ਅੱਜ ਤੋਂ ਬਦਲਣਗੇ 7 ਨਿਯਮ, GST ਤੋਂ ਪੈਨਸ਼ਨ ਤੇ ਬਿੱਲਾਂ ਦੇ ਭੁਗਤਾਨ ਤੱਕ ਹੋਵੇਗਾ ਅਸਰ; ਜਾਣੋ ਕੀ ਹੋਇਆ ਸਸਤਾ ਤੇ ਮਹਿੰਗਾ?

ਡਿਜੀਟਲ ਡੈਸਕ, ਨਵੀਂ ਦਿੱਲੀ: ਅਕਤੂਬਰ ਦੀ ਸ਼ੁਰੂਆਤ ਵਿੱਚ ਜੀਐੱਸਟੀ ਕੌਂਸਲ ਨੇ ਕਾਰੋਬਾਰੀ ਰਜਿਸਟ੍ਰੇਸ਼ਨ ਤੋਂ ਲੈ ਕੇ ਟੈਕਸਦਾਤਾਵਾਂ ਨੂੰ ਨੋਟਿਸ ਭੇਜਣ ਨਾਲ ਜੁੜੇ ਨਿਯਮਾਂ ਵਿੱਚ ਬਦਲਾਅ ਕੀਤੇ ਸਨ। ਇਹ ਬਦਲਾਅ ਅੱਜ ਯਾਨੀ 1 ਨਵੰਬਰ ਤੋਂ ਲਾਗੂ ਹੋਣ ਜਾ ਰਹੇ ਹਨ।

ਇਸ ਤੋਂ ਇਲਾਵਾ ਆਮ ਲੋਕਾਂ ਦੀ ਜ਼ਿੰਦਗੀ 'ਤੇ ਅਸਰ ਪਾਉਣ ਵਾਲੇ ਕਈ ਵਿੱਤੀ ਅਤੇ ਗੈਰ-ਵਿੱਤੀ ਬਦਲਾਅ ਵੀ ਅੱਜ ਤੋਂ ਲਾਗੂ ਹੋਣਗੇ। ਆਓ ਜਾਣਦੇ ਹਾਂ ਕਿ ਕਿਹੜੇ-ਕਿਹੜੇ ਨਿਯਮ ਬਦਲਣ ਜਾ ਰਹੇ ਹਨ।

ਕੰਮ ਵਾਲੀ ਥਾਂ ਦੇ ਪਤੇ 'ਤੇ ਹੋ ਸਕੇਗੀ ਜੀਐੱਸਟੀ ਰਜਿਸਟ੍ਰੇਸ਼ਨ

ਅੱਜ ਤੋਂ ਕਾਰੋਬਾਰੀ ਕੋ-ਵਰਕਿੰਗ ਪਲੇਸ ਦੇ ਪਤੇ 'ਤੇ ਜੀਐੱਸਟੀ ਰਜਿਸਟ੍ਰੇਸ਼ਨ ਕਰਵਾ ਸਕਣਗੇ। ਇਸ ਲਈ ਕਾਰੋਬਾਰੀ ਨੂੰ ਕੋ-ਵਰਕਿੰਗ ਪਲੇਸ ਦੀ ਮੈਂਬਰਸ਼ਿਪ ਦੀ ਕਾਪੀ ਅਪਲੋਡ ਕਰਨੀ ਪਵੇਗੀ, ਜਿਸ ਵਿੱਚ ਪਤਾ ਸਪੱਸ਼ਟ ਹੋਣਾ ਚਾਹੀਦਾ ਹੈ। ਇਸ ਦੇ ਨਾਲ ਹੀ ਆਧਾਰ ਨੰਬਰ ਦੇ ਆਧਾਰ 'ਤੇ ਰਜਿਸਟ੍ਰੇਸ਼ਨ ਕਰਵਾਉਣ ਦੀ ਸਥਿਤੀ ਵਿੱਚ ਅਧਿਕਾਰੀ ਪਤੇ ਦੀ ਜਾਂਚ ਕਰਨ ਲਈ ਉੱਥੇ ਨਹੀਂ ਜਾਵੇਗਾ।

ਧੋਖਾਧੜੀ ਜਾਂ ਕਿਸੇ ਹੋਰ ਗੰਭੀਰ ਗੜਬੜ ਦਾ ਸ਼ੱਕ ਹੋਣ 'ਤੇ ਹੀ ਪਤੇ ਦੀ ਜਾਂਚ ਕੀਤੀ ਜਾਵੇਗੀ। ਪਤੇ ਦੀ ਪੁਸ਼ਟੀ ਲਈ ਬਿਜਲੀ ਬਿੱਲ, ਹਾਊਸ ਟੈਕਸ ਵਰਗੇ ਦਸਤਾਵੇਜ਼ ਵੀ ਨਾਲ ਲਗਾਉਣੇ ਪੈਣਗੇ। ਇਸ ਤੋਂ ਇਲਾਵਾ ਅਪੀਲ ਲਈ ਫੀਸ ਜਮ੍ਹਾਂ ਕਰਵਾਉਣ, ਨੋਟਿਸ ਦੇ ਕਾਰਨਾਂ ਨੂੰ ਸਪੱਸ਼ਟ ਕਰਨ ਅਤੇ ਰਿਫੰਡ ਦੀ ਪ੍ਰਕਿਰਿਆ ਆਸਾਨ ਬਣਾਉਣ ਵਰਗੇ ਨਿਯਮ ਵੀ ਅੱਜ ਤੋਂ ਲਾਗੂ ਹੋ ਜਾਣਗੇ।

ਕਾਲ ਕਰਨ ਵਾਲੇ ਦਾ ਨਾਂ ਦਿਖਾਈ ਦੇਵੇਗਾ

ਅੱਜ ਤੋਂ ਸਾਰੀਆਂ ਦੂਰਸੰਚਾਰ ਕੰਪਨੀਆਂ ਨੂੰ ਕਾਲਿੰਗ ਨੇਮ ਪ੍ਰੈਜ਼ੈਂਟੇਸ਼ਨ (CNAP) ਸੇਵਾ ਲਾਗੂ ਕਰਨੀ ਹੋਵੇਗੀ। ਇਸ ਸੇਵਾ ਦੇ ਸ਼ੁਰੂ ਹੋਣ ਨਾਲ ਕਾਲ ਕਰਨ ਵਾਲੇ ਦਾ ਨਾਂ ਵੀ ਮੋਬਾਈਲ ਸਕ੍ਰੀਨ 'ਤੇ ਦਿਖਾਈ ਦੇਵੇਗਾ, ਭਾਵੇਂ ਉਸ ਦਾ ਨੰਬਰ ਫੋਨ ਵਿੱਚ ਸੇਵ ਹੋਵੇ ਜਾਂ ਨਾ ਹੋਵੇ। ਇਸ ਨਾਲ ਖਪਤਕਾਰਾਂ ਨੂੰ ਅਣਚਾਹੀਆਂ ਫੋਨ ਕਾਲਾਂ ਤੋਂ ਰਾਹਤ ਮਿਲੇਗੀ।

ਫਿਲਹਾਲ ਇਹ ਸਹੂਲਤ ਸਿਰਫ਼ 4ਜੀ ਅਤੇ 5ਜੀ ਕਨੈਕਸ਼ਨ ਵਾਲੇ ਫੋਨਾਂ 'ਤੇ ਹੀ ਮਿਲੇਗੀ। ਬਾਅਦ ਵਿੱਚ 2ਜੀ ਅਤੇ 3ਜੀ ਕਨੈਕਸ਼ਨ ਵਾਲੇ ਫੋਨਾਂ 'ਤੇ ਵੀ ਇਹ ਸਹੂਲਤ ਦਿੱਤੀ ਜਾ ਸਕਦੀ ਹੈ। ਮੋਬਾਈਲ ਦੀ ਸਕ੍ਰੀਨ 'ਤੇ ਕਾਲ ਕਰਨ ਵਾਲੇ ਦਾ ਉਹੀ ਨਾਂ ਦਿਖਾਈ ਦੇਵੇਗਾ, ਜਿਸ ਨਾਂ 'ਤੇ ਉਸ ਨੇ ਕੁਨੈਕਸ਼ਨ ਲਿਆ ਹੋਵੇਗਾ।

ਪੈਨਸ਼ਨਰਾਂ ਨੂੰ ਜਮ੍ਹਾਂ ਕਰਵਾਉਣਾ ਪਵੇਗਾ ਜੀਵਨ ਪ੍ਰਮਾਣ ਪੱਤਰ

80 ਸਾਲ ਤੋਂ ਘੱਟ ਉਮਰ ਦੇ ਸਰਕਾਰੀ ਪੈਨਸ਼ਨਰ 1 ਤੋਂ 30 ਨਵੰਬਰ ਦੇ ਵਿਚਕਾਰ ਆਪਣਾ ਸਾਲਾਨਾ ਜੀਵਨ ਪ੍ਰਮਾਣ ਪੱਤਰ ਜਮ੍ਹਾਂ ਕਰਵਾ ਸਕਦੇ ਹਨ। 80 ਸਾਲ ਜਾਂ ਇਸ ਤੋਂ ਵੱਧ ਉਮਰ ਦੇ ਪੈਨਸ਼ਨਰਾਂ ਨੇ ਇਹ ਪ੍ਰਕਿਰਿਆ 1 ਅਕਤੂਬਰ ਤੋਂ ਹੀ ਸ਼ੁਰੂ ਕਰ ਦਿੱਤੀ ਹੈ।

ਪੈਨਸ਼ਨਰ ਇਹ ਪ੍ਰਮਾਣ ਪੱਤਰ ਪੈਨਸ਼ਨ ਦੇਣ ਵਾਲੀ ਬੈਂਕ ਸ਼ਾਖਾ ਵਿੱਚ ਜਾ ਕੇ ਖੁਦ ਜਮ੍ਹਾਂ ਕਰਵਾ ਸਕਦੇ ਹਨ। ਇਸ ਤੋਂ ਇਲਾਵਾ 'ਜੀਵਨ ਪ੍ਰਮਾਣ' ਸਹੂਲਤ ਰਾਹੀਂ ਆਧਾਰ ਆਧਾਰਿਤ ਤਸਦੀਕ ਅਤੇ ਚਿਹਰੇ ਦੀ ਪਛਾਣ ਕਰਨ ਵਾਲੀ ਤਕਨੀਕ ਦੀ ਵਰਤੋਂ ਕਰਕੇ ਡਿਜੀਟਲ ਤਰੀਕੇ ਨਾਲ ਵੀ ਜਮ੍ਹਾਂ ਕਰਵਾਇਆ ਜਾ ਸਕਦਾ ਹੈ।

ਯੂਟਿਲਿਟੀ ਬਿੱਲਾਂ ਦੇ ਭੁਗਤਾਨ 'ਤੇ ਪੀਐੱਨਬੀ ਲਵੇਗਾ ਫੀਸ

ਜਨਤਕ ਖੇਤਰ ਦੇ ਪੰਜਾਬ ਨੈਸ਼ਨਲ ਬੈਂਕ (PNB) ਨੇ ਅੱਜ ਤੋਂ ਕ੍ਰੈਡਿਟ ਕਾਰਡ ਰਾਹੀਂ 50 ਹਜ਼ਾਰ ਰੁਪਏ ਤੋਂ ਵੱਧ ਦੇ ਯੂਟਿਲਿਟੀ ਬਿੱਲਾਂ ਦਾ ਭੁਗਤਾਨ ਕਰਨ 'ਤੇ 1 ਫ਼ੀਸਦੀ ਚਾਰਜ ਲਾਗੂ ਕੀਤਾ ਹੈ। ਹਾਲਾਂਕਿ, ਇਹ ਫੀਸ ਪ੍ਰਤੀ ਲੈਣ-ਦੇਣ ਵੱਧ ਤੋਂ ਵੱਧ 2,000 ਰੁਪਏ ਤੱਕ ਹੋਵੇਗੀ।

ਪਹਿਲਾਂ ਪੀਐੱਨਬੀ ਕ੍ਰੈਡਿਟ ਕਾਰਡ ਰਾਹੀਂ ਯੂਟਿਲਿਟੀ ਬਿੱਲ ਜਮ੍ਹਾਂ ਕਰਵਾਉਣ 'ਤੇ ਕੋਈ ਫੀਸ ਨਹੀਂ ਲੈਂਦਾ ਸੀ। ਬਿਜਲੀ, ਟੈਲੀਫੋਨ, ਇੰਟਰਨੈੱਟ ਅਤੇ ਪਾਣੀ ਵਰਗੇ ਬਿੱਲਾਂ ਨੂੰ ਯੂਟਿਲਿਟੀ ਬਿੱਲ ਕਿਹਾ ਜਾਂਦਾ ਹੈ।

ਮਿਊਚਲ ਫੰਡ ਵਿੱਚ ਡਾਇਰੈਕਟ ਪਲਾਨ ਹੋਵੇਗਾ ਡਿਫਾਲਟ ਬਦਲ

ਅੱਜ ਤੋਂ ਐਸੇਟ ਮੈਨੇਜਮੈਂਟ ਕੰਪਨੀਆਂ (AMC) ਦੇ ਡਿਜੀਟਲ ਪਲੇਟਫਾਰਮਾਂ 'ਤੇ ਮਿਊਚਲ ਫੰਡ ਦਾ ਡਾਇਰੈਕਟ ਪਲਾਨ ਡਿਫਾਲਟ ਬਦਲ ਹੋਵੇਗਾ।

ਸੇਬੀ ਦੇ ਚੇਅਰਮੈਨ ਤੁਹਿਨ ਕਾਂਤ ਪਾਂਡੇ ਅਨੁਸਾਰ, ਜੇਕਰ ਕੋਈ ਨਿਵੇਸ਼ਕ ਰੈਗੂਲਰ ਪਲਾਨ ਚੁਣਦਾ ਹੈ ਤਾਂ ਉਸ ਨੂੰ ਪਹਿਲਾਂ ਇਸ ਦੇ ਵੱਧ ਖਰਚ ਅਨੁਪਾਤ (ਐਕਸਪੈਂਸ ਰੇਸ਼ੋ) ਬਾਰੇ ਜਾਣਕਾਰੀ ਦਿੱਤੀ ਜਾਵੇਗੀ। ਇਸ ਦਾ ਮਤਲਬ ਹੈ ਕਿ ਹੁਣ ਆਨਲਾਈਨ ਨਿਵੇਸ਼ ਕਰਦੇ ਸਮੇਂ ਨਿਵੇਸ਼ਕਾਂ ਨੂੰ ਡਾਇਰੈਕਟ ਅਤੇ ਰੈਗੂਲਰ ਪਲਾਨ ਦੇ ਖਰਚਿਆਂ ਵਿਚਲੇ ਫ਼ਰਕ ਨੂੰ ਸਮਝਣ ਦਾ ਮੌਕਾ ਮਿਲੇਗਾ।

ਸਾਵਰੇਨ ਗੋਲਡ ਬਾਂਡ ਤੋਂ ਪੈਸੇ ਕਢਵਾਉਣ ਦਾ ਮੌਕਾ

ਨਵੰਬਰ ਮਹੀਨੇ ਵਿੱਚ ਸਾਵਰੇਨ ਗੋਲਡ ਬਾਂਡ ਵਿੱਚ ਨਿਵੇਸ਼ ਕਰਨ ਵਾਲਿਆਂ ਨੂੰ ਚਾਰ ਸੀਰੀਜ਼ ਦੇ ਬਾਂਡਾਂ ਵਿੱਚ ਸਮੇਂ ਤੋਂ ਪਹਿਲਾਂ ਪੈਸੇ ਕਢਵਾਉਣ ਦਾ ਮੌਕਾ ਮਿਲੇਗਾ।

ਇਨ੍ਹਾਂ ਵਿੱਚ 2020-21 ਸੀਰੀਜ਼-7 ਦੀ ਰਿਡੈਂਪਸ਼ਨ (ਨਿਕਾਸੀ) ਮਿਤੀ 2 ਨਵੰਬਰ, 2020-21 ਸੀਰੀਜ਼-8 ਦੀ 18 ਨਵੰਬਰ ਅਤੇ 2020-21 ਸੀਰੀਜ਼-2 ਦੀ 19 ਨਵੰਬਰ ਤੈਅ ਕੀਤੀ ਗਈ ਹੈ। ਇਸੇ ਤਰ੍ਹਾਂ 2021-22 ਸੀਰੀਜ਼-1 ਦੇ ਨਿਵੇਸ਼ਕ 25 ਨਵੰਬਰ ਨੂੰ ਸਮੇਂ ਤੋਂ ਪਹਿਲਾਂ ਪੈਸੇ ਕਢਵਾ ਸਕਣਗੇ।

9 ਨਵੰਬਰ ਤੋਂ ਕੈਂਸਰ ਦੀਆਂ 137 ਦਵਾਈਆਂ ਹੋਣਗੀਆਂ ਸਸਤੀਆਂ

ਹਾਲ ਹੀ ਵਿੱਚ ਸਰਕਾਰ ਨੇ 137 ਗੈਰ-ਅਨੁਸੂਚਿਤ ਕੈਂਸਰ ਵਿਰੋਧੀ ਦਵਾਈਆਂ 'ਤੇ ਵਪਾਰਕ ਮੁਨਾਫ਼ੇ ਦੀ ਵੱਧ ਤੋਂ ਵੱਧ ਸੀਮਾ 30 ਫ਼ੀਸਦੀ ਤੈਅ ਕਰ ਦਿੱਤੀ ਹੈ। ਰਾਸ਼ਟਰੀ ਔਸ਼ਧੀ ਮੁੱਲ ਨਿਰਧਾਰਨ ਅਥਾਰਟੀ (NPPA) ਦੇ ਇਸ ਫ਼ੈਸਲੇ ਨਾਲ ਮੌਜੂਦਾ ਕੀਮਤਾਂ ਦੇ ਆਧਾਰ 'ਤੇ ਦਵਾਈਆਂ ਦੀਆਂ ਪ੍ਰਚੂਨ ਕੀਮਤਾਂ ਵਿੱਚ 70 ਫ਼ੀਸਦੀ ਤੱਕ ਕਮੀ ਆਉਣ ਦੀ ਉਮੀਦ ਹੈ।

ਨਵੀਆਂ ਕੀਮਤਾਂ 9 ਨਵੰਬਰ ਤੋਂ ਲਾਗੂ ਹੋ ਜਾਣਗੀਆਂ। ਮਰੀਜ਼ ਐੱਨਪੀਪੀਏ ਦੀ ਵੈੱਬਸਾਈਟ ਅਤੇ 'ਫਾਰਮਾ ਸਹੀ ਦਾਮ' ਮੋਬਾਈਲ ਐਪ ਰਾਹੀਂ ਦਵਾਈਆਂ ਦੀਆਂ ਨਵੀਆਂ ਕੀਮਤਾਂ ਦੇਖ ਸਕਣਗੇ।