦਿੰਦੇ ਹਾਂ। ਸਾਡੇ ਘਰ ਇੱਕ ਮਿਕਸ ਮਿਠਾਈ ਦਾ ਡੱਬਾ ਆਉਂਦਾ ਹੈ, ਜਿਸ ਵਿੱਚ ਗੁਲਾਬ ਜਾਮੁਨ, ਰਸਗੁੱਲੇ ਅਤੇ ਹਰ ਤਰ੍ਹਾਂ ਦੀਆਂ ਮਿਠਾਈਆਂ ਹੁੰਦੀਆਂ ਹਨ। ਅਸੀਂ ਸਾਰੇ ਇੱਕ-ਇੱਕ ਕਰਕੇ ਸਾਰੀਆਂ ਮਿਠਾਈਆਂ ਖ਼ਤਮ ਕਰ ਦਿੰਦੇ ਹਾਂ।

ਦੀਵਾਲੀ ਦੀ ਪੂਜਾ ਤੋਂ ਬਾਅਦ ਇਹ ਸਾਡੀ ਪੁਰਾਣੀ ਰਵਾਇਤ ਰਹੀ ਹੈ।

'ਉੜਤਾ ਤੀਰ' ਦੇ ਸੀਕਵਲ ਦੀਆਂ ਵੀ ਖ਼ਬਰਾਂ ਆ ਰਹੀਆਂ ਹਨ

ਮੈਨੂੰ 'ਉੜਤਾ ਤੀਰ' ਦੀ ਸ਼ੂਟਿੰਗ ਕਰਦੇ ਹੋਏ ਬਹੁਤ ਮਜ਼ਾ ਆਇਆ ਕਿਉਂਕਿ ਇਹ ਬਹੁਤ ਦਿਲਚਸਪ ਅਤੇ ਵੱਖਰੀ ਕਿਸਮ ਦੀ ਫ਼ਿਲਮ ਹੈ। ਮੈਂ ਇਸ ਨੂੰ ਆਪਣੀ ਪਸੰਦੀਦਾ ਸ਼ੈਲੀ ਦੀ ਫ਼ਿਲਮ ਮੰਨਦਾ ਹਾਂ ਕਿਉਂਕਿ ਮੈਂ ਅਜਿਹੀਆਂ ਹੀ ਬਿਲਕੁਲ ਵੱਖਰੀਆਂ ਫ਼ਿਲਮਾਂ ਲਈ ਜਾਣਿਆ ਜਾਂਦਾ ਹਾਂ।

ਮੈਨੂੰ ਖ਼ੁਸ਼ੀ ਹੈ ਕਿ ਲੋਕਾਂ ਨੂੰ ਇਹ ਫ਼ਿਲਮ ਪਸੰਦ ਆਈ। ਹੁਣ ਇਸ ਦੇ ਦੂਜੇ ਭਾਗ ਵਿੱਚ ਕੀ ਕਰਨਾ ਹੈ, ਇਹ ਪੂਰੀ ਤਰ੍ਹਾਂ ਨਿਰਦੇਸ਼ਕ ਆਕਾਸ਼ ਕੌਸ਼ਿਕ 'ਤੇ ਨਿਰਭਰ ਕਰਦਾ ਹੈ।