ਦੁਬਈ ਦੇ ਸ਼ੇਖ ਨੇ ਖੋਲ੍ਹਿਆ ਖ਼ਜ਼ਾਨਾ: PM ਮੋਦੀ ਤੇ ਕ੍ਰਾਊਨ ਪ੍ਰਿੰਸ ਦੀ ਮੈਗਾ ਡੀਲ, ਭਾਰਤ 'ਚ UAE ਕਰੇਗਾ 1.10 ਲੱਖ ਕਰੋੜ ਰੁਪਏ ਦਾ ਨਿਵੇਸ਼

ਬਿਜ਼ਨੈੱਸ ਡੈਸਕ, ਨਵੀਂ ਦਿੱਲੀ : ਭਾਰਤ BRICS ਦੇ 18ਵੇਂ ਸਿਖਰ ਸੰਮੇਲਨ ਦੀ ਮੇਜ਼ਬਾਨੀ ਕਰ ਰਿਹਾ ਹੈ। ਇਸ ਸੰਮੇਲਨ 'ਚ ਹਿੱਸਾ ਲੈਣ ਲਈ ਅਬੂ ਧਾਬੀ ਦੇ ਕ੍ਰਾਊਨ ਪ੍ਰਿੰਸ ਸ਼ੇਖ ਖਾਲਿਦ ਬਿਨ ਮੁਹੰਮਦ ਬਿਨ ਜਾਇਦ ਅਲ ਨਾਹਯਾਨ ਵੀ ਭਾਰਤ ਪਹੁੰਚੇ ਹਨ। ਪ੍ਰਧਾਨ ਮੰਤਰੀ ਨਰਿੰਦਰ ਮੋਦੀ ਨੇ ਸ਼ਨੀਵਾਰ, 12 ਸਤੰਬਰ ਨੂੰ ਨਵੀਂ ਦਿੱਲੀ ਦੇ ਹੈਦਰਾਬਾਦ ਹਾਊਸ 'ਚ ਅਬੂ ਧਾਬੀ ਦੇ ਕ੍ਰਾਊਨ ਪ੍ਰਿੰਸ ਖਾਲਿਦ ਬਿਨ ਮੁਹੰਮਦ ਬਿਨ ਜਾਇਦ ਅਲ ਨਾਹਯਾਨ ਨਾਲ ਦੁਵੱਲੀ ਬੈਠਕ ਕੀਤੀ।

ਦੋਵਾਂ ਆਗੂਆਂ ਨੇ ਭਾਰਤ ਤੇ UAE ਵਿਚਾਲੇ ਵਧਦੇ ਆਰਥਿਕ ਤੇ ਰਣਨੀਤਕ ਸਬੰਧਾਂ ਦੀ ਸਮੀਖਿਆ ਕੀਤੀ। ਇਸ ਬੈਠਕ ਤੋਂ ਬਾਅਦ ਖ਼ਬਰ ਆਈ ਕਿ UAE ਦੀ ਇੰਟਰਨੈਸ਼ਨਲ ਹੋਲਡਿੰਗ ਕੰਪਨੀ ਭਾਰਤ ਦੇ ਓਡੀਸ਼ਾ 'ਚ ਇਕ ਇੰਟੀਗ੍ਰੇਟਿਡ ਗ੍ਰੀਨਫੀਲਡ ਐਲੂਮੀਨੀਅਮ ਪ੍ਰੋਜੈਕਟ ਲਈ 11.5 ਅਰਬ ਡਾਲਰ, ਯਾਨੀ ਲਗਭਗ 1.10 ਲੱਖ ਕਰੋੜ ਰੁਪਏ ਦਾ ਵੱਡਾ ਨਿਵੇਸ਼ ਕਰੇਗੀ।

ਇਸ ਬੈਠਕ ਦਾ ਮੁੱਖ ਫੋਕਸ ਭਾਰਤ 'ਚ UAE ਦੀਆਂ ਨਿਵੇਸ਼ ਯੋਜਨਾਵਾਂ 'ਤੇ ਰਿਹਾ। ਮੋਦੀ ਅਤੇ ਸ਼ੇਖ ਖਾਲਿਦ ਨੇ UAE ਦੀ ਇੰਟਰਨੈਸ਼ਨਲ ਹੋਲਡਿੰਗ ਕੰਪਨੀ ਵੱਲੋਂ ਓਡੀਸ਼ਾ 'ਚ ਇੰਟੀਗ੍ਰੇਟਿਡ ਗ੍ਰੀਨਫੀਲਡ ਐਲੂਮੀਨੀਅਮ ਪ੍ਰੋਜੈਕਟ 'ਚ 11.5 ਅਰਬ ਡਾਲਰ ਦੇ ਨਿਵੇਸ਼ ਦੇ ਐਲਾਨ ਦਾ ਸਵਾਗਤ ਕੀਤਾ। ਉਮੀਦ ਜਤਾਈ ਜਾ ਰਹੀ ਹੈ ਕਿ ਇਹ ਪ੍ਰੋਜੈਕਟ ਭਾਰਤ ਦਾ ਸਭ ਤੋਂ ਵੱਡਾ ਇੰਟੀਗ੍ਰੇਟਿਡ ਐਲੂਮੀਨੀਅਮ ਨਿਵੇਸ਼ ਹੋਵੇਗਾ ਅਤੇ ਓਡੀਸ਼ਾ ਨੂੰ ਗਲੋਬਲ ਐਲੂਮੀਨੀਅਮ ਮੈਨਿਊਫੈਕਚਰਿੰਗ ਹੱਬ ਵਜੋਂ ਸਥਾਪਿਤ ਕਰਨ 'ਚ ਮਦਦ ਕਰੇਗਾ।

ਕੌਣ ਹੈ UAE ਦੀ ਇੰਟਰਨੈਸ਼ਨਲ ਹੋਲਡਿੰਗ ਕੰਪਨੀ ਦਾ ਮਾਲਕ?

ਸੰਯੁਕਤ ਅਰਬ ਅਮੀਰਾਤ ਦੀ ਇੰਟਰਨੈਸ਼ਨਲ ਹੋਲਡਿੰਗ ਕੰਪਨੀ (IHC) 'ਚ ਅਬੂ ਧਾਬੀ ਦੇ ਬਿਜ਼ਨੈੱਸ ਗਰੁੱਪ ‘ਰੌਇਲ ਗਰੁੱਪ’ ਦੀ ਵੱਡੀ ਹਿੱਸੇਦਾਰੀ ਹੈ। ਰੌਇਲ ਗਰੁੱਪ 'ਤੇ ਉੱਥੋਂ ਦੇ ਸ਼ਾਸਕ ਅਲ ਨਾਹਯਾਨ ਪਰਿਵਾਰ ਦਾ ਕੰਟਰੋਲ ਹੈ ਅਤੇ ਇਸ ਪਰਿਵਾਰ ਦੀ ਕੰਪਨੀ 'ਚ 61 ਫ਼ੀਸਦੀ ਹਿੱਸੇਦਾਰੀ ਦੱਸੀ ਗਈ ਹੈ।

ਇੰਟਰਨੈਸ਼ਨਲ ਹੋਲਡਿੰਗ ਕੰਪਨੀ (IHC) ਦੀ ਅਗਵਾਈ ਤੇ ਦੇਖਰੇਖ UAE ਦੇ ਨੈਸ਼ਨਲ ਸਕਿਓਰਿਟੀ ਐਡਵਾਈਜ਼ਰ ਤੇ UAE ਦੇ ਰਾਸ਼ਟਰਪਤੀ ਸ਼ੇਖ ਮੁਹੰਮਦ ਬਿਨ ਜਾਇਦ ਅਲ ਨਾਹਯਾਨ ਦੇ ਭਰਾ ਸ਼ੇਖ ਤਹਨੂਨ ਬਿਨ ਜਾਇਦ ਅਲ ਨਾਹਯਾਨ ਕਰਦੇ ਹਨ। ਉਹ IHC ਦੇ ਚੇਅਰਮੈਨ ਵੀ ਹਨ। IHC ਇਕ ਪਬਲਿਕਲੀ ਟ੍ਰੇਡਡ ਕੰਪਨੀ ਹੈ ਜੋ ਅਬੂ ਧਾਬੀ ਸਕਿਓਰਿਟੀਜ਼ ਐਕਸਚੇਂਜ (ADX) 'ਤੇ ਲਿਸਟਿਡ ਹੈ। ਇਸ ਦਾ ਮਤਲਬ ਹੈ ਕਿ ਕੰਪਨੀ 'ਚ ਹੋਰ ਸੰਸਥਾਗਤ ਅਤੇ ਪਬਲਿਕ ਸ਼ੇਅਰਹੋਲਡਰ ਵੀ ਹਨ।

India-UAE ties have been transformed over the last few years. Now, we are raising our ambitions even higher.

Delighted to meet His Highness Sheikh Khaled bin Mohamed bin Zayed Al Nahyan.

Discussed taking our Strategic Partnership forward across defence, AI, space, critical… pic.twitter.com/omzRK4ccuP

— Narendra Modi (@narendramodi) September 12, 2026

BRICS ਨੂੰ ਹੋਰ ਮਜ਼ਬੂਤ ਬਣਾਉਣ 'ਤੇ ਸਹਿਮਤੀ

ਨਵੀਂ ਦਿੱਲੀ ਦੇ ਹੈਦਰਾਬਾਦ ਹਾਊਸ 'ਚ ਅਬੂ ਧਾਬੀ ਦੇ ਕ੍ਰਾਊਨ ਪ੍ਰਿੰਸ ਖਾਲਿਦ ਬਿਨ ਮੁਹੰਮਦ ਬਿਨ ਜਾਇਦ ਅਲ ਨਾਹਯਾਨ ਤੇ ਪ੍ਰਧਾਨ ਮੰਤਰੀ ਮੋਦੀ ਵਿਚਾਲੇ ਹੋਈ ਇਸ ਬੈਠਕ ਦੌਰਾਨ ਦੋਵਾਂ ਆਗੂਆਂ ਨੇ ਇਸ ਗੱਲ 'ਤੇ ਸਹਿਮਤੀ ਜਤਾਈ ਕਿ ਭਾਰਤ ਅਤੇ UAE BRICS ਸਹਿਯੋਗ ਨੂੰ ਮਜ਼ਬੂਤ ਕਰਨ ਅਤੇ ਆਪਣੇ ਸਾਂਝੇ ਹਿੱਤਾਂ ਨੂੰ ਅੱਗੇ ਵਧਾਉਣ ਲਈ ਇਸ ਮੰਚ ਰਾਹੀਂ ਮਿਲ ਕੇ ਕੰਮ ਕਰਦੇ ਰਹਿਣਗੇ। ਉਨ੍ਹਾਂ ਨੇ ਕਈ ਖੇਤਰਾਂ 'ਚ ਦੁਵੱਲੇ ਸਬੰਧਾਂ 'ਚ ਹੋਈ ਪ੍ਰਗਤੀ ਦੀ ਸਮੀਖਿਆ ਕੀਤੀ। ਦੋਵਾਂ ਦੇਸ਼ਾਂ ਵਿਚਾਲੇ ਨਿਵੇਸ਼ ਅਤੇ ਆਰਥਿਕ ਸਹਿਯੋਗ ਨੂੰ ਹੋਰ ਡੂੰਘਾ ਕਰਨ 'ਚ UAE ਦੇ ਸਭ ਤੋਂ ਨਵੇਂ ਸਾਵਰੇਨ ਇਨਵੈਸਟਮੈਂਟ ਫੰਡ ‘L’Imad’ ਦੀ ਭੂਮਿਕਾ 'ਤੇ ਵੀ ਚਰਚਾ ਕੀਤੀ ਗਈ।

2024 'ਚ BRICS ਦਾ ਹਿੱਸਾ ਬਣਿਆ ਸੀ UAE

ਜਨਵਰੀ 2024 'ਚ ਮਿਸਰ, ਇਥੋਪੀਆ, ਈਰਾਨ ਅਤੇ ਸਾਊਦੀ ਅਰਬ ਦੇ ਨਾਲ UAE ਵੀ BRICS ਦਾ ਪੂਰਨ ਮੈਂਬਰ ਬਣਿਆ ਸੀ, ਜਦਕਿ ਇੰਡੋਨੇਸ਼ੀਆ ਜਨਵਰੀ 2025 'ਚ BRICS ਸਮੂਹ ਦਾ ਪੂਰਨ ਮੈਂਬਰ ਬਣਿਆ ਸੀ।