ਬਿਰਲਾ ਦੀ ਫਲੈਗਸ਼ਿਪ ਕੰਪਨੀ 'ਤੇ ਕਸਟਮ ਵਿਭਾਗ ਦਾ ਛਾਪਾ, ਸਰਚ ਆਪਰੇਸ਼ਨ 'ਤੇ ਕੰਪਨੀ ਨੇ ਦਿੱਤਾ ਵੱਡਾ ਅਪਡੇਟ

ਜਾਗਰਣ ਬਿਜ਼ਨੈੱਸ, ਨਵੀਂ ਦਿੱਲੀ : ਕੁਮਾਰ ਮੰਗਲਮ ਬਿਰਲਾ ਦੀ 2,23,345 ਕਰੋੜ ਰੁਪਏ ਮਾਰਕੀਟ ਕੈਪ ਵਾਲੀ ਫਲੈਗਸ਼ਿਪ ਕੰਪਨੀ ਨੇ ਵੱਡਾ ਅਪਡੇਟ ਦਿੱਤਾ ਹੈ। 81 ਸਾਲ ਪੁਰਾਣੀ ਅਤੇ 1947 'ਚ ਬਣੀ ਗ੍ਰਾਸਿਮ ਇੰਡਸਟ੍ਰੀਜ਼ ਨੇ ਦੱਸਿਆ ਹੈ ਕਿ ਇੰਦੌਰ 'ਚ ਕਸਟਮਜ਼ ਕਮਿਸ਼ਨਰ ਦੇ ਦਫ਼ਤਰ ਨੇ ਮੱਧ ਪ੍ਰਦੇਸ਼ ਦੇ ਉੱਜੈਨ ਜ਼ਿਲ੍ਹੇ ਦੇ ਨਾਗਦਾ 'ਚ ਬਿਰਲਾਗ੍ਰਾਮ ਸਥਿਤ ਉਸ ਦੀ ਸੈਲੂਲੋਜ਼ਿਕ ਸਟੈਪਲ ਫਾਈਬਰ ਬਣਾਉਣ ਵਾਲੀ ਯੂਨਿਟ 'ਚ ਤਲਾਸ਼ੀ ਲਈ ਹੈ। ਕਸਟਮਜ਼ ਐਕਟ, 1962 ਦੀ ਧਾਰਾ 105 ਤਹਿਤ ਇਹ ਤਲਾਸ਼ੀ ਇੰਪੋਰਟ-ਐਕਸਪੋਰਟ ਲੈਣ-ਦੇਣ ਦੀ ਜਾਂਚ ਦੇ ਸਿਲਸਿਲੇ 'ਚ ਲਈ ਗਈ ਸੀ।

ਕਸਟਮਜ਼ ਅਧਿਕਾਰੀਆਂ ਨੇ 11 ਸਤੰਬਰ 2026 ਦੀ ਸ਼ਾਮ ਨੂੰ ਤਲਾਸ਼ੀ ਸ਼ੁਰੂ ਕੀਤੀ ਅਤੇ 12 ਸਤੰਬਰ 2026 ਦੀ ਸਵੇਰ ਤਕ ਆਪਣੀ ਕਾਰਵਾਈ ਪੂਰੀ ਕਰ ਲਈ। ਇਸ ਦੌਰਾਨ ਅਧਿਕਾਰੀਆਂ ਨੇ ਕੰਪਨੀ ਦੇ ਰਿਕਾਰਡ ਦੀ ਜਾਂਚ ਕੀਤੀ ਅਤੇ ਕੰਪਨੀ ਦੀਆਂ ਇੰਪੋਰਟ-ਐਕਸਪੋਰਟ ਗਤੀਵਿਧੀਆਂ ਨਾਲ ਜੁੜੀ ਜਾਣਕਾਰੀ ਇਕੱਠੀ ਕੀਤੀ। ਆਪਣੀ ਜਾਣਕਾਰੀ 'ਚ ਗ੍ਰਾਸਿਮ ਇੰਡਸਟ੍ਰੀਜ਼ ਨੇ ਦੱਸਿਆ ਕਿ ਯੂਨਿਟ ਨੇ ਅਧਿਕਾਰੀਆਂ ਨੂੰ ਪੂਰਾ ਸਹਿਯੋਗ ਦਿੱਤਾ, ਮੰਗੇ ਗਏ ਦਸਤਾਵੇਜ਼ ਮੁਹੱਈਆ ਕਰਵਾਏ ਅਤੇ ਸਬੰਧਤ ਕਰਮਚਾਰੀਆਂ ਨਾਲ ਗੱਲਬਾਤ 'ਚ ਮਦਦ ਕੀਤੀ।

ਕੋਈ 'ਸ਼ੋਅ ਕਾਜ਼ ਨੋਟਿਸ' ਜਾਂ ਹੁਕਮ ਜਾਰੀ ਨਹੀਂ ਕੀਤਾ ਗਿਆ

ਆਦਿਤਿਆ ਬਿਰਲਾ ਗਰੁੱਪ ਦੇ ਬਿਆਨ ਅਨੁਸਾਰ, ਜਾਣਕਾਰੀ ਦਾਖ਼ਲ ਕਰਨ ਦੀ ਤਰੀਕ ਤਕ ਅਧਿਕਾਰੀਆਂ ਵੱਲੋਂ ਕੋਈ 'ਸ਼ੋਅ ਕਾਜ਼ ਨੋਟਿਸ' ਜਾਂ ਹੁਕਮ ਜਾਰੀ ਨਹੀਂ ਕੀਤਾ ਗਿਆ ਹੈ। ਅਹਿਮ ਗੱਲ ਇਹ ਹੈ ਕਿ ਗ੍ਰਾਸਿਮ ਇੰਡਸਟ੍ਰੀਜ਼ ਨੇ ਕਿਹਾ ਹੈ ਕਿ ਇਸ ਕਾਰਵਾਈ ਨਾਲ ਉਸ ਦੇ ਵਿੱਤੀ ਪ੍ਰਦਰਸ਼ਨ ਜਾਂ ਕੰਮਕਾਜ 'ਤੇ ਕੋਈ ਖਾਸ ਅਸਰ ਪੈਣ ਦੀ ਉਮੀਦ ਨਹੀਂ ਹੈ ਅਤੇ ਕਾਰੋਬਾਰੀ ਗਤੀਵਿਧੀਆਂ ਬਿਨਾਂ ਕਿਸੇ ਰੁਕਾਵਟ ਦੇ ਚੱਲਦੀਆਂ ਰਹਿਣਗੀਆਂ।

ਕੰਪਨੀ ਨੇ ਅਧਿਕਾਰੀਆਂ ਨਾਲ ਸਹਿਯੋਗ ਜਾਰੀ ਰੱਖਣ ਅਤੇ ਜਾਣਕਾਰੀ ਦੇਣ ਨਾਲ ਜੁੜੀ ਕਿਸੇ ਵੀ ਕਾਨੂੰਨੀ ਜ਼ਿੰਮੇਵਾਰੀ ਨੂੰ ਪੂਰਾ ਕਰਨ ਦਾ ਵਾਅਦਾ ਕੀਤਾ ਹੈ। ਇਹ ਜਾਣਕਾਰੀ SEBI (ਲਿਸਟਿੰਗ ਆਬਲਿਗੇਸ਼ਨਜ਼ ਐਂਡ ਡਿਸਕਲੋਜ਼ਰ ਰਿਕਵਾਇਰਮੈਂਟਸ) ਰੈਗੂਲੇਸ਼ਨਜ਼, 2015 ਦੇ ਰੈਗੂਲੇਸ਼ਨ 30 ਅਤੇ SEBI ਮਾਸਟਰ ਸਰਕੁਲਰ ਤਹਿਤ ਸੌਂਪੀ ਗਈ ਰਿਪੋਰਟ 'ਚ ਵਿਸਥਾਰ ਨਾਲ ਦਿੱਤੀ ਗਈ ਹੈ।

12 ਸਤੰਬਰ 2026 ਨੂੰ ਜਾਰੀ ਗ੍ਰਾਸਿਮ ਇੰਡਸਟ੍ਰੀਜ਼ ਦੀ ਸੂਚਨਾ ਨੂੰ ਆਮ ਲੋਕਾਂ ਅਤੇ ਰਿਕਾਰਡ ਲਈ ਕੰਪਨੀ ਦੀ ਵੈੱਬਸਾਈਟ 'ਤੇ ਉਪਲਬਧ ਕਰਵਾਇਆ ਗਿਆ ਹੈ।

ਆਦਿਤਿਆ ਬਿਰਲਾ ਗਰੁੱਪ ਦੀ ਪ੍ਰਮੁੱਖ ਕੰਪਨੀ ਗ੍ਰਾਸਿਮ ਇੰਡਸਟ੍ਰੀਜ਼ ਇਸ ਪੂਰੀ ਪ੍ਰਕਿਰਿਆ ਦੌਰਾਨ ਸਟੇਕਹੋਲਡਰਜ਼ ਨਾਲ ਪਾਰਦਰਸ਼ਤਾ ਬਣਾਈ ਰੱਖਣ 'ਤੇ ਧਿਆਨ ਦੇ ਰਹੀ ਹੈ, ਜੋ ਉਸ ਦੇ ਕੰਪਲਾਇੰਸ ਅਤੇ ਕਾਰਪੋਰੇਟ ਗਵਰਨੈਂਸ ਸਟੈਂਡਰਡਜ਼ ਦੇ ਅਨੁਕੂਲ ਹੈ।