ਵੇਦਾਂਤਾ ਦਾ ₹1,908 ਕਰੋੜ ਵਾਲਾ ਮਾਸਟਰਸਟ੍ਰੋਕ: ਰਾਜਸਥਾਨ ਤੋਂ ਨਿਕਲੇਗਾ ‘ਕਾਲਾ ਸੋਨਾ’, ਦੇਸ਼ ਨੂੰ ਹੋਵੇਗਾ ਵੱਡਾ ਫਾਇਦਾ!

ਬਿਜ਼ਨੈੱਸ ਡੈਸਕ, ਨਵੀਂ ਦਿੱਲੀ : ਇਸ ਸਮੇਂ ਦੇਸ਼ ਵਿਚ ਤੇਲ ਦਾ ਉਤਪਾਦਨ ਵਧਾਉਣਾ ਤਰਜੀਹ ਬਣਦਾ ਜਾ ਰਿਹਾ ਹੈ। ਇਸੇ ਦੌਰਾਨ ਅਰਬਪਤੀ ਅਨਿਲ ਅਗਰਵਾਲ ਦੀ ਕੰਪਨੀ ਵੇਦਾਂਤਾ ਵੱਲੋਂ ਇਕ ਵੱਡੀ ਖ਼ਬਰ ਸਾਹਮਣੇ ਆਈ ਹੈ। ਅਨਿਲ ਅਗਰਵਾਲ ਦੀ ਕੰਪਨੀ ਅਤੇ ਭਾਰਤ ਦੀ ਪ੍ਰਮੁੱਖ ਨਿੱਜੀ ਤੇਲ ਤੇ ਗੈਸ ਕੰਪਨੀ, ਵੇਦਾਂਤਾ ਆਇਲ ਐਂਡ ਗੈਸ ਲਿਮਟਿਡ (VOGL), ਵਿੱਤੀ ਸਾਲ 2027 ਵਿਚ ਉੱਤਰੀ ਰਾਜਸਥਾਨ ਵਿਚ 200 ਮਿਲੀਅਨ ਡਾਲਰ (₹1,908 ਕਰੋੜ) ਦਾ ਨਿਵੇਸ਼ ਕਰਨ ਦੀ ਯੋਜਨਾ ਬਣਾ ਰਹੀ ਹੈ।

ਇਸ ਦਾ ਮਕਸਦ ਬਿਹਤਰ ਰਿਕਵਰੀ ਦੀਆਂ ਕੋਸ਼ਿਸ਼ਾਂ, ਉਤਪਾਦਨ ਨੂੰ ਬਿਹਤਰ ਬਣਾਉਣ ਅਤੇ ਰਿਸੋਰਸ-ਟੂ-ਰਿਜ਼ਰਵ ਕਨਵਰਜ਼ਨ ਪ੍ਰੋਗਰਾਮਾਂ ਵਿਚ ਤੇਜ਼ੀ ਲਿਆਉਣਾ ਹੈ।

ਫਰਸਟ ਆਇਲ ਦੇ 17 ਸਾਲ ਪੂਰੇ

ਰਾਜਸਥਾਨ ਦੇ ਬਾੜਮੇਰ ਸਥਿਤ ਕੰਪਨੀ ਦਾ ਮੰਗਲਾ ਫੀਲਡ ਭਾਰਤ ਦੇ ਹਾਈਡ੍ਰੋਕਾਰਬਨ ਸਰੋਤਾਂ ਦੀ ਸਮਰੱਥਾ ਦੀ ਇਕ ਵੱਡੀ ਉਦਾਹਰਨ ਹੈ। ਵੇਦਾਂਤਾ ਦੀ ਸਹਾਇਕ ਕੰਪਨੀ ਕੇਰਨ ਵੱਲੋਂ ਭਾਰਤ ਵਿਚ ਸਭ ਤੋਂ ਵੱਡੀ ਆਨਸ਼ੋਰ ਤੇਲ ਖੋਜ ਕੀਤੇ ਜਾਣ ਤੋਂ ਬਾਅਦ ਇੱਥੇ ਲਗਾਤਾਰ ਉਤਪਾਦਨ ਹੋ ਰਿਹਾ ਹੈ।

ਮੰਗਲਾ 'ਚ ‘ਫਰਸਟ ਆਇਲ’ (ਪਹਿਲੀ ਵਾਰ ਤੇਲ ਉਤਪਾਦਨ) ਦੇ 17 ਸਾਲ ਪੂਰੇ ਹੋਣ ਦੇ ਨਾਲ ਹੀ ਇਹ ਫੀਲਡ ਦੇਸ਼ ਦੇ ਤੇਲ ਤੇ ਗੈਸ ਉਦਯੋਗ ਦਾ ਇਕ ਅਹਿਮ ਹਿੱਸਾ ਬਣਿਆ ਹੋਇਆ ਹੈ। ਇਹ ਘਰੇਲੂ ਕੱਚੇ ਤੇਲ ਦੇ ਉਤਪਾਦਨ ਵਿਚ ਵੱਡਾ ਯੋਗਦਾਨ ਪਾ ਰਿਹਾ ਹੈ ਅਤੇ ਦਰਾਮਦ ’ਤੇ ਨਿਰਭਰਤਾ ਘਟਾ ਰਿਹਾ ਹੈ।

570 MMboe ਦਾ ਸੰਭਾਵੀ ਰਿਜ਼ਰਵ ਮੌਜੂਦ

2004 ਵਿਚ ਖੋਜਿਆ ਗਿਆ ਮਹੱਤਵਪੂਰਨ ਮੰਗਲਾ ਆਇਲਫੀਲਡ ਦੇਸ਼ ਦੇ ਸਭ ਤੋਂ ਵੱਧ ਉਤਪਾਦਨ ਕਰਨ ਵਾਲੇ ਆਨਸ਼ੋਰ ਹਾਈਡ੍ਰੋਕਾਰਬਨ ਐਸੈਟਸ 'ਚੋਂ ਇਕ ਬਣ ਗਿਆ ਹੈ। ਰਾਜਸਥਾਨ ਦੇ ਇਨ੍ਹਾਂ ਫੀਲਡਾਂ ਵਿਚ ਮੰਗਲਾ, ਭਾਗਯਮ ਅਤੇ ਐਸ਼ਵਰਿਆ (MBA) ਸ਼ਾਮਲ ਹਨ ਤੇ ਅਨੁਮਾਨ ਹੈ ਕਿ ਇਨ੍ਹਾਂ ਵਿਚ ਕੁੱਲ ਮਿਲਾ ਕੇ 570 MMboe ਦਾ ਸੰਭਾਵਿਤ ਰਿਜ਼ਰਵ ਮੌਜੂਦ ਹੈ।

ਤੇਲ ਦੀ ਰਿਕਵਰੀ ਵਧਾਉਣ ਦਾ ਟੀਚਾ

200 ਮਿਲੀਅਨ ਡਾਲਰ ਦੇ ਨਿਵੇਸ਼ ਦੇ ਐਲਾਨ ਮੌਕੇ ਵੇਦਾਂਤਾ ਆਇਲ ਐਂਡ ਗੈਸ ਦੇ ਅੰਤਰਿਮ CEO ਜਿਮ ਜੌਨੀ ਗੈਸਟ ਨੇ ਕਿਹਾ, 'ਭਾਰਤ ਦੇ ਆਨਸ਼ੋਰ ਤੇਲ ਖੇਤਰ ਦੀ ਤਸਵੀਰ ਬਦਲਣ ਤੋਂ ਲੈ ਕੇ ਘਰੇਲੂ ਤੇਲ ਉਤਪਾਦਨ ਵਿਚ ਅਹਿਮ ਭੂਮਿਕਾ ਨਿਭਾਉਣ ਤੱਕ—ਮੰਗਲਾ ਫੀਲਡ ਦੇਸ਼ ਦੀ ਹਾਈਡ੍ਰੋਕਾਰਬਨ ਯਾਤਰਾ ਦੀ ਇਕ ਵੱਡੀ ਉਦਾਹਰਨ ਹੈ। ਅੱਜ ਸਾਡਾ ਧਿਆਨ ਇਸ ਦੇ ਵਿਕਾਸ ਦੇ ਅਗਲੇ ਪੜਾਅ ਨੂੰ ਅੱਗੇ ਵਧਾਉਣ ’ਤੇ ਹੈ। ਐਡਵਾਂਸਡ ਤਕਨਾਲੋਜੀ, ਟਾਰਗੇਟਿਡ ਵਰਕਓਵਰ, ਸਾਈਡਟ੍ਰੈਕ ਅਤੇ ਵੈੱਲ ਇੰਟਰਵੈਂਸ਼ਨ ਰਾਹੀਂ ਸਾਡਾ ਟੀਚਾ ਰਿਕਵਰੀ ਨੂੰ 30 ਫੀਸਦੀ ਤੋਂ ਵਧਾ ਕੇ 60 ਫੀਸਦੀ ਕਰਨਾ ਹੈ। ਅੱਗੇ ਵੀ ਇਸ ਵਿਚ ਕਾਫ਼ੀ ਸੰਭਾਵਨਾਵਾਂ ਹਨ, ਇਸ ਲਈ ਮੰਗਲਾ ਫੀਲਡ ਲੰਬੇ ਸਮੇਂ ਤੱਕ ਟਿਕਾਊ ਉਤਪਾਦਨ ਨੂੰ ਉਤਸ਼ਾਹਿਤ ਕਰੇਗਾ ਅਤੇ ਭਾਰਤ ਦੀ ਊਰਜਾ ਸੁਰੱਖਿਆ ਨੂੰ ਮਜ਼ਬੂਤ ਕਰੇਗਾ।'

200-300 MMboe ਹੋਰ ਮਿਲਣ ਦੀ ਉਮੀਦ

ਇਸ ਦੌਰਾਨ ਕੇਰਨ ਨੇ ਮੰਗਲਾ ਵੈੱਲ ਪੈਡਜ਼ ’ਤੇ ਕਮਰਸ਼ੀਅਲ ASP (ਅਲਕਲਾਈਨ ਸਰਫੈਕਟੈਂਟ ਪਾਲੀਮਰ) ਇੰਜੈਕਸ਼ਨ ਦੀ ਸਮਰੱਥਾ ਵਧਾਈ ਹੈ। ਕੰਪਨੀ ਮੁਤਾਬਕ ਰਾਜਸਥਾਨ ਐਸੈਟ ਬੇਸ ਵਿਚ ਲਗਭਗ 100-200 MMboe ਟਾਈਟ ਆਇਲ ਦੀ ਸੰਭਾਵਨਾ ਹੈ, ਜਦਕਿ ਰਿਸੋਰਸ-ਟੂ-ਰਿਜ਼ਰਵ ਕਨਵਰਜ਼ਨ ਪ੍ਰੋਗਰਾਮ ਤੋਂ ਆਉਣ ਵਾਲੇ ਸਾਲਾਂ ਵਿਚ 200-300 MMboe ਹੋਰ ਮਿਲਣ ਦੀ ਉਮੀਦ ਹੈ। ਇਸ ਨਾਲ ਬਲਾਕ ਦੇ ਲੰਬੇ ਸਮੇਂ ਦੇ ਵਿਕਾਸ ਦੀ ਸੰਭਾਵਨਾ ਹੋਰ ਮਜ਼ਬੂਤ ਹੋਵੇਗੀ।

ਬਿਹਤਰ ਸਬ-ਸਰਫੇਸ ਵਿਜ਼ੀਬਿਲਟੀ, ਐਡਵਾਂਸਡ ਤਕਨਾਲੋਜੀ ਅਤੇ ਭਰੋਸੇਮੰਦ ਭਾਈਵਾਲਾਂ ਨਾਲ ਕੰਮ ਕਰਨ ਦੀ ਯਕੀਨੀਤਾ ਕਾਰਨ ਇਸ ਐਸੈਟ ਦਾ ਲੰਬੇ ਸਮੇਂ ਦਾ ਉਤਪਾਦਨ ਪ੍ਰੋਫਾਈਲ ਬਣਿਆ ਰਹਿਣ ਦੀ ਉਮੀਦ ਹੈ।