ਪੈਟਰੋਲ ਪੰਪਾਂ ਤੋਂ ਡੀਜ਼ਲ-ਪੈਟਰੋਲ ਖਰੀਦਣ ਦੇ ਨਿਯਮਾਂ 'ਚ ਵੱਡੀ ਤਬਦੀਲੀ, ਕੇਂਦਰ ਸਰਕਾਰ ਨੇ ਇਸ ਕਾਰਨ ਲਿਆ ਵੱਡਾ ਫ਼ੈਸਲਾ

ਡਿਜੀਟਲ ਡੈਸਕ, ਨਵੀਂ ਦਿੱਲੀ: ਦੇਸ਼ ਦੇ ਕੁਝ ਹਿੱਸਿਆਂ ਵਿੱਚ ਡੀਜ਼ਲ ਦੀ ਮੰਗ ਵਿੱਚ ਅਚਾਨਕ ਆਈ ਅਸਧਾਰਨ ਤੇਜ਼ੀ ਨੂੰ ਦੇਖਦੇ ਹੋਏ ਸਰਕਾਰ ਨੇ ਇੱਕ ਵੱਡਾ ਕਦਮ ਚੁੱਕਿਆ ਹੈ। ਸਰਕਾਰ ਨੇ ਇੱਕ ਅਧਿਕਾਰਤ ਹੁਕਮ ਜਾਰੀ ਕਰਕੇ ਇੰਡਸਟ੍ਰੀਅਲ , ਕਮਰਸ਼ੀਅਲ ਅਤੇ ਇੰਸਟੀਚਿਊਸ਼ਨਲ ਵਰਤੋਂਕਾਰਾਂ ਦੇ ਪੈਟਰੋਲ ਪੰਪਾਂ ਤੋਂ ਪੈਟਰੋਲ ਅਤੇ ਡੀਜ਼ਲ ਖਰੀਦਣ ’ਤੇ ਤੁਰੰਤ ਪ੍ਰਭਾਵ ਨਾਲ ਰੋਕ ਲਗਾ ਦਿੱਤੀ ਹੈ।

ਹੁਣ ਇਨ੍ਹਾਂ ਵੱਡੇ ਖਪਤਕਾਰਾਂ ਨੂੰ ਆਪਣੀ ਲੋੜ ਦਾ ਤੇਲ ਸਿਰਫ਼ 'ਬਲਕ ਸੇਲ ਪੁਆਇੰਟਸ' ਤੋਂ ਹੀ ਖਰੀਦਣਾ ਪਵੇਗਾ।

ਸਰਕਾਰ ਨੇ ਕਿਉਂ ਲਿਆ ਇਹ ਫ਼ੈਸਲਾ?

ਦਰਅਸਲ, ਪੱਛਮੀ ਏਸ਼ੀਆ ਸੰਕਟ ਤੋਂ ਬਾਅਦ ਲਾਗਤ ਵਧਣ ਦੇ ਬਾਵਜੂਦ ਆਮ ਜਨਤਾ ਨੂੰ ਰਾਹਤ ਦੇਣ ਲਈ ਰਿਟੇਲ ਕੀਮਤਾਂ ਨਹੀਂ ਵਧਾਈਆਂ ਗਈਆਂ, ਜਿਸ ਨਾਲ ਦਿੱਲੀ ਵਿੱਚ ਰਿਟੇਲ ਡੀਜ਼ਲ (95.20 ਰੁਪਏ ਪ੍ਰਤੀ ਲੀਟਰ) ਅਤੇ ਬਲਕ ਡੀਜ਼ਲ (134.50 ਰੁਪਏ ਪ੍ਰਤੀ ਲੀਟਰ) ਦੇ ਵਿਚਕਾਰ 39 ਰੁਪਏ ਤੋਂ ਵੱਧ ਦਾ ਵੱਡਾ ਫਰਕ ਆ ਗਿਆ। ਇਸੇ ਕਾਰਨ ਟੈਲੀਕਾਮ ਟਾਵਰ ਅਤੇ ਇੰਡਸਟਰੀਜ਼ ਵਰਗੇ ਬਲਕ ਵਰਤੋਂਕਾਰ ਨੁਕਸਾਨ ਤੋਂ ਬਚਣ ਲਈ ਰਿਟੇਲ ਪੈਟਰੋਲ ਪੰਪਾਂ ਤੋਂ ਖਰੀਦਦਾਰੀ ਕਰਨ ਲੱਗ ਪਏ ਸਨ।

ਸਰਕਾਰੀ ਹੁਕਮਾਂ ਅਨੁਸਾਰ, ਸਰਕਾਰ ਨੇ ਇੰਡਸਟ੍ਰੀਅਲ, ਕਮਰਸ਼ੀਅਲ ਅਤੇ ਇੰਸਟੀਚਿਊਸ਼ਨਲ ਵਰਤੋਂਕਾਰਾਂ ਲਈ ਪੈਟਰੋਲ ਪੰਪਾਂ ਤੋਂ ਪੈਟਰੋਲ ਅਤੇ ਡੀਜ਼ਲ ਖਰੀਦਣ ’ਤੇ ਰੋਕ ਅਗਲੇ 90 ਦਿਨਾਂ ਤੱਕ ਲਈ ਲਗਾਈ ਹੈ। ਸਰਕਾਰ ਨੇ ਅਧਿਕਾਰਤ ਹੁਕਮ ਜਾਰੀ ਕਰਕੇ ਇਨ੍ਹਾਂ ਵੱਡੇ ਖਪਤਕਾਰਾਂ ਨੂੰ ਪੈਟਰੋਲ ਪੰਪਾਂ ਦੀ ਬਜਾਏ ਸਿੱਧੇ ਬਲਕ ਸੇਲ ਪੁਆਇੰਟਸ ਤੋਂ ਡੀਜ਼ਲ ਦੀ ਖਰੀਦਦਾਰੀ ਕਰਨ ਦੇ ਨਿਰਦੇਸ਼ ਦਿੱਤੇ ਹਨ।

ਦੱਸ ਦੇਈਏ ਕਿ ਮੱਧ ਪੂਰਬ ਵਿੱਚ ਜਾਰੀ ਤਣਾਅ ਕਾਰਨ ਤੇਲ ਦੀਆਂ ਕੀਮਤਾਂ ਵਿੱਚ ਅਚਾਨਕ ਵਾਧਾ ਹੋਇਆ। ਆਮ ਖਪਤਕਾਰਾਂ ਨੂੰ ਬਚਾਉਣ ਲਈ ਸਰਕਾਰੀ ਤੇਲ ਕੰਪਨੀਆਂ ਵੱਲੋਂ ਖੁਦਰਾ ਕੀਮਤਾਂ ਨੂੰ ਬਹੁਤ ਜ਼ਿਆਦਾ ਨਹੀਂ ਵਧਾਇਆ ਗਿਆ, ਜਿਸ ਕਾਰਨ ਇੰਡਸਟ੍ਰੀਅਲ, ਕਮਰਸ਼ੀਅਲ ਅਤੇ ਇੰਸਟੀਚਿਊਸ਼ਨਲ ਵਰਤੋਂਕਾਰ ਵੀ ਇੱਥੋਂ ਹੀ ਪੈਟਰੋਲ-ਡੀਜ਼ਲ ਲੈਣ ਲੱਗ ਪਏ, ਕਿਉਂਕਿ ਇਨ੍ਹਾਂ ਵੱਡੇ ਖਪਤਕਾਰਾਂ ਨੂੰ ਬਲਕ ਸੇਲ ਪੁਆਇੰਟਸ ਤੋਂ ਤੇਲ ਖਰੀਦਣਾ ਮਹਿੰਗਾ ਪੈ ਰਿਹਾ ਸੀ।

ਨੋਟੀਫਿਕੇਸ਼ਨ ਵਿੱਚ ਕਿਹਾ ਗਿਆ ਹੈ, "ਮੌਜੂਦਾ ਸਥਿਤੀ ਵਿੱਚ ਇਹ ਦੇਖਿਆ ਗਿਆ ਹੈ ਕਿ ਦੇਸ਼ ਦੇ ਕੁਝ ਹਿੱਸਿਆਂ ਵਿੱਚ ਖੁਦਰਾ ਦੁਕਾਨਾਂ ਰਾਹੀਂ ਮੋਟਰ ਸਪਿਰਿਟ (ਪੈਟਰੋਲ) ਅਤੇ ਹਾਈ ਸਪੀਡ ਡੀਜ਼ਲ (ਡੀਜ਼ਲ) ਦੀ ਵਿਕਰੀ ਵਿੱਚ ਅਸਧਾਰਨ ਵਾਧਾ ਹੋ ਰਿਹਾ ਹੈ, ਜਿਸਦਾ ਕਾਰਨ ਖੁਦਰਾ ਅਤੇ ਥੋਕ ਵਿਕਰੀ ਕੀਮਤਾਂ ਵਿੱਚ ਫਰਕ ਕਾਰਨ ਉਦਯੋਗਿਕ, ਵਪਾਰਕ ਅਤੇ ਸੰਸਥਾਗਤ ਖਪਤਕਾਰਾਂ ਦਾ ਖੁਦਰਾ ਦੁਕਾਨਾਂ ਵੱਲ ਰੁਖ਼ ਕਰਨਾ ਹੈ।"

ਇਸ ਨੋਟੀਫਿਕੇਸ਼ਨ ਵਿੱਚ ਖੁਦਰਾ ਦੁਕਾਨਾਂ 'ਤੇ ਡੀਜ਼ਲ ਦੀ ਵਿਕਰੀ ਨੂੰ ਵਾਹਨਾਂ ਦੇ ਬਾਲਣ ਟੈਂਕਾਂ ਜਾਂ ਪੈਟਰੋਲੀਅਮ ਅਤੇ ਵਿਸਫੋਟਕ ਸੁਰੱਖਿਆ ਸੰਗਠਨ (PESO) ਦੁਆਰਾ ਪ੍ਰਵਾਨਿਤ ਕੰਟੇਨਰਾਂ ਤੱਕ ਸੀਮਤ ਕਰ ਦਿੱਤਾ ਗਿਆ ਹੈ, ਅਤੇ ਪ੍ਰਤੀ ਗਾਹਕ ਜਾਂ ਵਾਹਨ ਪ੍ਰਤੀ ਦਿਨ ਖਰੀਦ ਦੀ ਸੀਮਾ 200 ਲੀਟਰ ਤੈਅ ਕੀਤੀ ਗਈ ਹੈ। ਹੁਕਮਾਂ ਵਿੱਚ ਕਿਹਾ ਗਿਆ ਹੈ ਕਿ ਅਜਿਹੇ ਡੀਜ਼ਲ ਨੂੰ ਅੱਗੇ ਵੇਚਿਆ ਨਹੀਂ ਜਾ ਸਕਦਾ। (ਸਮਾਚਾਰ ਏਜੰਸੀ ਦੇ ਇਨਪੁਟ ਦੇ ਨਾਲ)