ਤਿਉਹਾਰੀ ਸੀਜ਼ਨ ’ਚ ਕਰਜ਼ੇ ’ਤੇ ਵਾਹਨ ਖ਼ਰੀਦਣ ਤੋਂ ਪਹਿਲਾਂ ਰੱਖੋ ਇਨ੍ਹਾਂ ਗੱਲਾਂ ਦਾ ਧਿਆਨ, RBI ਵੱਲੋਂ ਰੈਪੋ ਰੇਟ ਵਧਾਉਣ ਦਾ ਖ਼ਦਸ਼ਾ

ਨਵੀਂ ਦਿੱਲੀ: ਵੱਡੀ ਗਿਣਤੀ ਵਿੱਚ ਲੋਕ ਤਿਉਹਾਰੀ ਸੀਜ਼ਨ ਦੌਰਾਨ ਆਪਣਾ ਪਸੰਦੀਦਾ ਵਾਹਨ ਖ਼ਰੀਦਣ ਦੀ ਯੋਜਨਾ ਬਣਾਉਂਦੇ ਹਨ। ਇਸ ਦਾ ਮੁੱਖ ਕਾਰਨ ਇਹ ਹੈ ਕਿ ਤਿਉਹਾਰਾਂ ਦੇ ਦਿਨਾਂ ਵਿੱਚ ਵਾਹਨ ਕੰਪਨੀਆਂ, ਕਾਰ ਡੀਲਰਾਂ ਅਤੇ ਬੈਂਕਾਂ ਵੱਲੋਂ ਕਈ ਆਕਰਸ਼ਕ ਪੇਸ਼ਕਸ਼ਾਂ ਦਿੱਤੀਆਂ ਜਾਂਦੀਆਂ ਹਨ। ਇਸ ਦੌਰਾਨ ਬਹੁਤ ਸਾਰੇ ਲੋਕ ਕਰਜ਼ਾ ਲੈ ਕੇ ਵਾਹਨ ਖ਼ਰੀਦਦੇ ਹਨ। ਇੱਕ ਅਨੁਮਾਨ ਅਨੁਸਾਰ, ਪੂਰੇ ਸਾਲ ਦੌਰਾਨ ਹੋਣ ਵਾਲੀ ਵਾਹਨਾਂ ਦੀ ਕੁੱਲ ਵਿਕਰੀ ਵਿੱਚੋਂ 25 ਤੋਂ 30 ਫ਼ੀਸਦੀ ਵਿਕਰੀ ਤਿਉਹਾਰੀ ਸੀਜ਼ਨ ਦੌਰਾਨ ਹੁੰਦੀ ਹੈ।

ਜੇਕਰ ਤੁਸੀਂ ਵੀ ਇਸ ਤਿਉਹਾਰੀ ਸੀਜ਼ਨ ਵਿੱਚ ਕਰਜ਼ਾ ਲੈ ਕੇ ਵਾਹਨ ਖ਼ਰੀਦਣ ਦੀ ਯੋਜਨਾ ਬਣਾ ਰਹੇ ਹੋ, ਤਾਂ ਕੁਝ ਸਾਵਧਾਨੀਆਂ ਵਰਤਣੀਆਂ ਜ਼ਰੂਰੀ ਹਨ। ਇਸ ਨਾਲ ਭਵਿੱਖ ਵਿੱਚ ਤੁਹਾਨੂੰ ਵਿੱਤੀ ਰਾਹਤ ਮਿਲ ਸਕਦੀ ਹੈ।

ਪੜ੍ਹੋ ਮਨੋਜ ਕੁਮਾਰ ਦੀ ਰਿਪੋਰਟ

ਕਰਜ਼ੇ ਦੀ ਮਹੀਨਾਵਾਰ ਕਿਸ਼ਤ ਆਮਦਨ ਦੇ 40 ਫ਼ੀਸਦੀ ਤੋਂ ਵੱਧ ਨਾ ਹੋਵੇ

ਵਿੱਤੀ ਮਾਹਿਰਾਂ ਦਾ ਮੰਨਣਾ ਹੈ ਕਿ ਕਿਸੇ ਵੀ ਵਿਅਕਤੀ ਦੀਆਂ ਕੁੱਲ ਮਹੀਨਾਵਾਰ ਕਰਜ਼ੇ ਦੀਆਂ ਕਿਸ਼ਤਾਂ ਉਸ ਦੀ ਘਰ ਆਉਣ ਵਾਲੀ ਆਮਦਨ ਦੇ 40 ਫ਼ੀਸਦੀ ਤੋਂ ਵੱਧ ਨਹੀਂ ਹੋਣੀਆਂ ਚਾਹੀਦੀਆਂ। ਅਜਿਹੇ ਵਿੱਚ ਤਿਉਹਾਰੀ ਸੀਜ਼ਨ ਦੌਰਾਨ ਵਾਹਨ ਖ਼ਰੀਦਣ ਦੀ ਯੋਜਨਾ ਬਣਾਉਂਦੇ ਸਮੇਂ ਸਭ ਤੋਂ ਪਹਿਲਾਂ ਆਪਣੀ ਆਮਦਨ, ਰਹਿਣ-ਸਹਿਣ ਦੇ ਖ਼ਰਚਿਆਂ ਅਤੇ ਮੌਜੂਦਾ ਕਰਜ਼ਿਆਂ ਦਾ ਮੁਲਾਂਕਣ ਕਰਨਾ ਚਾਹੀਦਾ ਹੈ।

ਇਸ ਦੇ ਆਧਾਰ ’ਤੇ ਹੀ ਵਾਹਨ ਕਰਜ਼ੇ ਦੀ ਢੁੱਕਵੀਂ ਰਕਮ ਤੈਅ ਕਰੋ। ਜੇਕਰ ਕੁੱਲ ਮਹੀਨਾਵਾਰ ਕਿਸ਼ਤਾਂ ਆਮਦਨ ਦੇ 40 ਫ਼ੀਸਦੀ ਤੋਂ ਵੱਧ ਹੋ ਜਾਂਦੀਆਂ ਹਨ, ਤਾਂ ਘਰੇਲੂ ਖ਼ਰਚੇ ਚਲਾਉਣ ਵਿੱਚ ਮੁਸ਼ਕਲ ਆ ਸਕਦੀ ਹੈ। ਕਰਜ਼ੇ ਦੀ ਰਕਮ ਤੈਅ ਕਰਨ ਤੋਂ ਬਾਅਦ ਡਾਊਨ ਪੇਮੈਂਟ ਲਈ ਆਪਣੀ ਮੌਜੂਦਾ ਬੱਚਤ ਦਾ ਵੀ ਧਿਆਨ ਰੱਖੋ। ਡਾਊਨ ਪੇਮੈਂਟ ਉਹ ਰਕਮ ਹੁੰਦੀ ਹੈ, ਜੋ ਵਾਹਨ ਖ਼ਰੀਦਣ ਸਮੇਂ ਤੁਸੀਂ ਆਪਣੀ ਜੇਬ ਵਿੱਚੋਂ ਦਿੰਦੇ ਹੋ।

ਕਰਜ਼ੇ ਦੀ ਮਿਆਦ ਦਾ ਵੀ ਰੱਖੋ ਧਿਆਨ

ਆਮ ਤੌਰ ’ਤੇ ਵਾਹਨ ਕਰਜ਼ੇ ਦੀ ਮਿਆਦ ਪੰਜ ਸਾਲ ਹੁੰਦੀ ਹੈ, ਜਿਸ ਨੂੰ ਵਧਾ ਕੇ ਸੱਤ ਸਾਲ ਤੱਕ ਕੀਤਾ ਜਾ ਸਕਦਾ ਹੈ। ਲੰਮੀ ਮਿਆਦ ਦਾ ਕਰਜ਼ਾ ਲੈਣ ਨਾਲ ਮਹੀਨਾਵਾਰ ਕਿਸ਼ਤ ਘੱਟ ਹੋ ਜਾਂਦੀ ਹੈ, ਪਰ ਕੁੱਲ ਵਿਆਜ ਵੱਧ ਦੇਣਾ ਪੈਂਦਾ ਹੈ। ਇਸ ਦੇ ਉਲਟ, ਘੱਟ ਮਿਆਦ ਵਾਲੇ ਕਰਜ਼ੇ ਦੀ ਕਿਸ਼ਤ ਵੱਧ ਹੁੰਦੀ ਹੈ, ਪਰ ਕੁੱਲ ਵਿਆਜ ਘੱਟ ਦੇਣਾ ਪੈਂਦਾ ਹੈ।

ਇਸ ਲਈ ਆਪਣੀ ਆਮਦਨ ਦੇ ਹਿਸਾਬ ਨਾਲ ਕਰਜ਼ੇ ਦੀ ਮਿਆਦ ਚੁਣੋ, ਤਾਂ ਜੋ ਬਿਨਾਂ ਵਿੱਤੀ ਮੁਸ਼ਕਲ ਦੇ ਹਰ ਮਹੀਨੇ ਕਿਸ਼ਤ ਅਦਾ ਕਰ ਸਕੋ। ਕੋਸ਼ਿਸ਼ ਕਰੋ ਕਿ ਕਰਜ਼ੇ ਦੀ ਮਿਆਦ ਉੱਨੀ ਹੀ ਰੱਖੀ ਜਾਵੇ, ਜਿੰਨੀ ਵਿੱਚ ਤੁਸੀਂ ਆਸਾਨੀ ਨਾਲ ਕਿਸ਼ਤ ਭਰ ਸਕੋ ਅਤੇ ਵਿਆਜ ਦਾ ਬੋਝ ਵੀ ਘੱਟ ਰਹੇ।

ਉਦਾਹਰਨ ਵਜੋਂ, ਜੇਕਰ 8.4 ਫ਼ੀਸਦੀ ਵਿਆਜ ਦਰ ’ਤੇ ਪੰਜ ਸਾਲਾਂ ਲਈ 10 ਲੱਖ ਰੁਪਏ ਦਾ ਕਰਜ਼ਾ ਲਿਆ ਜਾਂਦਾ ਹੈ, ਤਾਂ ਇਸ ’ਤੇ 2,28,102 ਰੁਪਏ ਵਿਆਜ ਦੇਣਾ ਪਵੇਗਾ। ਜੇਕਰ ਕਰਜ਼ੇ ਦੀ ਮਿਆਦ ਛੇ ਸਾਲ ਕਰ ਦਿੱਤੀ ਜਾਵੇ, ਤਾਂ ਵਿਆਜ ਦੀ ਰਕਮ ਵਧ ਕੇ 2,76,502 ਰੁਪਏ ਹੋ ਜਾਵੇਗੀ। ਇਸ ਤਰ੍ਹਾਂ ਕਰਜ਼ੇ ਦੀ ਮਿਆਦ ਇੱਕ ਸਾਲ ਵਧਾਉਣ ਨਾਲ ਲਗਪਗ 48 ਹਜ਼ਾਰ ਰੁਪਏ ਵਾਧੂ ਵਿਆਜ ਦੇਣਾ ਪਵੇਗਾ।

ਵਿਆਜ ਦਰਾਂ ਵਿੱਚ ਵਾਧੇ ਲਈ ਰਹੋ ਤਿਆਰ

ਲਗਾਤਾਰ ਵਧ ਰਹੀ ਮਹਿੰਗਾਈ ਨੂੰ ਦੇਖਦਿਆਂ ਬੈਂਕਿੰਗ ਮਾਹਿਰਾਂ ਨੇ ਅੰਦਾਜ਼ਾ ਲਾਇਆ ਹੈ ਕਿ ਭਾਰਤੀ ਰਿਜ਼ਰਵ ਬੈਂਕ (ਆਰਬੀਆਈ) ਰੈਪੋ ਰੇਟ ਵਿੱਚ ਲਗਪਗ 75 ਆਧਾਰ ਅੰਕਾਂ ਦਾ ਵਾਧਾ ਕਰ ਸਕਦਾ ਹੈ। ਇਸ ਵਿੱਚੋਂ 25 ਆਧਾਰ ਅੰਕਾਂ ਦਾ ਵਾਧਾ ਅਕਤੂਬਰ ਵਿੱਚ ਕੀਤਾ ਜਾ ਚੁੱਕਾ ਹੈ। ਇਸ ਕਾਰਨ ਕਈ ਬੈਂਕ ਵਾਹਨ ਕਰਜ਼ਿਆਂ ਸਮੇਤ ਵੱਖ-ਵੱਖ ਤਰ੍ਹਾਂ ਦੇ ਕਰਜ਼ਿਆਂ ’ਤੇ ਵਿਆਜ ਦਰਾਂ ਵਧਾ ਚੁੱਕੇ ਹਨ।

ਜੇਕਰ ਤੁਸੀਂ ਇਸ ਤਿਉਹਾਰੀ ਸੀਜ਼ਨ ਵਿੱਚ ਕਰਜ਼ੇ ’ਤੇ ਵਾਹਨ ਖ਼ਰੀਦਣ ਦੀ ਯੋਜਨਾ ਬਣਾ ਰਹੇ ਹੋ, ਤਾਂ ਭਵਿੱਖ ਵਿੱਚ ਵਿਆਜ ਦਰਾਂ ਵਧਣ ਦੀ ਸੰਭਾਵਨਾ ਨੂੰ ਵੀ ਧਿਆਨ ਵਿੱਚ ਰੱਖੋ।

ਕਰਜ਼ਾ ਲੈਂਦੇ ਸਮੇਂ ਤੁਸੀਂ ਫਿਕਸਡ (ਸਥਾਈ) ਵਿਆਜ ਦਰ ਦੀ ਚੋਣ ਕਰ ਸਕਦੇ ਹੋ। ਫਿਕਸਡ ਦਰ ਵਾਲੇ ਕਰਜ਼ੇ ਦੀ ਸ਼ੁਰੂਆਤੀ ਵਿਆਜ ਦਰ ਆਮ ਤੌਰ ’ਤੇ ਵੱਧ ਹੋ ਸਕਦੀ ਹੈ, ਪਰ ਇਹ ਕਰਜ਼ੇ ਦੀ ਮਿਆਦ ਦੌਰਾਨ ਇੱਕੋ ਜਿਹੀ ਰਹਿੰਦੀ ਹੈ। ਦੂਜੇ ਪਾਸੇ, ਫਲੋਟਿੰਗ ਵਿਆਜ ਦਰ ਵਾਲੇ ਕਰਜ਼ੇ ਦੀ ਦਰ ਆਮ ਤੌਰ ’ਤੇ ਫਿਕਸਡ ਦਰ ਨਾਲੋਂ ਘੱਟ ਹੋ ਸਕਦੀ ਹੈ, ਪਰ ਆਰਬੀਆਈ ਦੀ ਰੈਪੋ ਰੇਟ ਵਿੱਚ ਬਦਲਾਅ ਦੇ ਅਨੁਸਾਰ ਇਸ ਵਿੱਚ ਵਾਧਾ ਜਾਂ ਕਮੀ ਹੋ ਸਕਦੀ ਹੈ।

ਫੀਸਾਂ ਦੀ ਜਾਂਚ ਕਰਨਾ ਨਾ ਭੁੱਲੋ

ਵਾਹਨ ਕਰਜ਼ਾ ਲੈਣ ਤੋਂ ਪਹਿਲਾਂ ਸਿਰਫ਼ ਵਿਆਜ ਦਰ ਹੀ ਨਹੀਂ, ਸਗੋਂ ਹੋਰ ਖ਼ਰਚਿਆਂ ਦੀ ਵੀ ਜਾਂਚ ਕਰੋ। ਇਨ੍ਹਾਂ ਵਿੱਚ ਪ੍ਰੋਸੈਸਿੰਗ ਫੀਸ, ਕਰਜ਼ੇ ਦੀ ਸਮੇਂ ਤੋਂ ਪਹਿਲਾਂ ਅਦਾਇਗੀ ’ਤੇ ਲੱਗਣ ਵਾਲਾ ਖ਼ਰਚਾ ਅਤੇ ਕਿਸ਼ਤ ਦੇਰੀ ਨਾਲ ਭਰਨ ’ਤੇ ਲੱਗਣ ਵਾਲਾ ਜੁਰਮਾਨਾ ਸ਼ਾਮਲ ਹਨ।

ਵੱਧ ਪ੍ਰੋਸੈਸਿੰਗ ਫੀਸ ਨਾਲ ਕਰਜ਼ੇ ਦੀ ਕੁੱਲ ਲਾਗਤ ਵਧ ਸਕਦੀ ਹੈ। ਇਸੇ ਤਰ੍ਹਾਂ, ਸਮੇਂ ਤੋਂ ਪਹਿਲਾਂ ਕਰਜ਼ਾ ਚੁਕਾਉਣ ਜਾਂ ਕਿਸ਼ਤ ਦੇਰੀ ਨਾਲ ਭਰਨ ’ਤੇ ਤੁਹਾਨੂੰ ਵਾਧੂ ਰਕਮ ਅਦਾ ਕਰਨੀ ਪੈ ਸਕਦੀ ਹੈ। ਇਸ ਲਈ ਕਰਜ਼ਾ ਲੈਣ ਤੋਂ ਪਹਿਲਾਂ ਵੱਖ-ਵੱਖ ਬੈਂਕਾਂ ਦੀਆਂ ਵਿਆਜ ਦਰਾਂ ਅਤੇ ਸ਼ਰਤਾਂ ਦੀ ਤੁਲਨਾ ਜ਼ਰੂਰ ਕਰੋ।

ਜਾਗਰਣ ਇਨਫੋ