- ਸ਼ਹਿਰ ਚੁਣੋ
- ਈ-ਪੇਪਰ
- ਵੈੱਬ ਸਟੋਰੀਜ਼
- ਸ਼ਹਿਰ ਚੁਣੋ
- ਈ-ਪੇਪਰ
- ਵੈੱਬ ਸਟੋਰੀਜ਼
16KG ਸੋਨੇ ਨਾਲ ਬਣੇ ਦੁਨੀਆ ਦੇ ਸਭ ਤੋਂ ਭਾਰੀ ਝੁਮਕੇ, ਇਸ ਭਾਰਤੀ ਅਰਬਪਤੀ ਨੇ ਦੁਬਈ 'ਚ ਕੀਤੇ ਲਾਂਚ; ਰੰਗ ਲਿਆਈ 55 ਕਾਰੀਗਰਾਂ ਦੀ ਮਿਹਨਤ
ਮੀਡੀਆ ਰਿਪੋਰਟਾਂ ਮੁਤਾਬਕ, ਗਿਨੀਜ਼ ਵਰਲਡ ਰਿਕਾਰਡ ਦੇ ਇੱਕ ਨੁਮਾਇੰਦੇ ਨੇ ਗਰੁੱਪ ਦੇ ਚੇਅਰਮੈਨ ਜੌਏ ਅਲੁੱਕਾਸ ਅਤੇ ਉਨ੍ਹਾਂ ਦੇ ਪੁੱਤਰ ਤੇ ਮੁੱਖ ਕਾਰਜਕਾਰੀ ਅਧਿਕਾਰੀ ਜੌਨ ਪੌਲ ਅਲੁੱਕਾਸ ਨੂੰ ਸਭ ਤੋਂ ਭਾਰੀਆਂ ਅਤੇ ਸਭ ਤੋਂ ਵੱਡੀਆਂ ਸੋਨੇ ਦੀਆਂ ਵਾਲੀਆਂ ਦੇ ਸਰਟੀਫਿਕੇਟ ਸੌਂਪੇ।
Posted By Seema Anand
Publish Date: Mon, 26 Oct 2026 01:44 PM (IST)
Updated Date: Mon, 26 Oct 2026 01:48 PM (IST)
ਬਿਜ਼ਨੈੱਸ ਡੈਸਕ, ਨਵੀਂ ਦਿੱਲੀ : ਭਾਰਤੀ ਅਰਬਪਤੀ ਜੌਏ ਅਲੁੱਕਾਸ ਦੀ ਜਿਊਲਰੀ ਚੇਨ 'ਜੌਏਅਲੁੱਕਾਸ' ਨੇ ਸੋਨੇ ਦੀਆਂ ਵਾਲੀਆਂ (ਝੁਮਕਿਆਂ) ਦੀ ਇੱਕ ਜੋੜੀ ਨਾਲ ਗਿਨੀਜ਼ ਵਰਲਡ ਰਿਕਾਰਡ ਦੇ ਦੋ ਰਿਕਾਰਡ ਆਪਣੇ ਨਾਂ ਕੀਤੇ ਹਨ। 16 ਕਿਲੋਗ੍ਰਾਮ ਤੋਂ ਵੱਧ ਭਾਰ ਵਾਲੀਆਂ ਇਹ ਵਾਲੀਆਂ ਹੁਣ ਤੱਕ ਦੀਆਂ ਸਭ ਤੋਂ ਭਾਰੀਆਂ ਅਤੇ ਸਭ ਤੋਂ ਵੱਡੀਆਂ ਵਾਲੀਆਂ ਹਨ।
'ਮਯੂਰ ਸਹਸ੍ਰ' (ਭਾਵ 'ਇੱਕ ਹਜ਼ਾਰ ਮੋਰ') ਨਾਂ ਦੀਆਂ ਇਨ੍ਹਾਂ ਵਾਲੀਆਂ ਨੂੰ ਸ਼ਨੀਵਾਰ ਨੂੰ ਦੁਬਈ ਗੋਲਡ ਡਿਸਟ੍ਰਿਕਟ 'ਚ ਕੰਪਨੀ ਦੇ ਨਵੇਂ ਫਲੈਗਸ਼ਿਪ ਸਟੋਰ 'ਜਿਊਲ ਆਫ਼ ਜੌਏ' 'ਚ ਲਾਂਚ ਕੀਤਾ ਗਿਆ। ਇਨ੍ਹਾਂ ਦੀ ਲਾਂਚਿੰਗ ਯੂਏਈ ਦੇ ਆਰਥਿਕਤਾ ਅਤੇ ਸੈਰ-ਸਪਾਟਾ ਮੰਤਰੀ ਅਬਦੁੱਲਾ ਬਿਨ ਤੌਕ ਅਲ ਮਰਰੀ ਨੇ ਕੀਤੀ।
22 ਕੈਰੇਟ ਸੋਨੇ ਨਾਲ ਬਣੇ ਹਨ ਝੁਮਕੇ
ਮੀਡੀਆ ਰਿਪੋਰਟਾਂ ਮੁਤਾਬਕ, ਗਿਨੀਜ਼ ਵਰਲਡ ਰਿਕਾਰਡ ਦੇ ਇੱਕ ਨੁਮਾਇੰਦੇ ਨੇ ਗਰੁੱਪ ਦੇ ਚੇਅਰਮੈਨ ਜੌਏ ਅਲੁੱਕਾਸ ਅਤੇ ਉਨ੍ਹਾਂ ਦੇ ਪੁੱਤਰ ਤੇ ਮੁੱਖ ਕਾਰਜਕਾਰੀ ਅਧਿਕਾਰੀ ਜੌਨ ਪੌਲ ਅਲੁੱਕਾਸ ਨੂੰ ਸਭ ਤੋਂ ਭਾਰੀਆਂ ਅਤੇ ਸਭ ਤੋਂ ਵੱਡੀਆਂ ਸੋਨੇ ਦੀਆਂ ਵਾਲੀਆਂ ਦੇ ਸਰਟੀਫਿਕੇਟ ਸੌਂਪੇ।
ਇਹ ਵਾਲੀਆਂ 22 ਕੈਰੇਟ ਸੋਨੇ ਨਾਲ ਬਣਾਈਆਂ ਗਈਆਂ ਹਨ ਅਤੇ ਇਨ੍ਹਾਂ 'ਚ ਕੁੱਲ 16.514 ਕਿਲੋਗ੍ਰਾਮ ਸੋਨਾ ਵਰਤਿਆ ਗਿਆ ਹੈ। ਇਨ੍ਹਾਂ ਦੀ ਲੰਬਾਈ 1.215 ਮੀਟਰ ਅਤੇ ਵਿਆਸ 0.682 ਮੀਟਰ ਹੈ। 55 ਕਾਰੀਗਰਾਂ ਨੇ ਕਈ ਮਹੀਨਿਆਂ ਤੱਕ 5,840 ਘੰਟੇ ਲਗਾ ਕੇ ਇਨ੍ਹਾਂ ਨੂੰ ਆਪਣੇ ਹੱਥਾਂ ਨਾਲ ਤਿਆਰ ਕੀਤਾ ਹੈ।
ਮੋਰ ਤੋਂ ਪ੍ਰੇਰਿਤ ਹੈ ਡਿਜ਼ਾਈਨ
ਇਨ੍ਹਾਂ ਵਾਲੀਆਂ ਦਾ ਡਿਜ਼ਾਈਨ ਮੋਰ ਤੋਂ ਪ੍ਰੇਰਿਤ ਹੈ ਅਤੇ ਇਨ੍ਹਾਂ ਨੂੰ ਦੱਖਣੀ ਏਸ਼ੀਆਈ ਦੁਲਹਨਾਂ ਦੇ ਗਹਿਣਿਆਂ 'ਚ ਦਿਖਾਈ ਦੇਣ ਵਾਲੇ 'ਝੁਮਕੇ' (ਘੰਟੀ ਦੇ ਆਕਾਰ ਵਾਲੇ ਗਹਿਣੇ) ਦੀ ਸ਼ੈਲੀ 'ਚ ਬਣਾਇਆ ਗਿਆ ਹੈ। ਦੱਸ ਦੇਈਏ ਕਿ ਗਿਨੀਜ਼ ਵਰਲਡ ਰਿਕਾਰਡ ਮੁਤਾਬਕ, 12 ਅਕਤੂਬਰ ਨੂੰ ਦੁਬਈ 'ਚ ਇਨ੍ਹਾਂ ਦੇ ਭਾਰ ਨੂੰ ਪ੍ਰਮਾਣਿਤ ਕੀਤਾ ਗਿਆ ਸੀ।
ਹਾਲਾਂਕਿ, ਜੌਏਅਲੁੱਕਾਸ ਨੇ ਦੱਸਿਆ ਕਿ ਇਹ ਵਾਲੀਆਂ ਵਿਕਰੀ ਲਈ ਨਹੀਂ ਹਨ। ਇਨ੍ਹਾਂ ਨੂੰ 'ਜਿਊਲ ਆਫ਼ ਜੌਏ' ਸਟੋਰ 'ਚ ਹਮੇਸ਼ਾ ਲਈ ਲੋਕਾਂ ਦੇ ਦੇਖਣ ਵਾਸਤੇ ਰੱਖਿਆ ਜਾਵੇਗਾ। ਇਹ ਸਟੋਰ ਰੋਜ਼ਾਨਾ ਸਵੇਰੇ 10 ਵਜੇ ਤੋਂ ਰਾਤ 10 ਵਜੇ ਤੱਕ ਖੁੱਲ੍ਹਾ ਰਹਿੰਦਾ ਹੈ ਅਤੇ ਇੱਥੇ ਦਾਖ਼ਲਾ ਮੁਫ਼ਤ ਹੈ।
ਕਿੰਨੀ ਹੈ ਇਨ੍ਹਾਂ ਝੁਮਕਿਆਂ ਦੀ ਕੀਮਤ?
ਕੰਪਨੀ ਨੇ ਇਨ੍ਹਾਂ ਵਾਲੀਆਂ ਦੀ ਕੋਈ ਕੀਮਤ ਨਹੀਂ ਦੱਸੀ ਹੈ। ਸ਼ਨੀਵਾਰ ਨੂੰ ਦੁਬਈ 'ਚ 24 ਕੈਰੇਟ ਸੋਨੇ ਦੀ ਪ੍ਰਚੂਨ ਕੀਮਤ ਲਗਪਗ 481 ਦਿਰਹਮ (131 ਡਾਲਰ) ਪ੍ਰਤੀ ਗ੍ਰਾਮ ਸੀ। ਇਸ ਹਿਸਾਬ ਨਾਲ, ਕਾਰੀਗਰੀ ਦੇ ਖ਼ਰਚ ਨੂੰ ਛੱਡ ਦਿੱਤਾ ਜਾਵੇ ਤਾਂ ਸਿਰਫ਼ ਇਨ੍ਹਾਂ 'ਚ ਵਰਤੇ ਗਏ ਸੋਨੇ ਦੀ ਕੀਮਤ ਹੀ ਲਗਪਗ 20 ਲੱਖ ਡਾਲਰ ਬਣਦੀ ਹੈ, ਜੋ ਭਾਰਤੀ ਕਰੰਸੀ 'ਚ ਕਰੀਬ 19 ਕਰੋੜ ਰੁਪਏ ਹੈ।
ਇਹ ਲਾਂਚਿੰਗ ਜੌਏਅਲੁੱਕਾਸ ਵੱਲੋਂ 'ਜਿਊਲ ਆਫ਼ ਜੌਏ' (Jewel of Joy) ਨਾਂ ਦਾ 25,000 ਵਰਗ ਫੁੱਟ ਦਾ ਸ਼ੋਅਰੂਮ ਖੋਲ੍ਹਣ ਤੋਂ ਕੁਝ ਦਿਨਾਂ ਬਾਅਦ ਕੀਤੀ ਗਈ ਹੈ। ਕੰਪਨੀ ਇਸ ਨੂੰ ਮੱਧ ਪੂਰਬ ਦਾ ਸਭ ਤੋਂ ਵੱਡਾ ਗਹਿਣਿਆਂ ਦਾ ਸਟੋਰ ਦੱਸਦੀ ਹੈ। ਦੁਬਈ ਅਤੇ ਦੱਖਣੀ ਭਾਰਤੀ ਸੂਬੇ ਕੇਰਲ ਦੇ ਤ੍ਰਿਸ਼ੂਰ 'ਚ ਸਥਿਤ ਇਹ ਗਰੁੱਪ 13 ਦੇਸ਼ਾਂ 'ਚ 200 ਤੋਂ ਵੱਧ ਸ਼ੋਅਰੂਮ ਚਲਾਉਂਦਾ ਹੈ।
ਇੱਕ ਸਟੋਰ ਤੋਂ ਕੀਤੀ ਸੀ ਸ਼ੁਰੂਆਤ
ਜੌਏ ਅਲੁੱਕਾਸ ਅਗਲੇ ਹਫ਼ਤੇ 70 ਸਾਲ ਦੇ ਹੋ ਜਾਣਗੇ। ਉਹ ਤ੍ਰਿਸ਼ੂਰ ਦੇ ਇੱਕ ਸੁਨਿਆਰੇ ਪਰਿਵਾਰ ਨਾਲ ਸਬੰਧ ਰੱਖਦੇ ਹਨ। ਉਨ੍ਹਾਂ ਦੇ ਪਿਤਾ ਵਰਗੀਸ ਅਲੁੱਕਾਸ ਨੇ ਉੱਥੇ ਇੱਕ ਹੀ ਸਟੋਰ ਤੋਂ ਇਸ ਕਾਰੋਬਾਰ ਦੀ ਸ਼ੁਰੂਆਤ ਕੀਤੀ ਸੀ, ਜਿਸ ਨੂੰ ਬਾਅਦ 'ਚ ਉਨ੍ਹਾਂ ਨੇ ਆਪਣੇ ਪੁੱਤਰਾਂ 'ਚ ਵੰਡ ਦਿੱਤਾ। ਜੌਏ ਅਲੁੱਕਾਸ ਨੇ ਖਾੜੀ ਦੇਸ਼ਾਂ ਤੋਂ ਸ਼ੁਰੂਆਤ ਕਰਦਿਆਂ ਕਾਰੋਬਾਰ ਦੇ ਵਿਦੇਸ਼ੀ ਹਿੱਸੇ ਦੀ ਕਮਾਨ ਸੰਭਾਲੀ ਅਤੇ ਬਾਅਦ 'ਚ 2001 'ਚ 'ਜੌਏ ਅਲੁੱਕਾਸ ਜਿਊਲਰੀ' ਦੀ ਸਥਾਪਨਾ ਕੀਤੀ। ਉਨ੍ਹਾਂ ਦੀ ਕੁੱਲ ਜਾਇਦਾਦ ਲਗਪਗ 5.4 ਅਰਬ ਡਾਲਰ ਅਨੁਮਾਨੀ ਗਈ ਹੈ। ਇਸ ਦੇ ਆਧਾਰ 'ਤੇ ਉਹ ਭਾਰਤ ਦੇ ਸਭ ਤੋਂ ਅਮੀਰ ਲੋਕਾਂ ਦੀ ਸੂਚੀ 'ਚ 52ਵੇਂ ਸਥਾਨ 'ਤੇ ਅਤੇ ਕੇਰਲ ਦੇ ਕਾਰੋਬਾਰੀਆਂ 'ਚ ਤੀਜੇ ਸਥਾਨ 'ਤੇ ਹਨ।