ਕੇਰਲ ਤੋਂ ਦੁਬਈ ਤਕ ਦਾ ਸਫ਼ਰ! ਇਹ ਭਾਰਤੀ ਹੈ ਅਰਬ ਦੇਸ਼ਾਂ ਦੇ ਸਭ ਤੋਂ ਵੱਡੇ ਜਵੈਲਰੀ ਸ਼ੋਅਰੂਮ ਦਾ ਮਾਲਕ, ਪਿਤਾ ਨੇ ਛੋਟੀ ਜਿਹੀ ਦੁਕਾਨ ਤੋਂ ਕੀਤੀ ਸੀ ਸ਼ੁਰੂਆਤ

ਜੌਏ ਅਲੁੱਕਾਸ ਨੇ ਅਕਤੂਬਰ 2026 'ਚ ਦੁਬਈ ਦੇ ਗੋਲਡ ਡਿਸਟ੍ਰਿਕਟ 'ਚ 'ਜਵੈਲ ਆਫ਼ ਜੌਏ' ਦੀ ਸ਼ੁਰੂਆਤ ਕੀਤੀ। ਕਰੀਬ 25,000 ਵਰਗ ਫੁੱਟ 'ਚ ਫੈਲੇ ਇਸ ਸ਼ੋਅਰੂਮ ਨੂੰ ਸਿਰਫ਼ ਗਹਿਣੇ ਵੇਚਣ ਦੀ ਥਾਂ ਦੀ ਬਜਾਏ ਇੱਕ ਪੂਰੇ ਜਵੈਲਰੀ ਐਕਸਪੀਰੀਅੰਸ ਸੈਂਟਰ ਵਜੋਂ ਤਿਆਰ ਕੀਤਾ ਗਿਆ ਹੈ। ਇਸ ਦਾ ਉਦਘਾਟਨ ਯੂਏਈ ਦੇ ਵਿਦੇਸ਼ ਵਪਾਰ ਮੰਤਰੀ ਡਾ. ਥਾਨੀ ਬਿਨ ਅਹਿਮਦ ਅਲ ਜ਼ੈਯੂਦੀ ਨੇ ਕੀਤਾ। ਇਸ ਮੌਕੇ ਦੁਬਈ 'ਚ ਭਾਰਤ ਦੇ ਕੌਂਸਲ ਜਨਰਲ ਡਾ. ਈ. ਵਿਸ਼ਨੂੰ ਵਰਧਨ ਰੈੱਡੀ ਸਮੇਤ ਕਈ ਵੱਡੀਆਂ ਹਸਤੀਆਂ ਮੌਜੂਦ ਰਹੀਆਂ। ਖ਼ਾਸ ਗੱਲ ਇਹ ਹੈ ਕਿ ਕੰਪਨੀ ਦੇ 200 ਤੋਂ ਵੱਧ ਸ਼ੋਅਰੂਮਾਂ ਦੇ ਗਲੋਬਲ ਨੈੱਟਵਰਕ 'ਚ ਇਹ ਆਪਣੇ ਤਰ੍ਹਾਂ ਦਾ ਵਿਸ਼ੇਸ਼ ਆਊਟਲੈੱਟ ਹੈ।

ਸ਼ੋਅਰੂਮ 'ਚ ਹੈ 'ਰਾਇਲ ਬੈਂਗਲ ਵਾਕ'

ਇਸ ਸ਼ੋਅਰੂਮ ਦੀ ਸਭ ਤੋਂ ਖ਼ਾਸ ਗੱਲ ਇਸ ਦਾ ਡਿਜ਼ਾਈਨ ਤੇ ਇੱਥੇ ਮਿਲਣ ਵਾਲਾ ਤਜਰਬਾ ਹੈ। ਇੱਥੇ ਸੋਨੇ ਦੇ ਰਵਾਇਤੀ ਗਹਿਣਿਆਂ ਤੋਂ ਲੈ ਕੇ ਬ੍ਰਾਈਡਲ ਕਲੈਕਸ਼ਨ, ਹੀਰਿਆਂ ਅਤੇ ਦੁਰਲੱਭ ਕੀਮਤੀ ਰਤਨਾਂ ਤੱਕ ਦੀ ਵੱਡੀ ਰੇਂਜ ਮੌਜੂਦ ਹੈ। ਸ਼ੋਅਰੂਮ 'ਚ ਇੱਕ ਖ਼ਾਸ ਆਕਰਸ਼ਣ 'ਦ ਰਾਇਲ ਬੈਂਗਲ ਵਾਕ' (The Royal Bangle Walk) ਹੈ। ਇਹ ਇੱਕ ਵਿਸ਼ਾਲ ਚੂੜੀ ਦੇ ਆਕਾਰ ਦਾ ਇੰਸਟਾਲੇਸ਼ਨ ਹੈ, ਜਿਸ ਦੇ ਵਿਚਕਾਰੋਂ ਗਾਹਕ ਲੰਘ ਸਕਦੇ ਹਨ। ਇਸ ਤੋਂ ਇਲਾਵਾ ਇੱਥੇ ਵਿਸ਼ੇਸ਼ ਡਿਜ਼ਾਈਨਰ ਸਟੂਡੀਓ, VIP ਲਾਊਂਜ, ਬੱਚਿਆਂ ਲਈ ਵੱਖਰਾ ਐਂਗੇਜਮੈਂਟ ਜ਼ੋਨ ਅਤੇ ਗਹਿਣਿਆਂ ਦੀ ਦੇਖਭਾਲ ਤੇ ਮੁਰੰਮਤ ਲਈ ਵਿਸ਼ੇਸ਼ ਸਹੂਲਤਾਂ ਵੀ ਬਣਾਈਆਂ ਗਈਆਂ ਹਨ। ਯਾਨੀ ਕੰਪਨੀ ਨੇ ਖ਼ਰੀਦਦਾਰੀ ਨੂੰ ਇੱਕ ਵੱਖਰਾ ਤਜਰਬਾ ਬਣਾਉਣ ਦੀ ਕੋਸ਼ਿਸ਼ ਕੀਤੀ ਹੈ।