EPFO 3.0 ਦੀਵਾਲੀ ਤਕ ਹੋਵੇਗਾ ਸ਼ੁਰੂ? ਇੰਝ UPI ਤੇ ATM ਰਾਹੀਂ ਕਢਵਾ ਸਕੋਗੇ PF ਦਾ ਪੈਸਾ; ₹5 ਲੱਖ ਤਕ ਦਾ ਕਲੇਮ 3 ਦਿਨਾਂ ’ਚ ਹੋਵੇਗਾ ਪਾਸ!

ਬਿਜ਼ਨੈੱਸ ਡੈਸਕ, ਨਵੀਂ ਦਿੱਲੀ: PF ਦਾ ਪੈਸਾ ਕਢਵਾਉਣਾ ਹੈ—ਇਹ ਸੁਣਦਿਆਂ ਹੀ ਅਕਸਰ ਲੰਬੇ-ਚੌੜੇ ਫਾਰਮ, ਕੰਪਨੀ ਦੇ HR ਦੇ ਚੱਕਰ ਤੇ 15-20 ਦਿਨਾਂ ਦੀ ਲੰਬੀ ਉਡੀਕ ਦੀ ਤਸਵੀਰ ਸਾਹਮਣੇ ਆਉਣ ਲੱਗਦੀ ਹੈ। ਇਸ ਤੋਂ ਇਲਾਵਾ EPFO ਦੇ ਸਰਵਰ ਡਾਊਨ ਹੋਣ ਦੀਆਂ ਪਰੇਸ਼ਾਨੀਆਂ ਵੀ ਵੱਖਰੀਆਂ ਹਨ। ਪਰ ਹੁਣ ਕਰੋੜਾਂ ਨੌਕਰੀਪੇਸ਼ਾ (Salaried) ਲੋਕਾਂ ਲਈ ਇੱਕ ਬੇਹੱਦ ਸ਼ਾਨਦਾਰ ਅਤੇ ਵੱਡੀ ਖੁਸ਼ਖਬਰੀ ਹੈ।

ਕਰਮਚਾਰੀ ਭਵਿੱਖ ਨਿਧੀ ਸੰਗਠਨ (EPFO) ਆਪਣੇ ਪੂਰੇ ਸਿਸਟਮ ਦਾ ਕਾਇਆਕਲਪ ਕਰਨ ਜਾ ਰਿਹਾ ਹੈ ਅਤੇ ਜਲਦ ਹੀ EPFO 3.0 ਲਾਂਚ ਕਰਨ ਵਾਲਾ ਹੈ। ਇਹ ਨਵਾਂ ਸਿਸਟਮ ਤੁਹਾਡੇ PF ਖਾਤੇ ਨੂੰ ਬਿਲਕੁਲ ਨੈੱਟ ਬੈਂਕਿੰਗ ਅਤੇ ਆਮ ਸੇਵਿੰਗ ਖਾਤੇ ਵਾਂਗ ਤੇਜ਼ ਅਤੇ ਹਾਈ-ਟੈਕ ਬਣਾ ਦੇਵੇਗਾ। ਉਮੀਦ ਜਤਾਈ ਜਾ ਰਹੀ ਹੈ ਕਿ ਦੀਵਾਲੀ ਦੇ ਆਸ-ਪਾਸ ਇਸ ਨਵੀਂ ਸਹੂਲਤ ਨੂੰ ਕਰੋੜਾਂ ਕਰਮਚਾਰੀਆਂ ਲਈ ਰੋਲਆਊਟ ਕਰ ਦਿੱਤਾ ਜਾਵੇਗਾ।

ਹੁਣ 5 ਲੱਖ ਰੁਪਏ ਤਕ ਦਾ ਕਲੇਮ ਹੋਵੇਗਾ ਆਟੋ ਸੈਟਲ

ਸਭ ਤੋਂ ਵੱਡੀ ਰਾਹਤ ਐਡਵਾਂਸ ਕਲੇਮ ਨੂੰ ਲੈ ਕੇ ਹੈ। ਬਿਮਾਰੀ, ਵਿਆਹ ਜਾਂ ਘਰ ਖਰੀਦਣ ਵਰਗੀਆਂ ਐਮਰਜੈਂਸੀ ਜ਼ਰੂਰਤਾਂ ਲਈ ਜੇ ਤੁਸੀਂ ₹5 ਲੱਖ ਤੱਕ ਦਾ ਐਡਵਾਂਸ ਕਲੇਮ ਕਰਦੇ ਹੋ ਤਾਂ ਹੁਣ ਕੋਈ ਅਧਿਕਾਰੀ ਬੈਠ ਕੇ ਫਾਈਲ ਦੀ ਜਾਂਚ ਨਹੀਂ ਕਰੇਗਾ। ਨਵੇਂ ਸਿਸਟਮ ਵਿੱਚ ਕੰਪਿਊਟਰ ਖੁਦ ਤੁਹਾਡੇ ਡੇਟਾ ਦੀ ਪੁਸ਼ਟੀ ਕਰੇਗਾ ਅਤੇ ਜਿਸ ਪੈਸੇ ਨੂੰ ਆਉਣ ਵਿੱਚ ਪਹਿਲਾਂ ਹਫ਼ਤੇ ਲੱਗ ਜਾਂਦੇ ਸਨ, ਉਹ ਹੁਣ ਸਿਰਫ਼ 3 ਤੋਂ 4 ਦਿਨਾਂ ਵਿੱਚ ਸਿੱਧਾ ਤੁਹਾਡੇ ਬੈਂਕ ਖਾਤੇ ਵਿੱਚ ਟਰਾਂਸਫਰ ਹੋ ਜਾਵੇਗਾ।

UPI ਤੇ ATM ਤੋਂ ਝਟਪਟ ਕਢਵਾਇਆ ਜਾ ਸਕੇਗਾ ਪੈਸਾ

ਇਹ ਕਿਸੇ ਸੁਪਨੇ ਵਰਗਾ ਲੱਗ ਸਕਦਾ ਹੈ, ਪਰ EPFO 3.0 ਵਿੱਚ PF ਖਾਤੇ ਨੂੰ ਸਿੱਧੇ ਆਧੁਨਿਕ ਬੈਂਕਿੰਗ ਸਿਸਟਮ ਅਤੇ UPI ਨੈੱਟਵਰਕ ਨਾਲ ਜੋੜਨ ਦੀ ਤਿਆਰੀ ਕੀਤੀ ਜਾ ਰਹੀ ਹੈ। ਰਿਪੋਰਟਾਂ ਮੁਤਾਬਕ ਐਮਰਜੈਂਸੀ ਵਿਚ ਮੈਡੀਕਲ ਜ਼ਰੂਰਤਾਂ ਦੇ ਸਮੇਂ ਤੁਸੀਂ ਇੱਕ ਨਿਰਧਾਰਤ ਸੀਮਾ ਤਕ ਆਪਣਾ ਪੈਸਾ ਸਿੱਧੇ BHIM UPI ਜਾਂ ATM ਰਾਹੀਂ ਕਢਵਾ ਸਕੋਗੇ।

ਸ਼ੁਰੂਆਤੀ ਪੜਾਅ 'ਚ ਸੁਰੱਖਿਆ ਅਤੇ ਪ੍ਰਾਈਵੇਸੀ ਨੂੰ ਧਿਆਨ ਵਿੱਚ ਰੱਖਦੇ ਹੋਏ ਇਸ ਨੂੰ ਸਿਰਫ਼ ਸਰਕਾਰੀ ਐਪ BHIM UPI ਨਾਲ ਜੋੜਿਆ ਜਾਵੇਗਾ, ਜਿਸ ਤੋਂ ਬਾਅਦ ਹੋਰ ਐਪਸ ਨੂੰ ਵੀ ਮਨਜ਼ੂਰੀ ਮਿਲ ਸਕਦੀ ਹੈ। ਇਸ ਪ੍ਰਕਿਰਿਆ ਲਈ ਤੁਹਾਨੂੰ ਆਪਣੀ ਕੰਪਨੀ ਜਾਂ HR ਤੋਂ ਕਿਸੇ ਵੀ ਤਰ੍ਹਾਂ ਦੀ ਮਨਜ਼ੂਰੀ (Approval) ਲੈਣ ਦੀ ਲੋੜ ਨਹੀਂ ਪਵੇਗੀ। ਇਹ ਪੂਰੀ ਤਰ੍ਹਾਂ ਪੇਪਰਲੈੱਸ ਹੋਵੇਗੀ।

ਕਲਾਊਡ ਬੇਸਡ ਸਿਸਟਮ

ਹੁਣ ਤਕ EPFO ਦਾ ਡੇਟਾ ਵੱਖ-ਵੱਖ ਸ਼ਹਿਰਾਂ ਦੇ ਸਰਵਰਾਂ ਵਿੱਚ ਵੰਡਿਆ ਹੋਇਆ ਸੀ, ਜਿਸ ਕਾਰਨ ਅਕਸਰ ਪੋਰਟਲ ਕਰੈਸ਼ ਹੋ ਜਾਂਦਾ ਸੀ। EPFO 3.0 ਪੂਰੀ ਤਰ੍ਹਾਂ ਕਲਾਊਡ ਬੇਸਡ ਅਤੇ ਸੈਂਟਰਲਾਈਜ਼ਡ ਹੋਵੇਗਾ। ਇਸ ਦਾ ਮਤਲਬ ਹੈ ਕਿ ਵੈੱਬਸਾਈਟ ਹੈਂਗ ਹੋਣ ਦੀ ਸਮੱਸਿਆ ਹਮੇਸ਼ਾ ਲਈ ਖਤਮ ਹੋ ਜਾਵੇਗੀ।

ਇਸ ਚਿਰਾਂ ਤੋਂ ਉਡੀਕੇ ਜਾ ਰਹੇ ਸਿਸਟਮ ਦੀ ਟੈਸਟਿੰਗ ਲਗਾਤਾਰ ਚੱਲ ਰਹੀ ਹੈ। ਪਹਿਲਾਂ ਇਸ ਨੂੰ ਜੁਲਾਈ-ਅਗਸਤ ਵਿੱਚ ਲਿਆਂਦਾ ਜਾਣਾ ਸੀ, ਪਰ ਤਕਨੀਕੀ ਖਾਮੀਆਂ ਕਾਰਨ ਇਹ ਟਲ ਗਿਆ। ਹੁਣ ਪੂਰੀ ਉਮੀਦ ਹੈ ਕਿ ਤਿਉਹਾਰੀ ਸੀਜ਼ਨ ਯਾਨੀ ਸਤੰਬਰ ਦੇ ਅੰਤ ਜਾਂ ਦੀਵਾਲੀ ਤੱਕ ਇਸ ਨੂੰ ਅਧਿਕਾਰਤ ਤੌਰ ’ਤੇ ਲਾਂਚ ਕਰ ਦਿੱਤਾ ਜਾਵੇਗਾ। ਕੁੱਲ ਮਿਲਾ ਕੇ, EPFO 3.0 ਤੁਹਾਡੀ ਆਪਣੀ ਗਾੜ੍ਹੀ ਕਮਾਈ ਨੂੰ ਤੁਹਾਡੇ ਅਤੇ ਵੀ ਨੇੜੇ ਲਿਆਉਣ ਵੱਲ ਇੱਕ ਕ੍ਰਾਂਤੀਕਾਰੀ ਕਦਮ ਹੈ।