- ਸ਼ਹਿਰ ਚੁਣੋ
- ਈ-ਪੇਪਰ
- ਵੈੱਬ ਸਟੋਰੀਜ਼
- ਸ਼ਹਿਰ ਚੁਣੋ
- ਈ-ਪੇਪਰ
- ਵੈੱਬ ਸਟੋਰੀਜ਼
ਸ਼ੇਅਰ ਬਾਜ਼ਾਰ ਦੀ ਗਿਰਾਵਟ ਤੋਂ ਨਾ ਡਰੋ, ਨਿਵੇਸ਼ ਦਾ ਬਣ ਸਕਦੈ ਵੱਡਾ ਮੌਕਾ! 3 ਸਾਲਾਂ 'ਚ 50% ਰਿਟਰਨ ਦੀ ਉਮੀਦ, ਦਿੱਗਜ ਫੰਡ ਮੈਨੇਜਰ ਨੇ ਅੰਕੜਿਆਂ ਨਾਲ ਕੀਤਾ ਦਾਅਵਾ
ਮਨੀਕੰਟਰੋਲ ਦੀ ਰਿਪੋਰਟ ਮੁਤਾਬਕ, ਦੇਸ਼ ਦੇ ਪ੍ਰਮੁੱਖ ਫੰਡ ਮੈਨੇਜਰ ਪ੍ਰਸ਼ਾਂਤ ਜੈਨ ਦਾ ਮੰਨਣਾ ਹੈ ਕਿ ਭਾਰਤੀ ਇਕੁਇਟੀ ਬਾਜ਼ਾਰ 'ਚ ਲੰਬੇ ਸਮੇਂ ਤੋਂ ਚੱਲ ਰਹੀ ਸੁਸਤੀ ਖ਼ਤਮ ਹੋਣ ਦੇ ਨੇੜੇ ਹੋ ਸਕਦੀ ਹੈ। ਅਜਿਹੇ 'ਚ ਉਨ੍ਹਾਂ ਨਿਵੇਸ਼ਕਾਂ ਲਈ ਮੌਕਾ ਬਣ ਸਕਦਾ ਹੈ, ਜੋ ਥੋੜ੍ਹੇ ਸਮੇਂ ਦੇ ਉਤਰਾਅ-ਚੜ੍ਹਾਅ ਦੀ ਬਜਾਏ ਲੰਬੇ ਸਮੇਂ ਦੇ ਨਜ਼ਰੀਏ ਨਾਲ ਨਿਵੇਸ਼ ਕਰਦੇ ਹਨ।
Posted By Seema Anand
Publish Date: Fri, 09 Oct 2026 02:00 PM (IST)
Updated Date: Fri, 09 Oct 2026 02:02 PM (IST)
ਬਿਜ਼ਨੈੱਸ ਡੈਸਕ. ਨਵੀਂ ਦਿੱਲੀ : ਸ਼ੇਅਰ ਬਾਜ਼ਾਰ 'ਚ ਅਗਸਤ ਤੋਂ ਸ਼ੁਰੂ ਹੋਈ ਗਿਰਾਵਟ ਦਾ ਸਿਲਸਿਲਾ ਅਕਤੂਬਰ ਤੱਕ ਜਾਰੀ ਹੈ। ਇਸ ਸਾਲ ਨਿਫਟੀ (Nifty) ਆਪਣੇ ਸਰਵਕਾਲੀ ਉੱਚ ਪੱਧਰ ਤੋਂ ਕਰੀਬ 15 ਫ਼ੀਸਦੀ ਤੱਕ ਡਿੱਗ ਚੁੱਕਾ ਹੈ। ਪਿਛਲੇ ਕਈ ਸਾਲਾਂ 'ਚ ਇਹ ਪਹਿਲੀ ਵਾਰ ਹੈ ਜਦੋਂ ਬਾਜ਼ਾਰ 'ਚ ਇੰਨੀ ਵੱਡੀ ਗਿਰਾਵਟ ਦੇਖਣ ਨੂੰ ਮਿਲੀ ਹੈ।
ਮਨੀਕੰਟਰੋਲ ਦੀ ਰਿਪੋਰਟ ਮੁਤਾਬਕ, ਦੇਸ਼ ਦੇ ਪ੍ਰਮੁੱਖ ਫੰਡ ਮੈਨੇਜਰ ਪ੍ਰਸ਼ਾਂਤ ਜੈਨ ਦਾ ਮੰਨਣਾ ਹੈ ਕਿ ਭਾਰਤੀ ਇਕੁਇਟੀ ਬਾਜ਼ਾਰ 'ਚ ਲੰਬੇ ਸਮੇਂ ਤੋਂ ਚੱਲ ਰਹੀ ਸੁਸਤੀ ਖ਼ਤਮ ਹੋਣ ਦੇ ਨੇੜੇ ਹੋ ਸਕਦੀ ਹੈ। ਅਜਿਹੇ 'ਚ ਉਨ੍ਹਾਂ ਨਿਵੇਸ਼ਕਾਂ ਲਈ ਮੌਕਾ ਬਣ ਸਕਦਾ ਹੈ, ਜੋ ਥੋੜ੍ਹੇ ਸਮੇਂ ਦੇ ਉਤਰਾਅ-ਚੜ੍ਹਾਅ ਦੀ ਬਜਾਏ ਲੰਬੇ ਸਮੇਂ ਦੇ ਨਜ਼ਰੀਏ ਨਾਲ ਨਿਵੇਸ਼ ਕਰਦੇ ਹਨ।
3P ਇਨਵੈਸਟਮੈਂਟ ਮੈਨੇਜਰਜ਼ ਦੀ ਸਤੰਬਰ 2026 ਦੀ ਤਿਮਾਹੀ ਰਿਪੋਰਟ 'ਚ ਪ੍ਰਸ਼ਾਂਤ ਜੈਨ ਨੇ ਕਿਹਾ ਹੈ ਕਿ ਭਾਰਤੀ ਬਾਜ਼ਾਰ ਅਗਲੇ ਤਿੰਨ ਸਾਲਾਂ 'ਚ 40 ਤੋਂ 50 ਫ਼ੀਸਦੀ ਤੱਕ ਰਿਟਰਨ ਦੇ ਸਕਦੇ ਹਨ। ਉਨ੍ਹਾਂ ਮੁਤਾਬਕ, ਗਿਰਾਵਟ ਦਾ ਦੌਰ ਥੋੜ੍ਹੇ ਸਮੇਂ ਲਈ ਹੀ ਰਹਿਣ ਦੀ ਸੰਭਾਵਨਾ ਹੈ। ਉਨ੍ਹਾਂ ਨੂੰ ਉਮੀਦ ਹੈ ਕਿ ਵਿਦੇਸ਼ੀ ਸੰਸਥਾਗਤ ਨਿਵੇਸ਼ਕਾਂ (FII) ਵੱਲੋਂ ਸ਼ੇਅਰਾਂ ਦੀ ਵਿਕਰੀ ਦਾ ਮੌਜੂਦਾ ਦੌਰ ਦਸੰਬਰ ਦੇ ਮੱਧ ਤੱਕ ਰੁਕ ਸਕਦਾ ਹੈ। ਇਸ ਨਾਲ ਬਾਜ਼ਾਰ ਦਬਾਅ ਤੋਂ ਉਭਰ ਕੇ ਲਗਾਤਾਰ ਰਿਕਵਰੀ ਵੱਲ ਵਧ ਸਕਦਾ ਹੈ।
'ਬਾਜ਼ਾਰ 'ਚ ਐਂਟਰੀ ਕਰਨ ਦੇ ਚੰਗੇ ਮੌਕੇ'
ਰਿਪੋਰਟ 'ਚ ਕਿਹਾ ਗਿਆ ਹੈ ਕਿ ਆਉਣ ਵਾਲੇ ਕੁਝ ਹਫ਼ਤੇ ਜਾਂ ਮਹੀਨੇ ਸ਼ੇਅਰ ਬਾਜ਼ਾਰ 'ਚ ਨਿਵੇਸ਼ ਸ਼ੁਰੂ ਕਰਨ ਲਈ ਚੰਗਾ ਮੌਕਾ ਹੋ ਸਕਦੇ ਹਨ। ਭਾਰਤੀ ਇਕੁਇਟੀ ਬਾਜ਼ਾਰ ਪਿਛਲੇ ਦੋ ਸਾਲਾਂ ਤੋਂ ਮੁਸ਼ਕਲ ਦੌਰ 'ਚੋਂ ਲੰਘ ਰਿਹਾ ਹੈ।
ਸਤੰਬਰ 2024 ਤੋਂ ਸਤੰਬਰ 2026 ਦਰਮਿਆਨ ਨਿਫਟੀ 'ਚ 12.4 ਫ਼ੀਸਦੀ ਦੀ ਗਿਰਾਵਟ ਦਰਜ ਕੀਤੀ ਗਈ, ਜਦਕਿ ਇਸ ਦੌਰਾਨ ਵਿਦੇਸ਼ੀ ਨਿਵੇਸ਼ਕਾਂ ਨੇ ਭਾਰਤੀ ਇਕੁਇਟੀ ਬਾਜ਼ਾਰ 'ਚੋਂ ਕੁੱਲ 58 ਅਰਬ ਡਾਲਰ ਦੇ ਸ਼ੇਅਰ ਵੇਚੇ। ਇਸ ਦੇ ਬਾਵਜੂਦ ਵਿੱਤੀ ਸਾਲ 2025 ਅਤੇ 2026 ਦੌਰਾਨ ਭਾਰਤੀ ਅਰਥਵਿਵਸਥਾ ਸਾਲਾਨਾ ਔਸਤਨ ਕਰੀਬ 7.5 ਫ਼ੀਸਦੀ ਦੀ ਦਰ ਨਾਲ ਵਧਦੀ ਰਹੀ।
ਅਜਿਹੇ 'ਚ ਦੇਸ਼ ਦੀ ਆਰਥਿਕ ਕਾਰਗੁਜ਼ਾਰੀ ਅਤੇ ਸ਼ੇਅਰ ਬਾਜ਼ਾਰ ਤੋਂ ਮਿਲਣ ਵਾਲੇ ਰਿਟਰਨ ਵਿਚਾਲੇ ਦਿਖਾਈ ਦੇਣ ਵਾਲਾ ਇਹ ਫ਼ਰਕ ਨਿਵੇਸ਼ ਦੇ ਮੌਕੇ ਵੱਲ ਇਸ਼ਾਰਾ ਕਰ ਸਕਦਾ ਹੈ।
ਬਾਜ਼ਾਰ 'ਚ ਗਿਰਾਵਟ ਦੇ ਪਿੱਛੇ ਬਾਹਰੀ ਕਾਰਨ
ਭਾਰਤੀ ਸ਼ੇਅਰ ਬਾਜ਼ਾਰ ਨੂੰ ਭੂ-ਸਿਆਸੀ ਟਕਰਾਅ, ਟੈਰਿਫ, ਸੋਨੇ ਦੀ ਦਰਾਮਦ 'ਤੇ ਸਖ਼ਤੀ, ਵਿਦੇਸ਼ੀ ਸਿੱਧੇ ਨਿਵੇਸ਼ (FDI) ਦੀ ਵਾਪਸੀ ਅਤੇ ਕੱਚੇ ਤੇਲ ਦੀਆਂ ਕੀਮਤਾਂ 'ਚ ਉਤਰਾਅ-ਚੜ੍ਹਾਅ ਵਰਗੀਆਂ ਚੁਣੌਤੀਆਂ ਦਾ ਸਾਹਮਣਾ ਕਰਨਾ ਪਿਆ ਹੈ। ਇਸ ਦੇ ਨਾਲ ਹੀ, ਆਰਟੀਫ਼ੀਸ਼ੀਅਲ ਇੰਟੈਲੀਜੈਂਸ (AI) ਅਤੇ ਸੈਮੀਕੰਡਕਟਰ ਖੇਤਰ 'ਚ ਦੁਨੀਆ ਭਰ 'ਚ ਵਧ ਰਹੇ ਨਿਵੇਸ਼ ਕਾਰਨ ਵਿਦੇਸ਼ੀ ਪੂੰਜੀ ਦੱਖਣੀ ਕੋਰੀਆ ਵਰਗੇ ਬਾਜ਼ਾਰਾਂ ਵੱਲ ਮੁੜੀ ਹੈ, ਜਿਨ੍ਹਾਂ ਦਾ ਇਨ੍ਹਾਂ ਖੇਤਰਾਂ ਨਾਲ ਸਿੱਧਾ ਸਬੰਧ ਹੈ।
ਹਾਲੀਆ ਗਿਰਾਵਟ ਦਾ ਇਕ ਹੋਰ ਕਾਰਨ ਅਮਰੀਕਾ ਦੇ 10 ਸਾਲਾ ਟ੍ਰੇਜ਼ਰੀ ਬਾਂਡ ਦੀ ਯੀਲਡ ਦਾ ਮਨੋਵਿਗਿਆਨਕ ਤੌਰ 'ਤੇ ਅਹਿਮ 5 ਫ਼ੀਸਦੀ ਦਾ ਪੱਧਰ ਪਾਰ ਕਰਨਾ ਦੱਸਿਆ ਗਿਆ ਹੈ। ਅਮਰੀਕਾ 'ਚ ਬਾਂਡ ਯੀਲਡ ਵਧਣ ਨਾਲ ਡਾਲਰ ਨਾਲ ਜੁੜੇ ਨਿਵੇਸ਼ ਵਧੇਰੇ ਆਕਰਸ਼ਕ ਹੋ ਜਾਂਦੇ ਹਨ। ਇਸ ਨਾਲ ਦੁਨੀਆ ਭਰ 'ਚ ਪੂੰਜੀ ਦੀ ਲਾਗਤ ਵਧਦੀ ਹੈ ਅਤੇ ਸ਼ੇਅਰਾਂ ਦੀਆਂ ਕੀਮਤਾਂ ਦੇ ਮੁਲਾਂਕਣ 'ਤੇ ਦਬਾਅ ਪੈਂਦਾ ਹੈ।
ਪਿਛਲੇ 25 ਸਾਲਾਂ ਦੇ ਅੰਕੜਿਆਂ ਦਾ ਕੀਤਾ ਵਿਸ਼ਲੇਸ਼ਣ
ਇਸ ਰਿਪੋਰਟ 'ਚ ਇਤਿਹਾਸਕ ਅੰਕੜਿਆਂ ਦੇ ਆਧਾਰ 'ਤੇ ਵੀ ਦਲੀਲ ਦਿੱਤੀ ਗਈ ਹੈ। 3P ਇਨਵੈਸਟਮੈਂਟ ਮੈਨੇਜਰਜ਼ ਨੇ ਪਿਛਲੇ 25 ਸਾਲਾਂ ਦੇ ਨਿਫਟੀ 50 ਟੋਟਲ ਰਿਟਰਨ ਇੰਡੈਕਸ ਦਾ ਵਿਸ਼ਲੇਸ਼ਣ ਕੀਤਾ।
ਇਸ ਤਹਿਤ ਮਹੀਨੇ ਦੇ ਅੰਤ 'ਤੇ ਮਾਪੀ ਗਈ ਦੋ ਸਾਲਾਂ ਦੀ ਰੋਲਿੰਗ ਮਿਆਦ ਦੌਰਾਨ 15 ਫ਼ੀਸਦੀ ਜਾਂ ਇਸ ਤੋਂ ਵੱਧ ਗਿਰਾਵਟ ਆਉਣ ਤੋਂ ਬਾਅਦ ਅਗਲੇ ਤਿੰਨ ਸਾਲਾਂ 'ਚ ਮਿਲੇ ਰਿਟਰਨ ਦਾ ਅਧਿਐਨ ਕੀਤਾ ਗਿਆ। ਨਤੀਜਿਆਂ ਮੁਤਾਬਕ, ਬਾਜ਼ਾਰ 'ਚ ਲੰਬੇ ਸਮੇਂ ਤੱਕ ਕਮਜ਼ੋਰੀ ਰਹਿਣ ਤੋਂ ਬਾਅਦ ਕਈ ਵਾਰ ਚੰਗਾ ਰਿਟਰਨ ਮਿਲਿਆ ਹੈ। ਹਾਲਾਂਕਿ, ਪਿਛਲੇ ਪ੍ਰਦਰਸ਼ਨ ਦੇ ਆਧਾਰ 'ਤੇ ਭਵਿੱਖ ਦੇ ਰਿਟਰਨ ਦੀ ਗਾਰੰਟੀ ਨਹੀਂ ਦਿੱਤੀ ਜਾ ਸਕਦੀ।