- ਸ਼ਹਿਰ ਚੁਣੋ
- ਈ-ਪੇਪਰ
- ਵੈੱਬ ਸਟੋਰੀਜ਼
- ਸ਼ਹਿਰ ਚੁਣੋ
- ਈ-ਪੇਪਰ
- ਵੈੱਬ ਸਟੋਰੀਜ਼
‘ਟੀਚਾ ਹੋਣਾ ਜ਼ਰੂਰੀ...’, ਨਜ਼ਰਅੰਦਾਜ਼ ਕੀਤੇ ਜਾਣ 'ਤੇ ਮੁਹੰਮਦ ਸ਼ਮੀ ਨੇ ਤੋੜੀ ਚੁੱਪ; ਟੀਮ ਇੰਡੀਆ 'ਚ ਵਾਪਸੀ ਨੂੰ ਲੈ ਕੇ ਆਖੀ ਵੱਡੀ ਗੱਲ
MohammedShami ਬੰਗਾਲ ਦੇ ਦੂਜੇ ਮੈਚ 'ਚੋਂ ਬਾਹਰ ਰਹੇ ਸਨ। ਨਵੀਂ ਦਿੱਲੀ ਦੇ ਪਾਲਮ ਏਅਰ ਫੋਰਸ ਗਰਾਊਂਡ-ਏ 'ਚ ਹੋਏ ਇਸ ਮੁਕਾਬਲੇ 'ਚ ਸ਼ਮੀ ਮਾਸਪੇਸ਼ੀਆਂ 'ਚ ਹਲਕੇ ਖਿਚਾਅ ਕਾਰਨ ਨਹੀਂ ਖੇਡੇ ਸਨ। ਹਾਲਾਂਕਿ, ਉਨ੍ਹਾਂ ਨੇ ਕਿਹਾ ਕਿ ਹੁਣ ਉਹ ਠੀਕ ਹਨ ਅਤੇ ਜਲਦੀ ਹੀ ਮੈਦਾਨ 'ਤੇ ਵਾਪਸੀ ਕਰਨਗੇ।
Posted By Seema Anand
Publish Date: Wed, 21 Oct 2026 01:06 PM (IST)
Updated Date: Wed, 21 Oct 2026 02:10 PM (IST)
ਸਪੋਰਟਸ ਡੈਸਕ, ਨਵੀਂ ਦਿੱਲੀ : ਭਾਰਤ ਦੇ ਦਿੱਗਜ ਤੇਜ਼ ਗੇਂਦਬਾਜ਼ ਮੁਹੰਮਦ ਸ਼ਮੀ ਪਿਛਲੇ ਸਾਲ ਤੋਂ ਹੀ ਟੀਮ ਇੰਡੀਆ ਤੋਂ ਬਾਹਰ ਚੱਲ ਰਹੇ ਹਨ। ਚੋਣਕਾਰ ਲਗਾਤਾਰ ਉਨ੍ਹਾਂ ਨੂੰ ਨਜ਼ਰਅੰਦਾਜ਼ ਕਰ ਰਹੇ ਹਨ। ਹਾਲਾਂਕਿ, ਸ਼ਮੀ ਨੇ ਅਜੇ ਵੀ ਟੀਮ 'ਚ ਵਾਪਸੀ ਦੀ ਉਮੀਦ ਨਹੀਂ ਛੱਡੀ। ਸ਼ਮੀ ਨੇ ਭਾਰਤ ਲਈ ਆਖ਼ਰੀ ਵਾਰ ਸਾਲ 2025 ਦੀ ਚੈਂਪੀਅਨਜ਼ ਟਰਾਫੀ ਖੇਡੀ ਸੀ। ਇਸ ਤੋਂ ਬਾਅਦ ਉਹ ਟੀਮ 'ਚ ਆਪਣੀ ਜਗ੍ਹਾ ਬਣਾਉਣ 'ਚ ਨਾਕਾਮ ਰਹੇ ਹਨ। ਸ਼ਮੀ ਇਸ ਸਮੇਂ ਰਣਜੀ ਟਰਾਫੀ 2026 'ਚ ਖੇਡਦੇ ਨਜ਼ਰ ਆ ਰਹੇ ਹਨ। ਇਸ ਦੌਰਾਨ ਬੰਗਾਲ ਦੀ ਟੀਮ ਵੱਲੋਂ ਸਰਵਿਸਿਜ਼ ਖ਼ਿਲਾਫ਼ ਜਿੱਤ ਤੋਂ ਬਾਅਦ ਪ੍ਰੈੱਸ ਕਾਨਫਰੰਸ 'ਚ ਸ਼ਮੀ ਨੇ ਟੀਮ ਇੰਡੀਆ 'ਚ ਵਾਪਸੀ ਬਾਰੇ ਖੁੱਲ੍ਹ ਕੇ ਗੱਲ ਕੀਤੀ। ਸ਼ਮੀ ਨੇ ਕਿਹਾ ਕਿ ਉਨ੍ਹਾਂ ਦੇ ਅੰਦਰ ਟੀਮ 'ਚ ਵਾਪਸੀ ਦੀ ਉਮੀਦ ਅਜੇ ਵੀ ਜ਼ਿੰਦਾ ਹੈ।
ਸ਼ਮੀ ਨੂੰ ਹੈ ਟੀਮ 'ਚ ਵਾਪਸੀ ਦੀ ਉਮੀਦ
ਸ਼ਮੀ ਨੇ ਅਜੇ ਵੀ ਟੀਮ 'ਚ ਵਾਪਸੀ ਦੀ ਉਮੀਦ ਨਹੀਂ ਛੱਡੀ ਹੈ। ਉਨ੍ਹਾਂ ਦਾ ਮੰਨਣਾ ਹੈ ਕਿ ਖਿਡਾਰੀਆਂ ਕੋਲ ਹਮੇਸ਼ਾ ਇੱਕ ਟੀਚਾ ਹੋਣਾ ਚਾਹੀਦਾ ਹੈ ਅਤੇ ਇਸ ਸਮੇਂ ਉਨ੍ਹਾਂ ਦਾ ਟੀਚਾ ਰਣਜੀ ਟਰਾਫੀ ਜਿੱਤਣਾ ਹੈ। ਸ਼ਮੀ ਨੇ ਕਿਹਾ, 'ਮੈਂ ਉਮੀਦ ਕਿਉਂ ਛੱਡਾਂਗਾ? ਉਮੀਦ ਹਮੇਸ਼ਾ ਹੋਣੀ ਚਾਹੀਦੀ ਹੈ। ਕਿਸੇ ਵੀ ਕਿੱਤੇ ਜਾਂ ਖੇਡ 'ਚ ਤੁਹਾਡੇ ਕੋਲ ਇੱਕ ਟੀਚਾ ਹੋਣਾ ਚਾਹੀਦਾ ਹੈ। ਇਸ ਸਮੇਂ ਸਾਡਾ ਟੀਚਾ ਆਪਣੇ ਸੂਬੇ ਲਈ ਰਣਜੀ ਟਰਾਫੀ ਖੇਡਣਾ ਅਤੇ ਜਿੱਤਣਾ ਹੈ। ਟੀਚਾ ਹਮੇਸ਼ਾ ਹੁੰਦਾ ਹੈ ਅਤੇ ਉਸ ਵੱਲ ਅੱਗੇ ਵਧਦੇ ਰਹਿਣਾ ਚਾਹੀਦਾ ਹੈ। ਮੈਂ ਇਹ ਨਹੀਂ ਕਹਿੰਦਾ ਕਿ ਮੇਰਾ ਕੋਈ ਟੀਚਾ ਨਹੀਂ ਹੈ।'
ਦੂਜੇ ਮੁਕਾਬਲੇ 'ਚ ਨਹੀਂ ਖੇਡੇ ਸ਼ਮੀ
ਸ਼ਮੀ ਬੰਗਾਲ ਦੇ ਦੂਜੇ ਮੈਚ 'ਚੋਂ ਬਾਹਰ ਰਹੇ ਸਨ। ਨਵੀਂ ਦਿੱਲੀ ਦੇ ਪਾਲਮ ਏਅਰ ਫੋਰਸ ਗਰਾਊਂਡ-ਏ 'ਚ ਹੋਏ ਇਸ ਮੁਕਾਬਲੇ 'ਚ ਸ਼ਮੀ ਮਾਸਪੇਸ਼ੀਆਂ 'ਚ ਹਲਕੇ ਖਿਚਾਅ ਕਾਰਨ ਨਹੀਂ ਖੇਡੇ ਸਨ। ਹਾਲਾਂਕਿ, ਉਨ੍ਹਾਂ ਨੇ ਕਿਹਾ ਕਿ ਹੁਣ ਉਹ ਠੀਕ ਹਨ ਅਤੇ ਜਲਦੀ ਹੀ ਮੈਦਾਨ 'ਤੇ ਵਾਪਸੀ ਕਰਨਗੇ। ਬੰਗਾਲ ਨੇ ਸਰਵਿਸਿਜ਼ ਖ਼ਿਲਾਫ਼ ਤਿੰਨ ਦਿਨਾਂ ਦੇ ਅੰਦਰ ਹੀ ਇਹ ਮੈਚ 60 ਦੌੜਾਂ ਨਾਲ ਜਿੱਤ ਲਿਆ। ਬੰਗਾਲ ਦੇ ਸਪਿਨ ਗੇਂਦਬਾਜ਼ਾਂ ਨੇ ਕੁੱਲ 20 'ਚੋਂ 19 ਵਿਕਟਾਂ ਆਪਣੇ ਨਾਂ ਕੀਤੀਆਂ। ਸ਼ਮੀ ਨੇ ਇਹ ਵੀ ਕਿਹਾ ਕਿ ਪਿੱਚ ਦੀ ਸਥਿਤੀ ਨੂੰ ਦੇਖਦਿਆਂ ਉਨ੍ਹਾਂ ਨੇ ਮੈਚ ਨਾ ਖੇਡਣ ਦਾ ਫ਼ੈਸਲਾ ਕੀਤਾ ਸੀ, ਕਿਉਂਕਿ ਪਿੱਚ ਪੂਰੀ ਤਰ੍ਹਾਂ ਸਪਿਨ ਗੇਂਦਬਾਜ਼ਾਂ ਦੇ ਅਨੁਕੂਲ ਸੀ।