IND vs SL: ਮੈਚ ਜਿੱਤਣ 'ਚ ਅਸਫਲ, ਪਰ ਗੱਲਾਂ ਬਣਾਉਣ 'ਚ ਅੱਗੇ ਨਿਕਲੇ ਗਿੱਲ; ਡਰਾਅ ਮਗਰੋਂ ਟੀਮ ਦਾ ਕੀਤਾ ਬਚਾਅ

ਕੋਲੰਬੋ— ਭਾਰਤੀ ਕਪਤਾਨ ਸ਼ੁਭਮਨ ਗਿੱਲ ਨੇ ਵੀਰਵਾਰ ਨੂੰ ਮੰਨਿਆ ਕਿ ਸ੍ਰੀਲੰਕਾ ਖਿਲਾਫ਼ ਦੂਜਾ ਟੈਸਟ ਨਾ ਜਿੱਤਣਾ ਨਿਰਾਸ਼ਾਜਨਕ ਸੀ ਪਰ ਡਰਾਅ ਹੋਏ ਮੈਚ 'ਚ ਆਪਣੇ ਖਿਡਾਰੀਆਂ ਦੀ ਮਿਹਨਤ ਅਤੇ ਦ੍ਰਿੜ ਸੰਕਲਪ ਨੂੰ 10 'ਚੋਂ 10 ਅੰਕ ਦਿੱਤੇ।

ਚੌਥੇ ਦਿਨ ਦੀ ਖੇਡ ਖਤਮ ਹੋਣ ਤੱਕ ਭਾਰਤ ਨੇ ਸ੍ਰੀਲੰਕਾ ਦਾ ਸਕੋਰ ਛੇ ਵਿਕਟਾਂ 'ਤੇ 229 ਦੌੜਾਂ ਤੱਕ ਪਹੁੰਚਾ ਦਿੱਤਾ ਸੀ ਪਰ ਮੇਜ਼ਬਾਨ ਟੀਮ ਨੇ ਸ਼ਾਨਦਾਰ ਬੱਲੇਬਾਜ਼ੀ ਕਰਦੇ ਹੋਏ ਪੰਜਵਾਂ ਦਿਨ ਪੂਰਾ ਕੀਤਾ ਅਤੇ ਸੋਨਲ ਦਿਨੁਸ਼ਾ ਦੀਆਂ ਅਜੇਤੂ 133 ਦੌੜਾਂ ਦੀ ਸ਼ਾਨਦਾਰ ਪਾਰੀ ਦੀ ਬਦੌਲਤ ਮੈਚ ਡਰਾਅ ਕਰ ਲਿਆ।

ਮੈਚ ਤੋਂ ਬਾਅਦ ਪ੍ਰੈਸ ਕਾਨਫਰੰਸ ਵਿੱਚ ਗਿੱਲ ਨੇ ਕਿਹਾ ਕਿ ਇਹ ਬਹੁਤ ਨਿਰਾਸ਼ਾਜਨਕ ਹੈ। ਅਸੀਂ ਸ਼ੁਰੂ ਵਿੱਚ ਬਹੁਤ ਵਧੀਆ ਕੀਤਾ। ਪਰ ਜਿਵੇਂ-ਜਿਵੇਂ ਮੈਚ ਅੱਗੇ ਵਧਦਾ ਗਿਆ, ਪਿੱਚ ਹੌਲੀ ਹੁੰਦੀ ਗਈ। ਅਜਿਹਾ ਨਹੀਂ ਸੀ ਕਿ ਗੇਂਦ ਬਿਲਕੁਲ ਨਹੀਂ ਹਿੱਲ ਰਹੀ ਸੀ ਪਰ ਜਦੋਂ ਗੇਂਦ ਹਿੱਲ ਰਹੀ ਸੀ ਤਾਂ ਵਿਕਟਾਂ ਲੈਣ ਦੇ ਮੌਕੇ ਨਹੀਂ ਸਨ। ਪਿੱਚ ਵੀ ਪੂਰੀ ਤਰ੍ਹਾਂ ਸਮਤਲ ਨਹੀਂ ਸੀ।

ਸ੍ਰੀਲੰਕਾ ਦੇ ਬੱਲੇਬਾਜ਼ਾਂ ਨੇ ਮੁਸ਼ਕਲਾਂ ਖੜ੍ਹੀਆਂ ਕੀਤੀਆਂ

ਗਿੱਲ ਨੇ ਸੰਕੇਤ ਦਿੱਤਾ ਕਿ ਸ੍ਰੀਲੰਕਾ ਦੇ ਬੱਲੇਬਾਜ਼ਾਂ ਦੀ ਪੂਰੀ ਤਰ੍ਹਾਂ ਨਾਲ ਰੱਖਿਆਤਮਕ ਪਹੁੰਚ ਨੇ ਭਾਰਤੀ ਗੇਂਦਬਾਜ਼ਾਂ ਲਈ ਵਿਕਟਾਂ ਹਾਸਲ ਕਰਨਾ ਹੋਰ ਵੀ ਮੁਸ਼ਕਲ ਬਣਾ ਦਿੱਤਾ। ਭਾਰਤੀ ਕਪਤਾਨ ਨੇ ਕਿਹਾ ਕਿ ਜਦੋਂ ਤੱਕ ਤੁਸੀਂ ਸ਼ਾਟ ਖੇਡਣ ਦੀ ਕੋਸ਼ਿਸ਼ ਨਹੀਂ ਕਰਦੇ ਅਤੇ ਦੌੜਾਂ ਬਣਾਉਣ ਦੀ ਕੋਸ਼ਿਸ਼ ਨਹੀਂ ਕਰਦੇ, ਵਿਕਟ ਲੈਣਾ ਮੁਸ਼ਕਲ ਹੁੰਦਾ ਹੈ। ਅਸੀਂ ਹਰ ਸੰਭਵ ਕੋਸ਼ਿਸ਼ ਕੀਤੀ ਅਤੇ ਮੈਨੂੰ ਨਹੀਂ ਲੱਗਦਾ ਕਿ ਸਾਡੇ ਯਤਨਾਂ ਵਿੱਚ ਕੋਈ ਕਮੀ ਸੀ। ਸਾਡੇ ਸਪਿਨਰਾਂ ਨੇ ਤਿੰਨ ਦਿਨ ਲਗਾਤਾਰ 50-60 ਓਵਰ ਗੇਂਦਬਾਜ਼ੀ ਕੀਤੀ। ਉਨ੍ਹਾਂ ਕਿਹਾ ਕਿ ਇਨ੍ਹਾਂ ਹਾਲਾਤਾਂ 'ਚ ਲਗਾਤਾਰ ਤਿੰਨ ਦਿਨ ਫੀਲਡਿੰਗ ਕਰਨਾ ਆਸਾਨ ਨਹੀਂ ਹੈ। ਮੈਂ ਕੋਸ਼ਿਸ਼ ਅਤੇ ਇਰਾਦੇ ਲਈ 10 ਵਿੱਚੋਂ 10 ਦੇਵਾਂਗਾ। ਉਸ ਨੇ ਵੀ ਬਹੁਤ ਵਧੀਆ ਬੱਲੇਬਾਜ਼ੀ ਕੀਤੀ।