IND vs NZ 3rd ODI Weather Report: ਮੀਂਹ ਬਣੇਗਾ ਟੀਮ ਇੰਡੀਆ ਦੀ ਮੁਸ਼ਕਲ, ਨਿਊਜ਼ੀਲੈਂਡ ਕੋਲੋਂ ਖੁੱਸ ਸਕਦੈ ਸੀਰੀਜ਼ ਜਿੱਤਣ ਦਾ ਵੱਡਾ ਮੌਕਾ!

ਸਪੋਰਟਸ ਡੈਸਕ, ਨਵੀਂ ਦਿੱਲੀ : ਭਾਰਤੀ ਕ੍ਰਿਕਟ ਟੀਮ ਨੇ ਨਿਊਜ਼ੀਲੈਂਡ ਖ਼ਿਲਾਫ਼ ਖੇਡੀ ਜਾ ਰਹੀ ਪੰਜ ਮੈਚਾਂ ਦੀ ਵਨਡੇ ਸੀਰੀਜ਼ ਦੇ ਸ਼ੁਰੂਆਤੀ ਦੋਵੇਂ ਮੈਚ ਜਿੱਤ ਕੇ ਬੜ੍ਹਤ ਬਣਾ ਲਈ ਹੈ। ਹੁਣ ਤੀਜਾ ਮੈਚ ਹੈਮਿਲਟਨ ਵਿੱਚ ਖੇਡਿਆ ਜਾਣਾ ਹੈ, ਪਰ ਇਸ ਮੈਚ ’ਤੇ ਮੀਂਹ ਦਾ ਸਾਇਆ ਮੰਡਰਾ ਰਿਹਾ ਹੈ। ਸ਼ੁਰੂਆਤੀ ਦੋਵੇਂ ਮੈਚਾਂ ਦੌਰਾਨ ਵੀ ਮੀਂਹ ਪਿਆ ਸੀ, ਪਰ ਕਿਸੇ ਤਰ੍ਹਾਂ ਮੈਚ ਪੂਰੇ ਹੋ ਗਏ ਸਨ। ਹਾਲਾਂਕਿ, ਤੀਜੇ ਮੈਚ ਦੇ ਪੂਰਾ ਹੋਣ ਦੀਆਂ ਸੰਭਾਵਨਾਵਾਂ ਘੱਟ ਨਜ਼ਰ ਆ ਰਹੀਆਂ ਹਨ।

ਭਾਰਤ ਲਈ ਤੀਜਾ ਮੈਚ ਕਾਫ਼ੀ ਅਹਿਮ ਹੈ ਕਿਉਂਕਿ ਜੇਕਰ ਟੀਮ ਇੰਡੀਆ ਇਹ ਮੈਚ ਜਿੱਤ ਜਾਂਦੀ ਹੈ ਤਾਂ ਸੀਰੀਜ਼ ਉਸ ਦੇ ਨਾਂ ਹੋ ਜਾਵੇਗੀ। ਉੱਧਰ, ਨਿਊਜ਼ੀਲੈਂਡ ਲਈ ਸੀਰੀਜ਼ ਵਿੱਚ ਬਣੇ ਰਹਿਣ ਦਾ ਇਹ ਆਖ਼ਰੀ ਮੌਕਾ ਹੈ। ਜੇਕਰ ਮੀਂਹ ਕਾਰਨ ਇਹ ਮੈਚ ਰੱਦ ਹੋ ਜਾਂਦਾ ਹੈ ਤਾਂ ਨਿਊਜ਼ੀਲੈਂਡ ਸੀਰੀਜ਼ ਨਹੀਂ ਜਿੱਤ ਸਕੇਗੀ। ਉਹ ਵੱਧ ਤੋਂ ਵੱਧ ਸੀਰੀਜ਼ ਬਰਾਬਰ ਕਰ ਸਕੇਗੀ।

ਮੀਂਹ ਬਣੇਗਾ ਵਿਲੇਨ

ਤੀਜਾ ਮੈਚ ਹੈਮਿਲਟਨ ਦੇ ਸੇਡਨ ਪਾਰਕ ਵਿੱਚ ਖੇਡਿਆ ਜਾਣਾ ਹੈ। ਐਕਿਊਵੈਦਰ ਦੀ ਰਿਪੋਰਟ ਮੁਤਾਬਕ ਮੈਚ ਵਾਲੇ ਦਿਨ ਹੈਮਿਲਟਨ ਵਿੱਚ ਰੁਕ-ਰੁਕ ਕੇ ਮੀਂਹ ਪੈਂਦਾ ਰਹੇਗਾ। ਇਸ ਕਾਰਨ ਮੈਚ ਸ਼ੁਰੂ ਹੋਣ ਵਿੱਚ ਦੇਰੀ ਹੋਣ ਦੇ ਨਾਲ-ਨਾਲ ਇਸ ਦੇ ਰੱਦ ਹੋਣ ਦੀ ਸੰਭਾਵਨਾ ਵੀ ਵਧ ਸਕਦੀ ਹੈ।

ਹੈਮਿਲਟਨ ਵਿੱਚ ਸਵੇਰ ਤੋਂ ਹੀ ਮੀਂਹ ਸ਼ੁਰੂ ਹੋਣ ਦੀ ਸੰਭਾਵਨਾ ਹੈ। ਰਿਪੋਰਟ ਅਨੁਸਾਰ ਤੜਕੇ ਸਵੇਰੇ 4 ਤੋਂ 5 ਵਜੇ ਦੇ ਕਰੀਬ ਮੀਂਹ ਪੈਣ ਦੀ 70 ਫ਼ੀਸਦੀ ਸੰਭਾਵਨਾ ਹੈ। ਜਿਵੇਂ-ਜਿਵੇਂ ਦਿਨ ਚੜ੍ਹੇਗਾ, ਮੀਂਹ ਦੀ ਸੰਭਾਵਨਾ ਵੀ ਵਧਦੀ ਜਾਵੇਗੀ। ਸ਼ਾਮ ਤੱਕ ਰੁਕ-ਰੁਕ ਕੇ ਮੀਂਹ ਪੈਣ ਦਾ ਖ਼ਦਸ਼ਾ ਹੈ, ਜਿਸ ਨਾਲ ਮੈਚ ਰੱਦ ਹੋਣ ਦਾ ਖ਼ਤਰਾ ਵੀ ਵਧ ਸਕਦਾ ਹੈ।

ਹਾਲਾਂਕਿ, ਨਿਊਜ਼ੀਲੈਂਡ ਦੇ ਸਥਾਨਕ ਸਮੇਂ ਮੁਤਾਬਕ ਮੈਚ ਦੁਪਹਿਰ 3 ਵਜੇ ਸ਼ੁਰੂ ਹੋਣਾ ਹੈ। ਮੌਸਮ ਦੀ ਭਵਿੱਖਬਾਣੀ ਦੇ ਮੱਦੇਨਜ਼ਰ ਮੈਚ ਸ਼ੁਰੂ ਹੋਣ ਵਿੱਚ ਦੇਰੀ ਹੋਣੀ ਤੈਅ ਮੰਨੀ ਜਾ ਰਹੀ ਹੈ। ਹੁਣ ਦੇਖਣਾ ਇਹ ਹੋਵੇਗਾ ਕਿ ਮੈਚ ਹੋ ਪਾਉਂਦਾ ਹੈ ਜਾਂ ਨਹੀਂ ਅਤੇ ਜੇਕਰ ਹੁੰਦਾ ਹੈ ਤਾਂ ਕਿੰਨੇ ਓਵਰਾਂ ਦਾ ਖੇਡਿਆ ਜਾਂਦਾ ਹੈ।

ਭਾਰਤ ਲਈ ਅਹਿਮ ਮੁਕਾਬਲਾ

ਟੀ-20 ਸੀਰੀਜ਼ ਵਿੱਚ ਵੀ ਭਾਰਤ ਨੇ ਸ਼ੁਰੂਆਤੀ ਤਿੰਨੋਂ ਮੈਚ ਜਿੱਤ ਕੇ ਸੀਰੀਜ਼ ਆਪਣੇ ਨਾਂ ਕਰ ਲਈ ਸੀ, ਜਿਸ ਤੋਂ ਬਾਅਦ ਆਖ਼ਰੀ ਦੋ ਮੈਚ ਨਿਊਜ਼ੀਲੈਂਡ ਨੇ ਜਿੱਤੇ ਸਨ। ਵਨਡੇ ਸੀਰੀਜ਼ ਵਿੱਚ ਵੀ ਭਾਰਤੀ ਟੀਮ ਤੀਜੇ ਮੈਚ ਵਿੱਚ ਹੀ ਸੀਰੀਜ਼ ਆਪਣੇ ਨਾਂ ਕਰਨ ਦੇ ਇਰਾਦੇ ਨਾਲ ਮੈਦਾਨ ਵਿੱਚ ਉਤਰੇਗੀ। ਜੇਕਰ ਮੀਂਹ ਉਸ ਦੀ ਰਾਹ ਵਿੱਚ ਅੜਿੱਕਾ ਨਾ ਬਣਿਆ ਤਾਂ ਭਾਰਤ ਲਈ ਇਹ ਕੰਮ ਆਸਾਨ ਹੋ ਸਕਦਾ ਹੈ।

ਉੱਧਰ, ਨਿਊਜ਼ੀਲੈਂਡ ਵੀ ਨਹੀਂ ਚਾਹੇਗਾ ਕਿ ਮੀਂਹ ਕਾਰਨ ਮੈਚ ਰੱਦ ਹੋਵੇ, ਕਿਉਂਕਿ ਅਜਿਹੀ ਸਥਿਤੀ ਵਿੱਚ ਉਸ ਦੇ ਹੱਥੋਂ ਸੀਰੀਜ਼ ਜਿੱਤਣ ਦਾ ਮੌਕਾ ਨਿਕਲ ਜਾਵੇਗਾ।