IND vs ENG 1st T20I Playing-11 : ਹੋ ਜਾਓ ਤਿਆਰ, ਵੈਭਵ ਸੂਰਿਆਵੰਸ਼ੀ ਕਰਨ ਜਾ ਰਿਹਾ ਹੈ ਡੈਬਿਊ; 15 ਸਾਲ ਦਾ ਇਹ ਖਿਡਾਰੀ ਵਸੂਲੇਗਾ ਗੋਰਿਆਂ ਤੋਂ 'ਲਗਾਨ'!

ਸਪੋਰਟਸ ਡੈਸਕ, ਨਵੀਂ ਦਿੱਲੀ : ਆਇਰਲੈਂਡ ਹੱਥੋਂ ਮਿਲੀ ਕਰਾਰੀ ਹਾਰ ਤੋਂ ਬਾਅਦ ਸ਼ਾਇਦ ਹੁਣ ਉਹ ਘੜੀ ਆ ਹੀ ਗਈ ਹੈ, ਜਿਸ ਦਾ ਪੂਰੀ ਦੁਨੀਆ ਬੜੀ ਬੇਸਬਰੀ ਨਾਲ ਇੰਤਜ਼ਾਰ ਕਰ ਰਹੀ ਸੀ। 15 ਸਾਲ ਦੇ ਤੂਫਾਨੀ ਬੱਲੇਬਾਜ਼ ਵੈਭਵ ਸੂਰਿਆਵੰਸ਼ੀ ਦਾ ਡੈਬਿਊ ਹੁਣ ਅੰਗਰੇਜ਼ਾਂ ਦੀ ਧਰਤੀ 'ਤੇ ਹੋਣ ਜਾ ਰਿਹਾ ਹੈ। ਭਾਰਤ ਅਤੇ ਇੰਗਲੈਂਡ ਵਿਚਾਲੇ ਪੰਜ ਮੈਚਾਂ ਦੀ ਟੀ-20 ਸੀਰੀਜ਼ ਬੁੱਧਵਾਰ ਤੋਂ ਸ਼ੁਰੂ ਹੋ ਰਹੀ ਹੈ ਅਤੇ ਪਹਿਲੇ ਹੀ ਮੈਚ ਵਿੱਚ ਵੈਭਵ ਨੂੰ ਮੈਦਾਨ 'ਤੇ ਉਤਾਰਿਆ ਜਾ ਸਕਦਾ ਹੈ।

ਸੀਰੀਜ਼ ਦਾ ਪਹਿਲਾ ਮੁਕਾਬਲਾ ਚੈਸਟਰ ਲੀ ਸਟ੍ਰੀਟ ਦੇ ਰਿਵਰਸਾਈਡ ਗਰਾਊਂਡ 'ਤੇ ਖੇਡਿਆ ਜਾਵੇਗਾ। ਆਇਰਲੈਂਡ ਖਿਲਾਫ ਮਿਲੀ ਅਣਕਿਆਸੀ ਹਾਰ ਤੋਂ ਬਾਅਦ ਵਿਸ਼ਵ ਜੇਤੂ ਟੀਮ ਇੰਡੀਆ ਵਾਪਸੀ ਲਈ ਤੜਫ ਰਹੀ ਹੈ ਅਤੇ ਅਜਿਹੇ 'ਚ ਇੰਗਲੈਂਡ ਦੀ ਧਰਤੀ 'ਤੇ ਖੁਦ ਨੂੰ ਸਾਬਤ ਕਰਨ ਲਈ ਪੂਰੀ ਤਰ੍ਹਾਂ ਉਤਾਵਲੀ ਹੋਵੇਗੀ। ਇਹੀ ਕਾਰਨ ਹੈ ਕਿ ਪਲੇਇੰਗ-11 ਵਿੱਚ ਕੁਝ ਵੱਡੇ ਬਦਲਾਅ ਦੇਖਣ ਨੂੰ ਮਿਲ ਸਕਦੇ ਹਨ।

ਵੈਭਵ ਇਨ, ਤਾਂ ਆਊਟ ਕੌਣ

ਆਇਰਲੈਂਡ ਦੌਰੇ ਦੌਰਾਨ ਵੀ ਵੈਭਵ ਨੂੰ ਮੌਕਾ ਦੇਣ ਦੀ ਮੰਗ ਕਾਫੀ ਉੱਠੀ ਸੀ ਪਰ ਉਸ ਨੂੰ ਪਲੇਇੰਗ-11 ਵਿੱਚ ਜਗ੍ਹਾ ਨਹੀਂ ਮਿਲੀ, ਜਿਸ ਕਾਰਨ ਟੀਮ ਮੈਨੇਜਮੈਂਟ ਦੀ ਕਾਫੀ ਕਿਰਕਿਰੀ ਵੀ ਹੋਈ। ਹੁਣ ਜਦੋਂ ਭਾਰਤ ਹਾਰ ਚੁੱਕਾ ਹੈ ਤਾਂ ਟੀਮ ਵਿੱਚ ਬਦਲਾਅ ਲਾਜ਼ਮੀ ਹੈ ਅਤੇ ਵੈਭਵ ਦਾ ਡੈਬਿਊ ਵੀ ਤੈਅ ਲੱਗ ਰਿਹਾ ਹੈ ਪਰ ਵੱਡਾ ਸਵਾਲ ਇਹ ਹੈ ਕਿ ਜੇਕਰ ਵੈਭਵ ਅੰਦਰ ਆਉਂਦਾ ਹੈ ਤਾਂ ਬਾਹਰ ਕੌਣ ਜਾਵੇਗਾ?

ਸੰਜੂ ਸੈਮਸਨ ਨੂੰ ਵੈਭਵ ਲਈ ਆਪਣੀ ਜਗ੍ਹਾ ਦੀ ਕੁਰਬਾਨੀ ਦੇਣੀ ਪੈ ਸਕਦੀ ਹੈ ਕਿਉਂਕਿ ਸੰਜੂ ਆਇਰਲੈਂਡ ਖਿਲਾਫ ਦੋਵਾਂ ਮੈਚਾਂ ਵਿੱਚ ਫਲਾਪ ਰਹੇ ਸਨ। ਦੂਜਾ ਰਸਤਾ ਇਹ ਹੈ ਕਿ ਈਸ਼ਾਨ ਕਿਸ਼ਨ ਨੂੰ ਆਰਾਮ ਦੇ ਕੇ ਸੰਜੂ ਨੂੰ ਤੀਜੇ ਨੰਬਰ 'ਤੇ ਖਿਡਾਇਆ ਜਾਵੇ ਅਤੇ ਅਭਿਸ਼ੇਕ ਸ਼ਰਮਾ ਦੇ ਨਾਲ ਵੈਭਵ ਸੂਰਿਆਵੰਸ਼ੀ ਨੂੰ ਓਪਨਿੰਗ ਦੀ ਜ਼ਿੰਮੇਵਾਰੀ ਸੌਂਪੀ ਜਾਵੇ।

ਬੱਲੇਬਾਜ਼ੀ ਦੇ ਬਾਕੀ ਕ੍ਰਮ ਵਿੱਚ ਕੋਈ ਹੋਰ ਬਦਲਾਅ ਹੁੰਦਾ ਨਜ਼ਰ ਨਹੀਂ ਆ ਰਿਹਾ। ਹਾਲਾਂਕਿ ਕਪਤਾਨ ਸ਼੍ਰੇਅਸ ਅਈਅਰ ਨੂੰ ਜ਼ਿਆਦਾ ਜ਼ਿੰਮੇਵਾਰੀ ਨਾਲ ਖੇਡਣਾ ਹੋਵੇਗਾ ਅਤੇ ਆਇਰਲੈਂਡ ਵਾਲੀ ਹਾਰ ਤੋਂ ਸਬਕ ਲੈਣਾ ਪਵੇਗਾ। ਸ਼ਿਵਮ ਦੁਬੇ ਅਤੇ ਅਕਸ਼ਰ ਪਟੇਲ ਨੂੰ ਵੀ ਬੱਲੇ ਨਾਲ ਦਮ ਦਿਖਾਉਣਾ ਹੋਵੇਗਾ।

ਇਸ ਸਪਿਨਰ ਦੀ ਹੋ ਸਕਦੀ ਹੈ ਐਂਟਰੀ

ਟੀਮ ਇੰਡੀਆ ਨੂੰ ਆਇਰਲੈਂਡ ਵਿੱਚ ਇੱਕ ਮਾਹਰ ਸਪਿਨਰ ਦੀ ਕਮੀ ਬਹੁਤ ਰੜਕੀ ਸੀ। ਇੰਗਲੈਂਡ ਵਿੱਚ ਭਾਰਤ ਇਸ ਕਮੀ ਨੂੰ ਪੂਰਾ ਕਰ ਸਕਦਾ ਹੈ। ਆਇਰਲੈਂਡ ਖਿਲਾਫ ਦੂਜੇ ਮੈਚ ਵਿੱਚ ਡੈਬਿਊ ਕਰਨ ਵਾਲੇ ਸੂਰਿਆਂਸ਼ ਸ਼ੈਡਗੇ ਨੂੰ ਬਾਹਰ ਕਰਕੇ ਰਵੀ ਬਿਸ਼ਨੋਈ ਨੂੰ ਮੌਕਾ ਦਿੱਤਾ ਜਾ ਸਕਦਾ ਹੈ। ਵਰੁਣ ਚੱਕਰਵਰਤੀ ਦੀ ਵਾਪਸੀ ਨੂੰ ਲੈ ਕੇ ਬੀਸੀਸੀਆਈ ਨੇ ਅਜੇ ਤੱਕ ਕੋਈ ਪੱਤੇ ਨਹੀਂ ਖੋਲ੍ਹੇ ਹਨ। ਉਹ ਸੱਟ ਕਾਰਨ ਆਇਰਲੈਂਡ ਸੀਰੀਜ਼ ਤੋਂ ਬਾਹਰ ਸਨ। ਬੀਸੀਸੀਆਈ ਨੇ ਪਹਿਲਾਂ ਕਿਹਾ ਸੀ ਕਿ ਵਰੁਣ ਆਪਣੀ ਸੱਟ ਤੋਂ ਉੱਭਰਨ ਦੇ ਆਖਰੀ ਪੜਾਅ 'ਤੇ ਹਨ।

ਹੁਣ ਦੇਖਣਾ ਇਹ ਹੋਵੇਗਾ ਕਿ ਵਰੁਣ ਇੰਗਲੈਂਡ ਦੌਰੇ 'ਤੇ ਖੇਡਦੇ ਹਨ ਜਾਂ ਨਹੀਂ। ਜੇਕਰ ਉਹ ਫਿੱਟ ਹੋ ਕੇ ਪਰਤਦੇ ਹਨ ਤਾਂ ਉਨ੍ਹਾਂ ਦਾ ਖੇਡਣਾ ਪੱਕਾ ਹੈ ਪਰ ਫਿਲਹਾਲ ਉਨ੍ਹਾਂ ਦੀ ਵਾਪਸੀ 'ਤੇ ਕੋਈ ਅਧਿਕਾਰਤ ਬਿਆਨ ਨਹੀਂ ਆਇਆ ਹੈ।

ਭਾਰਤ ਦੀ ਸੰਭਾਵਿਤ ਪਲੇਇੰਗ-11

ਸ਼੍ਰੇਅਸ ਅਈਅਰ (ਕਪਤਾਨ), ਵੈਭਵ ਸੂਰਿਆਵੰਸ਼ੀ, ਅਭਿਸ਼ੇਕ ਸ਼ਰਮਾ, ਈਸ਼ਾਨ ਕਿਸ਼ਨ, ਤਿਲਕ ਵਰਮਾ, ਸ਼ਿਵਮ ਦੁਬੇ, ਅਕਸ਼ਰ ਪਟੇਲ, ਰਵੀ ਬਿਸ਼ਨੋਈ, ਹਰਸ਼ਿਤ ਰਾਣਾ, ਅਰਸ਼ਦੀਪ ਸਿੰਘ, ਪ੍ਰਿੰਸ ਯਾਦਵ।