ਚੰਡੀਗੜ੍ਹ ਨਗਰ ਨਿਗਮ 'ਚ ਬੰਪਰ ਭਰਤੀ: ਕਲਰਕ, ਫਾਇਰਮੈਨ ਤੇ ਡਰਾਈਵਰਾਂ ਨੂੰ ਮਿਲੇਗਾ ਮੌਕਾ, ਜਾਣੋ ਡਿਟੇਲ

ਬਲਵਾਨ ਕਰੀਵਾਲ, ਚੰਡੀਗੜ੍ਹ: ਨਗਰ ਨਿਗਮ ਵਿੱਚ ਵਿੱਤੀ ਸੰਕਟ ਕਾਰਨ ਜਿਨ੍ਹਾਂ ਫਾਇਰਮੈਨਾਂ ਅਤੇ ਡਰਾਈਵਰਾਂ ਦੀਆਂ ਸੇਵਾਵਾਂ ਖ਼ਤਮ ਕਰ ਦਿੱਤੀਆਂ ਗਈਆਂ ਸਨ, ਹੁਣ ਉਨ੍ਹਾਂ ਹੀ ਸ਼੍ਰੇਣੀਆਂ ਵਿੱਚ ਰੈਗੂਲਰ ਭਰਤੀ ਕੀਤੀ ਜਾਵੇਗੀ।

ਨਿਗਮ ਨੇ 31 ਮਾਰਚ 2025 ਨੂੰ ਅੱਗ ਬੁਝਾਊ ਅਤੇ ਬਚਾਅ ਸੇਵਾਵਾਂ ਵਿੱਚ ਆਊਟਸੋਰਸਿੰਗ ਦੇ ਆਧਾਰ ’ਤੇ ਕੰਮ ਕਰ ਰਹੇ 90 ਕਰਮਚਾਰੀਆਂ ਦੇ ਇਕਰਾਰਨਾਮੇ ਅੱਗੇ ਨਹੀਂ ਵਧਾਏ ਸਨ। ਇਨ੍ਹਾਂ ਵਿੱਚ 47 ਫਾਇਰਮੈਨ ਅਤੇ 16 ਡਰਾਈਵਰ ਸ਼ਾਮਲ ਸਨ।

ਵਿੱਤੀ ਘਾਟੇ ਦਾ ਹਵਾਲਾ ਦੇ ਕੇ ਲਿਆ ਸੀ ਫ਼ੈਸਲਾ

ਉਸ ਸਮੇਂ ਨਿਗਮ ਨੇ ਲਗਪਗ 200 ਕਰੋੜ ਰੁਪਏ ਦੇ ਵਿੱਤੀ ਘਾਟੇ ਦਾ ਹਵਾਲਾ ਦਿੰਦਿਆਂ ਖ਼ਰਚੇ ਘਟਾਉਣ ਲਈ ਇਹ ਫ਼ੈਸਲਾ ਲਿਆ ਸੀ। ਹੁਣ ਨਿਗਮ ਵਿੱਚ ਪੱਕੇ ਅਹੁਦਿਆਂ ’ਤੇ ਭਰਤੀ ਦੀ ਤਿਆਰੀ ਤਹਿਤ 79 ਫਾਇਰਮੈਨਾਂ ਅਤੇ 33 ਡਰਾਈਵਰਾਂ ਦੇ ਅਹੁਦੇ ਵੀ ਸ਼ਾਮਲ ਕੀਤੇ ਗਏ ਹਨ।

ਇਸ ਤੋਂ ਇਲਾਵਾ, 118 ਕਲਰਕਾਂ ਸਮੇਤ ਵੱਖ-ਵੱਖ ਸ਼੍ਰੇਣੀਆਂ ਦੇ ਕੁੱਲ 275 ਅਹੁਦਿਆਂ ਨੂੰ ਭਰਨ ਦੀ ਪ੍ਰਕਿਰਿਆ ’ਤੇ ਕੰਮ ਕੀਤਾ ਜਾ ਰਿਹਾ ਹੈ। ਭਰਤੀ ਲਈ ਕੇਂਦਰੀ ਸਟਾਫ਼ ਸਿਲੈਕਸ਼ਨ ਕਮਿਸ਼ਨ (ਐੱਸਐੱਸਸੀ) ਦੀ ਮਦਦ ਲੈਣ ਸਬੰਧੀ ਪ੍ਰਕਿਰਿਆ ਅਤੇ ਜ਼ਿੰਮੇਵਾਰੀਆਂ ਬਾਰੇ ਸਪੱਸ਼ਟਤਾ ਮੰਗੀ ਜਾ ਰਹੀ ਹੈ।

ਪਹਿਲਾਂ ਵਾਧੂ ਕਰਮਚਾਰੀ ਦੱਸ ਕੇ ਹਟਾਇਆ, ਹੁਣ ਅਹੁਦੇ ਭਰਨ ਦੀ ਤਿਆਰੀ

ਮਾਰਚ 2025 ਵਿੱਚ ਕਰਮਚਾਰੀਆਂ ਦੇ ਇਕਰਾਰਨਾਮੇ ਵਧਾਉਣ ਦੀ ਬਜਾਏ ਉਨ੍ਹਾਂ ਨੂੰ ਹਟਾਉਣ ਦਾ ਫ਼ੈਸਲਾ ਖ਼ਰਚਿਆਂ ਵਿੱਚ ਕਟੌਤੀ ਕਰਨ ਦੇ ਉਦੇਸ਼ ਨਾਲ ਲਿਆ ਗਿਆ ਸੀ। ਉਸ ਸਮੇਂ ਨਿਗਮ ਵਿੱਚ ਆਊਟਸੋਰਸ ਕਰਮਚਾਰੀਆਂ ’ਤੇ ਵਧ ਰਹੇ ਖ਼ਰਚੇ ਨੂੰ ਵੀ ਇਸ ਫ਼ੈਸਲੇ ਦਾ ਆਧਾਰ ਬਣਾਇਆ ਗਿਆ ਸੀ।

ਇਸ ਦੇ ਨਾਲ ਹੀ ਕਿਹਾ ਗਿਆ ਸੀ ਕਿ ਆਊਟਸੋਰਸ ਕਰਮਚਾਰੀਆਂ ਨੂੰ ਇਸ ਸ਼ਰਤ ’ਤੇ ਰੱਖਿਆ ਗਿਆ ਸੀ ਕਿ ਰੈਗੂਲਰ ਭਰਤੀ ਹੋਣ ਤੋਂ ਬਾਅਦ ਉਨ੍ਹਾਂ ਨੂੰ ਹਟਾ ਦਿੱਤਾ ਜਾਵੇਗਾ।

ਅਹੁਦੇ ਭਰਨ ਲਈ ਕੇਂਦਰੀ ਏਜੰਸੀ ਐੱਸਐੱਸਸੀ ਨਾਲ ਕੀਤਾ ਸੰਪਰਕ

276 ਅਹੁਦਿਆਂ ’ਤੇ ਭਰਤੀ ਨੂੰ ਸਿਧਾਂਤਕ ਮਨਜ਼ੂਰੀ ਮਿਲ ਚੁੱਕੀ ਹੈ। ਯੂਟੀ ਪ੍ਰਸ਼ਾਸਕ ਨੇ 276 ਅਹੁਦਿਆਂ ’ਤੇ ਸਿੱਧੀ ਭਰਤੀ ਦੇ ਪ੍ਰਸਤਾਵ ਨੂੰ ਸਿਧਾਂਤਕ ਮਨਜ਼ੂਰੀ ਦਿੱਤੀ ਸੀ। ਪ੍ਰਸ਼ਾਸਨ ਨੇ ਨਿਗਮ ਨੂੰ ਰਾਖਵਾਂਕਰਨ ਦੇ ਨਿਯਮਾਂ ਦੀ ਪਾਲਣਾ ਕਰਦਿਆਂ ਕਿਸੇ ਪ੍ਰਸਿੱਧ ਸਰਕਾਰੀ ਏਜੰਸੀ ਰਾਹੀਂ ਭਰਤੀ ਕਰਵਾਉਣ ਦੇ ਨਿਰਦੇਸ਼ ਦਿੱਤੇ ਸਨ। ਹੁਣ ਐੱਸਐੱਸਸੀ ਰਾਹੀਂ ਭਰਤੀ ਕਰਵਾਉਣ ਦੀਆਂ ਸੰਭਾਵਨਾਵਾਂ ’ਤੇ ਵਿਚਾਰ ਕੀਤਾ ਜਾ ਰਿਹਾ ਹੈ।

ਪ੍ਰੀਖਿਆ ਤੋਂ ਲੈ ਕੇ ਵਿੱਤੀ ਰਸਮਾਂ ਤੱਕ ਮੰਗੀ ਜਾ ਰਹੀ ਜਾਣਕਾਰੀ

ਐੱਸਐੱਸਸੀ ਰਾਹੀਂ ਭਰਤੀ ਕਰਵਾਉਣ ਦੀਆਂ ਸੰਭਾਵਨਾਵਾਂ ’ਤੇ ਵਿਚਾਰ ਕਰਦਿਆਂ ਨਿਗਮ ਨੇ ਅਰਜ਼ੀ ਪ੍ਰਕਿਰਿਆ, ਪ੍ਰੀਖਿਆ ਕੇਂਦਰਾਂ ਦੀ ਵਿਵਸਥਾ, ਪ੍ਰੀਖਿਆ ਕਰਵਾਉਣ ਦੀ ਜ਼ਿੰਮੇਵਾਰੀ, ਭੁਗਤਾਨ, ਵਿੱਤੀ ਲੋੜਾਂ ਅਤੇ ਹੋਰ ਪ੍ਰਕਿਰਿਆਤਮਕ ਪਹਿਲੂਆਂ ਬਾਰੇ ਜਾਣਕਾਰੀ ਮੰਗੀ ਹੈ।

ਭਰਤੀ ਪ੍ਰਕਿਰਿਆ ਵਿੱਚ ਨਿਗਮ ਅਤੇ ਐੱਸਐੱਸਸੀ ਦੀਆਂ ਜ਼ਿੰਮੇਵਾਰੀਆਂ ਤੈਅ ਕਰਨਾ ਵੀ ਅਹਿਮ ਹੋਵੇਗਾ। ਇਨ੍ਹਾਂ ਨੁਕਤਿਆਂ ਬਾਰੇ ਸਪੱਸ਼ਟਤਾ ਮਿਲਣ ਤੋਂ ਬਾਅਦ ਹੀ ਭਰਤੀ ਦੀ ਅਗਲੀ ਰੂਪਰੇਖਾ ਤੈਅ ਕੀਤੀ ਜਾ ਸਕੇਗੀ।

ਤਕਨੀਕੀ ਅਤੇ ਸਿਹਤ ਵਿਭਾਗਾਂ ਦੇ ਅਹੁਦੇ ਵੀ ਖ਼ਾਲੀ

ਕਲਰਕਾਂ, ਫਾਇਰਮੈਨਾਂ ਅਤੇ ਡਰਾਈਵਰਾਂ ਤੋਂ ਇਲਾਵਾ ਨਿਗਮ ਵਿੱਚ ਜੂਨੀਅਰ ਡਰਾਫਟਸਮੈਨ, ਡਰਾਫਟਸਮੈਨ, ਸਬ-ਡਿਵੀਜ਼ਨਲ ਇੰਜੀਨੀਅਰ, ਜੂਨੀਅਰ ਇੰਜੀਨੀਅਰ (ਸਿਵਲ ਅਤੇ ਇਲੈਕਟ੍ਰੀਕਲ), ਮਲਟੀਪਰਪਜ਼ ਹੈਲਥ ਵਰਕਰ, ਅਕਾਊਂਟੈਂਟ, ਸੁਪਰਡੈਂਟ ਅਤੇ ਸਟੈਨੋਗ੍ਰਾਫਰ ਸਮੇਤ ਕਈ ਸ਼੍ਰੇਣੀਆਂ ਦੇ ਅਹੁਦੇ ਖ਼ਾਲੀ ਹਨ।

ਇਨ੍ਹਾਂ ਖ਼ਾਲੀ ਅਸਾਮੀਆਂ ਕਾਰਨ ਨਿਗਮ ਦੇ ਵੱਖ-ਵੱਖ ਵਿਭਾਗਾਂ ਵਿੱਚ ਮਨੁੱਖੀ ਸਰੋਤਾਂ ਦੀ ਲੋੜ ਬਣੀ ਹੋਈ ਹੈ।