ਜੌਬਲੈੱਸ ਹੋ ਜਾਂ ਨੌਕਰੀ ਤੋਂ ਲਈ ਹੈ ਬ੍ਰੇਕ, PF ਖਾਤੇ 'ਚ ਜਮ੍ਹਾਂ ਪੈਸਿਆਂ ਦਾ ਕੀ ਹੋਵੇਗਾ? EPFO ਦਾ ਇਹ ਨਵਾਂ ਨਿਯਮ ਜਾਣਨਾ ਹੈ ਜ਼ਰੂਰੀ

ਬਿਜ਼ਨੈੱਸ ਡੈਸਕ, ਨਵੀਂ ਦਿੱਲੀ: ਵਿੱਤ ਮੰਤਰਾਲੇ ਵੱਲੋਂ EPF ਤਨਖ਼ਾਹ ਹੱਦ (Wage Ceiling) ਨੂੰ ਮੌਜੂਦਾ 15,000 ਰੁਪਏ ਤੋਂ ਵਧਾ ਕੇ 25,000 ਰੁਪਏ ਪ੍ਰਤੀ ਮਹੀਨਾ ਕਰਨ ਦੇ ਪ੍ਰਸਤਾਵ ਨੂੰ ਮਨਜ਼ੂਰੀ ਦੇਣ ਤੋਂ ਬਾਅਦ ਇਕ ਹੋਰ ਜ਼ਰੂਰੀ ਖ਼ਬਰ ਸਾਹਮਣੇ ਆਈ ਹੈ। ਅੱਜ-ਕੱਲ੍ਹ ਕਈ ਨੌਜਵਾਨ ਅੱਗੇ ਦੀ ਪੜ੍ਹਾਈ, ਪਰਿਵਾਰਕ ਜ਼ਿੰਮੇਵਾਰੀ ਜਾਂ ਸਿਹਤ ਕਾਰਨਾਂ ਕਰਕੇ ਆਪਣੀ ਨੌਕਰੀ ਦੇ ਵਿਚਕਾਰ 1 ਤੋਂ 2 ਸਾਲ ਦਾ ਕਰੀਅਰ ਬ੍ਰੇਕ ਲੈ ਰਹੇ ਹਨ। ਕੁਝ ਮਾਮਲਿਆਂ 'ਚ ਨੌਕਰੀ ਖੁੱਸਣ ਕਾਰਨ ਵੀ ਲੋਕਾਂ ਨੂੰ ਬ੍ਰੇਕ ਲੈਣਾ ਪੈਂਦਾ ਹੈ। ਪਰ ਅਜਿਹੇ ਸਮੇਂ ਸਭ ਤੋਂ ਵੱਡਾ ਸਵਾਲ ਇਹ ਉੱਠਦਾ ਹੈ ਕਿ ਤੁਹਾਡੇ EPF (Employees' Provident Fund) ਖਾਤੇ 'ਚ ਜਮ੍ਹਾਂ ਪੈਸਿਆਂ ਦਾ ਕੀ ਹੁੰਦਾ ਹੈ?

ਜੇਕਰ ਤੁਸੀਂ ਵੀ ਇਸ ਉਲਝਣ 'ਚ ਹੋ ਜਾਂ ਪੈਸੇ ਕੱਢਵਾਉਣ ਦੀ ਸੋਚ ਰਹੇ ਹੋ ਤਾਂ ਰੁਕੋ! ਨਵੇਂ ਨਿਯਮਾਂ ਤਹਿਤ ਕੁਝ ਵੱਡੇ ਬਦਲਾਅ ਹੋਏ ਹਨ ਜਿਨ੍ਹਾਂ ਨੂੰ ਜਾਣਨਾ ਤੁਹਾਡੇ ਲਈ ਬਹੁਤ ਜ਼ਰੂਰੀ ਹੈ।

ਕੀ ਨੌਕਰੀ ਛੱਡਣ ਤੋਂ ਬਾਅਦ ਵਿਆਜ ਮਿਲਣਾ ਬੰਦ ਹੋ ਜਾਂਦਾ ਹੈ?

ਸਭ ਤੋਂ ਵੱਡੀ ਗਲਤਫਹਿਮੀ ਇਹ ਹੈ ਕਿ ਨੌਕਰੀ ਛੱਡਦਿਆਂ ਹੀ PF 'ਤੇ ਵਿਆਜ ਮਿਲਣਾ ਬੰਦ ਹੋ ਜਾਂਦਾ ਹੈ, ਪਰ ਅਜਿਹਾ ਬਿਲਕੁਲ ਨਹੀਂ ਹੈ। EPFO ਦੇ ਨਵੇਂ ਨਿਯਮਾਂ ਅਨੁਸਾਰ, ਜੇਕਰ ਤੁਸੀਂ ਨੌਕਰੀ ਛੱਡ ਦਿੱਤੀ ਹੈ, ਤਦ ਵੀ 58 ਸਾਲ ਦੀ ਉਮਰ ਤਕ ਤੁਹਾਡੇ EPF ਖਾਤੇ 'ਚ ਜਮ੍ਹਾਂ ਰਕਮ 'ਤੇ ਲਗਾਤਾਰ ਵਿਆਜ ਮਿਲਦਾ ਰਹੇਗਾ। ਪਰ ਇਸ ਵਿਚ ਸਭ ਤੋਂ ਵੱਡਾ ਕੈਚ ਇਹ ਹੈ ਕਿ ਜੇਕਰ ਕੋਈ ਵਿਅਕਤੀ 55 ਸਾਲ ਜਾਂ ਉਸ ਤੋਂ ਬਾਅਦ ਆਪਣੀ ਨੌਕਰੀ ਛੱਡਦਾ ਹੈ ਤਾਂ ਉਸਨੂੰ ਵੱਧ ਤੋਂ ਵੱਧ 3 ਸਾਲ ਤਕ ਹੀ ਵਿਆਜ ਦਿੱਤਾ ਜਾਵੇਗਾ। ਇਸ ਤੋਂ ਬਾਅਦ ਖਾਤਾ ਇਨਐਕਟਿਵ (inactive) ਮੰਨ ਲਿਆ ਜਾਵੇਗਾ ਤੇ ਉਸ 'ਤੇ ਅੱਗੇ ਵਿਆਜ ਨਹੀਂ ਮਿਲੇਗਾ।

ਕਰੀਅਰ ਬ੍ਰੇਕ ਤੋਂ ਬਾਅਦ ਕੀ ਹੁੰਦਾ ਹੈ?

ਜੇਕਰ ਤੁਸੀਂ ਬੇਰੋਜ਼ਗਾਰੀ ਜਾਂ ਕਰੀਅਰ ਬ੍ਰੇਕ ਦੌਰਾਨ ਪੈਸਾ ਕੱਢਵਾਉਣਾ ਚਾਹੁੰਦੇ ਹੋ ਤਾਂ 2026 ਦੇ ਨਵੇਂ ਨਿਯਮਾਂ ਨੂੰ ਸਮਝ ਲਵੋ:

1. ਨੌਕਰੀ ਖੁੱਸਣ ਦੇ ਤੁਰੰਤ ਬਾਅਦ ਮੁਲਾਜ਼ਮਹੁਣ ਆਪਣੇ EPF ਬੈਲੇਂਸ ਦਾ 75% ਤਕ ਹਿੱਸਾ ਕੱਢਵਾ ਸਕਦੇ ਹਨ।

2. ਬਾਕੀ ਬਚੀ 25% ਰਕਮ ਤੁਸੀਂ ਉਦੋਂ ਹੀ ਕੱਢਵਾ ਸਕਦੇ ਹੋ ਜਦੋਂ ਤੁਸੀਂ ਲਗਾਤਾਰ 12 ਮਹੀਨਿਆਂ ਤਕ ਬੇਰੋਜ਼ਗਾਰ ਰਹੋ।

3. ਸਭ ਤੋਂ ਵਧੀਆ ਗੱਲ ਇਹ ਹੈ ਕਿ ਹੁਣ ਇਸ ਨਿਕਾਸੀ ਰਕਮ 'ਚ ਤੁਹਾਡਾ ਯੋਗਦਾਨ, ਤੁਹਾਡੀ ਕੰਪਨੀ (Employer) ਦਾ ਯੋਗਦਾਨ ਤੇ ਉਸ 'ਤੇ ਮਿਲਿਆ ਵਿਆਜ, ਸਭ ਕੁਝ ਸ਼ਾਮਲ ਹੁੰਦਾ ਹੈ।

ਕਦੋਂ ਲੱਗ ਸਕਦਾ ਹੈ ਟੈਕਸ ਦਾ ਝਟਕਾ?

ਜੇਕਰ ਤੁਸੀਂ ਲਗਾਤਾਰ 5 ਸਾਲ ਦੀ ਨੌਕਰੀ ਪੂਰੀ ਨਹੀਂ ਕੀਤੀ ਹੈ ਤੇ ਉਸ ਤੋਂ ਪਹਿਲਾਂ ਹੀ ਪੈਸਾ ਕੱਢਵਾਉਂਦੇ ਹੋ ਤਾਂ ਤੁਹਾਡੀ EPF ਨਿਕਾਸੀ 'ਤੇ ਟੈਕਸ ਲੱਗ ਸਕਦਾ ਹੈ। ਉੱਥੇ ਹੀ, ਜੇਕਰ ਤੁਸੀਂ ਘੱਟੋ-ਘੱਟ 5 ਸਾਲ ਦੀ ਲਗਾਤਾਰ ਸੇਵਾ ਪੂਰੀ ਕਰ ਲਈ ਹੈ ਅਤੇ ਉਸ ਤੋਂ ਬਾਅਦ ਰਿਟਾਇਰਮੈਂਟ, ਕੰਪਨੀ ਬੰਦ ਹੋਣ, ਬਿਮਾਰੀ ਜਾਂ ਕਿਸੇ ਹੋਰ ਮਾਨਤਾ ਪ੍ਰਾਪਤ ਕਾਰਨ ਕਰਕੇ ਪੈਸਾ ਕੱਢਵਾਉਂਦੇ ਹੋ ਤਾਂ ਤੁਹਾਡਾ ਪੂਰਾ EPF ਬੈਲੇਂਸ ਪੂਰੀ ਤਰ੍ਹਾਂ ਟੈਕਸ-ਫ੍ਰੀ (Tax-Free) ਰਹਿੰਦਾ ਹੈ।

ਕੀ ਬਦਲਿਆ?

ਤੁਹਾਨੂੰ ਦੱਸ ਦੇਈਏ ਕਿ ਕਈ ਰਿਪੋਰਟਾਂ 'ਚ ਇਹ ਦਾਅਵਾ ਕੀਤਾ ਜਾ ਰਿਹਾ ਹੈ ਕਿ EPF ਤਹਿਤ ਲਾਜ਼ਮੀ ਤਨਖ਼ਾਹ ਹੱਦ (Wage Ceiling) ਨੂੰ ਵਧਾ ਕੇ 25,000 ਰੁਪਏ ਪ੍ਰਤੀ ਮਹੀਨਾ ਕਰਨ ਦੇ ਪ੍ਰਸਤਾਵ ਨੂੰ ਮਨਜ਼ੂਰੀ ਦੇ ਦਿੱਤੀ ਗਈ ਹੈ। ਇਹ ਨਵਾਂ ਬਦਲਾਅ ਅਜੇ ਅਧਿਕਾਰਤ ਤੌਰ 'ਤੇ ਲਾਗੂ ਨਹੀਂ ਹੋਇਆ ਹੈ; ਇਸਨੂੰ ਪੂਰੀ ਤਰ੍ਹਾਂ ਲਾਗੂ ਕਰਨ ਲਈ ਅਜੇ ਕੇਂਦਰੀ ਕੈਬਨਿਟ (Central Cabinet) ਦੀ ਅੰਤਿਮ ਮਨਜ਼ੂਰੀ ਮਿਲਣੀ ਬਾਕੀ ਹੈ।