ਕਦੇ ਪਖਾਨੇ ਕੀਤੇ ਸਾਫ਼, ਫਿਰ ਮਿਲੀ ₹1 ਕਰੋੜ ਦੀ ਨੌਕਰੀ ਮਿਲੀ; ਭਾਣਜੇ ਦੀ ਬਿਮਾਰੀ ਨੇ ਝੰਜੋੜਿਆ ਤੇ ਖੜ੍ਹੀ ਕਰ ਲਈ ₹350 ਕਰੋੜ ਦੀ ਕੰਪਨੀ

ਬਿਜ਼ਨੈੱਸ ਡੈਸਕ, ਨਵੀਂ ਦਿੱਲੀ : ਕਦੇ ਜ਼ਿੰਦਗੀ ਇਕ ਐਸੇ ਮੋੜ 'ਤੇ ਆਣ ਖੜ੍ਹੀ ਸੀ, ਜਿੱਥੇ ਜੇਬ 'ਚ ਪੈਸੇ ਨਹੀਂ ਸੀ ਹੁੰਦੇ, ਜ਼ਿੰਮੇਵਾਰੀਆਂ ਸਿਰ 'ਤੇ ਸਨ ਤੇ ਹਰ ਦਿਨ ਨਵੀਂ ਚਿੰਤਾ ਲੈ ਕੇ ਆਉਂਦਾ ਸੀ। ਰੋਜ਼ੀ-ਰੋਟੀ ਕਮਾਉਣ ਲਈ ਵੇਟਰ ਤਕ ਦੀ ਨੌਕਰੀ ਕਰਨੀ ਪੈ ਰਹੀ ਸੀ, ਛੋਟੇ-ਛੋਟੇ ਕੰਮ ਕਰ ਕੇ ਦਿਨ ਕੱਟਣੇ ਪੈਂਦੇ ਸੀ। ਹਾਲਾਤ ਇੰਨੇ ਔਖੇ ਸਨ ਕਿ ਭਵਿੱਖ ਪੂਰੀ ਤਰ੍ਹਾਂ ਧੁੰਦਲਾ ਜਾਪਦਾ ਸੀ।

ਪਰ ਅਸਲ ਇਮਤਿਹਾਨ ਉਦੋਂ ਸ਼ੁਰੂ ਹੋਇਆ ਜਦੋਂ 1 ਕਰੋੜ ਰੁਪਏ ਦੀ ਨੌਕਰੀ ਛੱਡੀ ਤੇ ਮੇਰੇ ਹੱਥ 'ਚ ਫੁੱਟੀ ਕੌਡੀ ਨਹੀਂ ਸੀ। ਸੁਪਨਾ ਸੀ ਦੁਨੀਆ ਜਿੱਤਣ ਦਾ ਪਰ ਹੱਥ ਵਿਚ ਕੁਝ ਨਹੀਂ ਸੀ। ਕਹਿੰਦੇ ਹਨ ਕਿ ਸੁਪਨੇ ਉਹ ਨਹੀਂ ਹੁੰਦੇ ਜੋ ਤੁਸੀਂ ਸੌਂਦੇ ਹੋਏ ਦੇਖਦੇ ਹੋ, ਸਗੋਂ ਸੁਪਨੇ ਉਹ ਹੁੰਦੇ ਹਨ ਜੋ ਤੁਹਾਨੂੰ ਸੌਣ ਨਹੀਂ ਦਿੰਦੇ। ਜੇਕਰ ਤੁਸੀਂ ਵੀ ਮੰਨਦੇ ਹੋ ਕਿ ਇਕ ਸਫਲ ਕਾਰੋਬਾਰ ਬਣਾਉਣ ਲਈ ਕਰੋੜਾਂ ਰੁਪਏ ਦੀ ਪਰਿਵਾਰਕ ਵਿਰਾਸਤ ਜਾਂ ਵੱਡੇ ਪਿਛੋਕੜ ਦੀ ਲੋੜ ਹੈ ਤਾਂ ਨਿਤਿਨ ਕਾਲੜਾ ਦੀ ਕਹਾਣੀ ਤੁਹਾਡੀ ਸੋਚ ਨੂੰ ਪੂਰੀ ਤਰ੍ਹਾਂ ਬਦਲ ਦੇਵੇਗੀ।

ਕੌਣ ਹੈ ਕਰੋੜਾਂ ਦਾ ਮਾਲਕ ?

ਤੁਹਾਨੂੰ ਦੱਸ ਦੇਈਏ ਕਿ ਭਾਰਤ ਦੇ ਉਭਰਦੇ ਬ੍ਰਾਂਡ Let's Try ਦੇ ਮਾਲਕ ਨਿਤਿਨ ਕਾਲੜਾ ਨੇ 9 ਸਾਲ ਤੋਂ ਵੱਧ ਸਮੇਂ ਤਕ ਇਕ ਫੂਡ ਕੰਪਨੀ 'ਚ ਕੰਮ ਕੀਤਾ। ਕਾਲਜ ਦੌਰਾਨ ਉਹ ਮੈਕਡੋਨਲਡਜ਼ ਵਰਗੀ ਵੱਡੀ ਕੰਪਨੀ 'ਚ 20 ਰੁਪਏ 'ਚ ਟੇਬਲ ਦੇ ਨਾਲ-ਨਾਲ ਟਾਇਲਟ ਵੀ ਸਾਫ਼ ਕਰਦੇ ਸਨ। ਇਸ ਤੋਂ ਬਾਅਦ ਉਨ੍ਹਾਂ ਨੂੰ ਕਾਲਜ ਤੋਂ ਪਲੇਸਮੈਂਟ ਮਿਲੀ ਤੇ 1 ਕਰੋੜ ਰੁਪਏ ਦੀ ਨੌਕਰੀ ਮਿਲ ਗਈ। ਪਰ ਆਪਣੇ ਸੁਪਨਿਆਂ ਦੇ ਜਨੂੰਨ ਕਾਰਨ, ਉਨ੍ਹਾਂ ਨੇ ਇਹ ਵੀ ਛੱਡ ਦਿੱਤੀ। ਇਸ ਤੋਂ ਬਾਅਦ ਕਰੀਬ 5 ਸਾਲ ਪਹਿਲਾਂ ਨਿਤਿਨ ਨੇ ਆਪਣੀ ਕੰਪਨੀ ਸ਼ੁਰੂ ਕੀਤੀ ਤੇ ਅੱਜ ਉਹ 350 ਕਰੋੜ ਰੁਪਏ ਦੇ ਕਾਰੋਬਾਰ ਦੇ ਮਾਲਕ ਹਨ।

ਕਿਵੇਂ ਆਇਆ ਬਿਜ਼ਨੈੱਸ ਆਇਡੀਆ ?

ਨਿਤਿਨ ਕੋਲ ਫੂਡ ਤੇ ਬਿਵਰੇਜ ਇੰਡਸਟਰੀ 'ਚ ਕੰਮ ਕਰਨ ਦਾ 10 ਸਾਲਾਂ ਤੋਂ ਵੱਧ ਦਾ ਤਜਰਬਾ ਸੀ। ਇੰਨੇ ਲੰਬੇ ਸਮੇਂ ਤਕ ਮਾਰਕੀਟ ਨੂੰ ਨੇੜਿਓਂ ਦੇਖਣ ਤੋਂ ਬਾਅਦ ਇਕ ਗੱਲ ਜੋ ਪਰੇਸ਼ਾਨ ਕਰਦੀ ਸੀ ਉਹ ਇਹ ਸੀ ਕਿ ਮਾਰਕੀਟ 'ਚ ਚਿਪਸ ਅਤੇ ਨਮਕੀਨ ਦੇ ਅਣਗਿਣਤ ਬ੍ਰਾਂਡ ਉਪਲਬਧ ਸਨ, ਪਰ ਜਦੋਂ ਸਿਹਤਮੰਦ ਤੇ ਪੌਸ਼ਟਿਕ ਵਿਕਲਪਾਂ ਦੀ ਗੱਲ ਆਈ ਤਾਂ ਬਾਜ਼ਾਰ ਬਿਲਕੁਲ ਖਾਲੀ ਜਾਪਦਾ ਸੀ।

ਭਾਣਜੇ ਦੀ ਬਿਮਾਰੀ ਨੇ ਕੀਤਾ ਸੋਚਣ ਲਈ ਮਜਬੂਰ

ਇਸ ਦੌਰਾਨ ਨਿਤਿਨ ਦੀ ਜ਼ਿੰਦਗੀ 'ਚ ਇਕ ਅਜਿਹਾ ਮੋੜ ਆਇਆ ਜਿਸ ਨੇ ਉਸ ਦੀ ਸੋਚਣੀ ਪੂਰੀ ਤਰ੍ਹਾਂ ਬਦਲ ਦਿੱਤੀ। ਉਸ ਦੇ ਛੋਟੇ ਭਾਣਜੇ ਨੂੰ ਥੈਲੇਸੀਮੀਆ ਵਰਗੀ ਗੰਭੀਰ ਬਿਮਾਰੀ ਸੀ। ਇਸ ਵੱਡੇ ਪਰਿਵਾਰਕ ਸੰਕਟ ਤੋਂ ਬਾਅਦ ਪੂਰੇ ਪਰਿਵਾਰ ਨੂੰ ਆਪਣੀ ਜੀਵਨ ਸ਼ੈਲੀ ਅਤੇ ਖਾਸ ਕਰਕੇ ਆਪਣੀ ਖੁਰਾਕ ਬਾਰੇ ਬਹੁਤ ਸੁਚੇਤ ਰਹਿਣਾ ਪਿਆ।

ਫਿਰ, ਆਪਣੇ ਪਰਿਵਾਰ ਲਈ ਸੁਰੱਖਿਅਤ ਤੇ ਸਿਹਤਮੰਦ ਖੁਰਾਕ ਦੀ ਖੋਜ ਕਰਦਿਆਂ ਨਿਤਿਨ ਨੂੰ ਇੱਕ ਕੌੜੀ ਸੱਚਾਈ ਦਾ ਅਹਿਸਾਸ ਹੋਇਆ। ਉਸ ਨੇ ਡੂੰਘਾਈ ਨਾਲ ਖੋਜ ਕੀਤੀ ਕਿ ਬਾਜ਼ਾਰ 'ਚ ਉਪਲਬਧ ਜ਼ਿਆਦਾਤਰ ਪੈਕ ਕੀਤੇ ਸਨੈਕਸ ਘੱਟ ਗੁਣਵੱਤਾ ਵਾਲੇ ਤੇਲ, ਆਟੇ ਤੇ ਸਿਹਤ ਨੂੰ ਨੁਕਸਾਨ ਪਹੁੰਚਾਉਣ ਵਾਲੇ ਹਾਨੀਕਾਰਕ ਰਸਾਇਣਾਂ ਨਾਲ ਭਰੇ ਹੋਏ ਹਨ।

ਉਸੇ ਸਮੇਂ, ਨਿਤਿਨ ਨੇ ਇਕ ਮਜ਼ਬੂਤ ​​ਸੰਕਲਪ ਲਿਆ ਤੇ ਫੈਸਲਾ ਕੀਤਾ ਕਿ ਉਹ ਇਕ ਅਜਿਹਾ ਬ੍ਰਾਂਡ ਬਣਾਏਗਾ ਜੋ ਲੋਕਾਂ ਦੀਆਂ ਪਲੇਟਾਂ 'ਚ ਨਾ ਸਿਰਫ਼ ਸਵਾਦ, ਸਗੋਂ 100% ਸ਼ੁੱਧ, ਸੁਰੱਖਿਅਤ ਅਤੇ ਸਿਹਤਮੰਦ ਸਨੈਕਸ ਵੀ ਪ੍ਰਦਾਨ ਕਰੇਗਾ।

ਇੱਥੋਂ ਕੀਤੀ Let's Try ਦੀ ਸ਼ੁਰੂਆਤ

ਆਪਣੇ ਵਿਜ਼ਨ ਨੂੰ ਹਕੀਕਤ ਦੇਣ ਲਈ ਨਿਤਿਨ ਨੇ ਇਕ ਜੋਖ਼ਮ ਭਰਿਆ ਕਦਮ ਚੁੱਕਿਆ। ਉਸਨੇ ਆਪਣੀ ਪਤਨੀ ਚਿਤਰਾ ਗੁਪਤਾ ਨਾਲ ਮਿਲ ਕੇ 'ਲੈਟਸ ਟ੍ਰਾਈ' ਨਾਂ ਦਾ ਆਪਣਾ ਡ੍ਰੀਮ ਬ੍ਰਾਂਡ ਸ਼ੁਰੂ ਕੀਤਾ। ਨਿਤਿਨ ਨੇ ਆਪਣੇ ਪਰਿਵਾਰ ਨਾਲ ਕੀਤਾ ਵਾਅਦਾ ਨਿਭਾਇਆ ਕਿ ਲੈਟਸ ਟ੍ਰਾਈ ਦੇ ਸਨੈਕਸ 'ਚ ਮੈਦੇ ਦੀ ਕੋਈ ਵਰਤੋਂ ਨਹੀਂ ਕੀਤੀ ਜਾਂਦੀ ਤੇ ਇਹ 100% ਸ਼ੁੱਧ ਮੂੰਗਫਲੀ ਦੇ ਤੇਲ 'ਚ ਹੀ ਤਿਆਰ ਕੀਤੇ ਜਾਂਦੇ ਹਨ, ਤਾਂ ਜੋ ਸਵਾਦ ਦੇ ਨਾਲ-ਨਾਲ ਸਿਹਤ ਨਾਲ ਕੋਈ ਸਮਝੌਤਾ ਨਾ ਹੋਵੇ।

'ਸ਼ਾਰਕ ਟੈਂਕ ਇੰਡੀਆ' 'ਚ ਬਣਾਈ ਜਗ੍ਹਾ

ਆਪਣੇ ਇਸ ਸ਼ੁੱਧ ਤੇ ਸਿਹਤਮੰਦ ਵਿਚਾਰ ਦੇ ਨਾਲ ਨਿਤਿਨ ਮਸ਼ਹੂਰ ਬਿਜ਼ਨੈੱਸ ਰਿਐਲਿਟੀ ਸ਼ੋਅ 'ਸ਼ਾਰਕ ਟੈਂਕ ਇੰਡੀਆ' ਦੇ ਪਹਿਲੇ ਸੀਜ਼ਨ ਦੇ ਪੜਾਅ 'ਤੇ ਪਹੁੰਚੇ ਸਨ। ਉਨ੍ਹਾਂ ਪੂਰੇ ਭਰੋਸੇ ਨਾਲ ਸ਼ਾਰਕ (ਨਿਵੇਸ਼ਕ) ਨੂੰ ਆਪਣੀ ਕੰਪਨੀ 'ਚ 2% ਇਕੁਇਟੀ ਦੇ ਬਦਲੇ 45 ਲੱਖ ਰੁਪਏ ਦੀ ਫੰਡਿੰਗ ਦੀ ਮੰਗ ਪੇਸ਼ ਕੀਤੀ। ਸ਼ੋਅ 'ਚ ਪਿਚ ਦੌਰਾਨ ਕਾਫੀ ਉਤਰਾਅ-ਚੜ੍ਹਾਅ ਦੇਖਣ ਨੂੰ ਮਿਲੇ।

ਨਿਤਿਨ ਦੇ ਸ਼ਾਨਦਾਰ ਉਤਪਾਦ ਨੂੰ ਦੇਖਦੇ ਹੋਏ ਸ਼ੁਰੂ ਵਿਚ ਦੋ ਅਨੁਭਵੀ ਸ਼ਾਰਕ ਅਮਨ ਗੁਪਤਾ ਤੇ ਅਨੁਪਮ ਮਿੱਤਲ ਪੈਸਾ ਲਗਾਉਣ ਲਈ ਰਾਜ਼ੀ ਹੋ ਗਏ। ਹਾਲਾਂਕਿ ਬਾਅਦ 'ਚ ਕਿਸੇ ਕਾਰਨ ਅਨੁਪਮ ਮਿੱਤਲ ਇਸ ਡੀਲ ਤੋਂ ਪਿੱਛੇ ਹਟ ਗਏ। ਪਰ ਅਮਨ ਗੁਪਤਾ ਨੇ ਨਿਤਿਨ 'ਤੇ ਭਰੋਸਾ ਕੀਤਾ ਅਤੇ ਇਹ ਉਹ ਇਤਿਹਾਸਕ ਪਲ ਸੀ ਜਿਸ ਨੇ 'ਲੈਟਸ ਟਰਾਈ ' ਨੂੰ ਘਰ-ਘਰ ਪਛਾਣਿਆ ਜਾਣ ਵਾਲਾ ਬ੍ਰਾਂਡ ਬਣਾ ਦਿੱਤਾ।

ਪੂਰਾ ਕੀਤਾ ਸੁਪਨਾ

ਨਿਤਿਨ ਦਾ ਬ੍ਰਾਂਡ 'ਲੈਟਸ ਟ੍ਰਾਈ', ਜਿਸ ਨੂੰ ਕਦੇ ਕੜਾਕੇ ਦੀ ਗਰਮੀ 'ਚ ਇਕ ਪੈਕਟ ਵੇਚਣ ਲਈ ਦੁਕਾਨਦਾਰਾਂ ਦੇ ਤਾਅਨੇ ਸੁਣਨੇ ਪੈਂਦੇ ਸਨ, ਅੱਜ ਸਫਲਤਾ ਦੇ ਸਿਖਰ 'ਤੇ ਹੈ। ਵਰਤਮਾਨ 'ਚ ਇਹ ਸਿਰਫ ਇਕ ਸਟਾਰਟਅੱਪ ਨਹੀਂ, ਸਗੋਂ 350 ਕਰੋੜ ਰੁਪਏ ਦੀ ਇਕ ਵੱਡੀ ਕੰਪਨੀ ਬਣ ਗਈ ਹੈ। ਆਪਣੀ ਸ਼ੁੱਧਤਾ, ਸ਼ਾਨਦਾਰ ਸੁਆਦ ਅਤੇ ਸਿਹਤ ਦੇ ਮਜ਼ਬੂਤ ​​ਵਾਅਦੇ ਕਾਰਨ ਇਹ ਬ੍ਰਾਂਡ ਅੱਜ ਲੱਖਾਂ ਭਾਰਤੀ ਪਰਿਵਾਰਾਂ ਦੀ ਪਹਿਲੀ ਪਸੰਦ ਬਣ ਗਿਆ ਹੈ।