ਅਨਿਲ ਅੰਬਾਨੀ ਨੂੰ ਵੱਡਾ ਝਟਕਾ; ਐੱਲਆਈਸੀ ਨਿਵੇਸ਼ ਧੋਖਾਧੜੀ ’ਚ ਸੀਬੀਆਈ ਨੇ ਕੇਸ ਕੀਤਾ ਦਰਜ, 2,684.57 ਕਰੋੜ ਰੁਪਏ ਦੇ ਘੋਟਾਲੇ ਦਾ ਦੋਸ਼

ਨਵੀਂ ਦਿੱਲੀ (ਪੀਟੀਆਈ): ਸੀਬੀਆਈ ਨੇ ਰਿਲਾਇੰਸ ਕੈਪੀਟਲ ਲਿਮਿਟਡ (ਆਰਕੈਪ), ਇਸ ਦੇ ਸਾਬਕਾ ਚੇਅਰਮੈਨ ਅਨਿਲ ਅੰਬਾਨੀ, ਸਾਬਕਾ ਗਰੁੱਪ ਮੈਨੇਜਿੰਗ ਡਾਇਰੈਕਟਰ ਸਤੀਸ਼ ਸੇਠ, ਅਗਿਆਤ ਸਰਕਾਰੀ ਕਰਮਚਾਰੀਆਂ ਅਤੇ ਹੋਰਾਂ ਖ਼ਿਲਾਫ਼ ਮਾਮਲਾ ਦਰਜ ਕੀਤਾ ਹੈ। ਇਹ ਮਾਮਲਾ ਲਾਈਫ ਇੰਸ਼ੋਰੈਂਸ ਕਾਰਪੋਰੇਸ਼ਨ ਆਫ ਇੰਡੀਆ (ਐਲਆਈਸੀ) ਦੇ ਨਿਵੇਸ਼ ਨਾਲ ਜੁੜੇ ਕਥਿਤ 2,684.57 ਕਰੋੜ ਰੁਪਏ ਦੇ ਘੋਟਾਲੇ ਨਾਲ ਸਬੰਧਿਤ ਹੈ।

ਅਨਿਲ ਅੰਬਾਨੀ ਦੇ ਬੁਲਾਰਾ ਨੇ ਕਿਸੇ ਵੀ ਤਰ੍ਹਾਂ ਦੀ ਗੜਬੜ ਤੋਂ ਇਨਕਾਰ ਕੀਤਾ ਹੈ। ਉਨ੍ਹਾਂ ਕਿਹਾ ਕਿ ਇਹ ਮਾਮਲਾ ਪੂਰੀ ਤਰ੍ਹਾਂ ਰਿਲਾਇੰਸ ਕੈਪੀਟਲ ਲਿਮਿਟਡ (ਆਰਕੈਪ) ਨਾਲ ਜੁੜਿਆ ਹੈ। ਅੰਬਾਨੀ ਨਵੰਬਰ 2021 ਤੱਕ ਸਿਰਫ ਨਾਨ-ਐਗਜ਼ਿਕਿਊਟਿਵ ਡਾਇਰੈਕਟਰ ਅਤੇ ਬੋਰਡ ਦੇ ਚੇਅਰਮੈਨ ਸਨ, ਜਦੋਂ ਰਿਜ਼ਰਵ ਬੈਂਕ ਆਫ ਇੰਡੀਆ ਨੇ ਬੋਰਡ ਨੂੰ ਹਟਾ ਕੇ ਇਕ ਐਡਮਿਨਿਸਟਰੇਟਰ ਨਿਯੁਕਤ ਕੀਤਾ ਸੀ। ਉਨ੍ਹਾਂ ਇਹ ਵੀ ਕਿਹਾ ਕਿ ਅੰਬਾਨੀ ਦੇ ਪਾਸ ਸਾਰੇ ਕਾਨੂੰਨੀ ਅਧਿਕਾਰ ਸੁਰੱਖਿਅਤ ਹਨ।

ਸੀਬੀਆਈ ਦੇ ਅਨੁਸਾਰ, ਐਲਆਈਸੀ ਦਾ ਦੋਸ਼ ਹੈ ਕਿ 12 ਅਪ੍ਰੈਲ 2012 ਅਤੇ 9 ਮਾਰਚ 2018 ਦੇ ਦਰਮਿਆਨ, ਉਸਨੇ ਆਰਕੈਪ ਦੁਆਰਾ ਜਾਰੀ ਕੀਤੇ ਪੰਜ ਨਾਨ-ਕਨਵਰਟਿਬਲ ਡਿਬੇਂਚਰ ਖਰੀਦੇ ਸਨ, ਜਿਨ੍ਹਾਂ ਦੀ ਕੁੱਲ ਕੀਮਤ 3,900 ਕਰੋੜ ਰੁਪਏ ਸੀ। ਇਹ ਨਿਵੇਸ਼ ਆਮ ਕਾਰਪੋਰੇਟ ਉਦੇਸ਼ਾਂ, ਫੰਡ ਦੀ ਲੋੜਾਂ ਅਤੇ ਮੌਜੂਦਾ ਕਰਜ਼ੇ ਨੂੰ ਦੁਬਾਰਾ ਫਾਇਨੈਂਸ ਕਰਨ ਲਈ ਕੀਤੇ ਗਏ ਸਨ।

ਐਲਆਈਸੀ ਨੇ ਦੋਸ਼ ਲਗਾਇਆ ਹੈ ਕਿ ਦੋਸ਼ੀਆਂ ਵਿਅਕਤੀਆਂ ਨੇ ਆਪਰਾਧਿਕ ਸਾਜ਼ਿਸ਼ ਰਚੀ ਅਤੇ ਕਈ ਅਪਰਾਧ ਕੀਤੇ, ਜਿਨ੍ਹਾਂ ਵਿਚ ਧੋਖਾਧੜੀ, ਅਪਰਾਧਿਕ ਵਿਸ਼ਵਾਸਘਾਤ, ਆਪਰਾਧਿਕ ਕਦਾਚਾਰ, ਫੰਡ ਦਾ ਗਲਤ ਇਸਤੇਮਾਲ/ਗਬਨ ਅਤੇ ਖਾਤਿਆਂ ਵਿਚ ਹੇਰਾਫੇਰੀ ਸ਼ਾਮਲ ਹਨ।

ਐਲਆਈਸੀ ਦਾ ਦੋਸ਼ ਹੈ ਕਿ ਦੋਸ਼ੀਆਂ ਨੇ ਗਲਤ ਜਾਣਕਾਰੀ ਦੇ ਕੇ ਉਸਨੂੰ ਆਰਕੈਪ ਵਿਚ ਨਿਵੇਸ਼ ਕਰਨ ਲਈ ਬੇਈਮਾਨੀ ਨਾਲ ਰਾਜ਼ੀ ਕੀਤਾ ਅਤੇ ਧੋਖਾਧੜੀ ਨਾਲ ਉਹ ਫੰਡ ਦੂਜੀ ਜਗ੍ਹਾ ਭੇਜ ਦਿੱਤੇ। ਇਸ ਕਾਰਨ ਐਲਆਈਸੀ ਨੂੰ 2,684.57 ਕਰੋੜ ਰੁਪਏ ਦਾ ਨੁਕਸਾਨ ਹੋਇਆ।