ਟਾਟਾ ਸੰਸ ਦੀ ਲਿਸਟਿੰਗ 'ਤੇ ਵਧਿਆ ਵਿਵਾਦ, ਸੀਨੀਅਰ ਟਰੱਸਟੀਆਂ ਨੇ ਵੇਣੂ ਸ਼੍ਰੀਨਿਵਾਸਨ ਤੇ ਵਿਜੈ ਸਿੰਘ 'ਤੇ ਲਾਏ ਗੰਭੀਰ ਦੋਸ਼

ਆਈਏਐਨਐਸ, ਨਵੀਂ ਦਿੱਲੀ : ਟਾਟਾ ਸਮੂਹ ਦੀ ਹੋਲਡਿੰਗ ਕੰਪਨੀ Tata Sons ਦੀ ਸੰਭਾਵਿਤ ਲਿਸਟਿੰਗ ਨੂੰ ਲੈ ਕੇ ਟਾਟਾ ਟਰੱਸਟਸ ਦੇ ਅੰਦਰ ਮਤਭੇਦ ਹੋਰ ਡੂੰਘੇ ਹੁੰਦੇ ਨਜ਼ਰ ਆ ਰਹੇ ਹਨ। ਇਕ ਰਿਪੋਰਟ ਮੁਤਾਬਕ, ਸਰ ਦੋਰਾਬਜੀ ਟਾਟਾ ਟਰੱਸਟ (SDTT) ਦੇ ਸੀਨੀਅਰ ਟਰੱਸਟੀਆਂ ਨੇ ਸਾਥੀ ਟਰੱਸਟੀਆਂ ਵੇਣੂ ਸ਼੍ਰੀਨਿਵਾਸਨ ਅਤੇ ਵਿਜੈ ਸਿੰਘ 'ਤੇ ਬੋਰਡ ਦੇ ਪ੍ਰਸਤਾਵਾਂ ਨੂੰ ਕਮਜ਼ੋਰ ਕਰਨ ਅਤੇ ਆਪਣੇ ਨਿਆਸੀ ਫਰਜ਼ਾਂ ਦੀ ਉਲੰਘਣਾ ਕਰਨ ਦਾ ਦੋਸ਼ ਲਗਾਇਆ ਹੈ।

ਇਕ ਮੀਡੀਆ ਰਿਪੋਰਟ ਮੁਤਾਬਕ, ਇਹ ਦੋਸ਼ ਇਕ ਪੱਤਰ ਰਾਹੀਂ ਸਾਹਮਣੇ ਆਏ ਹਨ, ਜਿਸ 'ਤੇ ਨੋਏਲ ਐੱਨ. ਟਾਟਾ, ਡੇਰੀਅਸ ਜੇ. ਖੰਬਾਟਾ, ਨੇਵਿਲ ਐੱਨ. ਟਾਟਾ ਅਤੇ ਭਾਸਕਰ ਭੱਟ ਦੇ ਦਸਤਖ਼ਤ ਦੱਸੇ ਗਏ ਹਨ। ਰਿਪੋਰਟ ਅਨੁਸਾਰ, ਇਹ ਘਟਨਾਕ੍ਰਮ ਟਾਟਾ ਟਰੱਸਟਸ ਦੇ ਅੰਦਰ ਟਾਟਾ ਸੰਸ ਦੀ ਮਾਲਕੀ ਸੰਰਚਨਾ ਅਤੇ ਇਸ ਦੀ ਲਿਸਟਿੰਗ ਦੀ ਸਥਿਤੀ ਨੂੰ ਲੈ ਕੇ ਵਧ ਰਹੇ ਮਤਭੇਦਾਂ ਨੂੰ ਦਰਸਾਉਂਦਾ ਹੈ। ਪੱਤਰ 'ਚ ਕਿਹਾ ਗਿਆ ਹੈ ਕਿ ਟਾਟਾ ਸੰਸ ਨੂੰ ਅਨਲਿਸਟਿਡ ਰੱਖਣਾ ਲੰਬੇ ਸਮੇਂ ਤੋਂ ਟਾਟਾ ਟਰੱਸਟਸ ਅਤੇ ਕੰਪਨੀ ਦੋਵਾਂ ਦੀ ਸਥਾਪਤ ਅਤੇ ਸਹਿਮਤੀ ਵਾਲੀ ਨੀਤੀ ਰਹੀ ਹੈ। ਰਿਪੋਰਟ ਮੁਤਾਬਕ, ਮਾਰਚ 2024 'ਚ ਟਾਟਾ ਸੰਸ ਦੇ ਬੋਰਡ ਨੇ ਸਰਬਸੰਮਤੀ ਨਾਲ ਕੰਪਨੀ ਨੂੰ ਅਨਲਿਸਟਿਡ ਰੱਖਣ ਦਾ ਫੈਸਲਾ ਕੀਤਾ ਸੀ।