CBSE ਦਾ ਵੱਡਾ ਫੈਸਲਾ: ਹੁਣ ਦੋ ਭਾਰਤੀ ਭਾਸ਼ਾਵਾਂ ਦੇ ਨਾਲ ਇੱਕ ਵਿਦੇਸ਼ੀ ਭਾਸ਼ਾ ਪੜ੍ਹਨੀ ਹੋਵੇਗੀ ਜ਼ਰੂਰੀ

ਐਜੂਕੇਸ਼ਨ ਡੈਸਕ, ਨਵੀਂ ਦਿੱਲੀ: ਨੈਸ਼ਨਲ ਐਜੂਕੇਸ਼ਨ ਪਾਲਿਸੀ (NEP 2020) ਅਤੇ ਨੈਸ਼ਨਲ ਕਰੀਕੁਲਮ ਫਰੇਮਵਰਕ ਫਾਰ ਸਕੂਲ ਐਜੂਕੇਸ਼ਨ (NCFSE 2023) ਦੇ ਤਹਿਤ ਸੈਂਟਰਲ ਬੋਰਡ ਆਫ ਸੈਕੰਡਰੀ ਐਜੂਕੇਸ਼ਨ (CBSE) ਅਗਲੇ ਸੈਸ਼ਨ ਯਾਨੀ ਕਿ 2027-28 ਤੋਂ ਨਵੀਂ CBSE Third Language Policy 2026 ਲਾਗੂ ਕਰਨ ਜਾ ਰਹੀ ਹੈ। ਇਸ ਨਿਯਮ ਅਨੁਸਾਰ ਹੁਣ ਛੇਵੀਂ ਜਮਾਤ ਤੋਂ ਸਾਰੇ ਵਿਦਿਆਰਥੀਆਂ ਲਈ ਦੋ ਭਾਰਤੀ ਭਾਸ਼ਾਵਾਂ ਦੇ ਨਾਲ ਇੱਕ ਵਿਦੇਸ਼ੀ ਭਾਸ਼ਾ ਪੜ੍ਹਨੀ ਲਾਜ਼ਮੀ ਕਰ ਦਿੱਤੀ ਗਈ ਹੈ।

ਅੰਗਰੇਜ਼ੀ ਨੂੰ ਮੰਨਿਆ ਜਾਵੇਗਾ ਵਿਦੇਸ਼ੀ ਭਾਸ਼ਾ

ਨਵੇਂ ਨਿਯਮ ਮੁਤਾਬਕ ਅੰਗਰੇਜ਼ੀ ਭਾਸ਼ਾ ਨੂੰ 'ਥਰਡ ਲੈਂਗੂਏਜ' (ਤੀਜੀ ਭਾਸ਼ਾ) ਮੰਨਿਆ ਜਾਵੇਗਾ। ਅਜਿਹੇ ਵਿੱਚ ਵਿਦਿਆਰਥੀ ਦੋ ਭਾਰਤੀ ਭਾਸ਼ਾਵਾਂ ਦੇ ਨਾਲ ਅੰਗਰੇਜ਼ੀ ਨੂੰ ਵਿਦੇਸ਼ੀ ਭਾਸ਼ਾ ਦੇ ਰੂਪ ਵਿੱਚ ਚੁਣ ਸਕਣਗੇ। ਜੇਕਰ ਕੋਈ ਵਿਦਿਆਰਥੀ ਫ੍ਰੈਂਚ, ਜਰਮਨ ਜਾਂ ਕੋਈ ਹੋਰ ਵਿਦੇਸ਼ੀ ਭਾਸ਼ਾ ਪੜ੍ਹਦਾ ਹੈ, ਤਾਂ ਉਸ ਦੇ ਨਾਲ ਵੀ ਦੋ ਭਾਰਤੀ ਭਾਸ਼ਾਵਾਂ ਸਿੱਖਣੀਆਂ ਲਾਜ਼ਮੀ ਹੋਣਗੀਆਂ।

2031 ਤੱਕ ਬੋਰਡ ਪ੍ਰੀਖਿਆਵਾਂ ਵਿੱਚ ਸ਼ਾਮਲ ਕਰਨ ਦਾ ਟੀਚਾ

ਸੀ.ਬੀ.ਐਸ.ਈ. ਵੱਲੋਂ ਛੇਵੀਂ ਜਮਾਤ ਤੋਂ ਅਗਲੇ ਹੀ ਸੈਸ਼ਨ ਵਿੱਚ ਇਹ ਨਿਯਮ ਲਾਗੂ ਹੋ ਜਾਵੇਗਾ। ਇਸ ਤੋਂ ਬਾਅਦ ਸਾਲ 2031 ਤੱਕ ਇਸ ਨੂੰ 10ਵੀਂ ਜਮਾਤ ਤੱਕ ਲਾਗੂ ਕਰਨ ਦਾ ਰੋਡਮੈਪ (ਯੋਜਨਾ) ਤਿਆਰ ਕੀਤਾ ਜਾ ਰਿਹਾ ਹੈ। ਅਜਿਹੇ ਵਿੱਚ ਸੀ.ਬੀ.ਐਸ.ਈ. 2031 ਵਿੱਚ ਤੀਜੀ ਭਾਸ਼ਾ ਨੂੰ ਬੋਰਡ ਦੀ ਪ੍ਰੀਖਿਆ ਵਿੱਚ ਸ਼ਾਮਲ ਕਰੇਗਾ।

ਨਵੀਆਂ ਕਿਤਾਬਾਂ ਕੀਤੀਆਂ ਜਾਣਗੀਆਂ ਤਿਆਰ

ਅਗਲੇ ਸੈਸ਼ਨ ਤੋਂ ਨਵਾਂ ਨਿਯਮ ਲਾਗੂ ਹੋ ਜਾਵੇਗਾ, ਇਸ ਲਈ ਸੀ.ਬੀ.ਐਸ.ਈ. ਵੱਲੋਂ ਤੀਜੀ ਭਾਸ਼ਾ ਲਈ ਸਿਲੇਬਸ ਅਤੇ ਕਿਤਾਬਾਂ ਤਿਆਰ ਕੀਤੀਆਂ ਜਾਣਗੀਆਂ। ਪਹਿਲੇ ਸੈਸ਼ਨ ਤੋਂ ਸੀ.ਬੀ.ਐਸ.ਈ. ਤਾਮਿਲ, ਤੇਲਗੂ, ਮਲਿਆਲਮ, ਕੰਨੜ, ਗੁਜਰਾਤੀ ਅਤੇ ਬੰਗਾਲੀ ਸਮੇਤ 9 ਭਾਸ਼ਾਵਾਂ ਲਈ ਕਿਤਾਬਾਂ ਤਿਆਰ ਕਰੇਗਾ। ਬਾਅਦ ਵਿੱਚ ਹੋਰ ਭਾਰਤੀ ਭਾਸ਼ਾਵਾਂ ਅਤੇ ਵਿਦੇਸ਼ੀ ਭਾਸ਼ਾਵਾਂ ਲਈ ਵੀ ਕਿਤਾਬਾਂ ਤਿਆਰ ਕੀਤੀਆਂ ਜਾਣਗੀਆਂ।