ਬਾਜ਼ਾਰ 'ਚ ਚਾਂਦੀ ਦਾ 'ਤੂਫ਼ਾਨ': ਰਾਤੋ-ਰਾਤ ਬਦਲ ਗਈ ਖੇਡ, ਇੱਕ ਝਟਕੇ 'ਚ ਵਧੇ ਇੰਨੇ ਹਜ਼ਾਰ ਕਿ ਨਿਵੇਸ਼ਕਾਂ ਦੇ ਉੱਡੇ ਹੋਸ਼

Silver Price Today: ਅਮਰੀਕੀ ਰਾਸ਼ਟਰਪਤੀ ਡੋਨਾਲਡ ਟ੍ਰੰਪ ਦੇ ਗਲੋਬਲ ਟੈਰਿਫ ਐਲਾਨ ਤੋਂ ਬਾਅਦ ਕਾਰੋਬਾਰੀ ਹਫ਼ਤੇ ਦੀ ਸ਼ੁਰੂਆਤ ਵਿੱਚ ਚਾਂਦੀ ਵਿੱਚ ਜ਼ਬਰਦਸਤ ਉਛਾਲ ਦੇਖਣ ਨੂੰ ਮਿਲਿਆ। ਨਿਵੇਸ਼ਕਾਂ ਨੂੰ ਹੈਰਾਨ ਕਰਦੇ ਹੋਏ ਚਾਂਦੀ ਦੇ ਭਾਅ ਇੱਕੋ ਦਿਨ ਵਿੱਚ ਲਗਪਗ ₹20,000 ਤੱਕ ਵਧ ਗਏ।

MCX 'ਤੇ ਜਿੱਥੇ ₹13,000 ਤੋਂ ਵੱਧ ਦੀ ਤੇਜ਼ੀ ਦਰਜ ਕੀਤੀ ਗਈ, ਉੱਥੇ ਹੀ ਇੰਡੀਅਨ ਬੁਲੀਅਨ ਜਵੈਲਰਜ਼ ਐਸੋਸੀਏਸ਼ਨ (IBJA) ਦੇ ਅੰਕੜਿਆਂ ਅਨੁਸਾਰ ਚਾਂਦੀ ਲਗਪਗ ₹19,986 ਉਛਲ ਕੇ ਨਵੇਂ ਪੱਧਰ 'ਤੇ ਪਹੁੰਚ ਗਈ।

ਚਾਂਦੀ ਦੇ ਤਾਜ਼ਾ ਭਾਅ ਕੀ ਹਨ?

ਮਲਟੀ ਕਮੋਡਿਟੀ ਐਕਸਚੇਂਜ (MCX) 'ਤੇ 5 ਮਾਰਚ ਦੀ ਡਿਲੀਵਰੀ ਵਾਲੀ ਚਾਂਦੀ ਵਿੱਚ ਅੱਜ 4.65 ਫੀਸਦੀ ਦਾ ਉਛਾਲ ਆਇਆ ਅਤੇ ਕੀਮਤ 11,756 ਰੁਪਏ ਵਧ ਕੇ 2,64,700 ਰੁਪਏ ਪ੍ਰਤੀ ਕਿਲੋਗ੍ਰਾਮ ਹੋ ਗਈ। ਟ੍ਰੇਡਿੰਗ ਦੌਰਾਨ ਇਸ ਦਾ ਉੱਚ ਪੱਧਰ 2,68,875 ਰੁਪਏ ਰਿਹਾ।

ਉੱਥੇ ਹੀ IBJA 'ਤੇ ਸ਼ੁੱਕਰਵਾਰ ਨੂੰ ਚਾਂਦੀ ਦਾ ਭਾਅ 2,45,564 ਰੁਪਏ ਸੀ, ਜੋ ਅੱਜ ਵਧ ਕੇ 2,65,550 ਰੁਪਏ ਪ੍ਰਤੀ ਕਿਲੋਗ੍ਰਾਮ 'ਤੇ ਪਹੁੰਚ ਗਿਆ। ਅੰਤਰਰਾਸ਼ਟਰੀ ਬਾਜ਼ਾਰ ਵਿੱਚ ਵੀ ਚਾਂਦੀ ਦੀ ਕੀਮਤ 86 ਡਾਲਰ ਪ੍ਰਤੀ ਔਂਸ ਦੇ ਪਾਰ ਚਲੀ ਗਈ ਹੈ।

ਅਜੈ ਕੇਡੀਆ ਨੇ ਦੱਸੇ ਉਛਾਲ ਦੇ 2 ਵੱਡੇ ਕਾਰਨ:

ਕੇਡੀਆ ਐਡਵਾਈਜ਼ਰੀ ਦੇ ਡਾਇਰੈਕਟਰ ਅਜੈ ਕੇਡੀਆ ਨੇ ਇਸ ਤੇਜ਼ੀ ਦੇ ਮੁੱਖ ਕਾਰਨ ਦੱਸੇ ਹਨ:

ਐਕਸਪਾਇਰੀ ਦਾ ਅਸਰ: ਚਾਂਦੀ ਦੇ ਵਾਇਦਾ ਕੰਟਰੈਕਟ ਦੀ ਐਕਸਪਾਇਰੀ ਨਜ਼ਦੀਕ ਹੈ। ਐਕਸਪਾਇਰੀ ਦੇ ਸਮੇਂ ਅਕਸਰ 'ਸ਼ਾਰਟ ਕਵਰਿੰਗ' ਹੁੰਦੀ ਹੈ, ਜਿਸ ਨਾਲ ਕੀਮਤਾਂ ਵਿੱਚ ਤੇਜ਼ ਉਛਾਲ ਆਉਂਦਾ ਹੈ।

ਚੀਨ ਦਾ ਲੂਨਰ ਨਿਊ ਈਅਰ: ਚੀਨ ਦੁਨੀਆ ਦਾ ਵੱਡਾ ਕਮੋਡਿਟੀ ਉਪਭੋਗਤਾ ਹੈ। ਛੁੱਟੀਆਂ ਤੋਂ ਬਾਅਦ ਉੱਥੇ ਉਦਯੋਗਿਕ ਮੰਗ ਦੁਬਾਰਾ ਸਰਗਰਮ ਹੋਈ ਹੈ, ਜਿਸ ਨਾਲ ਚਾਂਦੀ ਦੀ ਮੰਗ ਵਧਣ ਦੀ ਉਮੀਦ ਹੈ।