Team India Schedule: 30 ਦਿਨ, 3 ਦੇਸ਼ ਤੇ 13 ਮੈਚ... ਟੀਮ ਇੰਡੀਆ ਬਣੇਗੀ 'ਵਿਦੇਸ਼ੀ'; ਜਾਣੋ ਕਦੋਂ-ਕਿੱਥੇ ਤੇ ਕਿਸ ਨਾਲ ਹੋਵੇਗੀ ਟੱਕਰ

ਸਪੋਰਟਸ ਡੈਸਕ, ਨਵੀਂ ਦਿੱਲੀ : ਭਾਰਤੀ ਕ੍ਰਿਕਟ ਟੀਮ ਨੇ ਆਈਪੀਐਲ ਤੋਂ ਬਾਅਦ ਅਫ਼ਗਾਨਿਸਤਾਨ ਖ਼ਿਲਾਫ਼ ਟੈਸਟ ਅਤੇ ਵਨਡੇ ਸੀਰੀਜ਼ ਖੇਡੀ। ਇਹ ਦੋਵੇਂ ਸੀਰੀਜ਼ ਭਾਰਤ ਨੇ ਆਪਣੇ ਹੀ ਘਰ ਵਿੱਚ ਖੇਡੀਆਂ ਪਰ ਹੁਣ ਟੀਮ ਇੰਡੀਆ 'ਵਿਦੇਸ਼ੀ' ਹੋਣ ਜਾ ਰਹੀ ਹੈ। ਅਗਲੇ ਤਕਰੀਬਨ ਇੱਕ ਮਹੀਨੇ ਤੱਕ ਭਾਰਤੀ ਟੀਮ ਵਿਦੇਸ਼ੀ ਦੌਰੇ 'ਤੇ ਰਹੇਗੀ।

ਭਾਰਤੀ ਟੀਮ ਜੂਨ-ਜੁਲਾਈ ਵਿੱਚ ਤਿੰਨ ਦੇਸ਼ਾਂ ਦਾ ਦੌਰਾ ਕਰੇਗੀ ਅਤੇ ਕੁੱਲ 13 ਮੈਚ ਖੇਡੇਗੀ। ਇਸ ਵਿੱਚ ਵਨਡੇ (ODI) ਅਤੇ ਟੀ-20 (T20) ਸੀਰੀਜ਼ ਸ਼ਾਮਲ ਹਨ। ਇਸ ਦੌਰਾਨ ਟੀਮ ਇੰਡੀਆ ਆਪਣਾ ਪਹਿਲਾ ਮੈਚ 26 ਜੂਨ ਨੂੰ ਖੇਡੇਗੀ ਅਤੇ ਆਖਰੀ ਮੈਚ 26 ਜੁਲਾਈ ਨੂੰ। ਇਸ ਤੋਂ ਬਾਅਦ ਟੀਮ ਇੰਡੀਆ ਲੰਮਾ ਆਰਾਮ ਕਰੇਗੀ।

ਆਇਰਲੈਂਡ ਤੇ ਇੰਗਲੈਂਡ ਵਿੱਚ ਖੇਡੇਗੀ ਸੀਰੀਜ਼

ਸਭ ਤੋਂ ਪਹਿਲਾਂ ਟੀਮ ਇੰਡੀਆ ਆਇਰਲੈਂਡ ਦੇ ਦੌਰੇ 'ਤੇ ਜਾਵੇਗੀ, ਜਿੱਥੇ ਉਹ ਦੋ ਮੈਚਾਂ ਦੀ ਟੀ-20 ਸੀਰੀਜ਼ ਖੇਡੇਗੀ। ਇਸ ਸੀਰੀਜ਼ ਦੀ ਸ਼ੁਰੂਆਤ 26 ਜੂਨ ਤੋਂ ਹੋਵੇਗੀ ਅਤੇ ਇਹ ਮੈਚ ਬੇਲਫਾਸਟ ਵਿੱਚ ਖੇਡਿਆ ਜਾਵੇਗਾ। ਦੂਜਾ ਮੈਚ ਵੀ ਇਸੇ ਮੈਦਾਨ 'ਤੇ 28 ਜੂਨ ਨੂੰ ਹੋਵੇਗਾ। ਇਸ ਤੋਂ ਬਾਅਦ ਟੀਮ ਇੰਡੀਆ ਇੰਗਲੈਂਡ ਦਾ ਰੁਖ਼ ਕਰੇਗੀ, ਜਿੱਥੇ ਉਸ ਨੇ ਪੰਜ ਮੈਚਾਂ ਦੀ ਟੀ-20 ਸੀਰੀਜ਼ ਤੋਂ ਇਲਾਵਾ ਤਿੰਨ ਮੈਚਾਂ ਦੀ ਵਨਡੇ ਸੀਰੀਜ਼ ਵੀ ਖੇਡਣੀ ਹੈ।

ਇਸ ਦੌਰੇ ਦੀ ਸ਼ੁਰੂਆਤ ਟੀ-20 ਸੀਰੀਜ਼ ਨਾਲ ਹੋਵੇਗੀ ਅਤੇ ਪਹਿਲਾ ਮੈਚ 1 ਜੁਲਾਈ ਨੂੰ ਚੈਸਟਰ ਲੀ ਸਟ੍ਰੀਟ ਵਿੱਚ ਖੇਡਿਆ ਜਾਵੇਗਾ। 4 ਜੁਲਾਈ ਨੂੰ ਮੈਨਚੈਸਟਰ ਦੇ ਓਲਡ ਟ੍ਰੈਫਰਡ ਵਿੱਚ ਦੂਜਾ ਮੈਚ ਹੋਵੇਗਾ। ਨੌਟਿੰਘਮ ਵਿੱਚ 7 ਜੁਲਾਈ ਨੂੰ ਤੀਜਾ ਮੈਚ ਹੋਵੇਗਾ। 9 ਜੁਲਾਈ ਨੂੰ ਬ੍ਰਿਸਟਲ ਚੌਥੇ ਮੈਚ ਦੀ ਮੇਜ਼ਬਾਨੀ ਕਰੇਗਾ। ਸੀਰੀਜ਼ ਦਾ ਆਖਰੀ ਮੈਚ ਸਾਊਥੈਮਪਟਨ ਵਿੱਚ 11 ਜੁਲਾਈ ਨੂੰ ਖੇਡਿਆ ਜਾਵੇਗਾ।

ਜਿੱਥੋਂ ਤੱਕ ਵਨਡੇ ਸੀਰੀਜ਼ ਦੀ ਗੱਲ ਹੈ ਤਾਂ ਪਹਿਲਾ ਮੈਚ 14 ਜੁਲਾਈ ਨੂੰ ਬਰਮਿੰਘਮ ਦੇ ਐਜਬੈਸਟਨ ਵਿੱਚ ਖੇਡਿਆ ਜਾਵੇਗਾ। ਕਾਰਡਿਫ 16 ਜੁਲਾਈ ਨੂੰ ਦੂਜੇ ਵਨਡੇ ਦੀ ਮੇਜ਼ਬਾਨੀ ਕਰੇਗਾ। ਕ੍ਰਿਕਟ ਦਾ ਮੱਕਾ ਕਹੇ ਜਾਣ ਵਾਲੇ ਲਾਰਡਜ਼ ਸਟੇਡੀਅਮ ਵਿੱਚ ਤੀਜਾ ਅਤੇ ਆਖਰੀ ਮੈਚ ਖੇਡਿਆ ਜਾਵੇਗਾ।

ਜ਼ਿੰਬਾਬਵੇ ਦੇ ਦੌਰੇ 'ਤੇ ਜਾਵੇਗੀ ਟੀਮ ਇੰਡੀਆ

ਇੰਗਲੈਂਡ ਦੇ ਦੌਰੇ ਤੋਂ ਬਾਅਦ ਭਾਰਤੀ ਟੀਮ ਜ਼ਿੰਬਾਬਵੇ ਦੇ ਦੌਰੇ 'ਤੇ ਜਾਵੇਗੀ। ਇਸ ਦੌਰੇ 'ਤੇ ਭਾਰਤੀ ਟੀਮ ਤਿੰਨ ਮੈਚਾਂ ਦੀ ਟੀ-20 ਸੀਰੀਜ਼ ਖੇਡੇਗੀ। ਇਸ ਸੀਰੀਜ਼ ਦੀ ਸ਼ੁਰੂਆਤ 23 ਜੁਲਾਈ ਨੂੰ ਹਰਾਰਾ ਵਿੱਚ ਹੋਵੇਗੀ। ਇਸੇ ਮੈਦਾਨ 'ਤੇ 25 ਜੁਲਾਈ ਨੂੰ ਦੂਜਾ ਅਤੇ 26 ਜੁਲਾਈ ਨੂੰ ਤੀਜਾ ਮੈਚ ਖੇਡਿਆ ਜਾਵੇਗਾ। ਇਸ ਦੌਰੇ ਤੋਂ ਬਾਅਦ ਭਾਰਤੀ ਟੀਮ ਸਤੰਬਰ ਵਿੱਚ ਏਸ਼ੀਅਨ ਗੇਮਜ਼ ਅਤੇ ਵੈਸਟਇੰਡੀਜ਼ ਖ਼ਿਲਾਫ਼ ਖੇਡਦੀ ਹੋਈ ਦਿਖਾਈ ਦੇਵੇਗੀ।