- ਸ਼ਹਿਰ ਚੁਣੋ
- ਈ-ਪੇਪਰ
- ਵੈੱਬ ਸਟੋਰੀਜ਼
ਲੱਖਾਂ ਮੁਲਾਜ਼ਮਾਂ ਦੀ ਉੱਡੇਗੀ ਨੀਂਦ! 4 ਵੱਡੀਆਂ ਫੈਕਟਰੀਆਂ ਨੂੰ ਤਾਲਾ ਲਗਾਉਣ ਦੀ ਤਿਆਰੀ, ਅਗਲੇ ਮਹੀਨੇ ਮਨਜ਼ੂਰੀ ਮਗਰੋਂ ਹੋਵੇਗਾ ਐਕਸ਼ਨ
ਹਾਲ ਹੀ ਦੇ ਮਹੀਨਿਆਂ 'ਚ IT ਸੈਕਟਰ 'ਚ ਵੱਡੇ ਪੱਧਰ 'ਤੇ ਛਾਂਟੀ ਹੋਈ ਹੈ ਅਤੇ ਹੁਣ ਇਸ ਦਾ ਕਹਿਰ ਆਟੋ ਸੈਕਟਰ 'ਤੇ ਦੇਖਣ ਨੂੰ ਮਿਲ ਸਕਦਾ ਹੈ। ਦਰਅਸਲ, 'ਮੈਨੇਜਰ ਮੈਗਜ਼ੀਨ' ਦੀ ਰਿਪੋਰਟ ਮੁਤਾਬਕ, ਯੂਰਪ ਦੀ ਸਭ ਤੋਂ ਵੱਡੀ ਕਾਰ ਨਿਰਮਾਤਾ ਕੰਪਨੀ ਵੋਲਕਸਵੈਗਨ ਦੇ ਸੀ.ਈ.ਓ. ਓਲੀਵਰ ਬਲੂਮ ਕੰਪਨੀ ਨੂੰ ਹੋਰ ਜ਼ਿਆਦਾ ਮੁਕਾਬਲੇਬਾਜ਼ ਬਣਾਉਣ ਦੀ ਕੋਸ਼ਿਸ਼ 'ਚ ਹਜ਼ਾਰਾਂ ਹੋਰ ਨੌਕਰੀਆਂ ਖ਼ਤਮ ਕਰਨ ਅਤੇ ਕੁਝ ਫੈਕਟਰੀਆਂ ਬੰਦ ਕਰਨ 'ਤੇ ਵਿਚਾਰ ਕਰ ਰਹੇ ਹਨ।
Posted By Sunita
Publish Date: Fri, 26 Jun 2026 03:44 PM (IST)
Updated Date: Fri, 26 Jun 2026 03:47 PM (IST)
ਨਵੀਂ ਦਿੱਲੀ : ਹਾਲ ਹੀ ਦੇ ਮਹੀਨਿਆਂ 'ਚ IT ਸੈਕਟਰ 'ਚ ਵੱਡੇ ਪੱਧਰ 'ਤੇ ਛਾਂਟੀ ਹੋਈ ਹੈ ਅਤੇ ਹੁਣ ਇਸ ਦਾ ਕਹਿਰ ਆਟੋ ਸੈਕਟਰ 'ਤੇ ਦੇਖਣ ਨੂੰ ਮਿਲ ਸਕਦਾ ਹੈ। ਦਰਅਸਲ, 'ਮੈਨੇਜਰ ਮੈਗਜ਼ੀਨ' ਦੀ ਰਿਪੋਰਟ ਮੁਤਾਬਕ, ਯੂਰਪ ਦੀ ਸਭ ਤੋਂ ਵੱਡੀ ਕਾਰ ਨਿਰਮਾਤਾ ਕੰਪਨੀ ਵੋਲਕਸਵੈਗਨ ਦੇ ਸੀ.ਈ.ਓ. ਓਲੀਵਰ ਬਲੂਮ ਕੰਪਨੀ ਨੂੰ ਹੋਰ ਜ਼ਿਆਦਾ ਮੁਕਾਬਲੇਬਾਜ਼ ਬਣਾਉਣ ਦੀ ਕੋਸ਼ਿਸ਼ 'ਚ ਹਜ਼ਾਰਾਂ ਹੋਰ ਨੌਕਰੀਆਂ ਖ਼ਤਮ ਕਰਨ ਅਤੇ ਕੁਝ ਫੈਕਟਰੀਆਂ ਬੰਦ ਕਰਨ 'ਤੇ ਵਿਚਾਰ ਕਰ ਰਹੇ ਹਨ।
'ਮੈਨੇਜਰ ਮੈਗਜ਼ੀਨ' ਨੇ ਸ਼ੁੱਕਰਵਾਰ ਨੂੰ ਮਾਮਲੇ ਦੀ ਜਾਣਕਾਰੀ ਰੱਖਣ ਵਾਲੇ ਲੋਕਾਂ ਦੇ ਹਵਾਲੇ ਨਾਲ ਦੱਸਿਆ ਕਿ ਇਸ ਹਫ਼ਤੇ ਦੀ ਸ਼ੁਰੂਆਤ 'ਚ ਮੈਨੇਜਮੈਂਟ ਬੋਰਡ ਦੀ ਮੀਟਿੰਗ 'ਚ ਸੀ.ਈ.ਓ. ਵੱਲੋਂ ਪੇਸ਼ ਕੀਤੀਆਂ ਗਈਆਂ ਯੋਜਨਾਵਾਂ 'ਚ ਕਰਮਚਾਰੀਆਂ ਦੀ ਕਟੌਤੀ ਨੂੰ ਦੁੱਗਣਾ ਕਰਕੇ 1,00,000 ਤੱਕ ਕਰਨਾ ਸ਼ਾਮਲ ਹੈ। ਪੋਰਸ਼ (Porsche) ਅਤੇ ਆਡੀ (Audi) ਦੀ ਮਾਲਕ ਇਸ ਕੰਪਨੀ 'ਚ ਹਾਲੇ ਲਗਭਗ 6,57,000 ਲੋਕ ਕੰਮ ਕਰਦੇ ਹਨ।
ਸੁਪਰਵਾਈਜ਼ਰੀ ਬੋਰਡ ਦੀ ਮਨਜ਼ੂਰੀ ਦਾ ਇੰਤਜ਼ਾਰ
ਬਲੂਮ ਦੀ ਪੁਨਰਗਠਨ ਦੀ ਇਸ ਨਵੀਂ ਕੋਸ਼ਿਸ਼ ਨੂੰ ਚਰਚਾ ਲਈ ਅਗਲੇ ਮਹੀਨੇ ਸੁਪਰਵਾਈਜ਼ਰੀ ਬੋਰਡ ਦੇ ਸਾਹਮਣੇ ਪੇਸ਼ ਕੀਤਾ ਜਾਵੇਗਾ। ਵੋਲਕਸਵੈਗਨ (VW) ਦੀਆਂ ਯੋਜਨਾਵਾਂ 'ਚ ਅਕਸਰ ਬਦਲਾਅ ਕਰਨਾ ਪੈਂਦਾ ਹੈ ਕਿਉਂਕਿ ਇਸ ਬੋਰਡ 'ਚ ਅੱਧੇ ਮੈਂਬਰ ਲੇਬਰ ਰਿਪ੍ਰੈਜ਼ੈਂਟੇਟਿਵ ਹੁੰਦੇ ਹਨ।
ਮੈਗਜ਼ੀਨ ਅਨੁਸਾਰ, ਉਨ੍ਹਾਂ ਦੀ ਰਣਨੀਤੀ 'ਚ ਇਸ ਦਹਾਕੇ ਦੇ ਅੰਤ ਤੱਕ ਆਮ ਓਵਰਹੈੱਡ ਲਾਗਤ ਨੂੰ €11 ਬਿਲੀਅਨ ($12.5 ਬਿਲੀਅਨ) ਤੱਕ ਘਟਾਉਣਾ ਅਤੇ ਨਾਲ ਹੀ ਮੱਧ ਮਿਆਦ 'ਚ ਜਰਮਨੀ 'ਚ ਚਾਰ ਫੈਕਟਰੀਆਂ ਨੂੰ ਬੰਦ ਕਰਨਾ ਵੀ ਸ਼ਾਮਲ ਹੈ। ਇਨ੍ਹਾਂ 'ਚ ਨੇਕਰਸਲਮ 'ਚ ਆਡੀ ਦਾ ਇੱਕ ਪਲਾਂਟ ਅਤੇ ਹਨੋਵਰ, ਜ਼ਵਿਕਾਊ ਤੇ ਐਮਡੇਨ 'ਚ ਵੋਲਕਸਵੈਗਨ ਦੇ ਪਲਾਂਟ ਸ਼ਾਮਲ ਹਨ।
ਰਿਪੋਰਟ 'ਚ ਕਿਹਾ ਗਿਆ ਹੈ ਕਿ ਬਲੂਮ ਗਰੁੱਪ ਨੂੰ ਹੋਰ ਕੁਸ਼ਲ ਬਣਾਉਣ ਲਈ ਕੰਪੋਨੈਂਟ ਪਲਾਂਟ ਅਤੇ ਸਭ ਤੋਂ ਮਹੱਤਵਪੂਰਨ, ਵੋਲਕਸਵੈਗਨ ਬ੍ਰਾਂਡ ਨੂੰ ਵੱਖ ਕਰਨ 'ਤੇ ਵੀ ਵਿਚਾਰ ਕਰ ਰਹੇ ਹਨ। ਇਸ ਬ੍ਰਾਂਡ ਨੂੰ ਲੰਮੇ ਸਮੇਂ ਤੋਂ ਘੱਟ ਮੁਨਾਫ਼ੇ ਦੀ ਸਮੱਸਿਆ ਦਾ ਸਾਹਮਣਾ ਕਰਨਾ ਪੈ ਰਿਹਾ ਹੈ।
ਵੋਲਕਸਵੈਗਨ ਦੇ ਇੱਕ ਬੁਲਾਰੇ ਨੇ ਕਿਹਾ ਕਿ ਕੰਪਨੀ ਨੂੰ "ਵੱਡੇ ਬਦਲਾਵਾਂ 'ਚੋਂ ਗੁਜ਼ਰਨਾ ਪਵੇਗਾ।" ਉਨ੍ਹਾਂ ਨੇ 'ਮੈਨੇਜਰ ਮੈਗਜ਼ੀਨ' ਦੀ ਰਿਪੋਰਟ ਦੀਆਂ ਖ਼ਾਸ ਗੱਲਾਂ 'ਤੇ ਕੋਈ ਟਿੱਪਣੀ ਕਰਨ ਤੋਂ ਇਨਕਾਰ ਕਰ ਦਿੱਤਾ। ਕੰਪਨੀ ਦੇ ਐਗਜ਼ੀਕਿਊਟਿਵ ਬੋਰਡ ਨੇ ਪਿਛਲੇ ਕੁਝ ਮਹੀਨਿਆਂ ਤੋਂ ਕੰਪਨੀ ਨੂੰ ਨਵੀਂ ਦਿਸ਼ਾ ਦੇਣ ਲਈ ਭਵਿੱਖ ਨੂੰ ਧਿਆਨ 'ਚ ਰੱਖ ਕੇ ਇੱਕ ਯੋਜਨਾ ਬਣਾਉਣ 'ਤੇ ਜ਼ੋਰ-ਸ਼ੋਰ ਨਾਲ ਕੰਮ ਕੀਤਾ ਹੈ।
ਦੱਸ ਦੇਈਏ ਕਿ ਆਡੀ ਅਤੇ ਪੋਰਸ਼ ਵਰਗੀਆਂ ਲਗਜ਼ਰੀ ਕਾਰਾਂ ਦਾ ਨਿਰਮਾਣ ਵੋਲਕਸਵੈਗਨ ਗਰੁੱਪ (Volkswagen Group) ਹੀ ਕਰਦਾ ਹੈ। ਵੋਲਕਸਵੈਗਨ ਗਰੁੱਪ, ਜਰਮਨੀ ਦੀ ਇੱਕ ਬਹੁਤ ਵੱਡੀ ਬਹੁ-ਰਾਸ਼ਟਰੀ ਆਟੋਮੋਬਾਈਲ ਨਿਰਮਾਤਾ ਕੰਪਨੀ ਹੈ।